ខណៈដែល វ្លាឌីមៀរ ពូទីន បានជាប់ឆ្នោតជាថ្មីម្តងទៀត ក្នុងការបោះឆ្នោតប្រធានាធិបតី នៃប្រទេសរុស្ស៊ី កាលពីថ្ងៃ ០៤ មិនា ឃើញថា មានមេដឹកនាំលោកខាងលិចជាច្រើន ដែលនៅរួញរានឹងអបអរសាទរចំពោះលោក ខណៈដែលសារពត៌មានលោកខាងលិចក៏តាំងជំហរ រិះគន់ចាស់ដៃផងដែរ។
យ៉ាងណាក្តី ឃើញថា មានកុងសង់ស៊ុសមួយ ដែលរឹងមាំឬយ៉ាងណា មានតែពេលវេលាទេដែលអាចបញ្ជាក់បាន លើចំណុចថា ពូទីន ជាអ្នកស្រោចស្រង់រុស្ស៊ី ហើយសំរាប់ប្រជាជនរុស្ស៊ីប្រមាណ ៦៤% គិតថា ជាមេដឹកនាំកំពូល តែសំរាប់ប្រជាជនរុស្សីា លុះដោយមនោគមន៍វិជ្ជារត់តាមផលប្រយោជន៍អប្បជនាធិបតេយ្យ (ភាគតិចកាន់អំណាច ឬ oligarchs) ពិសេសអ្នកដែលចងខ្លួននឹងផលប្រយោជន៍ជាមួយលោកខាងលិចមួយចំនួន ពិតជាមិនសប្បាយចិត្តនឹងអោយមេដៃរបស់ខ្លួនឡើយ។
ដោយនិយាយថា “បន្ទាប់ពីច្រើនសតវត្សនៃភាពជាខ្ញុំគេ (របស់ប្រជាជនរុស្ស៊ី) ពូទីន បានផ្តល់ នូវវិបុលភាព” លោក Lawrence Solomon នាយកប្រតិបត្តិ Energy Probe របស់ Financial Post តាំងពី ពីរថ្ងៃមុនការបោះឆ្នោតប្រធានាធិបតីរុស្ស៊ី បានសរសេរអត្ថបទខាងក្រោម ដែលស្មេរឃើញមានទឡ្ហីករណ៍រឹងមាំមួយចំនួន សំរាប់ចែកជូកលោកអ្នកអានបានជ្រាប។ ដូចធម្មតរា ស្មេរ បានបន្ថែមពត៌មានយោងមួយចំនួន ដើម្បីជួយជាមូលដ្ឋានក្នុងការយល់ពី ការអះអាងថា វ្លាឌីមៀរ ពូទីន កំពុងក្លាយជាមេដឹកនាំមហិមារបស់រុស្ស៊ី និងពីសភាពការណ៍ នៃប្រទេសមួយដ៏ធំ សម្បូរណ៍ធនធានធម្មជាតិ នៅឆ្ងាយពីយើង តែមានទំនាក់ទំនងក្នុងកំរិតមួយជិតស្និត ក្នុងដំណាក់កាលមួយនៃប្រវត្តិសាស្ត្រ ក៏ដូចជាកំពុងតែបន្តមាននាពេលបច្ចុប្បន្ន ជាមួយកម្ពុជា។
ថ្ងៃអាទិត្យនេះ វ្លាឌីមៀរ ពូទីន នឹងត្រូវជាប់ឆ្នោតជាប្រធានាធិបតីរុស្ស៊ីជាថ្មី ហើយអាចថាក្នុងចំនួនច្រើន ដែលគាត់មិនចាំបាច់ចាត់ចែងការបោះឆ្នោតនោះទេ។ នៅដំណាច់អាណត្តិថ្មីនេះ គឺចប់នៅឆ្នាំ ២០១៦ គាត់នឹងបានបំរើមុខតំណែងជាប្រធានាធិបតី ឬនាយករដ្ឋមន្ត្រីបួនអាណត្តិ ហើយក៏ប្រៀបដូចជា មេដឹកនាំតែមួយគត់របស់រុស្ស៊ី ក្នុងសតវត្សទី ២១។ ក្នុងព្រឹត្តិការណ៍ដែលមិនអាចនឹងកើតមាន ដែលគាត់នឹងជ្រើសយកការចូលនិវត្តន៍ គាត់នឹងធ្វើ ដោយមានការអះអាងថា ជាមេដឹកនាំដ៏មហិមារបស់ប្រទេស ចាប់តាំងពីសម័យស្តេច ត្សារ នៃសតវត្សទី ១៧ ស្តេច ភីធើរ ដ៏មហិមា (Peter the Great) និង ស្តេច កាតេរីន ដ៏មិហមា (Catherine the Great)។
ប្រជាប្រីយ៍ភាពដែលធ្វើអោយគ្រប់គ្នាស្រឡាំងកាំង និងអូសបន្លាយពេលដ៏យូរ របស់ ពូទីន ដូចដែលមានការធានា ក្នុងការស្ទង់សាធារណមតិរុស្ស៊ី និងសហរដ្ឋអាមេរិកដ៏ច្រើន វាមានលើសពីអ្វីដែលគេបានឃើញ នៅក្នុងប្រជាធិបតេយ្យលោកខាងលិច។ ក្រៅពីការធ្លាក់ចុះក្នុងឆ្នាំ ២០១១ ដែលគាត់បានហក់ឡើងមកវិញ អ្នកដែលចូលចិត្ត ពូទីន មិនដែលស្ថិតនៅក្រោម ៦៥% ទេ ហើយជាញឹកញយតែងតែលើសពី ៨០% ផង ហើយអ្នកដែលមិនចូលចិត្តគាត់ ច្រើនតែស្ថិតក្នុងវ័យ ២០ ឆ្នាំ ឬក៏ក្មេងជាងនេះ។ ស្រីៗ ជាពិសេស កើតខ្យល់ដោយសារតែស្ទីលថតរូបបញ្ចេញសាច់ដុំរបស់គាត់ តែអ្នកទាំងនោះមិនមែនស្ថិតក្នុងស្ថានភាពបែបនេះតែឯងទេ។ ពូទីន មានប្រជាប្រីយ៍ភាពជាមួយប្រជាជនរុស្ស៊ីភាគច្រើន ទាំងអ្នកមាន ទាំងអ្នកក្រ ទាំងក្មេង ទាំងចាស់ ជារុស្ស៊ី ឬជនជាតិភាគតិច ក៏ដូចជា ទាំងជាបុរស ទាំងជាស្ត្រី ដោយសារតែមានរឿងរបស់វា។ បន្ទាប់ពីរាប់សតវត្សនៃភាពជាខ្ញុំកញ្ជះគេ និងភាពអត់ឃ្លាន ក្រោមស្តេច ត្សារ ជាច្រើនទសវត្សក្រោយពីការធ្វើផែនការពីថ្នាក់កណ្តាល និងការមិនបានសំរេចដូចបំណង ក្រោមការដឹកនាំរបស់ពួកកុម្មុយនិស្ត និងក្រោយមួយទសវត្សនៃភាពវឹកវរ និងការខ្វះខាត ក្នុងទសវត្សឆ្នាំ ១៩៩០ ពូទីន បានធ្វើអោយមានស្ថេរភាព និងវិបុលភាព។
នៅដំណាច់ឆ្នាំ ២០០៦ ចំណុចកណ្តាលនៃការសោយរាជរបស់គាត់គិតមកដល់សព្វថ្ងៃនេះ គាត់បានធ្វើអោយល្បីឈ្មោះ។ ផលិតផលក្នុងស្រុកសរុបរបស់ប្រទេសរុស្ស៊ី កើនឡើងសឹងតែបីដង លើសពីរយៈពេលបួនឆ្នាំមុន ខណៈដែលធនបំរុងបានកើនជាង ៦ ដង ប្រាក់រូប្ល មានស្ថានភាពរឹងមាំ អតិផរណាត្រូវបានកាត់បន្ថយពាក់កណ្តាល សេដ្ឋកិច្ចកើនឡើងក្នុងម្តុំ ៧% ដែលសឹងតែគ្រប់គ្នាត្រូវបានធ្វើអោយមានស្ថានភាពល្អជាងមុន។ ទោះបីមានការធ្លាក់ចុះថ្មីៗ នេះ ធ្វើអោយប៉ះទង្គិចដល់សេដ្ឋកិច្ចរុស្ស៊ី ដែលពឹងផ្អែកលើថាមពលយ៉ាងខ្លាំងជាពិសេសក៏ ដោយ ពេលនោះផលិតផលក្នុងស្រុកសរុបបានធ្លាក់ចុះ ៨% ក្នុងឆ្នាំ ២០០៩ ប្រទេសរុស្ស៊ីក៏ ឆាប់ងើបឡើងវិញ ហើយសព្វថ្ងៃអួតខ្លួនថា ជាសេដ្ឋកិច្ចកំពុងរីកចំរើនលឿនបំផុតទីបី នៃពិភព លោក។ ដោយនិយាយរឿងទាំងនេះ ចាប់តាំងពី ពូទីន ឡើងកាន់អំណាចនៅដំណាច់ឆ្នាំ ១៩៩៩ ផលិតផលក្នុងស្រុកសរុបគិតជាមនុស្សម្នាក់ៗ កើនឡើងប្រមាណជា ៦ ដង យោងតាមមូលនិធិរូបិយវត្ថុ ហើយប្រាក់ចំណូលសល់ពីការកាត់ពន្ធហើយ ក៏មានកំរិតខ្ពស់បំផុតមិន ធ្លាប់មានដែរ។
ការសំរេចបានខាងសេដ្ឋកិច្ចនោះ ដែលគិតចូលទាំងការរកបានសមាជិកភាពវណ្ណៈខ្ពស់របស់រុស្ស៊ី ជាប្រទេស G8 មួយ ជាហេតុផលគ្រប់គ្រាន់ដើម្បីនឹងបោះឆ្នោតអោយម្តងទៀត ដល់អ្នកណាក៏ដោយ តែ ពូទីន មានការសក្តិសមជាងសំរាប់គាត់ គឺ ការស្តារឡើងវិញមោទនភាពជាតិរុស្ស៊ី។ ក្រោយពីការដួលរលំនៃចក្រភពសូវៀត ពួករុស្ស៊ី បានជួបនឹងក្តីអាម៉ាស់ ពីការបាត់បង់ ស្ថានភាពជាមហាអំណាចកំពូល ក៏ដូចជា រដ្ឋរណបជាច្រើន ហើយក្លាយជាប្រទេសខូចទឹកចិត្ត ដែលលោកខាងលិចបង្វិលបានតាមតែអំពើចិត្ត។
លែងអញ្ចឹងទៀតហើយ។ ក្រោមការដឹកនាំរបស់ពូទីន ជាថ្មីម្តងទៀត រុស្ស៊ី បង្ហាញសាច់ដុំ ដំអោយសំប៉ែតនូវការបះបោរផ្តាច់ខ្លួននៅ ឈៀឆ្ញៀ ឈ្លានពានប្រទេស ហ្សេអ័រហ្ស៊ី ដាក់ប្រទេសអ៊ូក្រែន អតីតរដ្ឋរណបអោយនៅមួយកន្លែង បង្ខំសហរដ្ឋអាមេរិកអោយបោះបង់ផែនការដាក់តាំងប្រព័ន្ធការពារទប់ទល់កាំជ្រួច នៅប៉ូឡូញ និងសាធារណរដ្ឋឆេក និងបង្ក្រាបផែនការសហរដ្ឋអាមេរិក សំរាប់ប្រទេសស៊ីរី តាមរយៈការបោះឆ្នោតវ៉េតូនៅសហប្រជាជាតិ និងដោយការតាំងនាវាដឹកយន្តហោះរបស់រុស្ស៊ី នៅនឹងច្រាំងសមុទ្រនៃប្រទេសស៊ីរី។ អ្វីដែលប្រទេសលោកខាងលិច មើលឃើញថា ជាការសម្លុត ឬ សូម្បីតែ “គួរអោយស្អប់” ផងនោះ បើដកស្រង់ការរៀបរាប់ពីចរិតលក្ខណៈរបស់ ហៀឡារី គ្លីនតុន ពីការបោះឆ្នោតវ៉េតូរបស់រុស្ស៊ី សាធារណ មតិរុស្ស៊ី ជាទូទៅឃើញថា វាជា ការគួរអោយសរសើ និងប្រកបដោយកិត្តិយសទៅវិញទេ។ ខណៈដែលរដ្ឋបាលអូបាម៉ា កំពុងពិចារណាពីការពង្រួញយ៉ាងខ្លាំងនូវចំណាយយោធា ក្នុងនោះ ការកាត់បន្ថយ ៨០% នូវគំនរអាវុធនុយក្លេអ៊ែរដែលបានតាំង ពូទីន កំពុងតែឈរឈ្មោះ ស្វែងរកការជាប់ឆ្នោតជាថ្មី ជាមួយនឹងការសន្យាពង្រីកសមត្ថភាពយោធារបស់រុស្ស៊ី ក្នុងនោះមានទាំងអាវុធនុយក្លេអ៊ែររបស់ខ្លួនផង។
ចុះទីបំផុតវាយ៉ាងម៉េច? ទោះបីជាមានការសន្មត់ពីរបបរបស់គាត់ថា មិនជាគួរអោយមានកិត្តិយសក៏ដោយ ដូចជាការរីករាលដាលនៃអំពើពុករលួយ និងភាពមានជីវិតមិនយូរនៃពួកអ្នករាយការណ៍ពត៌មានដែលម៉ឺងម៉ាត់ហួសពេក មានការរំពឹងថា ពូទីន នឹងឈ្នះហោចណាស់ ៦៦% នៃសន្លឹកឆ្នោត ក្នុងការបោះឆ្នោតនាថ្ងៃអាទិត្យ ដោយនាំមុខប្រមាណជា ៥០ ភាគរយ លើគូប្រជែងនៅកៀកនឹងគាត់បំផុត ដែលស្ថិតនៅប្រមាណជា ១៥% ប៉ុណ្ណោះ។
រួមជាមួយស្ថានភាពដែលពិភពលោកចេញផុតពីការធ្លាក់ចុះខាងសេដ្ឋកិច្ច និងត្រូវការប្រេង និងឧស្ម័នកាន់តែច្រើនពីរុស្ស៊ី ដែលមានទំហំដល់ទៅជិតពីរភាគបី នៃផលទុនពីការនាំចេញរបស់រុស្ស៊ី ពាក់កណ្តាល ឬក៏លើសនេះ ក្នុងថវិការបស់រដ្ឋាភិបាល ហើយក៏ប្រមាណជា ៣០% នៃផលិតផលក្នុងស្រុកសរុបរបស់ប្រទេស វាជាការងាយណាស់ដើម្បីនឹងប្រមើលពីការបន្តទៅទៀតនៃវិបុលកម្មក្នុងអាណត្តិទីបួនរបស់ ពូទីន។ វាក៏ជាការងាយ ដើម្បីនឹងប្រមើលពីការដួលរលំសេដ្ឋកិច្ចរបស់រុស្ស៊ីបន្ទាប់ពីនោះ ក្រោយពីការដួលរលំនៃតម្លៃប្រេង និងឧស្ម័ន។
ទោះបីថា ស្ថានភាពទូទៅនៃប្រទេសរុស្ស៊ី បានល្អឡើងហច្រើនក្នុងទសវត្សកន្លងទៅក៏ដោយ ប្រទេសនៅមិនទាន់អស់រឿងរញ៉ីរញ៉ៃទេ។ ជាការសំខាន់ណាស់ដែលត្រូវរំលឹកពី ទំនាញស្ថានការណ៍រុស្ស៊ី ពេលដែល ពូទីន ឡើងកាន់អំនាច ដែលតាមការលើកឡើងរបស់អ្នកវិភាគនយោបាយរុស្ស៊ី គាត់ ត្រូវទទួលមរតក៌មួយ ដែល ពួកសេរីនិយម បាន លក់ប្រទេសទាញយកចំណេញពីធនធានធម្មជាតិដាក់ចូលហោប៉ៅ ដែលមិនធ្លាប់មាន ក្នុងខណៈដែលប្រទេសកំពុងតែងើបឡើងពីការស្រុតចុះដោយរបប កុម្មុយនិស្តនិយម។
និយាយពីពួកសេរីនិយមរុស្ស៊ី ឃើញថាមានបក្សសេរីនិយមមួយចំនួន ដែលមានការគាំទ្រ និងជាពិសេសមានតំណាងនៅក្នុងសភា។ បិតានៃលទ្ធិសេរីនិយមរុស្ស៊ី ត្រូវបានភាគច្រើនគិតថា គឺ Mikhail Speransky (មករា ១៧៧២ – កុម្ភៈ ១៨៣៩) ហើយដែលគំនិតរបស់គាត់ត្រូវបានពួកមូលវិវដ្តនិយមរុស្ស៊ីជណាន់សតវត្សទី ១៩ លើកមកបកស្រាយ។ បក្សប្រជាធិបតេយ្យសេរីរុស្ស៊ី មិនត្រូវបានប្រភពឯកសារលោកខាងលិចចាត់ទុកថាជា ពួកសេរីនិយមទេ តែជា ពួក ជាតិនិយម ស្តាំនិយម និងប្រជានិយម ដោយសារតែសំអាងទៅលើការអះអាងរបស់បក្សនេះ ថា “ខ្លួនជាពួកកណ្តាលនិយម និងកែទម្រង់”។
ដោយអះអាងថា “វណ្ណៈបញ្ញាវ័ន្តសេរីនិយមរុស្ស៊ី ក្លាយជាជនរងគ្រោះនៃឧត្តមគតិរបស់ខ្លួន” លោក Boris Kapustin នៃបណ្ឌិតសភាវិទ្យាសាស្ត្ររុស្ស៊ី និយាយថា សេរីនិយមរុស្ស៊ីកំពុង ស្ថិតក្នុងវិបត្តិ ហើយបើនិយាយជានយោបាយវិញ សឹងតែថា លែងមានអត្ថិភាពទៅហើយ។ ពួកនេះ មិនមានតំណាងក្នុងសភាទៀតទេ ដោយបាត់ខ្លួនពីការយកចិត្តទុកដាក់របស់សាធារណៈមតិរុស្ស៊ីទៅហើយ សូម្បីតែក្នុងចំណោមបញ្ញវ័ន្តរុស្ស៊ីផង។ ពាក្យថា សេរីនិយមរុស្ស៊ី សំដៅទៅដល់ការអនុវត្តជាកើស្តែង ឬភ្នាក់ងារនយោបាយទាំងឡាយដែលប្រកាន់យកគំនិតសេរីនិយម ទាំងសេរីនិយមថ្មី ទាំងសេរីនិយមសង្គម ដូចដែលបានជំរាបជូនខាងលើ។ បើយោងតាមការវិភាគនេះ ឃើញថា ការដែល ពូទីន ទទួលបានអាណត្តិប្រធានាធិបតីថ្មី មិនដូចជា ហេតុផលទាំងឡាយ ដែលសារពត៌មាន ក៏ដូចជាមេដឹកនាំលោកខាងលិចមួយចំនួន អះអាងទេ។
ដូចបានអះអាងរួចហើយដែរ កំហុសក្នុងដំណាក់កាលនៃការដឹកនាំដណ្តើមអំណាចពី ហ្គ័របាឆូវ ត្រូវបាន ពូទីន កែសម្រួល ពេលដែល គាត់ដេញពួកអប្បជនាធិបតេយ្យ ចេញពីវិមានក្រឹមឡាំង ពេលដែលឡើងកាន់អំណាច។ សារៈសំខាន់ ត្រង់នេះឯង ដែលមានមនុស្សជាច្រើនបានភ្លេចវា។ បើ មិនបានស្រាយសំអាតបញ្ហាទាំងនោះទេ រុស្ស៊ីមិនអាចមានថ្ងៃនេះទេ ហើយក៏មិនអាចល្អជាងមុនបានដែរ។ អ្នកវិភាគរុស្ស៊ីមួយចំនួន គិតថា អ្នកទាំងឡាយណាដែលច្រានចោលជ័យជំនះរបស់ពូទីន លើពូក អប្បជនាធិបតេយ្យ ពិតជាមិនអាចនឹងដឹងបានទេថា តើមេដឹកនាំពិភពលោកប៉ុន្មាន ដែលបានទទួលជោគជ័យក្នុងការប៉ះទង្គិចជាមួយនឹងវណ្ណៈធុរៈកិច្ច ក្នុងពេលថ្មីៗ នេះ។ ចម្លើយដ៏ងាយ ដូចដែលគេនិយាយ គឺ “គ្មានម្នាក់ទេ”។
រហូតមកទល់គ្នានឹងពេលថ្មីៗ នេះ សហរដ្ឋអាមេរិក គឺជាអ្នកនាំចូលធំបំផុតនូវឧស្ម័នធម្មជាតិ ក្នុងពិភពលោក។ ពេលនេះ សហរដ្ឋអាមេរិក ជាអ្នកនាំចេញឧស្ម័នធម្មជាតិសំខាន់មួយ អាស្រ័យដោយមានបច្ចេកវិទ្យាថ្មី ក្នុងការទាញយកឧស្ម័ន ដែលធ្វើអោយមានការផ្គត់ផ្គង់បានយ៉ាងធំទូលាយ។ សហរដ្ឋអាមេរិក នៅតែជាអ្នកនាំចូលប្រេងដ៏ធំបំផុត។ សហរដ្ឋអាមេរិក អាចនឹងក្លាយជាប្រទេសនាំប្រេងចេញមួយ នៅពេលឆាប់ខាងមុខ អាស្រ័យដោយបច្ចេកវិទ្យាថ្មីក្នុងការទាញយកប្រេង ដែលអាចនឹងធ្វើអោយសហរដ្ឋអាមេរិក ក្លាយជាប្រទេសផលិតប្រេងធំបំផុតលើពិភពលោកបាន។
ពេលនេះជាប្រទេសនាំចូលយ៉ាងសំខាន់នូវប្រេង និងឧស្ម័ន ចិនមានសក្តានុពលធំបំផុតទីពីរ លើពិភពលោក សំរាប់ការទាញយកអ៊ីដ្រូកាបោន (ជាធនធានថាមពលសំខាន់បំផុតមួយនៃផែនដីប្រើជាឥន្ធនៈ ហើយបើជារូបធាតុរឹង មានទំរង់ជា asphalt ឬកៅស៊ូចាក់ថ្នល់) ដែលពេលនេះកំពុងអភិវឌ្ឍន៍។ ប្រទេសនានានៅអឺរ៉ុប ដូចជា ប៉ូឡូញ អ៊ូក្រែន និងអង់គ្លេស ក៏មានអាងបំរុងដ៏ធំនៃអ៊ីដ្រូការបោន ដែលអាញទាញយកបានដែរ ធ្វើអោយអឺរ៉ុបទាំងមូលមានក្តីសង្ឃឹម ពីការផ្គត់ផ្គង់ខ្លួនដោយខ្លួនឯងក្នុងផ្នែកថាមពល ជាពិសេស ដោយសារប្រទេសអឺរ៉ុបទាំងឡាយនៅនឹងសមុទ្រម៉េឌីទែរ៉ាណេ ទើបតែចាប់ផ្តើមធ្វើអាជីវកម្មស្រទាប់ដ៏ធំនៃប្រេង និងឧស្ម័នធម្មតា ដែលដេកនៅក្រោមបាតសមុទ្រ។ ប្រភពថ្មី និងធំៗ នៃឧស្ម័ន និងប្រេង នឹងជន់ជោរចូលទីផ្សារអន្តរជាតិ ហើយក៏សកម្មភាពធ្វើអោយមានសម្ពាធលើប្រាក់ចំណូល ដែលសេដ្ឋកិច្ចរុស្ស៊ីពេលនេះកំពុងអាស្រ័យលើ ខណៈដែលក៏កំពុងតែមានការរកឃើញថ្មី សំខាន់ៗ នូវប្រេង និងឧស្ម័ន នៅអាហ្វ្រិក និងអាមេរិកខាងត្បូង។
រូបមន្តរបស់ពូទីន សំរាប់ជោគជ័យសេដ្ឋកិច្ច មិនខុសគ្នាពី ស្តេច ភីធើ មហិមា និង កាតេរីន មហិមា ទេ ដែល នាំចូលបច្ចេកវិទ្យាពីលោកខាងលិច មកអភិវឌ្ឍន៍វត្ថុធាតុដើមរបស់រុស្ស៊ី សំរាប់ការនាំចេញ ភាគច្រើនបំផុត ក្រោមការគៀបយ៉ាងតឹងនៃការត្រួតត្រារបស់រដ្ឋរុស្ស៊ី។ ទាំងហ្វូងស្តេច ត្សារ នាសតវត្សទី ១៨ ទាំងអ្នកបន្តវេនក្រោយៗ មក មិនបានរំដោះសេដ្ឋកិច្ចរុស្ស៊ី ទេ នៅតែទុកអោយសេដ្ឋកិច្ចនេះអន់ថយ និងទីបំផុតគឺងាយរងគ្រោះ ទោះបីថា រុស្ស៊ី មានធនធានធម្មជាតិដ៏សន្ធឹកសន្ធាប់ក៏ដោយ។ ប្រទេសរុស្ស៊ី របស់ ពូទីន ក៏នឹងមានជោគវាសនាដូចគ្នាមិនខាន បើសិនជានៅក្នុងអាណត្តិដែលសេសសល់របស់គាត់ៗ បន្តដើរតាមដាននៃអ្នកកាន់អំណាច (រុស្ស៊ី) មុនគាត់។
ដូចបានជំរាបពីខាងដើម សហរដ្ឋអាមេរិក អបអរសាទរប្រជាជនរុស្ស៊ី ពីការបញ្ចប់នូវការបោះឆ្នោតប្រធានាធិបតី តែ មិនអបអរចំពោះ ពូទីន ជាបុគ្គលទេ។ នាយករដ្ឋមន្ត្រីអង់គ្លេស និយាយជាមួយ ពូទីន តាមទូរស័ព្ទ ពី “ការកសាងទំនាក់ទំនងអោយរឹងមាំ” ទោះបីមានការមិនចុះសំរុងគ្នា និងចំនុចគួរអោយព្រួយបារម្ភក៏ដោយ តែក៏មិនបានជូនពរប្រធានាធិបតីជាប់ឆ្នោតនេះផងទេ។ ដូចគ្នាដែរ Catherine Ashton ប្រធានគោលនយោបាយសហភាពអឺរ៉ុប ប្រកាសដឹងលឺពីលទ្ធផលបថមនៃការបោះឆ្នោត និងជាជោគជ័យយ៉ាងច្បាស់របស់ វ្លាឌីមៀរ ពូទីន តែក៏មិនអបអរដោយផ្ទាល់ជាបុគ្គល ចំពោះប្រធានាធិបតី ក្លាយជា នាយករដ្ឋមន្ត្រី និងក្លាយជាប្រធានាធិបតីម្តងទៀត ពីជោគជ័យរបស់គាត់ដែរ។
យ៉ាងណាក្តី មានប្រតិកម្មយ៉ាងកក់ក្តៅពីដៃគូសំខាន់បំផុតមួយ គឺប្រទេសអាឡឺម៉ង់។ អធិការបតី Angela Merkel បានអបអរសាទរ ពូទីន និងធានាអះអាងនឹងគាត់ថា លោកស្រីនឹងបន្តអភិវឌ្ឍទំនាក់ទំនងទ្វេភាគីរវាង អាឡឺម៉ង់ និងរុស្ស៊ី។ ប្រធានាធិបតីបារាំង អបអរ វ្លាឌីមៀរ ពូទីន និងសំដែងក្តីសង្ឃឹមសំរាប់ការធ្វើអោយមានកិច្ចសហប្រតិបត្តិការស្ថាបនា រវាង បារាំង និងរុស្ស៊ី។ ក្រៅពីនេះ មេដឹកនាំនៃរដ្ឋឯករាជ្យក្នុង Commonwealth ប្រធានាធិបតី អ៊ីរ៉ង់ ស៊ីរី វ៉េណេហ្ស៊ូអេឡា ចិន និងជប៉ុន សុទ្ធតែបានអបអរដល់ជ័យជំនះរបស់ វ្លាឌីមៀរ ពូទីន។ លោកអ្នកពិតជាគិតហើយមែនទេ ថាប្រទេសតាំងនេះ កំពុងតែមានទំនាក់ទំនងជិតស្និតជាមួយរុស្ស៊ី ទាំងលើវិស័យការទូត វិស័យសេដ្ឋកិច្ច ធុរៈកិច្ច យោធា និងនយោបាយ។ ដូចនេះ មិនមានអ្វីត្រូវឆ្ងល់ទេ។
យ៉ាងណាក្តី បទពិសោធន៍រុស្ស៊ីមួយនេះបង្ហាញ ប្រជាជនរុស្ស៊ី ភាគច្រើន បន្ទាប់ពីវិបត្តិមនោគមន៍វិជ្ជា នយោបាយ និងសេដ្ឋកិច្ច ទីបំផុត បានប្រមូលផ្តុំគ្នាជាថ្មីឡើងវិញ សម្លឹងឃើញយ៉ាងច្បាស់ថា មិនមានអ្វីប្រសើរជាង មេដឹកនាំដែលបានផ្តល់នូវអ្វី ដែលពិមុនមិនធ្លាប់មាន ទាំងក្នុងកំរិតបុគ្គល និងកំរិតជាតិនោះឡើយ។ គងថ្ងាសបន្តិច តើការនិយាយអំពី ភាពជាខ្ញុំគេ និងក្រីក្រ នៅរុស្ស៊ី ដែល ពូទីន បានឈូសចោល វាមានភាពស្រដៀងគ្នាអ្វីទេ ទៅនឹងភាពក្រីក្រ ដែលកម្ពុជាធ្លាប់ជួបប្រទះ ក្នុងប្រវត្តិសាស្ត្រទាំងបុរាណ ទាំងសម័យ? បើនៅ រុស្ស៊ី ស្ថានភាពទាំងនោះត្រូវបានធ្វើអោយល្អឡើង ហើយប្រជាជនផ្តល់នូវការគាំទ្រ ចុះមានហេតុផលអ្វីដែលថា មេដឹកនាំប្រទេសដ៏ទៃ ក្នុងនោះ មានទាំងកម្ពុជាផង មិនអាចទទួលនូវការគាំទ្រដូចគ្នានេះបាន? មកដល់នេះ យើងសរុបទាំងអស់គ្នាថា វ្លាឌីមៀរ ពូទីន ឆ្នើម ឬមហិមា គឺជាការសំរេចចិត្តតែមួយគត់ដោយប្រជាជនរុស្ស៊ី៕
ហៀល វែលឌី ថ្ងៃ/០៧ មិនា ២០១២
