បុណ្យ​ចូល​ឆ្នាំ​ចិន​៣​ថ្ងៃ​មាន​មនុស្ស​២១​នាក់​ស្លាប់ និង​១៣១​នាក់ របួសធ្ងន់​ស្រាល​ដោយ​គ្រោះថ្នាក់​ចរាចរណ៍

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង14:48   ផ្នែក: សន្តិសុខ និង សង្គម    ដោយ: សំអឿន​

M21-02-15-p

ភ្នំពេញ​ ៖ ​ពិធីបុណ្យ​ចូលឆ្នាំ​ចិន​ក្នុង​រយៈពេល​៣​ថ្ងៃ​គឺ​ចាប់ពី​ថ្ងៃ​ទី​១៨ , ១៩ និង​ថ្ងៃ​ទី​២០ ខែ​កុម្ភៈ​ឆ្នាំ​២០១៥ គ្រោះថ្នាក់​ចរាចរណ៍ បាន​សម្លាប់​មនុស្ស ចំនួន​២១​នាក់ និង​របួសធ្ងន់ និង​ស្រាល ចំនួន ១៣១ នាក់។

ចំនួន​នេះ​បើ​ធៀប​នឹង ឆ្នាំមុនៗ​ឃើញ​ថា​មាន​ចំនួន​តិច ជាង ដោយ​ឆ្នាំ​២០១៤ មាន​អ្នក​ស្លាប់ ប្រមាណ ៤០​នាក់ នៅ​ក្នុង​ឆ្នាំ​២០១៣ មាន​៦៣​នាក់ និង​នៅ​ក្នុង​ឆ្នាំ​២០១២ មាន​ចំនួន​៣៧​នាក់។

យោង​តាម​របាយការណ៍​របស់ នាយកដ្ឋាន​សណ្ដាប់ធ្នាប់ នៃ​អគ្គស្នងការដ្ឋាន នគរបាល​ជាតិ បាន​ឲ្យ​ដឹង​ថា ក្នុង​រយៈពេល​៣​ថ្ងៃ ពីថ្ងៃ​១៨, ១៩ ដល់​ថ្ងៃ ២០ ខែ​កុម្ភៈ ឆ្នាំ​២០១៥ គ្រោះថ្នាក់​ចរាចរណ៍ បាន​ធ្វើ​ឲ្យ​មនុស្ស​ស្លាប់ ២១​នាក់ និង​រង​របួស ១៣១​នាក់។

របាយការណ៍ បាន​បង្ហាញ​ថា នៅ​ថ្ងៃ​ទី​១៨ ខែ​កុម្ភៈ មាន​គ្រោះថ្នាក់​ចរាចរណ៍​កើតឡើង នៅ​ទូទាំងប្រទេស​ចំនួន ១០​លើក បណ្ដាល​ឲ្យ​មនុស្ស ស្លាប់​ចំនួន ៥​នាក់ របួសធ្ងន់ ៥​នាក់ និង​របួសស្រាល​១១​នាក់​។ នៅ​ថ្ងៃ​ទី​១៩ ខែ​កុម្ភៈ មាន​គ្រោះថ្នាក់​ចរាចរណ៍ នៅ​ទូទាំង​ប្រទេស ចំនួន ៣៤​លើក បណ្ដាល​ឲ្យ​មនុស្ស ស្លាប់​ចំនួន ៩​នាក់ របួសធ្ងន់ ៥៧​នាក់ និង​របួសស្រាល​២៤​នាក់​…​និង​នៅ​ថ្ងៃ​ទី​២០ ខែ​កុម្ភៈ ​ មាន​គ្រោះថ្នាក់​ចរាចរណ៍ នៅ​ទូទាំង​ប្រទេស​ចំនួន​២២​លើក​បណ្ដាល​ឲ្យ​មនុស្ស​ស្លាប់​ចំនួន​៧​នាក់ ​របួសធ្ងន់​១៩​នាក់ និង​របួសស្រាល​១៥​នាក់៕