លោកអ្នកអានជាទីមេត្រី ក្រឡាអុកមជ្ឈិមបូព៌ា និងអាហ្វ្រិកខាងជើង៖ ពុះបំបែក ដណ្តើមយក និងត្រួតត្រា រៀបរាប់ជូនរួចហើយពីក្របខណ្ឌទូទៅនៃវិបត្តិនៅមជ្ឈិមបូព៌ា និងអាហ្វ្រិកខាងជើង។ ក្នុងល្បែងចត្រង្គនេះដដែល សង្គ្រាម និង/ឬរដ្ឋប្រហារ នៅប្រទេសស៊ីរី ក៏ដូចជា ការគន់គូរពីលទ្ធភាពតានតឹង និង/ឬ ភ្លើងសង្គ្រាម នៅទូទាំងដំបន់ ជារោគវិនិច្ឆ័យមួយកំពុងតែបង្ហាញនូវភាពធ្ងន់ធ្ងររបស់ខ្លួន។ ការវិភាគទាំងឡាយ រាប់ទាំងការប្រើពាក្យធ្ងន់ៗ ខាងមនោគមវិជ្ជា គឺជារបស់អ្នកនិពន្ធដើម ក្នុងវ៉ែបសាយត៍ WSWS ទាំងស្រុង។ យ៉ាងណាក្តី ហៀល វែលឌី បានសំរួលខ្លឹមសារ និងបន្ថែមនូវព័ត៌មាន ព្រមទាំងការវិភាគពីប្រភពផ្សេងទៀត ដើម្បី ជួយអោយគំនិតរួមនៃអត្ថបទងាយយល់ផង និងមានន័យបូកសរុបសភាពការណ៍ផង។
ការផុតឱសានវាទរបស់សម្ព័ន្ធអារ៉ាប់ ចំពោះរបប Bashir al-Assad នៅស៊ីរី អោយដកកងទ័ពចេញពីការប្រយុទ្ធនៅក្នុងប្រទេសស៊ីរី និងធ្វើការចរចា ជាមួយក្រុមប្រឆាំងដែលគាំទ្រគំនិតលោកខាងលិច បាននាំមួយជំហានទៅមុខកាន់តែជិត ទៅនឹងការធ្វើអន្តរាគមន៍ដោយយោធាបរទេសក្នុងសង្គ្រាមស៊ីវិលដែលកាន់តែឆាបឆេះខ្លាំងឡើងនៅស៊ីរី។
នៅពីក្រោយក្រុមប្រឆាំងប្រដាប់អាវុធគាំទ្រដោយទួរគី អារ៉ាប៊ី សាអ៊ូឌី និងកាតា មានសហរដ្ឋអាមេរិក អង់គ្លេស និងបារាំង។ ប្រទេសទាំងនេះបានលូកដៃជាច្រើនខែមកហើយក្នុងការរៀបចំល្បិចនានាពីខាងក្រោយ ជាមួយ ក្រុង អង់ការ៉ា ក្រុងរីយ៉ាដ និងក្រុមប្រឆាំងស៊ីរី ក្នុងការខិតខំដើម្បីធានាថា ការផ្តួលរំលំរបបដឹកនាំដោយក្រុម Alawite នៃនិកាយ ស៊ីអ៊ីត គាំទ្រអ៊ីរ៉ង់ នឹងនាំយករបបអាយ៉ងគាំទ្រលោកខាងលិចទៅកាន់អំណាចនៅក្រុង ដាម៉ាស។ សូមជំរាបជូនថា ក្រុមគ្រួសារប្រធានាធិបតី Bashir al-Assad ស្ថិតនៅក្នុងក្រុម Alawite នៃនិកាយស៊ីអ៊ីតនេះ។
តាំងពីការចាប់ផ្តើមម្លេះ ប្រទេសអារ៉ាប៊ីសាអ៊ូឌី កាតា ហ្សកដង់ និងទួរគី ក៏ដូចជាវ៉ាស៊ីនតោន បានប្រឹងប្រែងដើម្បីប្រើចលនាសង្គមប្រឆាំងនឹងប្រធានាធិបតី Assad ជំរុញពីដោយការតស៊ូបដិវត្តន៍នៅអេហ្ស៊ីព និងទូនីស៊ី ដើម្បីជំរុញអោយមានការដូរផ្លាស់របបមួយដែលស្តាំនិយម និងគាំទ្រចក្រពត្តិនិយម។ ក្រុមប្រឹក្សាជាតិស៊ីរី បច្ចុប្បន្នជាកម្លាំងតំណាងនាំមុខសំរាប់មហាអំណាចនានាក្នុងតំបន់ និងចក្រពត្តិ មានមូលដ្ឋានតាំងនៅទួរគី និងមានក្រុមពីរសំខាន់។ ក្រុមសេចក្តីថ្លែងការណ៍ក្រុង ដាម៉ាស ត្រួតត្រាដោយកម្លាំងគាំទ្រសហរដ្ឋអាមេរិក និងក្រុមបងប្អូនមូស្លីមស៊ូន្នី ជាតំណាងរដ្ឋអារ៉ាប់ និងទួរគី។
ដូចក្នុងសង្គ្រាម “ចក្រពត្តិ” នៅលីប៊ីដែរ មានការបែងចែងការងារគ្នានៅក្នុងប្រតិបត្តិការនេះ។ កម្លាំងដូចជា កងទ័ពស៊ីរីស៊ូន្នីសេរីផ្តាច់មុខ ឈរជើងនៅទួរគី ផ្តល់ជាមធ្យោបាយសំរាប់ប្រតិបត្តិការយោធាប្រឆាំងទាំងកម្លាំង Alawis និងកងសន្តិសុខស៊ីរី។ ក្នុងពេលជាមួយគ្នា មានក្រុម ប្រកាសខ្លួនថា “សេរីនិយម” ក៏ច្រើន ដែលត្រូវបានបណ្តាញឃោសនាលើកមុខលើកមាត់សរសើរថាជាចលនាមួយមិនប្រកាន់និកាយសាសនា ខណៈដែលភាគីបដិបក្ខសាសនា និងជាតិសាសន៍ ត្រូវបានគេបង្ក្រាបនៅនឹងកន្លែង។
កាសែត the Gulf News អះអាងថា៖ “ការចាប់ពង្រត់ជាឈ្លើយគ្នាទៅវិញទៅមក ការធ្វើទារុណកម្ម ការកាត់ក្បាល និងការរើទីតាំងរស់នៅរបស់ប្រជាជន ដែលកំពុងកើតមានរវាងសហគមន៍ ស៊ូន្នី និង Alawite នៅទីក្រុង Homs នាភាគកណ្តាលនៃប្រទេសស៊ីរី ជាញឹកញយត្រូវបានពណ៌នាថាជា «ទុនបដិវត្តន៍» បានបញ្ជូននូវសញ្ញាដ៏ភ័យខ្លាចពីអ្វីដែលនឹងកើតមានសំរាប់ភាគ ឯទៀតនៃប្រទេស។
របប ស៊ីរី មិនជាល្អអីជាង Zine El Abidine Ben Ali នៅទូនីស៊ី ឬ Hosni Mubarak នៅអេហ្ស៊ីព ឬ Muammar Gaddafi នៅលីប៊ីទេ វាសមនឹងត្រូវទទួលនូវការកំចាត់។ ក្រុមរបបនេះ ត្រូវបានបង្កើតឡើងដោយសារការកៀបសង្កត់មកជាច្រើនទសវត្ស និងការធ្វើអោយប្រជាជនរបស់ខ្លួនក្រីក្រ ដែលក្នុងករណីទូទៅ ប្រមាណជា ៣២% នៃប្រជាជនខ្លួនត្រូវរស់នៅជាមួយនឹងប្រាក់ចំណូល ២ ដុល្លារក្នុងមួយថ្ងៃ ឬក៏ទាបជាងនេះផង។ ប៉ុន្តែ សំណួរមួយនៃសំណួរដ៏ច្រើនស្អេកស្កះ ហើយធ្វើអោយមហាជនភាន់ភាំង គឺ តើអ្វីទៅដែលនឹងជំនួស Assad?
របបសាសនាមួយ លើកបន្តុប ក្នុងនាមក្រុង អង់ការ៉ា ក្រុង រីយ៉ាដ និង វ៉ាស៊ីនតោន នឹងមិនជា ជំហានទៅមុខទេ បើតាមអ្នកវិភាគធំ។ វានឹងជាជំហានទៅក្រោយវិញសំរាប់វណ្ណៈធ្វើការងារ ទាំងនៅស៊ីរី ទាំងក្នុងឆាកអន្តរជាតិ។ ក្រោយពីការលើកបន្តុបរបបអាយ៉ាងគាំទ្រលោកខាងលិចនៅលីប៊ី វាគឺជាជោគជ័យមួយទៀតក្នុងការប្រឆាំងបដិវត្តន៍របស់ប្រទេសលោភលន់វាតទី ប្រឆាំងនឹងបដិវត្តន៍នៅមជ្ឈិមបូព៌ា។
បន្ទាប់ពីការដួលរលំនូវរបបជាភ្ញៀវរបស់ខ្លួននៅ ទូនីស និងគែរ ក្រុងវ៉ាស៊ីនតោន ក្រុងឡុងដ្រ៍ និងប៉ារីស បានសន្និដ្ឋានថា “ការដូររបប” ត្រូវបានក្លែងបន្លំទូទាំងមជ្ឈិមបូព៌ាដែលសម្បូរណ៌ដោយប្រេង ហើយ ប្រទេសទាំងនោះយល់ថាត្រូវតែធ្វើសកម្មភាពជាបន្ទាន់ ដើម្បីនឹងរចនាតំបន់នេះអោយស្របតាមការចង់បានរបស់ខ្លួន។ នៅទីណាដែល សញ្ចេតនាប្រឆាំងបានគំរាមកំហែងសម្ព័ន្ធមិត្តនៃប្រទេសលោភលន់វាតទី នៅអេហ្សីពក៏ដោយ នៅ បាហ្រេនក៏ដោយ ឬក៏នៅ អារ៉ាប៊ីសាអ៊ូឌី ក៏ដោយ ត្រូវតែទទួលនូវការប្រឆាំងតបវិញពេញទំហ៊ឹង។ ទីណាក៏ដោយ ដែលវាអាចប្រើដើម្បីបំរើផលប្រយោជន៍នៃការលោភលន់វាតទីបាន មិនថានៅលីប៊ី ហើយពេលនេះនៅ ស៊ីរី ទេ ត្រូវតែដាក់អោយនៅក្រោមការត្រួតត្រានៃកម្លាំងស្តាំនិយម គាំទ្រមហិច្ឆិតាលោភលន់វាតទី។
សហរដ្ឋអាមេរិក និងអឺរ៉ុប មានទស្សនៈថា “ចំណិតខែស៊ីអ៊ីត” ដែលលាតសន្ធឹងពីក្រុង តេហេរ៉ង់ នៃប្រទេសអ៊ីរ៉ង់ ទៅ ទីក្រុង ដាម៉ាស ក្រុងហ្សេប៊ូឡា នៅលីបង់ និងពេលនេះរដ្ឋាភិបាលនៅអ៊ីរ៉ាក់ ជាសក្តានុពលគំរាមកំហែងដល់អនុត្តរភាពរបស់ខ្លួន។ សូមជំរាបថា ចំណិតខែស៊ីអ៊ីត ជាពាក្យប្រើក្នុងភូមិសាស្ត្រនយោបាយ ដើម្បីពណ៌នាតំបន់ភ្ជាប់គ្នាបានជារាងចំណិតខែ ក្នុងផែនទីដែលលាតសន្ធឹងពីអាហ្ស៊ែរបៃហ្សាន ទៅអ៊ីរ៉ង់ ទៅបាហ្រេន និងអ៊ីរ៉ាក់ និងលីបង់។ រដ្ឋអារ៉ាប់ស៊ូន្នី នានា ទួរគី និងអ៊ីស្រាអែល ក៏ចង់ដាក់អោយអ៊ីរ៉ង់នៅឯកោ និងត្រូចខាតបង់ដែរ (សូមអានអត្ថបទ ក្រឡាអុកមជ្ឈិមបូព៌ា និងអាហ្វ្រិកខាងជើង៖ ពុះបំបែក ដណ្តើមយក និងត្រួតត្រា)។
នាយកប្រតិបត្តិ និងជាស្ថាបនិកសាជីវកម្មស៊ើបការណ៍ឯកជន Stratfor លោក George Friedman បានកត់សំគាល់ថា ទៅតាំងល្អបំផុតដើម្បីនឹងប្រឆាំងឥទ្ធិពលអ៊ីរ៉ង់ គឺ “ស៊ីរី ហើយកិច្ចការគន្លឹះដែលត្រូវធ្វើនៅស៊ីរី គឺធ្វើអ្វីៗ គ្រប់យ៉ាងដើម្បីអាយមានការផ្តួលរំលំ al Assad ... ដំណោះស្រាយដែលអាចត្រូវប្រកាន់យកគឺ គាំទ្រដោយចេញមុខចំពោះពួក ស៊ូន្នីប្រឆាំង បញ្ជូនចូលកាត់តាមលីបង់ ឬអាចថាទួរគី និងហ្សកដង់។
តាមការសន្និដ្ឋានរបស់ George Friedman ការផ្តួលរំលំ al Assad ជា “ការសំខាន់ ព្រោះវាដូរវិធាននៃល្បែង។ មូលដ្ឋានដែលអាចថាសមស្របបំផុតសំរាប់អន្តរាគមន៍យោធាប្រឆាំងនឹង al Assad គឺជាផែបការនាំមុខរបស់ទួរគី ក្នុងការបង្កើតជា “តំបន់ទ្រនាប់” លាតសន្ធឹងកាត់តាមព្រំដែន។ ដោយមានការគាំទ្រពីបារាំង កងទ័ពសេរីស៊ីរី បានទាមទារអោយបង្កើតជា “តំបន់គ្មានការហោះហើរ” ជាការនាំមុខសំរាប់ប្រតិបត្តិការរបស់ខ្លួន។
លោកអ្នកអានជាទីមេត្រី ជាពត៌មានបន្ថែមដើម្បីនឹងកាន់តែមើលឃើញពីទ្រង់ទ្រាយនៃបញ្ហា តាមប្រភពព័ត៌មាន Milliyet ថ្ងៃ ២៦ វិច្ឆិកា បារាំងបានបញ្ជូនកម្លាំងហ្វឹកហ្វឺនយោធារបស់ខ្លួន ទៅទួរគី និងលីបង់ ដើម្បីហ្វឹកហ្វឺនកងទ័ពសេរីស៊ីរី ដែលជាក្រុមពួកផ្តាច់ខ្លួន ធ្វើប្រតិបត្តិ នៅក្រៅទួរគី និងលីបង់ ក្នុងបំណងធ្វើសង្គ្រាមប្រឆាំងកងទ័ព ស៊ីរី។ តាមប្រភពដដែលក៏មានការអះអាងថា អាជ្ញាធរបារាំង អង់គ្លេស និងទួរគី “បានព្រមព្រៀងគ្នាបញ្ជូនអាវុធចូលទៅស៊ីរី” និងថាក្រុមបះបោរប្រដាប់អាវុធនេះ កំពុងតែឈរជើងនៅខេត្ត Hatay នៃប្រទេសទួរគី ក្បែរព្រំដែនជាមួយនឹងស៊ីរី។
នៅក្នុងសេចក្តីរាយការណ៍មួយទៀតរបស់ Global Research ថ្ងៃទី ២០ វិច្ឆិកា អោយដឹងថា សមាជិកនៃកងទ័ពសេរីស៊ីរី ប្រឆាំងរដ្ឋាភិបាល មិនមែនជាទាហានផ្តាច់ខ្លួនចេញពីរដ្ឋាភិបាល ស៊ីរី ដូចដែលបណ្តាញឃោសនាលោកខាងលិចបានផ្សាយនោះទេ តែជាក្រុមសកម្មប្រយុទ្ធដែលបានទទួលការគាំទ្រ ឧបត្ថម្ភថវិកា និងបំពាក់អាវុធដោយសហរដ្ឋអាមេរិក អ៊ីស្រាអែល និងទួរគី។ Tony Cartalucci ជំនាញការខាងភូមិសាស្ត្រនយោបាយ និយាយថា “សេចក្តីរាយការណ៍នេះ វាខុសគ្នាស្រឡះទៅនឹងការឃោសនាតាមបណ្តាញឃោសនាសាជីវកម្ម និងការពណ៌នារៀងរាល់ថ្ងៃ ដោយរដ្ឋមន្ត្រីការបរទេសលោកខាងលិច ដែលអំពើហឹង្សាត្រូវបានឆ្លុះបញ្ចាំងតែពីភាគីម្ខាង ថា ប្រធានាធិបតី al-Assad បាញ់សម្លាប់បាតុករ ដែលគ្រវីបដាដោយសន្តិវិធី។ យោងតាមឯកសារសម្ងាត់ការទូតរបស់រដ្ឋាភិបាលសហរដ្ឋអាមេរិក ដែលត្រូវបែកធ្លាយប្រាប់អោយដឹងថា ក្រុងវ៉ាស៊ីនតោន បានផ្តល់ថវិកាដល់ក្រុមប្រឆាំងស៊ីរី ហោចណាស់ក៏តាំងតែពីឆ្នាំ ២០០៥ ម្លេះ ហើយក៏កំពុងតែបន្តសព្វថ្ងៃ។
កាសែត the Jerusalem Post បានលាតត្រដាងយោបល់លោក Jonathan Spyer ទីប្រឹក្សារដ្ឋាភិបាលថា ដើម្បីរុញអោយផ្អៀងយកប្រៀបប្រឆាំង al-Assad “ប្រហែលជាត្រូវការអោយមានការចូលទៅពាក់ព័ន្ធដោយត្រង់ហើយ។ តំបន់ទ្រនាប់អាចផ្តល់ជាទីតាំងសំរាប់ពួកបះបោរស៊ីរី ចាត់តាំង និងកសាងការប្រឈមចំពោះការដឹកនាំរបស់ al-Assad ក៏ពិតមែនហើយ តែវាក៏អាចធ្វើអោយកើតមាននូវលទ្ធភាពប៉ះទង្គិចរវាងស៊ីរី/ទួរគីដែរ។ ការផ្ទុះសង្គ្រាមពេញទីនៅស៊ីរី វាចង្អុលបង្ហាញពីលទ្ធភាពផ្ទុះសង្គ្រាមក្នុងតំបន់ ដែលមានពាក់ព័ន្ធដល់អ៊ីរ៉ង់ នោះម្ខាង និងទួរគី និងរដ្ឋមូស្លីមស៊ូន្នីនានានោះម្ខាងទៀត។ ស្មានមើលចុះថាតើស្ថានការណ៍នេះ នឹងហុចឱកាសប៉ុណ្ណាអោយមានការកេងចំណេញពីមហាអំណាច នាំទៅដល់ និងរាប់បញ្ចូលទាំងការធ្វើអន្តរាគមន៍ដោយត្រង់ ដូចដែលពួកគេបានធ្វើនៅលីប៊ី។
គ្រោះថ្នាក់មួយបែបនេះមិនអាចយកចេញបានទេ ដោយផ្អែកទៅលើការគាំទ្ររបស់ al-Assadឬអ្នកគាំទ្រគាត់នៅ Tehran ឬរុស្ស៊ី និងចិន។ មានអ្នកវិភាគប្រកាន់ទស្សនៈសង្គមនិយមអន្តរជាតិខ្លះគិតថា របប al-Assad ត្រូវតែបានផ្តួលរំលំ និងជំនួសមកវិញដោយរដ្ឋាភិបាលមួយសង្គមនិយម ប្រជាធិបតេយ្យពិតប្រាកដ បង្រួបបង្រួមបានវណ្ណៈកម្មករ តស៊ូប្រឆាំង “ចក្រពត្តិនិយម” ដែលស្មេរបានប្រឹងប្រែងហៅត្រឹមតែថា “លោភលន់វាតទី” តែប៉ុណ្ណោះ។
ជោគវាសនានៃស៊ីរី ចងភ្ជាប់ជាមួយព្រឹត្តិការណ៍នានា ដែលផ្ទុះកក្តុងកក្តាំងជាហូរហែនៅមជ្ឈិមបូព៌ា ពិសេសជាងគេនៅអេហ្ស៊ីព។ អ្នកវិភាគលំអៀងទៅនិន្នាការសង្គមនិយមគិតថា ការគណនារបស់ប្រទេសមហាអំណាចលោភលន់ និងវាតទី ពីលោកខាងលិចទាំងអស់ សុទ្ធតែផ្អែកលើការមិនគិតដល់វណ្ណៈកម្មករ ក្នុងជីវភាពនយោបាយ និងតួនាទីសំខាន់នៃភ្នាក់ងារតំបន់នានា ទាំងរដ្ឋាភិបាលជាតិ ទាំងកម្លាំងនយោបាយនានា ដូចជា ក្រុម Muslim Brotherhood ជាដើម។ ក្នុងន័យនេះ ការផ្ទុះឡើងជាថ្មីនូវការតស៊ូបដិវត្តនៅអេហ្ស៊ីព ជាការគំរាមកំហែងមិនមែនសំរាប់តែពួកយោធានិយមគាំទ្រដោយសហរដ្ឋអាមេរិកនៅក្រុងគែរនោះទេ តែគ្រប់តែផែនការដែលមានត្រៀមទុក ដើម្បីពង្រាយបន្តទៀតនូវរបបបត់បែនបាន តាមគំរូក្រុមប្រឹក្សាជាតិអន្តរកាលនៃប្រទេសលីប៊ី។
ចេញពីការវិភាគនេះមកវិញ កាលពីថ្ងៃ ២៤ វិច្ឆិកា តាមទីភ្នាក់ងារសារពត៌មាន Xinhua ប្រទេសចិនបានចាត់ទុក ការអំពាវនាវដល់ពួកស៊ីរីប្រឆាំង កុំធ្វើការសន្ទនាជាមួយរដ្ឋាភិបាល al-Assad ថា ប្រទេសលោកខាងលិច កំពុងតែអោយសញ្ញាថា ខ្លួនគាំទ្រពួកប្រឆាំងអោយផ្តួលរំលំរដ្ឋាភិបាលដោយហឹង្សាហើយ។ ស៊ីនហួរ បន្តថា ការប៉ុនប៉ងធ្វើម្តងទៀតតាម “គំរូលីប៊ី” នៅស៊ីរី ជាការមួយប្រកបដោយគ្រោះថ្នាក់ ដោយយោងទៅលើសារសំខាន់ខាងភូមិយុទ្ធសាស្ត្រ នៅមជ្ឈិមបូព៌ា។ ប្រធានាធិបតី al-Assad ក៏បានព្រមានមហាអំណាចលោកខាងលិច ថានឹងត្រូវទទួលហានិភ័យពីការបង្ករ “ការរំជួយដី” និងថា “បញ្ហាណាមួយដែលកើតនៅស៊ីរី នឹងដុតតំបន់ទាំងមូលអោយសន្ធោសន្ធៅជាមិនខាន។
តាមអ្នកវិភាគរបស់ចិន ការអូសបន្លាយអស្ថេរភាពនៅស៊ីរី ដោយមិនទាន់និយាយដល់ការដូរផ្លាស់របប និងការដូរល្បឿនប្រជាធិបតេយ្យទេ នឹងនាំទៅដល់ការបង្កើតជាសម្ព័ន្ធភាពតំបន់មួយថ្មី ហើយដូរផ្លាស់តុល្យភាពអំណាចបច្ចុប្បន្ននៅមជ្ឈិមបូព៌ាជាមិនខាន។ អ្នកវិភាគទាំងនោះ គិតថា វិបត្តស៊ីរី មានការស្មុគ្រស្មាញជាងបញ្ហានៅលីប៊ី ហើយបានព្រមានថា សហគមន៍ អន្តរជាតិគួរតែមានការប្រយ័ត្នប្រយែងអោយមែនទែនក្នុងដំណើរស្រាយបញ្ហានេះ។
ដូចបាននិយាយមកពីខាងដើម មិនមានអ្វីសង្ស័យទៀតទេ ដែលថា ស៊ីរី ក្លាយជាមុខសញ្ញាថ្មី របស់ការវាយប្រហារដោយយោធានាំមុខដោយណាតូ ពិសេសខណៈដែលកាលពីថ្ងៃទី ២៥ វិច្ឆិកា មានព័ត៌មានថា សាធារណរដ្ឋអារ៉ាប់រួមអេមីរ៉ាត បានប្រកាសសូមអោយពលរដ្ឋរបស់ខ្លួនចាកចេញពីស៊ីរី ខណៈដែលកាលបរិច្ឆេទបានចូលដល់។ ស្ថានទូតសហរដ្ឋអាមេរិក ប្រចាំនៅក្រុងដាម៉ាស ក៏បានទូន្មានអោយពលរដ្ឋខ្លួនធ្វើដូចគ្នាដែរ ហើយទួរគី ប្រាប់ពលរដ្ឋខ្លួនអោយជៀសពីការធ្វើដំណើរកាត់តាមស៊ីរី ពេលដែលវិលពី អារ៉ាប៊ី សាអ៊ូឌី វិញ។ តែ ឱសានវាទជាលក្ខខណ្ឌនៃការបញ្ជូនអ្នកសង្កេតការណ៍ ៥០០ នាក់ចូលទៅស៊ីរី បានកន្លងផុតទៅដោយមិនមានការឆ្លើយតបទេ។ រដ្ឋមន្ត្រីការបរទេសទួរគី ប្រាប់រដ្ឋាភិបាល ស៊ីរី ថា “ឱសានវាទជានាទីចុងក្រោយហើយ” ហើយរួមជាមួយនោះ ក៏មានអោយលេចលឺអោយទ្រហ៊ឹងនូវដំណឹងថា កំពុងតែមានការរៀបចំអោយមាន “តំបន់គ្មានការហោះហើរ” ដោយមានការគាំទ្រខាងភស្តុភាពីសហរដ្ឋអាមេរិក។ លោកអ្នកអានអាចចាំថា តំបន់មួយដូចនេះ ជាលេសសំរាប់ការវាយលុកតាមផ្លូវអាកាស នៅលីប៊ី។
តាមសេចក្តីរាយការណ៍អោយដឹងថា ការតានតឹង បានជំរុញអោយរុស្ស៊ី ឆ្លើយតបជាការបំពាក់ អោយស៊ីរី នូវប្រព័ន្ធការពារកាំជ្រួចពិសេស ដែលផលិតសំរាប់ទប់ទល់នឹងយន្តហោះចម្បាំងរបស់សត្រូវ។ ប្រភពនានា នៅស៊ីរី អោយដឹងថា នាវាចម្បាំងរុស្ស៊ី បានចូលទៅដែនទឹកស៊ីរី កាលពីសប្តាហ៍កន្លងទៅ ដើម្បីជាការប្រឈមនឹងការវាយលុកណាមួយដឹកនាំដោយ ណាតូ។ ក្រុងមូស្គូ មិនបញ្ជាក់ថាជាដំណឹងពិត ឬយ៉ាងណាឡើយ។ ដូចដែលបានធ្វើនៅ លីប៊ី មុនការវាយប្រហាររបស់ ណាតូ ដែរ នាវាដឹកយន្តហោះ George H.W. Bush ត្រូវបានដាក់អោយប្រចាំក្នុងទីតាំងនៅផុតពីឆ្នេរស៊ីរីប៉ុន្មានថ្ងៃថ្មីៗ នេះដែរ។
រដ្ឋមន្ត្រីការបរទេសបារាំង Alain Juppé ក៏បានធានាចំពោះកម្លាំស៊ីរីប្រឆាំងថា មហាអំណាច ណាតូ ក៏កំពុងតែមានផែនការធ្វើអន្តរាគមន៍យោធា ដោយបង្កើតអោយមានជា “របៀងមនុស្សធម៌ ឬតំបន់មនុស្សធម៌” ក្នុងនាមការពារជនស៊ីវិល ពីការបំពានដោយរបប al-Assad។ បូកសរុបមកវិញ ទោះបីថា សភាពការណ៍នៅស៊ីរី ដូចជាកាលពីលីប៊ីដែរ ច្បាស់ណាស់កំពុងតែធ្លាក់ចុះទៅក្នុងសង្គ្រាមស៊ីវិល ដោយទាំងសងខាងវាយគ្នាទៅវិញទៅមក មហាអំណាចលោកខាងលិច បានប្រឹងប្រែងរៀបចំឆាកបង្ហាញចលាចលទាំងនោះថាជា អំពើឃោរឃៅតែពីកងទ័ពរបស់ al-Assad។
ចុះសេណារីយ៉ូផ្សេងវិញ។ ក្នុងចំណោមជំរើសជាច្រើន អ្នកវិភាគលោកខាងលិចមួយចំនួនបានគិតពីលទ្ធភាពដែលថាអាចមានការធ្វើរដ្ឋប្រហារ ដោយផ្អែកទៅលើប្រការថាមន្ត្រីយោធាមួយចំនួនធំ ក្នុងនោះមានទាំងមន្ត្រីថ្នាក់ខ្ពស់ មិនសប្បាយចិត្តនឹងការដែលខ្លួនត្រូវរារាំងមិនអោយឡើងសក្តិ មកពីការសំរាំងសក្តិទុកអោយមន្ត្រីស្មោះត្រង់នឹងបក្ស Ba'ath របស់ al-Assad ក៏ចូលរួមដែរ។ ការធ្វើរដ្ឋប្រហារណាមួយក៏ដោយ មិនជាងាយនឹងរៀបចំអោយបានជោគជ័យ គេចផុតពីការប្រុងប្រៀបប្រឆាំងតបពីរបប al-Assad ក្នុងខណៈដែលមានគំរូនៅអេហ្ស៊ីព និងនៅលីប៊ីកន្លងមកថ្មីៗ នេះ៕
