សហព័ន្ធកីឡាអត្តពលកម្មកម្ពុជា បានរៀបចំធ្វើសន្និបាតបូកសរុបលទ្ធផលប្រចាំឆ្នាំ២០១១និងលើកទិសដៅអនុវត្តសំរាប់ឆ្នាំ២០១២កាលពីល្ងាចថ្ងៃទី២៨កុម្ភៈ ដោយមានការចូលរួមពីលោក ប៊ុន សុខ ប្រធានសហព័ន្ធកីឡាអត្តពលកម្មកម្ពុជា។
លោក ប៊ុន សុខ បានមានប្រសាសន៍ថា ការងារមួយឆ្នាំកន្លងទៅរបស់សហព័ន្ធកីឡាអត្តពលកម្ម បានដំណើរការទៅដោយជោគជ័យនិងទទួលបានលទ្ធផលល្អប្រសើជាងច្រើន ប៉ុន្តែក៏នៅមានបញ្ហាខ្វះខាតនិងសេសសល់មួយចំនួនដែរ ។ ចំណុចខ្វះខាតនេះ លោកជឿថានៅក្នុងឆ្នាំ២០១២នេះ សហព័ន្ធនឹងខិតខំដោះស្រាយនិងលុបបំបាត់អោយអស់ ។
នៅក្នុងរបាយការណ៍របស់លោកប៉ែន វុទ្ធី អគ្គលេខាធិការសហព័ន្ធកីឡាអត្តពលកម្មបានបង្ហាញថា បានបង្ហាញថា នៅទូទាំងរាជធានី-ខេត្ត ក្លិបកីឡាអត្តពលកម្មមានចំនួន ៤៥ ដែលមានកីឡាករ-កីឡាការិនីសរុបចំនួន ១.៤១៦ នាក់ ក្នុងនោះមានកីឡាការិនី ៧០៨ នាក់ និងចែកចេញជា ៤ វ័យ។ វ័យរៀមច្បង មានអាយុចាប់ពី ២៥ ដល់ ៣៥ឆ្នាំ មានកីឡាករ ៤២០ នាក់ កីឡាការិនីចំនួន ៤២០ នាក់។ វ័យយុវជន មានអាយុចាប់ពី ១៨ ដល់ ១៩ឆ្នាំ កីឡាករមានចំនួន ៧២ នាក់ និងកីឡាការិនី ៧២ នាក់។ វ័យជំទង់ មានអាយុចាប់ពី ១៦ ទៅ ១៧ឆ្នាំ កីឡាករមាន ៧២ នាក់ កីឡាការិនី ៧២ នាក់ និងវ័យប្អូនពៅ មានអាយុក្រោម ១៦ឆ្នាំ កីឡាករមានចំនួន ៧២ នាក់ និងកីឡាការិនី ៧២ នាក់ដែរ។
ចំពោះសកម្មភាពប្រកួតវិញនោះ មានការប្រកួតជាលក្ខណៈអន្តរអនុវិទ្យាល័យ និងវិទ្យាល័យ ដែលមានអនុវិទ្យាល័យ ៨ និងវិទ្យាល័យ ២ ចូលរួម។ ក្នុងនោះមានកីឡាករ ៩៦ នាក់ កីឡាការិនី ១៥០ នាក់។ ការប្រកួតបើកទូលាយ មានអង្គភាពចំនួន ១៤ ចូលរួម គឺវិទ្យាល័យ ៧ អនុវិទ្យាល័យ ២ សាកលវិទ្យាល័យ ១ និងក្លឹប ៤។ ចំពោះវិញ្ញាសាដែលដាក់ឲ្យប្រកួតនោះ រត់ល្បឿន ១០០ ម៉ែត្របុរស-នារី រត់ ១០ គីឡូម៉ែត្របុរស ៥ គីឡូម៉ែត្រនារី លោតកម្ពស់បុរស-នារី ចោលដុំដែកបុរស-នារី។ ក្រៅពីនេះនៅមានការប្រកួតដោយសហការជាមួយនាយកដ្ឋានពាក់ព័ន្ធ ដូចជាការប្រកួតជើងឯកភូមិភាគ រត់ក្នុងព្រឹត្តិការណ៍អបអរនានា និងរត់ពាក់កណ្ដាលម៉ារ៉ាតុងនៅសៀមរាបភ្នំពេញ។
ទន្ទឹមនឹងការត្រួតពិនិត្យឡើងវិញនូវរបាយការណ៍សកម្មភាពការងារ អង្គសន្និបាត ក៏បានតាមដានស្តាប់នូវរបាយការណ៍ហិរញ្ញវត្ថុឆ្នាំ២០១១ និង ផែនការឆ្នាំ២០១២ដែលបង្ហាញដោយលោក ឡោ ម៉េង ដែលជាអគ្គហិរញ្ញិករបស់សហព័ន្ធកីឡាអត្តពលកម្មនោះ ៕
វិសិទ្ធ
| < មុន | បន្ទាប់ > |
|---|
