វ៉ាន់ ចាន់វៃ អ្នកប្រដាល់ក្លិបសឹង្ហៈកីឡា ត្រូវគេផ្គូផ្គងឲ្យជួបប្រកួតជាមួយ ឡេះ តើក អ្នកប្រដាល់ក្លិបពុទ្ធសេរីវង្សកីឡា នាល្ងាចថ្ងៃសុករទី២២ ខែកុម្ភៈ ឆ្នាំ២០១៣នៅលើសង្វៀនបាយ័នបឹងស្នោរ។
អ្នកប្រដាល់ជើងចាស់ទាំងពីរនាក់នេះ ពុំដែលប៉ះគ្នាទេពីមុនមក។ ចាន់វៃ គេជាអ្នកប្រដាល់ល្អទាំងកម្លាំងកាយសម្បទា ល្អទាំងស្នៀតប្រដាល់ ពិសេសគឺកណ្តាប់ដៃនិងជង្គង់។ កណ្តាប់ដៃរបស់ចាន់វៃខ្លាំង ដែលធ្វើឲ្យគូប្រកួតពិបាកទប់ណាស់។ គេប្រកួតចុងក្រោយនេះ វាយឈ្នះនន់ ជំនិត អ្នកប្រដាល់ក្លិបមជ្ឈមណ្ឌលកំចាត់មីនកម្ពុជាដោយពិន្ទុ។
ឡេះ តើក ជាអ្នកប្រដាល់ចាស់វស្សា គេវាយគ្មានបណ្តាក់ដៃទេ ទាំងដៃ ទាំងជើង គឺចេញទាំងអស់ ប៉ុន្តែគ្មានផ្លែនិងគ្មានស្នៀតណាដែលច្បាស់លាស់ ដើម្បីផ្ដួលយកឈ្នះគេនោះឡើយ។ តើក គេប្រកួតប្រាំមួយលើកចុងក្រោយនេះ ឈ្នះបានម្តង ស្មើម្តង និងចាញ់៤លើកឯណោះ។ ប្រកួតចុងក្រោយគេ គឺវាយស្មើជាមួយចៅ ផលឌឿ អ្នកប្រដាល់ក្លិបតេជ្ជៈរាជសីហ៍ខេត្តក្រចេះ។
សម្រាប់ការជួបគ្នាលើកនេះ មិនដឹងថាឡេះតើក អាចទប់កណ្តាប់ដៃនិងជើងរបស់វ៉ាន់វៃបានឬអត់នោះទេ ?។ ឡេះ តើក គេមានល្បិចកលក្នុងការប្រកួតច្រើន រាងខ្ពស់ជាងចាន់វៃ តែផ្លែចាញ់ចាន់វៃហើ ។ ចាំមើល តើឡេះ តើក ឈ្នះឬវ៉ាន់ចាន់វៃជាអ្នកឈ្នះ ?។
កែវ វិរៈ អ្នកប្រដាល់ក្លិបគុជសារកីឡា នឹងជួបប្រកួតជាមួយសុខ សុវណ្ណ អ្នកប្រដាល់ក្លិបកងពលតូចលេខ៣១។ វិរៈ មិនធ្លាប់ប៉ះសុវណ្ណទេកន្លងមក។
សុខ សុវណ្ណគេមានកណ្តាប់ដៃល្អ រហ័សរហួន ព្រមទាំងមានភាពវ័យឆ្លាតក្នុងការប្រកួតថែមទៀត។ ម្ល៉ោះហើយ រាល់ការប្រកួតរបស់គេ ពុំ សូវដែលបរាជ័យនោះឡើយ។
កែវ វិរៈ តាមពិតក្បាច់ប្រដាល់របស់គេមិនជាអន់នោះទេ គ្រាន់តែអន់កម្លាំងស៊ុហ្វនៅចុងទឹកប៉ុណ្ណោះ។ នៅក្នុងការប្រកួតកន្លងមក វិរៈវាយខ្លាំងនៅដើមទឹក តែដល់ចុងទឹក បែរជាធ្លាក់ដៃ ធ្វើឲ្យគូប្រកួតយកប្រៀបឈ្នះបានវិញ។
ដូច្នេះ សម្រាប់ការជួបប្រកួតលើកនេះ ប្រសិនបើកែវ វិរៈ គេហ្វឹកហាត់ដិតដល់ កម្លាំងកាយសម្បទារឹងមាំនោះ គឺអាចសង្ឃឹមឈ្នះ។ ប៉ុន្តែលើកនេះ ប៉ះសុខ សុវណ្ណ មើលទៅកែវ វិរៈ ដូចជាគ្មានផ្លូវសង្ឃឹមឈ្នះបាននោះឡើយ។
សួស សីលា អ្នកប្រដាល់ក្លិបរការខ្នុរគុនខ្មែរ ត្រូវគេផ្គូផ្គងឲ្យជួបជាមួយធី តុងហ៊ី អ្នកប្រដាល់ក្លិបសាលវ័ន្តកីឡា។ សីលា ជាអ្នកប្រដាល់ថ្មី ទើបតែឡើងប្រកួតនេះទេ។ មិនដឹងថាសមត្ថភាព បច្ចេកទេសរបស់គេកំរិតណាទេ ដែលមកប៉ះជាមួយធីតុងហ៊ី ដែលជាអ្នកលេងកែងជង្គង់ដ៏ល្អនោះ។
កីឡាការិនីសម សំណាង ក្លិបពន្លឺសាមគ្គីខេត្តបាត់ដំបង នឹងជួបប្រកួតជាមួយកីឡាការិនីសូយ គឹមលៀង ក្លិបអូដឹមកីឡា។ អ្នកប្រដាល់ស្រីពីរនាក់នេះ ធ្លាប់វាយចាញ់ឈ្នះគ្នាទៅវិញទៅមក ដូច្នេះលើកនេះពួកនាងជម្រះបញ្ជីគ្នា ដើម្បីចង់ដឹងថាអ្នកណាជាអ្នកឈ្នះដោយពិតប្រាកដនោះ៕
វិសីទ្ធ
| < មុន | បន្ទាប់ > |
|---|
