សៀមរាប ៖ ក្រោយពីអង្គភាពអធិការកិច្ចរបស់ឧត្តមក្រុមប្រឹក្សា នៃអង្គចៅក្រម ត្រូវបានបង្កើតឡើងតាមអនុក្រឹត្យលេខ១៤៤អនក្រ.បកចុះថ្ងៃទី១១ខែកញ្ញាឆ្នាំ២០១២ របស់រាជរដ្ឋាភិបាលនៃព្រះរាជាណាចក្រកម្ពុជាតាមសំណើសុំរបស់សហប្រធានកំណែទម្រង់ច្បាប់ និងប្រព័ន្ធតុលាការឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និង លោក ឌិត មុន្ទី ប្រធានតុលាការកំពូល លោកបណ្ឌិត ជីវ កេង សមាជិកនៃឧត្តមក្រុមប្រឹក្សាចៅក្រម និងជាប្រធាននៃអង្គភាពអធិការកិច្ច។
អង្គភាពបាននិងកំពុងបំពេញបេសកកម្មរបស់ខ្លួនក្នុងការចុះផ្សព្វផ្សាយ អំពីមូលហេតុនៃការបង្កើត និង តួនាទីភារកិច្ចរបស់អង្គភាពអធិការកិច្ច ជូនដល់ សាលាជម្រះក្តីរាជធានី ខេត្ត ព្រមទាំងការស្វែងយល់ពីបញ្ហាប្រឈមនានាដែលកំពុងកើតមាននៅតាមបណ្តាសាលាជម្រះក្តីនានា។
ជាក់ស្ដែងនាព្រឹកថ្ងៃទី១៨ ខែកុម្ភៈ ឆ្នាំ២០១៣ មានបើកធ្វើអធិការកិច្ចនៅអយ្យការ និង សាលាដំបូងខេត្តសៀមរាប ក្រោមកិច្ចដឹកនាំរបស់លោក សេង ប៊ុនឃាង អនុប្រធានអង្គភាពអធិការកិច្ច ព្រមទាំងអស់លោក លោកស្រីជាមន្ត្រីអង្គភាពអធិការកិច្ច និង ដោយមានការចូលរួម ពីចៅក្រមតុលាការ ចៅក្រម អយ្យការ ក្រឡាបញ្ជី និង មន្ត្រីសាលាដំបូងខេត្តផងដែរ ។
ក្នុងកិច្ចដំណើរការធ្វើអធិការកិច្ចនោះក្នុងនាមលោកបណ្ឌិត ជីវ កេង ប្រធាននៃអង្គភាពអធិការកិច្ច លោក សេង ប៊ុនឃាង ក៏បានជម្រាបជូនអង្គពិធីទាំងមូល អស់លោក លោកស្រីជាចៅក្រម អយ្យការ ក្រឡាបញ្ជី និង មន្ត្រីសាលាដំបូងខេត្តសៀមរាប ស្តីពីប្រវត្តិ និង គោលបំណង នៃការបង្កើតអង្គភាព អធិការកិច្ច ព្រមទាំងបញ្ជាក់ពីតួនាទី សិទ្ធិអំណាច និង វិធានការរបស់អង្គភាព ជាគោលដៅក្នុងការដាស់តឿន រំលឹក កែលំអ ចំពោះចៅក្រមគ្រប់រូបគោរពឲ្យបាននូវក្រមសីលធម៌ និង ការអនុវត្តច្បាប់ឲ្យបានម៉ឺនម៉ាត់ ក្នុងការបំពេញការងារមុខវិជ្ជាជីវៈរបស់ខ្លួន ដើម្បីចៀសវាងនូវរាល់ការប្រព្រឹត្តិអំពើប្រាស់ចាកផ្ទុយពីច្បាប់ ក្នុងការដោះស្រាយរឿងក្តីនានា ។ ក្នុងនោះលោកក៏បានបញ្ជាក់ថា ការធ្វើអធិការកិច្ចនេះ បើសិនជាចៅក្រមរូបណា ត្រូវបានរក ឃើញថា មានកំហុសឆ្គងនោះនឹងត្រូវប្រឈមមុខនឹងក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម និង ជាយថាហេតុ ទណ្ឌកម្មព្រហ្មទណ្ឌទៀតផង ។ លោក សេង ប៊ុនឃាង ក៏បានជម្រាបទៀតថា អ្នកចូលរួមទាំងអស់ អំពីសមិទ្ធផលវិជ្ជមានមួយចំនួន ដែលថ្នាក់ដឹកនាំបានដោះស្រាយ សំខាន់ទាក់ទងទៅនឹងការបំពេញនូវកង្វះខាតក្រឡាបញ្ជី ដែលជាបញ្ហាតម្រូវការចាំបាច់ និងបន្ទាន់ សម្រាប់សាលាដំបូង និង អយ្យការអមសាលាដំបូង នៅ តាមបណ្តាខេត្តឆ្ងាយជាប់ព្រំដែនជាដើម ។ ក្នុងនោះដែរលោកក៏បានរំលឹកផងដែរ ដល់អង្គពិធីទាំងមូល ដោយបានបញ្ជាក់ថា ដើម្បីអនុវត្តតាមយុទ្ធសាស្ត្រចតុកោណ ដំណាក់កាលទី២ របស់រាជរដ្ឋាភិបាល អាណត្តិទី៤ ស្តីពីការ កំណែទម្រង់ច្បាប់ និង ប្រព័ន្ធយុត្តិធម៌ ព្រមទាំងផែនការយុទ្ធសាស្ត្រកំណែទម្រង់ច្បាប់ និង ប្រព័ន្ធយុត្តិធម៌ លើការពង្រឹង ការការពារសិទ្ធិ និង សេរីភាពរបស់បុគ្គល ការធ្វើឲ្យប្រសើរឡើង គុណភាពនៃដំណើរការរឿងក្តី និង សេវាពាក់ព័ន្ធ ពង្រឹងសេវាកម្មយុត្តិធម៌ និង ស្ថាប័ន វិស័យច្បាប់ និង តុលាការឲ្យបំពេញអាណត្តិរបស់ខ្លួនឲ្យបាន សម្រេចនោះ អង្គភាពអធិការកិច្ច គឺជាសេនាធិការផ្ទាល់របស់ក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម ក្នុងការធ្វើឲ្យសម្រេចបាននូវយុទ្ធសាស្ត្រកំណែទម្រង់របស់រដ្ឋ ដែលជាទិសដៅធ្វើឲ្យព្រះរាជាណាចក្រកម្ពុជា ក្លាយជានីតិរដ្ឋ ។
បន្តមកក្រុមការងារអធិការកិច្ច បានចាប់ដំណើរការពិនិត្យជាក់ស្តែង អំពីការងាររដ្ឋបាល បច្ចេកទេស របស់តុលាការ និង អយ្យការ ព្រមទាំងគោរពទៅតាមក្រមសីលធម៌របស់ខ្លួនផងដែរ ៕
គឿនវ៉េត
