ភ្នំពេញ ៖ របាំងដែកបែងចែកទ្រូងផ្លូវចំនួន៦ផ្ទាំងបានបាក់រាបដល់ដី ក្រោយពីមានហេតុការណ៍គ្រោះថ្នាក់ចរាចរ ដោយរថយន្ត១គ្រឿងម្ចាស់វាស្រវឹងធ្លាក់ភ្នែកបើកមកបុកយ៉ាងពេញទំហឹងរួចមកនោះ ហើយក្រោយពេលកើតហេតុ រថយន្តបានបើករត់ទាំងបែកកង់មុខខាងឆ្វេង រហូតដល់ផ្លូវលេខ៥៦៦ សង្កាត់បឹងកក់ទី១ ខណ្ឌទួលគោក ទើបសមត្ថកិច្ចឃាត់បាន។ ប៉ុន្តែអ្វីដែលជាការកត់សំគាល់នោះនៅពេលសមត្ថកិច្ចប៉ូលិសឃាត់បានទាំងមនុស្សនិងរថយន្តបែរជាអ្នកបើកបររថយន្តបង្កនោះរករឿងប៉ូលិសនិងអ្នកកាសែតដែលចូលទៅផ្តិតរូបភាពនោះថែមទៀត។
ហេតុការណ៍នេះ កើតឡើងនៅវេលាម៉ោង១១ និង៣០នាទីយប់ថ្ងៃទី១៨ កុម្ភៈ នៅចំណុចមុខវត្តនាគវ័នផ្លូវសហព័ន្ធរុស្សី សង្កាត់ផ្សារដេប៉ូទី៣ ខណ្ឌទួលគោក។
ប្រភពព័ត៌មានពីសមត្ថកិច្ចបានឲ្យដឹងថា រថយន្តបង្កជាប្រភេទរថយន្តឡិចស៊ីស ES300 ពណ៌ត្រីឆ្លូញ បើកបរបុរសម្នាក់ស្រវឹងស្រាជោកជាំ ឈ្មោះ ប៉េង ហួត ភេទប្រុស អាយុ ៣៤ឆ្នាំ មានទីលំនៅសង្កាត់ភ្នំពេញថ្មី ខណ្ឌសែនសុ ។ មុនពេលកើតហេតុ បានបើករថយន្តតាមមហាវិថីសហព័ន្ធ រុស្ស៊ី ពីកើតទៅលិច ខណៈមកដល់ចំណុចខាងលើបានបើករថយន្តទៅបុករនាំងដែកពុះចែកផ្លូវបាក់ អស់ ៥ផ្ទាំង និងវៀចអស់មួយផ្ទាំង ធ្វើឲ្យរថយន្តបែកកង់មុខខាងឆ្វេង។ តែរថយន្តនោះនៅតែព្យាយាមបើករត់គេចទាំងបែកកង់ទៅដល់ផ្លូវលេខ៥៦៦ សង្កាត់បឹងកក់ទី១ ខណ្ឌទួលគោក ក៏ត្រូវសមត្ថកិច្ចឃាត់បានតែម្ដង។
ប្រភពដដែលបន្តទៀតថា បន្ទាប់ពីឃាត់រថយន្តបង្កបានហើយ អ្នកបើកបររថយន្តបានរត់ចុះទៅដេញវាយសមត្ថកិច្ចផ្អើលកន្លែងកើតហេតុ ទម្រាំតែចាប់ក្រៀកដាក់ចូលក្នុងរថយន្តបញ្ជូនទៅសាលារាជធានីភ្នំពេញ រួមជាមួយរថយន្តបង្ក។ មិនត្រឹមតែរត់ដេញវាយសមត្ថកិច្ច មិនរើសមុខប៉ុណ្ណោះទេថែមទាំងនិយាយរករឿងអ្នកយកព័ត៌មានដែលចុះទៅថតរូបភាពនៅកន្លែងកើតហេតុនោះថែមទៀត៕
ស្រីរ័ត្ន
