គ្រោះថ្នាក់​ចរាចរណ៍​ថ្ងៃទី​៣០​មករា​កើតឡើង​១៣​លើក​ស្លាប់​ម្នាក់​របួសធ្ងន់​ស្រាល​២០​នាក់

ថ្ងៃ សុក្រ ទី31 មករា ឆ្នាំ2014 ម៉ោង11:20   ផ្នែក: សន្តិសុខ និង សង្គម    ដោយ:

T-01-31-14-h-full

ភ្នំពេញ ៖ កាលពី​ថ្ងៃទី​៣០ ខែមករា ឆ្នាំ​២០១៤ មាន​ហេតុការណ៍​គ្រោះថ្នាក់​ចរាចរណ៍ នៅ​ទូទាំង​ប្រទេស​កើតឡើង ១៣​លើក (​យប់ ០៦​លើក​) បណ្ដាល​ឲ្យ​មនុស្ស​ស្លាប់​ម្នាក់ (​ប្រុស​) រង​របួស​ធ្ងន់ ១៧​នាក់ (​ស្រី​០៣​នាក់​) និង របួសស្រាល ០៣​នាក់ (​ស្រី​ម្នាក់​) នេះ​បើ​យោង​តាម​របាយការណ៍​ពី​នាយកដ្ឋាន​សណ្ដាប់ធ្នាប់ នៃ​អគ្គស្នងការដ្ឋាន​នគរ​បាល​ជាតិ។

នៅក្នុង​ករណី​គ្រោះថ្នាក់​ចរាចរណ៍​ទាំង ១៣​លើក​នេះ បាន​បង្ក​ឲ្យ​ខូចខាត​យានយន្ត​សរុប ២៣​គ្រឿង ក្នុង​នោះ​ម៉ូតូ ១៥​គ្រឿង រថយន្ត​ធុន​តូច ០៧​គ្រឿង រថយន្ត​ធុន​ធំ ០១​គ្រឿង និង​ថ្មើរជើង ០២​នាក់។

របាយការណ៍​ខាងលើ​ឲ្យ​ដឹង​បន្ត​ទៀត​ថា មូលហេតុ​ដែល​បង្ក​ឲ្យ​កើតមាន​ហេតុការណ៍​គ្រោះថ្នាក់​ចរាចរណ៍ គឺ​បណ្ដាល​មក​ពី​ល្បឿន ០៧​លើក មិន​ប្រកាន់​ស្ដាំ ០១​លើក ប្រជែង​គ្រោះថ្នាក់ ០២​លើក ស្រវឹង ០៣​លើក ក្នុង​នោះ​ជិះ​ម៉ូតូ​គ្រោះថ្នាក់​មិន​ពាក់មួក ២០​នាក់ (​យប់ ១១ នាក់​)

ប្រភព​ព័ត៌មាន​ពី​នាយកដ្ឋាន​សណ្ដាប់ធ្នាប់ នៃ​អគ្គស្នងការដ្ឋាន​នគរ​បាល​ជាតិ​ប្រាប់​បញ្ជាក់​ឲ្យ​ដឹង​ថា រថយន្ត​ដែល​ត្រូវ​ផាកពិន័យ​នៅ​អង្គភាព កាលពី​ថ្ងៃទី​៣០ ខែមករា ឆ្នាំ​២០១៤​នេះ សរុប​មាន​ចំនួន ៥៨​គ្រឿង ក្នុង​នោះ​មាន រថយន្ត​ទេសចរណ៍​គ្រួសារ ២៤​គ្រឿង រថយន្ត​ដឹក​ដំណើរ​ធុន​តូច ១០​គ្រឿង រថយន្ត​ដឹកទំនិញ​ធុន​ធំ ២៤​គ្រឿង។ រថយន្ត​ទាំងអស់​ត្រូវ​បាន​បង់ប្រាក់​ពិន័យ​រួច​នៅ​ស្នងការដ្ឋាន​នគរបាល​ខេត្ត ៣៥​គ្រឿង និង​នៅ​នាយកដ្ឋាន​សណ្ដាប់ធ្នាប់ ២៣​គ្រឿង៕

រ៉ា​វុ​ទ្ធ