ព្រះមហាក្សត្រ ៖ សុខភាព​ផ្លូវចិត្ត គឺជា​កត្តា​សំខាន់​មិនអាច​ខ្វះ​បាន​(Update)

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង14:43   ផ្នែក: ព័ត៌មានជាតិទូទៅ    ដោយ: ស្នាយពល​
Nita-21-A-24-Full

ភ្នំពេញ ៖ នៅក្នុង​ពិធី​ប្រារព្ធ​ខួប​២០​ឆ្នាំ និង​សម្ពោធ​អគារ​ព្យាបាល​ជំងឺផ្លូវចិត្ត​របស់ អង្គការ​ចិត្ត​សង្គម​អន្តរ​វប្បធម៌​កម្ពុជា (TPO-Cambodia) ស្ថិតក្នុង​ខណ្ឌ​សែន​សុខ រាជធានី​ភ្នំពេញ ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជា​ណាកច្រកម្ពុជា​បាន​មាន​ព្រះ​រាជបន្ទូល​ថា សុខភាព​ផ្លូវ ចិត្ត​គឺជា​កត្តា​សំខាន់​មិនអាច​ខ្វះ​បាន នៅក្នុង​ជីវភាព​ប្រចាំថ្ងៃ​របស់​មនុស្ស​គ្រប់ៗ រូបនោះ​។​

ព្រះករុណា​ជា​អម្ចាស់ជីវិតលើត្បូង ដែល​យាង​ជា​ព្រះរាជាធិបតីភាព​ដ៏​ខ្ពង់ ខ្ពស់បំផុត​ក្នុង​ពិធី​សម្ពោធ​សមិទ្ធផល ដែលជា​ជំនួយ​ដ៏​ថ្លៃថ្លា​របស់​ប្រជាជន​នៃ​ប្រ ទេស​ហូ​ឡង់ តាមរយៈ​អង្គការ TCCO សម្រាប់​ព្យាបាល និង​ថែទាំ​សុខភាព​ផ្លូវ ចិត្ត​ជូន​ប្រជារាស្ត្រ​កម្ពុជា មាន​ព្រះរាជបន្ទូល​ថា «​យើង​មាន​សុខភាព​ល្អ ហើយក៏ ត្រូវមាន​សុខភាព​ផ្លូវ​ចិត្តល្អ​ផងដែរ​» ទើប​រស់នៅ​ទទួលបាន​សុភមង្គល អាច​រៀនសូត្រ​អភិវឌ្ឍន៍​ខ្លួន និង​ប្រកបមុខរបរ​ចិញ្ចឹមជីវិត​តាម​សមត្ថភាព​របស់ខ្លួន។ ផ្លូវ កាយ និង​ផ្លូវចិត្ត​គឺជា​ធាតុ​មិនអាច​ផ្តាច់ចេញ​ពីគ្នា​បានឡើយ ពេលណា​ផ្លូវកាយ មាន​បញ្ហា ឬ​មាន​ជំងឺ វា​ក៏​អាច​ប៉ះ​ពាល់​ដល់​ផ្លូវចិត្ត ហើយ​ពេលណា​ផ្លូវចិត្ត​មាន បញ្ហា ឬ​មាន​ជំងឺ​វា​ក៏​ប៉ះពាល់​ដល់​ផ្លូវកាយ​វិញ​ផងដែរ។ ចំណងទាក់ទង​នេះ​គឺ​ឆ្លុះ បញ្ចាំង​ឱ្យឃើញថា ការផ្តោត​ការយកចិត្តទុកដាក់​ទាំ​ង​សុខភាព​ផ្លូវកាយនិង​សុខភាព​ផ្លូវចិត្ត គឺជា​កត្តាចាំបាច់​ដូចគ្នា​ដែល​មិនអាច​ខ្វះ​បាន ដើម្បីឱ្យ​ប្រជារាស្ត្រ កម្ពុជា​ទទួលបាន​នូវ​សុខុមាលភាព​ពេញលេញ។

នៅ​ប្រទេស​កម្ពុជា បន្ទាប់ពី​របប​ប្រល័យពូជសាសន៍​ខ្មែរក្រហម និង សង្គ្រាមស៊ីវិល​ជាង​៣​ទសវត្សរ៍​បានបញ្ចប់ ប្រទេសជាតិ​បាន​រង​ការ​ខូច​ខ្ទេចខ្ទាំ យ៉ាងដំណំ ដែល​បញ្ហា​នេះ​នាំឱ្យ​ប៉ះពាល់​ដល់​សុខុមាលភាព​របស់​ប្រជារាស្ត្រ​ទូ ទៅទៀត​ផង។ ព្រះករុណា​ជា​អ​ម្ចាស់ជីវិតលើត្បូង​មាន​ព្រះរាជ​បន្ទូល​ថា ប្រវត្តិ សាស្ត្រ​ដ៏​ជូរចត់ និង​តក់ស្លុត​នេះ​ជា​ព្រឹត្តិការណ៍​ប៉ះទង្គិច​ផ្លូវ​យ៉ាងធ្ងន់ធ្ងរ ដែល​បាន ធ្វើ​ឱ្យ​ប្រជារាស្ត្រ​ខ្មែរ ដែល​នៅ​រស់រានមានជីវិត​ប្រឈមមុខ​នឹង​បញ្ហា​ផ្លូវចិត្ត​សង្គម និង​បញ្ហា​ផ្លូវចិត្ត​ជា​ច្រើន។ នៅក្នុង​ព្រះរាជ​សុន្ទរកថា ព្រះករុណា​ព្រះមហាក្សត្រ​ បានកត់សម្គាល់​អំពី របាយការណ៍​របស់​លោក​បណ្ឌិត ឈឹម សុធា​រ៉ា នាយក​ប្រតិបត្តិ​អង្គការ​ធី​ភី​អូ ដែល​បាន​លើកឡើងថា ផលប៉ះ​ពាល់​ទាំងនោះ​បាន​លេចចេញ​ជា​អំពើហិង្សា ផ្នែក​យេនឌ័រ ការប្រើប្រាស់​គ្រឿង​ស្រវឹង ឬ​គ្រឿងញៀន និង​ជំងឺផ្លូវចិត្ត​ដែល​បង្ក ជា​ភាព​អសកម្ម និង​បញ្ហា​សង្គម​ផ្សេងៗ ហើយ​បាន​ប៉ះពាល់​ដ៏​ខ្លាំងក្លា​ដល់​ការ​អភិវឌ្ឍ​សង្គមជាតិ​យើង។ ព្រះរាជា​មាន​ព្រះរាជបន្ទូល​ថា ស្ថិតក្នុង​ស្ថានភាព​ដូច្នេះ ការយកចិត្តទុក​ដាក់​ទៅលើ​វិស័យ​សុខភាព​ផ្លូវចិត្ត​ពិតជា​ចាំបាច់ និង​មាន​សារៈ​សំ ខាន់​យ៉ាងខ្លាំង​ក្នុង​ការជួយ​ប្រជា​រាស្ត្រ​ទាំងនោះ ឱ្យបាន​ធូរស្រាល​ពី​បញ្ហា​ផ្លូវចិត្ត និង​ចិត្ត​សង្គម ដើម្បីឱ្យ​ពួកគាត់​មានលទ្ធភាព​ចូលរួម ក្នុង​ដំណើរការ​កាត់បន្ថយ ភាពក្រីក្រ ដែល​រាជរដ្ឋាភិបាល​កម្ពុជា​កំពុង​យកចិត្តទុកដាក់ ពីព្រោះ​នៅ​ពេល​ប្រជារាស្ត្រ​មាន​សុខភាព​ផ្លូវចិត្ត​នឹង​ជួយ​បង្កើន​ផលិតភាព និង​ជួយ​ពន្លឿន​ដល់​ការ អភិវឌ្ឍ​សេដ្ឋ​កិច្ចជាតិ​ផងដែរ។

ព្រះមហាក្សត្រ ដែល​ដង្ហែ​ព្រះរាជដំណើរ​ដោយ​សម្តេចចៅហ្វា​វាំង គង់ សំអុល ឧបនាយក​រដ្ឋមន្ត្រី រដ្ឋមន្ត្រីក្រសួង​ព្រះបរមរាជវាំង​នោះ បាន​ថ្លែង​អំណរ គុណ​ចំពោះ​អង្គការ TPO-Cambodia ដែល មាន​ឯកទេស​ផ្នែក​សុខភាព​ផ្លូវចិត្ត និង​មានបទពិសោធន៍​បានរួម​ចំណែក​ជាមួយ​រាជរដ្ឋាភិបាល​កម្ពុជា ដើម្បី​ឆ្លើយ តប​ទៅនឹង​សេចក្តីត្រូវការ​ក្នុងការ​ថែទាំ និង​ព្យាបាល​បញ្ហា​ចិត្ត​សង្គម និង​សុខភាព​ផ្លូវចិត្ត​ជូន​ប្រជារាស្ត្រ​កម្ពុជា ជាពិសេស​ជូន​បងប្អូន​ដែល​រស់នៅ​តំបន់​ជន បទ​ដាច់ស្រយាល។ ព្រះករុ​ណា​ជា​អ​ម្ចាស់ជីវិតលើត្បូង​មាន​ព្រះរាជបន្ទូល​ថា សកម្មភាព​ដ៏​សំខាន់​នេះ ជាការ​ចូលរួមចំណែក​ស្តារ និង​ពង្រឹង​វិស័យ​សុខា​ភិ បាល​កម្ពុជា ដែល​កំពុង​យកចិត្តទុកដាក់​ពី​សុខភាព​ផ្លូវកាយ និង​សុខ​ភាព​ផ្លូវចិត្ត របស់​ប្រជាជន​កម្ពុជា។ ខ្ញុំ​សូម​សំណូមពរ​ដល់​ប្រទេស​ម្ចាស់ជំនួយ​ទាំងអស់ សូមមេត្តា​បន្ត​ផ្តល់ជំនួយ ព្រមទាំង​ផ្តល់​ការគាំទ្រ​បន្ថែមទៀត​ដល់​អង្គការ TPO-Cambodia ។ ខ្ញុំ​ក៏​សូម​សំណូមពរ​ឱ្យ​ក្រសួងសុខាភិបាល ព្រមទាំង​ក្រសួង ស្ថាប័ន​ពាក់ព័ន្ធ​នានា មេត្តា​បន្ត​គាំទ្រ និង​បង្កើន​កិច្ចសហ​ប្រតិបត្តិការ​ជាមួយ​អង្គ ការ TPO-Cambodia ក្នុង​បេសកកម្ម​ផ្តល់​ការគាំទ្រ និង​ថែទាំ​សុខភាព​ផ្លូវចិត្ត និង ចិត្ត​សង្គម​ដល់​ប្រជារាស្ត្រ​កម្ពុជា​ឱ្យ​កាន់​តែមាន​ប្រសិទ្ធភាព​។​

អង្គការ TPO-Cambodia បាន​ចាប់បដិសន្ធិ​នា​ខែកុម្ភៈ​ឆ្នាំ​១៩៩៥ ដែលជា សាខា​មួយ​របស់​អង្គ​ការ​ធី​ភី​អូ អន្តរជាតិ មកពី​ទីក្រុង​អាំ​ស្ទែ​ដាំ ប្រទេស​ហូ​ឡង់។ អង្គការ​នេះ​បង្កើតឡើង ដើម្បី​ឆ្លើយតប​ទៅ​នឹង​តម្រូវការ​របស់​ប្រជាជន​កម្ពុជា​ក្នុង ការថែទាំ និង​ព្យាបាល​បញ្ហា​ផ្លូវចិត្ត ដែលជា​ផលវិបាក​នៃ​សង្គ្រាមស៊ីវិល និង​របប ប្រល័យពូជសាសន៍។ នៅ​ឆ្នាំ​២០០០​អង្គការ​ធី​ភី​អូ អន្តរជាតិ​បាន​ប្តូរ​មកជា​អង្គការ​ក្នុងស្រុក ដែល​ក្នុងនោះ​អ្វីៗ​ទាំងអស់ ​គឺ​មិន​ស្ថិតនៅក្រោម​ការគ្រប់គ្រង​របស់ អង្គការ​ធី​ភី​អូ អន្តរជាតិ​ទៀត​ទេ។ ចាប់ពីពេលនោះ​មក បុគ្គលិក​កម្ពុជា​ទាំងអស់ ទាំង​អ្នកបច្ចេកទេស អ្នកជំនាញ និង​អ្នកគ្រប់គ្រង​រដ្ឋបាល គឺ​សុទ្ធតែជា​ជនជាតិ កម្ពុជា ដោយ​គ្រាន់តែ​ត្រូវការ​ទីប្រឹក្សា​បរទេស ក្នុង​រយៈពេល​កំណត់​មួយ​តែ ប៉ុណ្ណោះ។

លោក​បណ្ឌិត ឈឹម សុធា​រ៉ា បាន​រាយការណ៍​ឱ្យដឹងថា យើង​ជា​អ្នកបង្កើត ចក្ខុវិស័យ និង​ជា​អ្នករក​ថវិកា ដើម្បី​អនុវត្តន៍​នូវ​បេសកកម្ម​របស់​យើង​រហូតមក ដល់​សព្វថ្ងៃនេះ។ លោក​បញ្ជាក់ថា អគារ​ដែល​បាន​សម្ពោធ​នេះ​ចំណាយ​ថវិកា សរុប​ចំនួន​៣៦៧.៦៧៦,៣៣​ដុល្លារ ក្នុងនោះ​ចំនួន​១៣២.០០០​ដុល្លារ​ត្រូវបាន​ចំ ណាយ​ទៅលើ​ការទិញ​ដី និង​ចំនួន​២៣៥,៦៧៦​ដុល្លារ​ចំណាយ​សម្រាប់​សំណង់។ នៅក្នុង​នោះ​យើង​ក៏មាន​ថវិកា​សប្បុរស​ជនបរទេស​ចំនួន​១១.៣១៤,៧៥​ដុល្លារ និង​ថវិកា​របស់​អង្គការ TPO-Cambodia ចំនួន​១៨.៨០៨,៥៥​ដុល្លារ​ផងដែរ​។ អគារ​ដែល​បាន​សម្ពោធ​ចែកចេញ​ជា​៥​ជាន់​គឺ ជាន់​ផ្ទាល់​ដី​មាន​បន្ទប់​ពិ គ្រោះ​ជំងឺ និង​ផ្តល់​ប្រឹក្សា​លក្ខណៈ​បុគ្គល​ចំនួន​៨​បន្ទប់។ ជាន់​ទី​១​មាន​បន្ទប់​ប្រជុំ ១ ដែល​អាច​ទទួល​មនុស្ស​បាន​រហូតដល់​៣០​នាក់ និង​មាន​ការិយាល័យ​ចំនួន​៤ សម្រាប់​ផ្នែក​រដ្ឋបាល ហិរញ្ញវត្ថុ និង​ផ្នែក​ស្រាវជ្រាវ​-​តាមដាន និង​វាយតម្លៃ។ ជាន់​ទី​២ មាន​បន្ទប់​ការិយាល័យ​ចំនួន​៣ សម្រាប់​គម្រោង និង​បន្ទប់​ញ៉ាំ​អាហារ រួមគ្នា ។ បន្ទប់​នេះ​ក៏​ប្រើ​សម្រាប់ធ្វើ​ការ​ព្យាបាល​តា​ម​បែប​ចិត្តសាស្ត្រ​ជា​ក្រុម ឬ សម្រាប់​អនុវត្តន៍​ក្រុម​ជួយ​ខ្លួនឯង​ផងដែរ។ ជាន់​ទី​៣ មាន​ការិយាល័យ​ចំនួន​៤ សម្រាប់​គម្រោង និង​មាន​បណ្ណាល័យ​សម្រាប់​អាន​សៀវភៅ​១ និង​ជាន់​ទី​៤ គឺជា សាល​ប្រជុំ​ធំ ដែល​អាច​ទទួល​មនុស្ស​រហូតដល់​១០០​នាក់ ។ សាលប្រជុំ​នេះ​គឺជា បន្ទប់​សម្រាប់ធ្វើ​សិក្ខាសាលា សម្រាប់​ការបណ្តុះបណ្តាល ក៏ដូចជា​បន្ទប់​សម្រាប់ ព្យាបាល​តាមបែប​ចិត្តសាស្ត្រ​ជា​ក្រុម​ផងដែរ​។​

ក្រៅពី​ប្រោស​ព្រះរាជទាន​ព្រះរាជ​ទ្រព្យ​ចំនួន​៥.០០០​ដុល្លារ​ឧបត្ថម្ភ ដល់ សកម្មភាព​របស់​អង្គការ TPO-Cambodia ព្រះមហាក្សត្រ​ក៏បាន​សព្វ​ព្រះរាជ​ហ​ឫ ទ័យ​ប្រោស​ព្រះរាជទាន ព្រះរាជ​អំណោយ​ដល់​បុគ្គលិក​ពេទ្យ​ចំនួន​៤៥​នាក់ ម្នាក់ ទទួលបាន​អាវយឺត​មាន​ស្លាក​ព្រះ​រាជអំណោយ​ព្រះករុណា ព្រះបាទ​សម្តេចព្រះ បរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​ចំនួន​១ និង​ថវិកា​ចំនួន​៥០.០០០​រៀល។ និស្សិត​សាកលវិទ្យាល័យ​ភូមិន្ទ​ភ្នំពេញ​ចំនួន ១៣០​នាក់ ក្នុង​ម្នាក់ៗ​ទទួលបាន​អាវយឺត​មាន​ស្លាក​ព្រះ​រាជអំណោយ​ព្រះករុណា ព្រះបាទ​សម្តេច​ព្រះបរម​នាថ នរោត្តម សីហមុនី ព្រះមហាក្សត្រ​នៃ​ព្រះរាជា​ណា ចក្រ​កម្ពុជា​ចំនួន​១ និង​ថវិកា​ចំនួន​៣០.០០០​រៀល។ ក្រុម​របាំ​ចំនួន​១១​នាក់ ក្នុង ម្នាក់​ទទួលបាន​សារុង​១ និង​ថវិកា​ចំនួន​៥០.០០០​រៀល ។ អ្នកជំងឺ​ចំនួន​៧០​នាក់ ក្នុង​ម្នាក់​ទទួលបាន​សារុង​១ អាវយឺត​មាន​ស្លាក​ព្រះរាជ​អំណោយ​ព្រះករុណា ព្រះ បាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ កម្ពុជា​ចំនួន​១ និង​ថវិកា​ចំនួន​៣០.០០០​រៀល និង​នារី​ថ្វាយ​ផ្កា​ចំនួន​៤​នាក់ ក្នុង ម្នាក់​សារុង​១ និង​ថវិកា​១០០.០០០​រៀល​៕​

Nita-21-A-23-FullNita-21-A-22-Full