អាវុធហត្ថ​រាជធានី​បង្កើន​ការ​ពង្រឹង​សន្តិសុខ​បាន​ល្អ​ប្រសើរ​ជូន​ពលរដ្ឋ​ក្នុង​ឱកាស​អបអរ​ពិធីបុណ្យ​ចូល​ឆ្នាំ​ថ្មី​ចិន

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង13:23   ផ្នែក: ព័ត៌មានជាតិទូទៅ    ដោយ: វិមាន​

M21-02-15-j

ភ្នំពេញ​ ៖ ​សន្តិសុខ​ សុវត្ថិភាព ​និង​សណ្ដាប់ធ្នាប់​សង្គម​ត្រូវ​បាន​ធ្វើការ​រឹត​បន្តឹង​ដោយ​កម្លាំង​អាវុធហត្ថ​រាជធានី​សហការ​ជាមួយ​ប៉ូលិស​ក្រុងភ្នំពេញ​ចេញ​ល្បាត​ការពារ​តាម​គោលដៅ និង​តាម​ដង​ផ្លូវ​ដើម្បី​ឲ្យ​ប្រជាពលរដ្ឋ​​​ជួបជុំ​បងប្អូន​ និង​​ធ្វើដំណើរ ​ប្រកបដោយ​សុខសាន្ត​សុវត្ថិភាព ​ទាំង​មុន​ពេល​ក្នុង​ពេល​និង​ក្រោយពេល​បញ្ចប់​ពិធីបុណ្យ​ក្នុង​ឆ្នាំ​២០១៥​នេះ។

ជាមួយគ្នា​នេះ​ដែរ​កម្លាំង​អាវុធហត្ថ​ និង​ប៉ូលិស​ក្រុងភ្នំពេញ​បាន​ធ្វើ​ការ​សំណូមពរ​ដល់​ប្រជាពលរដ្ឋ​ត្រូវ​ពាក់មួក​សុវត្ថិភាព​គ្រប់ៗ​គ្នា​ ទាំង​អ្នក​បើក​ម៉ូតូ ​អ្នក​ជិះ​ និង​បើកបរ​ត្រូវ​​ប្រុង​ប្រយ័ត្ន​ដើម្បី​សុវត្ថិភាព​ពេល​ធ្វើ​ដំណើរ​កម្សាន្ត​សប្បាយ​នានា​ និង​ការ​ធ្វើដំណើរ​ទៅលេង​ស្រុក​កំណើត​ក្នុង​ឱកាស​អបអរ​បុណ្យ​ប្រពៃណី ជាតិខ្មែរ​ឆ្នាំ​២០១៤​នេះ​ ពិសេស​កាត់បន្ថយ​ករណី​គ្រោះថ្នាក់​ចរាចរណ៍​តែម្តង។

តាម​ការបញ្ជាក់​ឲ្យ​ដឹងពី​លោក​ឧ​ត្ត​ម​សេនីយ៍​ទោ រ័ត្ន ស្រ៊ាង​មេបញ្ជាការរង​កងរាជអាវុធហត្ថ​លើ​ផ្ទៃ​ប្រទេស​និង​ជា​មេបញ្ជាការ​អាវុធហត្ថ​រាជធានី​ភ្នំពេញ​បាន​ដាក់​ផែនការ​​​រឹតបន្តឹង​ និង​សំណូមពរ​កាលពី​ថ្មីៗ​នេះ​ដើម្បី​ឲ្យ​បងប្អូន​ប្រជាពលរដ្ឋ ធ្វើ​ចរាចរណ៍​តាម​ដង​ផ្លូវ​ចូលរួម​គោរព​តាម​ការណែនាំ​របស់​ក្រសួងមហាផ្ទៃ សាលា​រាជធានី និង​ការណែនាំ​ផ្ទាល់​របស់​សមត្ថកិច្ច​តាម​គោល ដៅ គ្រប់កន្លែង​ក្នុង​ក្រុងភ្នំពេញ​ជំរុញ​ឲ្យ​មានការ​គោរព​ច្បាប់​ចរាចរណ៍​​ដោយ​ពាក់មួក​សុវត្ថិភាព​គ្រប់ៗ​គ្នា​ទាំង​អ្នក​បើក ​អ្នកជិះ​ក្នុង ការធ្វើដំណើរ និង​មាន​បំពាក់​កញ្ចក់​ម៉ូតូ​សម្រាប់​មើល​ក្រោយ​ផង​។ ប៉ុន្តែ​ទោះបី​សមត្ថកិច្ច​ដាក់​កម្លាំង​តាម​ដង​ផ្លូវ​ការពារ​ និង​ចាំ​សម្រួល​ចរាចរណ៍​យ៉ាងណា​ក៏ដោយ​ ក៏​ការស្ទះ​ចរាចរណ៍​នៅតែ​កើតមាន​ជៀស​មិន​ផុត​ ដោយ​កំណើន​ប្រជាជន​និង​មធ្យោបាយ​ធ្វើដំណើរ​។​

អាវុធហត្ថ​រាជធានី​ភ្នំពេញ​បានធ្វើការ​សំណូមពរ​ដល់​ប្រជាពលរដ្ឋ​អ្នកប្រើប្រាស់​យានយន្ត ទាំងអស់​នាំគ្នា​គោរព​នូវ​ច្បាប់​ចរាចរណ៍​ពិសេស​បើកបរ​ត្រូវ​ប្រុង​ប្រយ័ត្ន ដើម្បី​បញ្ចៀស​នូវ​ករណី​គ្រោះថ្នាក់​ចរាចរណ៍។ សមត្ថកិច្ច​បាន​សហការ​គ្នា​ចុះ​ផ្សព្វផ្សាយ​តាម​ដង​ផ្លូវ ទីប្រជុំជន តាម​ចំណតរថយន្ត​ជាដើម​អំពី​សុវត្ថិ​ភាពជា​ចម្បង​ក្នុង​ការ​ធ្វើ​ដំណើរ​ទាំង​មុន​ពេល ​ក្នុង​ពេល​និង​ក្រោយ​បញ្ចប់​បុណ្យ​ប្រពៃណី​ធំៗ។ កម្លាំង​សមត្ថកិច្ច​អាវុធហត្ថ​បាន​សហការ​ជាមួយ​ប៉ូលិស​ចុះ​តាម​គ្រប់​គោលដៅ​ពិសេស​ច្រក​ចេញ​ចូល​រាជធានី ​ចាំ​អន្តរាគមន៍​ការពារ​សន្តិសុខ​ទូទៅ​និង​សម្រួល​សណ្ដាប់ធ្នាប់​ចរាចរណ៍​គ្រប់ពេលវេលា​ទាំង​មុន​ពេល​បុណ្យ ​ក្នុង​ពេល​និង​ក្រោយពេល​បញ្ចប់​បុណ្យ​ដើម្បី​ឲ្យ​ប្រជាពលរដ្ឋ​ធ្វើដំណើរ​ប្រកបដោយ​សុវត្ថិភាព តាម​ទិសដៅ ​និង​ផែនការ​ណែនាំ​ដ៏​ ម៉ឺងម៉ាត់​របស់​លោក​នាយ​ឧត្ដមសេនីយ៍ សៅ សុខា អគ្គមេបញ្ជាការ​រង​កង​យោធពល​ខេមរភូមិន្ទ​និង​ជា មេបញ្ជាការ​កងរាជអាវុធហត្ថ​លើ​ផ្ទៃ ប្រទេស​តែម្តង​ដែល​បាន​អនុវត្តតាម​ផែនការ​យុទ្ធសាស្ត្រ​របស់​រាជរដ្ឋាភិបាល​ជា​រៀងរាល់​ឆ្នាំ៕

 

​ ​

M21-02-15-j1M21-02-15-j2M21-02-15-j3M21-02-15-j4