អាគារ​មជ្ឈមណ្ឌល​សិក្សា​សហគមន៍​១៣ អបអរ​ខួប​ទី​៧០ របស់​អង្គការ​យូណេស្កូ​ ត្រូវបាន​សម្ពោធ​ដាក់ឲ្យ​ប្រើប្រាស់​

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង15:16   ផ្នែក: ព័ត៌មានជាតិទូទៅ    ដោយ: គឿនវ៉េត​
Nita-21-A-29-Full

សៀមរាប ៖ អង្គការ​សហព័ន្ធ​ជាតិ​នៃ​សមាគម​យូណេស្កូ​ជប៉ុន NFUAJ) បាន​បើកសម្ពោធ​អាគារ​មជ្ឈមណ្ឌល​សិក្សា​សហគមន៍ រហាល នៅក្នុង​ឃុំ​តា​សៀម ស្រុក​ស្វាយ​លើ ខេត្តសៀមរាប។

អាគារ​មជ្ឈមណ្ឌល​សិក្សា​សហគមន៍​រហាល​ គឺជា​អាគារ​មជ្ឈមណ្ឌល​សិក្សា​សហគមន៍ទី​១៣​ហើយ ដែល​អង្គការ​សហព័ន្ធ​ជាតិ​ នៃ​សមាគម​យូណេស្កូ​ជប៉ុន បាន​កសាង​ជូន​ប្រជាពលរដ្ឋ​កម្ពុជា​នៅក្នុង​ខេត្តសៀមរាប ហើយ​ការបើក​សម្ពោធ​អាគារ​មជ្ឈមណ្ឌល​សិក្សា​សហគមន៍ទី​១៣ (​រហាល​)​នេះ ត្រូវ​បាន​ការផ្តល់​កិត្តិយស អញ្ជើញ​កាត់​ខ្សែបូ ដោយ​ឯកឧត្តម​បណ្ឌិត ហង់ ជួនណា​រ៉ុ​នរដ្ឋមន្ត្រីក្រសួង​អប់រំ​យុវជន និង កីឡា ដែល​ក្នុងឱកាស​នោះ​ក៏មាន​វត្តមាន​ផងដែរ​.​លោក ម៉ៅ វុ​ឌ្ឍី អភិបាលរង​ខេត្តសៀមរាប កាលពី​ថ្ងៃទី ២០ ខែកុម្ភៈ ឆ្នាំ​២០១៥។

លោក ណូ​បូ​រុ ណូ​ហ្គុ​ឈិ អគ្គនាយក​អង្គការ​សហព័ន្ធ​ជាតិ​ នៃ​សមាគម​យូណេស្កូ​ជប៉ុន បាន​លើកឡើងថា ដោយហេតុថា សង្គ្រាម ! វា​កើតចេញពី​ក្នុង​ចិត្ត​របស់​មនុស្ស ហេតុនេះ ! គឺ​ពី​ក្នុង​ឌួង​ចិត្ត​របស់​មនុស្ស​នេះហើយ ដែល​យើង​ត្រូវបង្កើត​គំនិត ដើម្បី​ការពារ​សន្តិភាព ! នេះ​គឺជា​ធម្មនុញ្ញ​របស់​អង្គការ​យូណេស្កូ ហើយ​ឆ្នាំនេះ អង្គការ​យូណេស្កូ ប្រារព្ធ​ខួប​ទី​៧០​របស់ខ្លួន ហើយ​លោក បាន​បង្ហាញ​នូវ​ជំនឿ​ចិត្ត​ថា វា​ពិត​ជាមាន​សារសំខាន់ និង​មាន​អត្ថន័យ​ដ៏​ជ្រាលជ្រៅ​ដែល​យើង​បាន​ប្រារព្ធ​ពិធី​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​នូវ អាគារ​មជ្ឈមណ្ឌល​សិក្សា​សហគម​ន៍ទី​១៣(​រហាល​)​នេះ នៅក្នុង​ឆ្នាំ​រំលឹក​ខួប​ទី​៧០ របស់​អង្គការ​យូណេស្កូ។ លោក​បាន​បន្តទៀតថា​ដោយហេតុថា​អក្ខរកម្ម​គឺជា​ការអប់រំ​ដ៏​ចាំបាច់​នៅក្នុង​ក្នុងសង្គម​រស់នៅ ហើយ​ការទទួលបាន​នូវ​ឱកាស​អប់រំ​ដោយ​សេរី និង​ស្មើភាព​គ្នា វា​គឺជា​សិទ្ធិ​មូលដ្ឋាន​របស់​មនុស្ស​ផង​នោះ ដូច្នេះ អង្គការ​យូណេស្កូ បាននិងកំពុង​លើក​កម្ពស់ ការអប់រំ​សម្រាប់​ទាំងអស់គ្នា។ គួរ​បញ្ជាក់ដែរថា កាលពី​ឆ្នាំ ១៩៨៩ អង្គការ​សហព័ន្ធ​ជាតិ​នៃ​សមាគម​យូណេស្កូ​ជប៉ុន ( NFUAJ ) បានចាប់ផ្តើម​អនុវត្ត​កម្មវិធី​មជ្ឈមណ្ឌល​សិក្សា​សហគមន៍ ដើម្បី​គាំទ្រ​ដល់​កម្មវិធី ( ការអប់រំ​ដើម្បី​ទាំងអស់គ្នា របស់​អង្គការ​យូណេស្កូ ក្នុង​គោលបំណង​ផ្តល់ឱកាស​សិក្សា​ដល់​អ្នកក្រីក្រ និង​ងាយ​រងគ្រោះ ដើម្បី​កែប្រែ​ជីវភាព​រស់នៅ​របស់​ពួកគាត់ ហើយ​សម្រាប់​នៅ​ប្រទេស​កម្ពុជា អង្គការ NFUAJ បាន​អនុវត្ត​កម្មវិធី​មជ្ឈមណ្ឌល​សិក្សា​សហគមន៍ នៅក្នុង​ឆ្នាំ​១៩៩៤ ជាមួយ​អង្គការ​យូណេស្កូ​ប្រចាំ​នៅ​រាជធានី​ភ្នំពេញ។ នៅក្នុង​ឆ្នាំ ២០០៦ អង្គការ NFUAJ បាន​បង្កើត​ការិយាល័យ​របស់ខ្លួន​នៅ​ខេត្តសៀមរាប សំដៅ​ពង្រឹង​ការគាំទ្រ​របស់ខ្លួន​ដល់​កម្មវិធី ការអប់រំ​សម្រាប់​ទាំងអស់គ្នា របស់​អង្គការ​យូណេស្កូ នៅ​ខេត្តសៀមរាប។

ក្នុងនាម​លោក ឃឹម ប៊ុន​សុង អភិបាល​នៃ​គណៈ​អភិបាលខេត្ត លោក​ម៉ៅ វុ​ឌ្ឍី ក៏បាន​លើក​ឡើង​ផងដែរ មជ្ឈមណ្ឌល​សិក្សា​សហគមន៍ ពិតជា​មធ្យោបាយ​ដ៏​ប្រសើរ និង មាន​ប្រសិទ្ធិភាព​បំផុត ក្នុង​ការ​បង្កើន​ចំណេះដឹង ទូទៅ​ពហុ​វិស័យ​ដើម្បី​ពង្រីក​នឹង​ពង្រឹងសមត្ថភាព​ប្រជាជន​ក្នុងការ​ទទួលយក​ព័ត៌មាន​ចំណេះដឹង ជំនាញ​សម្រាប់​លើកស្ទួយ​ជីវ​ភា​រស់នៅ​ប្រចាំថ្ងៃ។

ហង់ ជួនណា​រ៉ុ​ន​ បាន​សម្តែង​នូវ​អំណរ​សាទរ​និង កោតសរសើរ​ចំពោះ​អង្គការ​សហព័ន្ធ​ជាតិ​នៃ​សមាគម​យូ​ណេ​ណ្កូ​ជប៉ុន​ដែល​បាន​យកចិត្តទុកដាក់​និង ជួយ​រំលែក​បន្ទុក​របស់​ក្រសួង​អប់រំ​ក្នុងការ​អភិវឌ្ឍន៍​កម្ម​វិធី​អប់រំ​ក្រៅ​ប្រព័ន្ធ​តាមរយៈ​នៃ​គម្រោង មជ្ឈមណ្ឌល​សិក្សា​សហគមន៍​អង្គរ​ដោយមាន​ការឧបត្ថម្ភ​គាំទ្រ​ទាំង​ថវិកា​សម្ភារៈ​និង បច្ចេកទេស​ដល់​មជ្ឈមណ្ឌល​សិក្សា​សហគមន៍​តាំងពី​ឆ្នាំ​២០០៦ ដែល​សមិទ្ធផល​ទាំងនោះ សុទ្ធតែជា​ជំនួយឥតសំណង របស់​ប្រជាជន​ជប៉ុន​ជា​មិត្ត​។ លោក​បាន​បញ្ជាក់ថា ក្រសួង​មាន​ផែនការ​បង្កើត​មជ្ឈមណ្ឌល សិក្សា​សហគមន៍​ឲ្យ​បាន​គ្រប់​ឃុំ​សង្កាត់​ពីព្រោះ​តាមរយៈ​មជ្ឈមណ្ឌល​សិក្សា​សហគមន៍ យើង​អាចអនុវត្ត​នូវ​កម្មវិធី​អប់រំ​ក្រៅ​ប្រព័ន្ធ​ជាច្រើន​ដើម្បី​ផ្តល់​ចំណេះដឹង​បំណិន​ជីវិត និង​ជំនាញ​មុខរបរ​ជូន​បងប្អូន​ប្រជាពលរដ្ឋ និង​ជាទី​កន្លែង​ដែល​អាជ្ញាធរ​មូលដ្ឋាន​ស្ថាប័ន និង​អង្គការ​ដៃគូ​អភិវឌ្ឍន៍​នានា អាច​ផ្សព្វផ្សាយ​នូវ​ព័ត៌មាន​ថ្មីៗ ប្លែកៗ ទាំង​ក្នុង​និង​ក្រៅប្រទេស ជូន​ដល់​សហគមន៍​ផងដែរ។ ឆ្លៀត​ក្នុងឱកាស​នោះ ជាមួយនឹង​ការឧបត្ថម្ភ​ថវិកា​មួយចំនួន​លោក​បាន​អំពាវនាវ​សូម​ឲ្យ​ស្ថាប័ន​អង្គការ​ដៃគូ​អភិវឌ្ឍន៍​នានា អាជ្ញាធរ​មូលដ្ឋាន​សប្បុរស​ជន​ និង​ប្រជាពលរដ្ឋ​ទាំងអស់​ចូលរួម​ឧបត្ថម្ភ​គាំទ្រ​ទៅតាម​លទ្ធភាព ដើម្បី​ទ្រទ្រង់​មជ្ឈមណ្ឌល​សិក្សា​សហគមន៍​រហាល ឲ្យ​មាន​ដំណើរការ និង​អភិវឌ្ឍ​រីកចម្រើន​តរៀង​ទៅ៕

Nita-21-A-30-FullNita-21-A-27-FullNita-21-A-28-Full