ហៀល វែលឌី
យោងតាមទីភ្នាក់ងារសារពត៌មានរុស្ស៊ី ណូវ៉ូស្ទី គណៈបក្សរុស្ស៊ីរួបរួម (United Russia party/UR) ដែលគាំទ្រ វ្លាឌីមៀរ ពូទីន ដណ្តើមបានអាសនៈចំនួន ២៣៨ នៅក្នុងសភាឌូម៉ា ក្នុងការបោះឆ្នោតកាលពីថ្ងៃអាទិត្យ ដែលជាភាគច្រើនដាច់ខាតនៅក្នុងសភាជាន់ទាប ដែលមានអាសនៈ ៤៥០ និងគ្រប់គ្រាន់ដើម្បីនឹងធានាការកែទំរង់សេដ្ឋកិច្ចដោយម្នាក់ឯងបាន។ ក្នុងទស្សនៈនៃសារពត៌មានរុស្ស៊ីមួយនេះ បក្សរុស្ស៊ីរួបរួម នឹងត្រូវតែរៀបចំអោយមានជាសម្ព័ន្ធភាព ដើម្បីនឹងគៀងគរសម្លេងឆ្នោតចាំបាច់ ដើម្បីនឹងធ្វើវិសោធនកម្មរដ្ឋធម្មនុញ្ញ។ ក៏ប៉ុន្តែ ដូចលោកអ្នកអាន បានជ្រាប និងឃើញតាមកញ្ចក់ទូរទស្សន៍ពីលោកខាងលិច ប្រជាជនរុស្ស៊ី ជាច្រើនបានធ្វើ បាតុកម្មប្រឆាំងនឹងលទ្ធផលឆ្នោត ដោយមានការគាំពារពីប្រព័ន្ធឃោសនាលោកខាងលិចថា “មានការក្លែងបន្លំ” ឬ “មិនយុត្តិធម៌។
សូមជំរាបលោកអ្នកអានថា បក្សរុស្ស៊ីរួបរួម មានសមាជិកជាង ២ លាននាក់ ជាមហាយក្សនយោបាយបង្កើតកាលពីថ្ងៃ ០១ ធ្នូ ឆ្នាំ ២០០១ ដែលទទួលបានជ័យជំនះភ្លូកទឹកភ្លូកដី ក្នុងការបោះឆ្នោតកាលពីឆ្នាំ ២០០៧ ដោយបានអាសនៈដល់ទៅ ៣១៥ ក្នុងចំណោម ៤៥០ អាសនៈ ក្នុងសភាថ្នាក់ទាប។ លោក ពូទីន ជាមេដឹកនាំបក្ស ថ្វីបើលោកមិនមែនជាសមាជិកបក្សក៏ដោយ។ បក្សនេះមានកម្មវិធីនយោបាយ កសាងរុស្ស៊ី អោយទៅជាមហាអំណាចធំមួយ និងឯករាជ ក្នុងពិភពលោកពហុប៉ូល ដោយធ្វើការកែទំរង់សន្សឹមៗ ជំរុញការអភិវឌ្ឍសេដ្ឋកិច្ច ក៏ដូចជាការពារជាតិ ដោយផ្អែកលើស្ថេរភាពនយោបាយរបស់ប្រទេស។
បក្សកុម្មុយនិស្ត បង្កើតនៅឆ្នាំ ១៩៩០ ជាផ្នែកមួយនៃអតីតបក្សកុម្មុយនិស្តសហភាពសូវៀត ជាកម្លាំងប្រឆាំងធំបំផុតទីពីរនៅរុស្ស៊ី មានសមាជិកប្រមាណ ១៥៣០០ នាក់ ភាគច្រើនជាមនុស្សវ័យចាស់ ដែលនៅនឹកស្រណោះពីសម័យសូវៀត។ ក្រៅពីមានគោលដៅបង្កើនសោធន និងប្រាក់កំរៃ បក្សអំពាវននាវអោយមានតួនាទីកានើតែរឹងមាំរបស់រដ្ឋ នៅក្នុងមណ្ឌលនយោបាយ សេដ្ឋកិច្ច និងសង្គម។ បក្ស ប្រជាធិបតេយ្យសេរី បង្កើតកាលពីឆ្នាំ ១៩៨៩ មានសមាជិក ២០០០០០ នាក់ ជាបក្សជាតិនិយមរុស្ស៊ីមួយ។ បក្ស រុស្ស៊ីត្រឹមត្រូវ បង្កើតកាលពីឆ្នាំ ២០០៦ ស្នើអោយមានការបង្កើនប្រាក់សោធន និងកំរៃ ដោយយកពីកូនជ្រូកនៃប្រាក់ចំណូល ប្រេង និងភ្ជាប់សារសំខាន់ទៅនឹងការការពារបរិស្ថាន។
ថយអ្នកគាំទ្រ ១ លាននាក់ តែនៅតែជាភាគច្រើនក្នុង ឌូម៉ា
នៅក្នុងសមរភូមិប្រជាធិបតេយ្យកាលពីថ្ងៃអាទិត្យទី ៤ ធ្នូ គណៈបក្សកុម្មុយនិស្តរុស្ស៊ី (CPR) បានទទួលតែ ៩២ អាសនៈទេ បក្ស រុស្ស៊ីត្រឹមត្រូវ (A Just Russia) បានទទួល ៦៤ អាសនៈ និងបក្សប្រជាធិបតេយ្យសេរី (LDPR) បានទទួល ៥៦ អាសនៈ ឬត្រូវជា ២១២ សម្លេងក្នុងសភាឌូម៉ា លើសពី ១៥០ អាសនៈចាំបាច់ ដើម្បីនឹងរាំងស្កាត់ការដូរផ្លាស់ណាមួយនៃរដ្ឋធម្មនុញ្ញ ដែលទាមទារអោយមានសម្លេងពីរភាគបី។
យោងតាមបទពិសោធន៍នាពេលថ្មីៗ នេះ បានបង្ហាញថា គណៈបក្សប្រឆាំងទាំងអស់ នឹងរួបរួមគ្នាលើករណីតិចតួចណាស់។ ពិសេសនៅពេលដែលសភាទីក្រុងមូស្គូ កាលពីខែ តុលា ឆ្នាំ ២០០៩ ដែលជាទីក្រុងដែលមានចំរុះភាពនយោបាយបំផុតនៅប្រទេសរុស្ស៊ី ប្រែក្លាយជាសភាមួយដែលភាគច្រើនបំផុតជាសមាជិកគណៈបក្សរុស្ស៊ីរួបរួម។ ណូវ៉ូស្ទី គិតថា តាមពិតទៅ គណៈបក្សរុស្ស៊ីរួបរួម អាចនឹងស្វែងរកបានដៃគូដោយងាយនៅក្នុងបញ្ហាសេដ្ឋកិច្ច សង្គម និងបញ្ហានានា ដែលមិនមានការពាក់ព័ន្ធទៅនឹងអាយុជីវិតរបស់បក្ស។ ហើយបើយោងទៅលើភាគច្រើនដែលបក្សបានទទួល ក៏អាចថាមិនទាំងចាំបាច់គិតផង។
លោក Igor Bunin ប្រធានមជ្ឈមណ្ឌលបច្ចេកវិទ្យានយោបាយ នៅប្រទេសរុស្ស៊ី និយាយថា “សភាឌូម៉ា ពិនិត្យសេចក្តីស្នើច្បាប់ធម្មនុញ្ញម្តងក្នុងមួយឆ្នាំ ម្តងក្នុងរយៈពេល ៦ ខែ។ ភាគច្រើនដាច់ខាត ដូចជា ២៣៨ អាសនៈ វាគ្រប់គ្រាន់ដើម្បីនឹងឆ្លងច្បាប់ធំៗ ថ្មី ក្នុងគោលដៅរុះ រើអ្វីដែលសេសសល់ពីប្រព័ន្ធសង្គម អប់រំ និងសុខភាពកាលពីជំនាន់សូវៀត” យ៉ាងណាក្តី លោកគិតថា ការដូរផ្លាស់ជាដុំកំភួនណាមួយ នឹងមិនអាចកើតមានទេនៅក្នុងរយៈពេលប៉ុន្មានខែខាងមុខ។
ហេតុផលមួយដែល Bunin យកមកសំអាងគឺ នៅខែមិនា ពូទីន នឹងឈរឈ្មោះប្រជែងតំណែងប្រធានាធិបតី ហើយគាត់ត្រូវការអោយជាប់នៅក្នុងជុំទីមួយតែម្តង ដូចនេះ ពូទីន ពិតជាមិនស្វះស្វែងធ្វើអោយមណ្ឌលអភិរក្សសំខាន់ មានការខឹងសម្បារមុនការបោះឆ្នោតប្រធានាធិបតីទេ។ មណ្ឌលអភិរក្ស ជាការនិយាយសំដៅទៅប្រជាពលរដ្ឋរុស្ស៊ី ដែលមើលទូរទស្សន៍ ជាជាងការប្រើអាំងទែរណែត ហើយជាញឹកញយរស់នៅដោយពឹងផ្អែកលើអ្វីដែលនៅសេសសល់ពីប្រព័ន្ធចែកចាយរបស់អតីតសហភាពសូវៀត។ ក្នុងពេលជាមួយគ្នា ផែនការ និគំនិតសេដ្ឋកិច្ចសំខាន់ៗ ដែលមាននៅក្នុងឯកសារនៃក្រុមការងារ យុទ្ធសាស្ត្រ ២០២០ ហាក់មានការបើកទស្សនៈ ហើយរាប់ចូលនូវវិធានការណ៍មិនប្រជាប្រីយ៍ៗ មួយចំនួន ដូចជា ការកែទំរង់ប្រព័ន្ធបៀវត្ស ដើម្បីផ្តល់អោយមានការចូលពាក់ព័ន្ធច្រើនឡើងនូវនិវត្តន៍ជនក្នុងសេដ្ឋកិច្ច ក៏ដូចជាមុខសញ្ញាត្រូវផ្តល់ជំនួយសង្គមពីថវិកាជាតិ។
អ្នកវិភាគនយោបាយរុស្ស៊ី Stanislav Belkovsky គិតថា យូរ ឬក៏ឆាប់ គំនិតទាំងនេះនឹងត្រូវបានកែប្រែទៅជាច្បាប់ ដោយសភាឌូម៉ាថ្មី បើទោះជាបក្សនយោបាយទាំងអស់ មានការនិយាយអីចេះអីចុះក្នុងកម្មវិធីនយោបាយរបស់ខ្លួនតែរៀងៗ ខ្លួនយ៉ាងណាក៏ដោយ។ ថ្វីបើវាអីដឹងក៏ពិតមែន ក៏ប្រៀបនឹងឆ្នាំ ២០០៧ បក្សរុស្ស៊ីរួបរួម ក៏ថយល្បឿនរបស់ខ្លួនដែរ ព្រោះនៅពេលនោះ បក្សបានទទួលការគាំទ្រពីអ្នកបោះឆ្នោត ៤៥ លាននាក់ ហើយដែលការបោះឆ្នោតកាលពីថ្ងៃអាទិត្យកន្លងទៅនេះអ្នកបោះឆ្នោតគាំទ្រ ១០ លានបានដូរចិត្តទៅហើយ។ វាជាតក្កវិជ្ជាមួយជៀសមិនផុត ដែលអ្នកបោះឆ្នោតរំពឹងចង់បានការដូរផ្លាស់ពីថ្នាក់កំពូលរបស់បក្ស។
អ្នកជំនាញរុស្ស៊ីគិតថា បើសិនជា បក្សរុស្ស៊ីរួបរួម ត្រូវការអោយមានសម្ព័ន្ធភាព ជាការដែលសឹងតែពិតហើយថា បក្សប្រជាធិបតេយ្យសេរី នឹងត្រូវបានជ្រើសរើសយកជាដៃគូ ទោះបីថាលទ្ធភាពនៃការធ្វើសម្ព័ន្ធភាពជាមួយបក្សណាមួយក្នុងចំណោមបក្សពីរទៀត គឺ រុស្ស៊ីត្រឹមត្រូវ (AJR) និងសូម្បីតែបក្សកុម្មុយនិស្តផង ក៏មិនអាចទាត់ចោលបានដែរ។ មានការគិតជាទូទៅថា សម្ព័ន្ធភាពប្រឆាំងនឹងលោកខាងលិច អាចនឹងមានកំរិតខ្ពស់នៅក្នុងកិច្ចការពាក់ព័ន្ធនឹងគោលនយោបាយការបរទេស ឯ ការរៀបចំនយោបាយក្នុងស្រុក បក្សរុស្ស៊ីរួបរួមកំពុងតែបាត់បង់តួនាទីរបស់ខ្លួនដែលមានពីមុន ជាបច្ច័យនៃការបាត់បង់នូវភាគច្រើនក្នុងសភានោះឯង។
បោះឆ្នោតអោយ រុស្ស៊ីរួបរួម គឺបោះឆ្នោតអោយ ពូទីន
លោក Matthew Rojansky អ្នកវិភាគនៃវិទ្យាស្ថាន Carnegie Endowment សំរាប់សន្តិភាពអន្តរជាតិ (Carnegie Endowment for International Peace/CEIP) មានយោបល់មុនថ្ងៃបោះឆ្នោតនៅរុស្ស៊ីថា ការបោះឆ្នោតសភាឌូម៉ា គឺជាការសាកល្បងដ៏សំខាន់មួយនូវកម្លាំង និងភាពស្របច្បាប់នៃបក្សរុស្ស៊ីរួបរួម នៅមុនការបោះឆ្នោតប្រធានាធិបតីនាខែមិនា ឆ្នាំ ២០១២ ដែលលោកពូទីន វ្លាឌីមៀរ អាចនឹងឈរឈ្មោះ។ លោកបានពន្យល់ថា សេដ្ឋកិច្ចគឺជាបញ្ហាសំខាន់បំផុតសំរាប់អ្នកបោះឆ្នោត នៅក្នុងប្រទេសមួយដែលកំពុងតែតយុទ្ធនៅឡើយ ដើម្បីនឹងបានចេញផុតពីវិបត្តិហិរញ្ញវត្ថុ។
មិនខុសទេ ការបោះឆ្នោតសភាឌូម៉ា ឬសភាថ្នាក់ក្រោម គឺជាការបោះឆ្នោតដោយប្រជាជនតែមួយគត់ ពីព្រោះ ពូទីន បានប្តូរសភាថ្នាក់លើ ឬព្រឹទ្ធសភាអោយទៅជាសភាដែលទទួលការតែងតាំងពីប្រធានាធិបតីទៅហើយ។ កាលពីឆ្នាំ ២០០៧ បក្សគាំទ្រលោក ពូទីន ដណ្តើមបានដល់ទៅ ៦០% នៃសម្លេងឆ្នោតឯណោះ ហើយចំនួនប្រជាជនចេញទៅបោះឆ្នោតក៏មានប្រមាណជា ៦០% ដែរ។ លើកនេះ ថ្វីបើ ពូទីន មិនមានឈ្មោះនៅក្នុងបញ្ជីបោះឆ្នោតរបស់បក្សរុស្ស៊ីរួបរួម ក៏ដោយ គាត់ជាអ្នកកាន់ទង់បក្សយ៉ាង ពិតប្រាកដណាស់។ ពូទីន ត្រូវបានគេមើលឃើញថាជាមនុស្សតែម្នាក់ឯង គ្មានបក្ស ដែលបានរៀបចំរបៀបវារៈអោយបក្សមួយ ដែល ម៉េដវេដេវ ជាអ្នកឈរឈ្មោះលើគេក្នុងបញ្ជី ហើយក៏អាចនឹងគិតបានថានឹងក្លាយជានាយករដ្ឋមន្ត្រី ក្រោយពេលដែល ពូទីន ជាប់ឆ្នោតនៅខែមិនា និងចូលកាន់តំណែងនៅខែឧសភា ឆ្នាំ ២០១២ ខាងមុខជាមិនខាន។
អ្នកវិភាគនយោបាយរុស្ស៊ីជាទូទៅ មើលឃើញថា ពូទីន ជាជនដែលបានតាក់តែងរបៀបវារៈអោយបក្សកាន់អំណាចទាំងខាងនីតិបញ្ញតិ ទាំងខាងប្រតិបត្តិ។ ការបែងចែកអំណាចហាក់ដូចជាមិនសូវជាផ្លូវការប៉ុន្មាន ក្នុងបរិបទនៃប្រទេសរុស្ស៊ី បើតាមការពិចារណារបស់ Rojansky ។ ដូចនេះ ការបោះឆ្នោតអោយបក្សរុស្ស៊ីរួបរួម ជាការផ្តល់ការគាំទ្រដល់របៀបវារៈរបស់ ពូទីន ដូចដែលនិយាយមកខាងលើ ព្រោះនោះវាជាការយល់ដោយប្រជាជន។ ជាធម្មតាទេ ស្ថានភាពមិនអំណោយផលខាងហិរញ្ញវត្ថុសកល ការអូសបន្លាយវិបត្តិបំណុលនៅអឺរ៉ុប អំពើពុករលួយ និងអតិផរណា គឺជាបច្ច័យធំៗ សំរាប់ការសំរេចចិត្តផ្តល់សន្លឹកឆ្នោត។ យ៉ាងណាក្តី អ្នកគាំទ្រ បក្សរុស្ស៊ីរួបរួម ដែល មានពូទីន និងប្រធានាធិបតីរុស្ស៊ី បច្ចុប្បន្នរួមគ្នាដឹកនាំ ថ្វីបើ ពូទីន មិនដែលជាសមាជិកបក្សនោះក៏ដោយ ក៏មានន័យថាជា អ្នកពូទីននិយមដែរ។
មូលបទសំខាន់ៗ នៃការបោះឆ្នោត
ដែល Rojansky និយាយថា សេដ្ឋកិច្ចជាមូលបទសំខាន់នោះ វាក៏ពិបាកនឹងរកទឡ្ហីករណ៍ណាមួយមកនិយាយនៅពេលនេះ កាលៈទេសៈនេះថា នៅទីណាក៏ដោយនៃពិភពលោក ក្នុងស្ថានភាពអូសបន្លាយវិបត្តិហិរញ្ញវត្ថុ និងសេដ្ឋកិច្ចយ៉ាងនេះ ថាវាមិនត្រឹមត្រូវ ឬវាមានរឿងអ្វីណាផ្សេងទៅវិញនោះ។ មិនខុសពីការបោះឆ្នោតនៅសហរដ្ឋអាមេរិកដែរ ដែលការបោះឆ្នោតវាប្រមូលផ្តុំនឹងភាពឆ្កួតនៃសេដ្ឋកិច្ច។ ប្រជាជនរុស្ស៊ី ទៅស្ថានីយ៍បោះឆ្នោត ជាមួយនឹងការគិតពីគណនីធនាគាររបស់ខ្លួន ពីការស្វែងរកការងារធ្វើ តើនឹងមានការកាត់បន្ថយប្រាក់សោធនឬទេ ឬក៏តើសេដ្ឋកិច្ចវានឹងនៅតែអាប់អួរអញ្ចឹងតទៅឬយ៉ាងណា។ ចុះកាលពីបោះឆ្នោតកន្លងទៅ និង/ឬ ការបោះឆ្នោតពាក់កណ្តាលអាណត្តិខាងមុខ នៅសហរដ្ឋអាមេរិក?
រឿងនេះវាកើតមានសំរាប់ប្រជាជនរុស្ស៊ីភាគច្រើន ក្នុងនោះមានវណ្ណៈកណ្តាលដែលកំពុងតែកើតឡើងនៅក្រុងមូស្គូ និង សេនពីទែរបួហ្គ។ នៅជនបទ ប្រជាជនរុស្ស៊ីនៅមិនទាន់ចេញផុតពីវិបត្តិនៅឡើយទេ ហើយនេះក៏ជាករណីកើតមាននៅប្រទេសជាច្រើន ដែលតួលេខ ”គួរអោយចាប់ចិត្ត” នៃការប្រែប្រួលនៃសេដ្ឋកិច្ចក្រោយវិបត្តិ ត្រូវបានគេប្រកាស។ មានប្រជាជនរុស្ស៊ីមួយចំនួន ក៏តាមមិនទាន់នូវសភាពការណ៍ទសវត្សឆ្នាំ ១៩៩០ និងការដួលរលំនៃប្រព័ន្ធសូវៀត ដែលពួកគេនៅចាំមើលផ្លូវ ការវិលមកវិញនៃការងារ និងវិបុលភាពនៅឡើយ។
ក៏ប៉ុន្តែ ជាហេតុផលមួយដែរ ពូទីន និងម៉េដវ៉េដេវ បានប្រយុទ្ធដោយជោគជ័យក្នុងសង្គ្រាមមួយខ្លីជាមួយនឹងប្រទេសហ្សេអ័រហ្ស៊ី ក៏ដូចជាស្រាយចលាចលហិរញ្ញវត្ថុតាំងពីឆ្នាំ ២០០។ ការស្ទង់មតិមុនបោះឆ្នោតក៏បង្ហាញថា ៥៤% នៃអ្នកចូលរួម ផ្តល់ចម្លើយវិជ្ជមានពីផ្លូវដើរនយោបាយបច្ចុប្បន្នរបស់ប្រទេស ហើយអ្នកមានទស្សនផ្ទុយវិញមានតែ ២០% ប៉ុណ្ណោះ។ Igor Bunin និយាយប្រាប់ទីភ្នាក់ងារសារពត៌មានចិន ស៊ីនហួរ ថា ក្នុងថានៈជាបក្សកាន់អំណាចយូរ ជាធម្មតាទេ រុស្ស៊ីរួបរួម ត្រូវតែប្រឈមនឹងករណី “ការនឿយណាយនយោបាយ” ក្នុងចំណោម សាធារណជនរុស្ស៊ី - “ជាចិត្តសាស្តជាធម្មជាតិទេ តែប្រជាជនធុញទ្រាន់នឹងក្រុមដឹកនាំប្រទេស ដោយសារតែការបោះឆ្នោតជាច្រើនដងហើយ វានៅតែដដែល។
យ៉ាងណាក្តី លោកគូសបញ្ជាក់ថា ជាការឆ្លើយតបទៅនឹង “ការនឿយណាយនយោបាយ” នេះ ពូទីន និងរុស្ស៊ីរួបរួម បានប្តូរយុទ្ធសាស្ត្រជាច្រើនដើម្បីទាក់ទាញអោយមាន “មុខថ្មី” ហើយក៏ ដោយហេតុនោះឯងដែរ ដែល ពូទីន បានស្នើអោយមានការដាក់ចេញជាអង្គការគ្របដណ្តប់មួយ ហៅថា រណសិរ្សប្រជាជនរុស្ស៊ីទាំងមូល (All-Russia Popular Front) ដែលទទួលបានការគាំទ្រយ៉ាងខ្លាំងនៅក្នុងប្រទេស។
ជុំវិញការប្រឆាំងលទ្ធផលឆ្នោត
ការប្រឆាំងតវ៉ាបានកើតមាន និងអូសបន្លាយរហូតមកដល់ថ្ងៃអង្គារ៍ ដែលអ្នកតវ៉ា បាននិយាយថា “បក្សរុស្ស៊ីរួបរួមលួចឆ្នោត” ដើម្បីផ្តល់ឱកាសអោយ ពូទីន វ្លាឌីមៀរ។ ការប្រឆាំងតវ៉ា មិនត្រូវច្បាប់នោះ មានការចូលរួមពីប្រជាជនប្រមាណជា ៦០០០ នាក់ មិនឆ្ងាយពីវិមានក្រឹមឡាំង ស្រែកថា “រុស្ស៊ីមិនត្រូវការពូទីន” ក្នុងពេលដែលយុវជនគាំទ្រវិមានក្រឹមឡាំង ២០០០ នាក់ក៏បានបង្ហាញខ្លួន និងស្រែកថា “គាំទ្រការបោះឆ្នោត និងគាំទ្រ ពូទីន” ផងដែរ។ អ្នកសង្កេតការណ៍អន្តរជាតិ និងសហរដ្ឋអាមេរិក រិះគន់ការបោះឆ្នោត តែប្រធានាធិបតី ម៉េដវ៉េដេវ ថា មិនមានភាពមិនប្រក្រតីដែលអាចនាំអោយសើរើការបោះឆ្នោតទេ។
ក្នុងការចោទប្រកាន់ពីការចាប់ក្រុមបាតុករប្រឆាំងលទ្ធផលបោះឆ្នោត លោក Tony Cartalucci នៃ Global Research បានចោទសំណួរដ៏ងាយៗ ថា តើពួកអាមេរិក នឹងនិយាយថាម៉េចទៅវិញ បើសិនជា នៅតាមស្ថានីយ៍បោះឆ្នោត និងក្នុងបក្សនយោបាយមួយចំនួន មានការជ្រាតចូលដោយលុយចិន អ្នកសង្កេតការណ៍ចិន និងបេក្ខជនដែលគាំទ្រដោយចិន ដើម្បីជំរុញផលប្រយោជន៍របស់ចិន ក្នុងការបោះឆ្នោតរបស់អាមេរិកវិញនោះ? ចម្លើយគឺវាពិតជាមាន ចាប់ពី ចាប់ដាក់គុក កាត់ទោសពីបទចោទប្រកាន់ដែលអាចមានហេតុផលពីការគៃបន្លំ រហូតដល់ការអុជអាលអោយបះបោរ និងសូម្បីតែទោសក្បត់ជាតិ ជាមិនខាន ដោយត្រូវជាប់ទោសពន្ធធនាគារមួយជិវិត ឬក៏ប្រល័យបង់ នេះមិនទាន់រាប់ចូលនូវសកម្មភាពយោធា ដែលអាចនឹងចាត់ចែងអោយមាន ក្នុងករណីដែលចង់គិតថាវាជាអំពើបង្កសង្គ្រាម។
Cartalucci ថា តាមពិតទៅ ជាញឹកញយដង ដែលការប៉ុនប៉ងធ្វើអោយមានការកែប្រែប្រទេសមួយ និង/ឬ ចូលទៅរញ៉ីរញ៉ៃនឹងការបោះឆ្នោតក្នុងប្រទេសណាមួយនោះ ជាសកម្មភាពបង្កសង្គ្រាម ជាសកម្មភាពដែល រដ្ឋាភិបាលប្រទេសធំខ្លះ បានធ្វើតាមរយៈ “អង្គការក្រៅរដ្ឋាភិបាល” ជាច្រើន ម្តងហើយម្តងទៀត ច្រើនទសវត្សមកហើយ នៅជុំវិញពិភពលោកនេះ។ ការពិតទៅ តាមដែល Cartalucci សន្និដ្ឋាន “និទាឃរដូវអារ៉ាប់” ក៏ជាមហាអគ្គីភ័យភូមិសាស្ត្រនយោបាយ ដែលក្រុមអង្គការក្រៅរដ្ឋាភិបាល និងបណ្តាប្រព័ន្ធឃោសនា ដែលមានការគាំទ្រ ពីលោកខាងលិច ដ៏ច្រើនរាប់មិនអស់ ជាអ្នកបង្កឡើងដែរ។
សេណារីយ៉ូ រុស្ស៊ី ២០២០?
នៅពេលដែល មានការគិតថា វ្លាឌីមៀរ ពូទីន ត្រៀមខ្លួនវិលទៅកាន់តំណែងប្រធានាធិបតី នៅក្នុងការបោះឆ្នោតឆ្នាំ ២០១២ ក្រុមការងារ រុស្ស៊ី ២០២០ បានប្រមែប្រមូលអ្នកជំនាញល្បីៗ ពីរុស្ស៊ី សហរដ្ឋអាមេរិក និងអឺរ៉ុប ជិត ៣០ នាក់ បើតាមការអោយដឹងពី CEIP ដើម្បីធ្វើការវិភាគ ពីសេណារីយ៉ូណាដែល ការអភិវឌ្ឍន៍ និងហានិភ័យរបស់រុស្ស៊ី ត្រូវប្រឈមនាពេលខាងមុខ។ ក្រុមនេះយល់ថា បើទោះជា ពូទីន វិលមកវិញក៏ដោយ ក៏យុគសម័យ ពូទីន កន្លងផុតហើយ។ លោក James F. Collins និងសហការីស្រាវជ្រាវរបស់លោក គិតថា ទោះបី នេះមិនមានន័យថា ពូទីន នឹងបោះបង់អំណាចក្នុងពេលឆាប់ៗ ក៏ដោយ ក៏គង់តែប្រព័ន្ធនយោបាយ និងសេដ្ឋកិច្ច ដែលគាត់បានបង្កើត មិនស្រាយលក្ខខណ្ឌប្រែប្រួលយ៉ាងលឿនរហ័សរបស់រុស្ស៊ីបានទេ។
ក្រុមពិចារណាអំពីអនាគតរុស្ស៊ីដល់ឆ្នាំ ២០២០ និយាយថា មានសេណារីយ៉ូបី ដែលរុស្ស៊ី អាចនឹងមានត្រាច់ចរ គឺ ១) សេណារីយ៉ូ របៀបស្តាលីន ២) សេណារីយ៉ូ គ្រាដើមនៃរជ្ជកាលពូទីន និង ៣) សេណារីយ៉ូ ប៉េរ៉េស្ត្រួយកា។ ក្រុមបានពន្យល់ថា ក្នុងសេណារីយ៉ូទីមួយ រុស្ស៊ីអាចនឹងបន្តនិន្នាការបច្ចុប្បន្ន ក្រោមការដឹកនាំរបស់ ពូទីន តែ ដែលនិន្នាការអាជ្ញានិយមណាមួយ នឹងមិនអាចមាននិរន្តភាពយូរអង្វែងបានទេ។ ក្នុងសេណារីយ៉ូ ទីពីរ អ្នកពិចារណា ព្រៀងគំនិតថា នឹងអាចមានទំនើបភាវូបនីយកម្មដោយចំណែក នៅក្រោមការត្រួតត្រារបស់របប តែពិតជានឹងទៅតាមផ្លូវដែលវិមានក្រឹមឡាំងត្រួសត្រាយជាមិនខាន។ ក្នុងសេណារីយ៉ទី ៣ ការកែទំរង់ធំមួយក្នុងប្រព័ន្ធនយោបាយ និងសេដ្ឋកិច្ចរុស្ស៊ី ត្រូវបានរំពឹង ដែលនោះពិតជា សេណារីយ៉ូ ដែលនឹងគំរាមកំហែងដល់ការក្រាញក្តាប់អំណាចរបស់ ក្រុមលោក ពូទីន ជាមិនខាន។ ដូចនេះ ពូទីន ត្រូវបានគេគិតថា នឹងមិនរើស សេណារីយ៉ូ មួយនេះទេ។
និន្នាការទូទៅបីយ៉ាង
ការសន្និដ្ឋានថានឹងមានសេណារីយ៉ូទាំងនេះ វាអាស្រ័យដោយក្រុមសិក្សាបានពិនិត្យឃើញពី និន្នាការជាទូទៅបីយ៉ាង គឺ ១) ការកើនឡើងនូវស្មារតីជាតិនិយម ២) ការប្រឈមហានិភ័យនៃសេដ្ឋកិច្ច និង៣) ចំណោលនយោបាយពីការបោះឆ្នោតឆ្នាំ ២០១។ យោងតាម Masha Lipman នៃ CEIP ប្រជាជនរុស្ស៊ី ៣៥% បានបង្ហាញនូវទឹកចិត្តជាតិនិយម ថ្វីបើពលរដ្ឋថ្នាក់មធ្យមនៅមានភាពញោចញើមក្នុងការគាំទ្របុព្វហេតុជាតិនិយមក៏ដោយ។ ស្មារតីជាតិនិយមនេះ ត្រូវបានកត់សំគាល់ឃើញទាំងក្នុងមណ្ឌលនៃពួកសេរី និងទាំងក្នុងមណ្ឌលនៃពួកកុម្មុយនិស្ត ហើយដែលហាក់បីដូចជាមាននិន្នាការប្រឆាំងនឹងរបប ពូទីន។
និន្នាការទីពីរ ត្រូវបានអ្នកស្រាវជ្រាវអាមេរិក Clifford Gaddy នៃ Brookings Institution លើកហេតុផលថា កត្តាសំខាន់បីធំៗ នឹងកំណត់នូវទ្រង់ទ្រាយសេដ្ឋកិច្ចរបស់ រុស្ស៊ី នៅក្នុងប៉ុន្មានទសវត្សខាងមុខ ក) ថ្លៃឈ្នួលប្រេង និងឧស្ម័ន ខ) រចនាសម្ព័ន្ធបន្សល់ពីអតីតសហភាពសូវៀតមិនអាចទ្រាំទ្រការរីកចំរើនថ្មីបាន និង គ) ប្រព័ន្ធគ្រប់គ្រងថ្លៃឈ្នួល។ អ្នកស្រាវជ្រាវរូបនេះ គូសវាសថា នៅបន្ទាប់ពីឆ្នាំ ២០១២ ទៅ សេដ្ឋកិច្ចរុស្ស៊ី មិនអាចទទួលបានកំណើនក្នុងកំរិតដូចក្នុងពេលបច្ចុប្បន្ន ដែលថ្លៃឈ្នួលប្រេង និងឧស្ម័ន ហូរចូលទៅក្នុងស្នូលនៃសេដ្ឋកិច្ចទេ។ វារលែងតែ ពូទីន ធ្វើការកែទំរង់នយោបាយម៉ឺងម៉ាត់ ឬតម្លើងថ្លៃឈ្នួលប្រេង និងឧស្ម័ន បើពុំនោះទេ រុស្ស៊ី នឹងប្រឈមនឹងវិបត្តិសេដ្ឋកិច្ចដ៏ធំក្នុងអនាគតមិនយូរឡើយ។
ការបោះឆ្នោតនៅឆ្នាំ ២០១២ អាចនឹងនាំ ពូទីន ទៅកាន់តំណែងជាប្រធានាធិបតីជាលើកទីពីរ ដែលអ្នកស្រាវជ្រាវនៃក្រុម រុស្ស៊ី ឆ្នាំ ២០២០ គិតថា យុទ្ធនាការបោះឆ្នោតរបស់រុស្ស៊ីរួបរួម គឺ យុទ្ធនាការ “គ្មានការដូរផ្លាស់” ដែលប្រជាជនរុស្ស៊ីសាមញ្ញទូទៅ មិនជជែកពីការបោះឆ្នោត ហើយបក្សនានាក៏ចាយលុយនោះតិចលើការឃោសនានយោបាយ។ អ្នកវិភាគសន្និដ្ឋានថា ការនេះធ្វើអោយរុស្ស៊ីខ្វះ “មណ្ឌលផ្លាស់ប្តូរថ្មី” ដែលអាចជាចម្លាស់អាចទុកចិត្តបាន ទៅនឹង របប ពូទីន។
ផ្អែកតាមការវិវត្តន៍នេះ លទ្ធភាពដែលថា ពូទីន នឹងក្លាយជាប្រធានាធិបតីជាលើកទីពីរ នៅឆ្នាំ ២០១២ ឃើញថា មានភាគរយទៅខាងពិតច្រើន។ ពូទីន និងម៉េដវ៉េដេវ អាចនៅជាគូកននយោបាយបន្តទៀតក្នុងឆាកនយោបាយរុស្ស៊ី។ គណៈបក្សប្រឆាំង នៅរុស្ស៊ី ត្រូវបានអ្នកវិភាគ ធំៗ វាយតម្លៃថា មិនទាន់ជាគូប្រកួតពេញកម្លាំងនឹងបក្សរុស្ស៊ីរួបរួមទេ មិនតែប៉ុណ្ណោះ ក៏មិនទាន់មានឥស្សរជននយោបាយណាមានថាមភាពថ្លឹងនឹង ពូទីន បាននៅឡើយដែរ។ រុស្ស៊ី ២០២០ ថា ពូទីន មិនអាចនៅហួសពីឆ្នាំ ២០២០ ជាការត្រឹមត្រូវ ព្រោះសំរាប់អាណត្តិក្រោយ ជាប្រធានាធិបតីទីពីរ ក៏មានតែ ៥ ឆ្នាំដែរ។ បើគិតពីឆ្នាំ ២០១២ ទៅ ពូទីន នៅសល់ពេលប្រាំបីឆ្នាំទៀត ដើម្បីពង្រឹងអំណាចអោយ អ្នកពូទីននិយម ទោះពេលនោះ គាត់ជាប្រធានាធិបតី ឬមិនមែនក៏ដោយ។ ការចូលទៅលូកលាន់នឹងរឿងរ៉ាវផ្ទៃក្នុងរបស់ប្រទេសនានា គឺជាលំនាំនៃគោលនយោបាយរបស់មហាអំណាចឆ្លងមហាសមុទ្រ មិនដឹងថា ដល់សតវត្សទីប៉ុន្មានបានវាចប់។ ពហុប៉ូលភាព កំពុងតែជាតថភាព តែប៉ូល រុស្ស៊ីនៅមិនទាន់មានកម្លាំងដូចកាលពីជំនាន់ សហភាពសូវៀតទេ ហើយក៏សឹងតែថារកមិនឃើញមកវិញផងក៏ថាបាន។ យ៉ាងណាក្តី ពូទីន ជាអ្នកទទួលខុសត្រូវមួយ ក្នុងប្រវត្តិសាស្ត្ររុស្ស៊ី ក្រោយសហភាពសូវៀត៕
