កំពង់ធំ ៖ សមត្ថកិច្ចនគរបាលព្រហ្មទណ្ឌនៃស្នងការដ្ឋានខេត្តកំពង់ធំ បាននិងកំពុងព្យាយាមសម្របសម្រួលបញ្ចប់រឿង អ្នកកំដរកូនកំលោះម្នាក់ ដែលសមត្ថកិច្ចនគរបាលក្រុងស្ទឹងសែនឃាត់ខ្លួនខណៈយុវជននេះគ្រាហ៍ភ្ញៀវស្រីម្នាក់អាយុ១៤ឆ្នាំ ទៅសម្ពោធព្រហ្មចារិយបានសម្រេចនៅខាងក្រោយរោងការប្រមាណ៣០ម៉ែត្រនោះ។
ហេតុការណ៍នេះបានកើតឡើងកាលពីវេលាម៉ោង ២៣និង៥នាទីយប់ថ្ងៃទី១៧ ខែកុម្ភៈ ឆ្នាំ២០១៣ នៅខាងក្រោយរោងការមួយស្ថិតក្នុងភូមិកំពង់ធំ ឃុំកំពង់រទេះ ក្រុងស្ទឹងសែន ខេត្តកំពង់ធំ។
យុវជនម្នាក់នេះឈ្មោះ ហួត ប៊ុនហាំ អាយុ២១ឆ្នាំ នៅភូមិកំពង់ស្វាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ត្រូវបានសមត្ថកិច្ចនគរបាលក្រុងស្ទឹងសែនបញ្ជូនទៅស្នងការដ្ឋាននគរបាលខេត្តកំពង់ធំហើយកាលពីល្ងាចថ្ងៃទី១៨ ខែកុម្ភៈ។
លោក វរសេនីយ៍ឯក កែ ខាន់ណារា ស្នងការរងទទួលបន្ទុកនគរបាលព្រហ្មទណ្ឌនៃស្នងការដ្ឋានខេត្តកំពង់ធំបាននិយាយឲ្យដឹងកាលពីព្រឹកថ្ងៃទី១៩ ខែកុម្ភៈនៅស្នងការដ្ឋានថា បទល្មើសនេះពិបាកកំណត់ជាបទល្មើសចាប់រំលោភសេពសន្ថវៈណាស់ ព្រោះអង្គហេតុវាផ្ទុយពីអំណះអំណាងរបស់ដើមចោទ ពោលនៅយប់កើតហេតុនោះ ក្មេងស្រីនេះបានផឹកស៊ីស្រវឹងយ៉ាងចាស់ដៃធ្វើដំណើរទៅផ្ទះមិនរួច ក៏ពឹងពាក់យុវជននេះឲ្យជូនទៅផ្ទះ ខណៈដែលធ្វើដំណើរនោះក្មេងស្រីនេះ ធ្វើដំណើរទ្រេតទ្រោតរហូតដល់ដួល ហើយយុវជននេះក៏ស្រវាឱបនាងក្រោកឡើង ជាមួយនឹងគ្នានោះនាងក៏ឱបយុវជននោះវិញ បណ្ដាលឲ្យមានរឿងហេតុអីចឹងទៅ។ លុះពេលអ្នកស្រុកច្របាច់ភ្លើងពិលឃើញ ក៏ផ្ទះរឿងចាប់រំលោភតែម្ដង។
លោកស្នងការរូបនេះបានអះអាងថា យោងតាមចម្លើយរបស់អ្នកទាំង២គឺទទួលស្គាល់ថា អំពើសេពសន្ថវៈបានសម្រេច ចំពោះសំណុំរឿងនេះលោកព្រះរាជអាជ្ញាអមសាលាដំបូងបានបង្គាប់ឲ្យសមត្ថកិច្ចរបស់លោកពិនិត្យ និងស្រាវជ្រាវចរិតនៃអង្គហេតុ និងអង្គច្បាប់ឲ្យបានច្បាស់លាស់មុននឹងបញ្ជូនទៅអយ្យការនោះ។
ប៉ុន្តែទោះជាយ៉ាងនេះក្ដីមន្ត្រីនគរបាលព្រហ្មទណ្ឌក្រុងស្ទឹងសែនបាននិយាយឲ្យដឹង មុនពេលបញ្ជូនជនសង្ស័យទៅស្នងការដ្ឋានថា យោងតាមចម្លើយនៃកំណត់ហេតុក្នុងសំណុំរឿងនេះគឺបន្ទាប់ពីនាង ថ.ស.ន អាយុ១៤ឆ្នាំនេះ ផឹកស៊ីស្រវឹងស្ទើរបាត់ស្មារតីរហូតនៅម៉ោងប្រហែល២៣យប់នោះ យុវជនឈ្មោះ ហួត ប៊ុនហាំនេះ ក៏ជូននាងទៅក្អួត លុះដើរទៅក្រោយរោងការ ប្រមាណ៣០ម៉ែត្រឃើញឱកាសល្អ ក៏ធ្វើសកម្មភាពចាប់រំលោភរហូតបានសម្រេចតែម្ដង។
ចំណែកមតិអ្នកច្បាប់ខ្លះទៀតនិយាយថា ចំណុចដែលធ្វើឲ្យយុវជននេះពិបាករំដោះខ្លួនពីសំណាញ់ច្បាប់ត្រង់ថា នាងថ.ស.ន ជាអនីតិជន៕
កងចេស្ដា
