ស្វាយរៀង ៖ មានចម្ងល់ជាច្រើនបានលើកឡើង បន្ទាប់ពីមានកូដកម្មពីសំណាក់កម្មករ-កម្មការិនីរោងចក្រ បានកើតឡើងជាបន្តបន្ទាប់នៅក្នុងតំបន់សេដ្ឋកិច្ចពិសេស តាយសេង និងតំបន់សេដ្ឋកិច្ចពិសេស មេនហាតធេន ក្រុងបាវិត ខេត្តស្វាយរៀង រហូតឈានដល់ការប្រើហិង្សាទៀតផង។ កូដកម្មនោះបានអូសបន្លាយ ចាប់តាំងពីថ្ងៃទី០៦ រហូតដល់ថ្ងៃទី១៨ ខែកុម្ភៈ ដែលសកម្មភាពនេះ កាន់តែខ្លាំងឡើងៗហាក់ដូចជាមានការញុះញង់នៅខាងក្រោយខ្នងពីក្រុមមួយក្ដាប់តូចណាមួយ។
ទង្វើដ៏ល្ងង់ខ្លៅនេះ បានធ្វើអោយមានចលាចលកើតឡើង និងរីករាលដាលទៅរោងចក្រផ្សេងៗទៀតដោយមិនដឹងថាក្រុមក្មេងពាលទាំងនេះមានប្រភពចេញពីទីណា ហើយមានបំណងអ្វីនោះទេ? ហេតុអ្វីបានជាពួកគេចូលរួមធ្វើបាតុកម្ម ហើយថែមទាំងធ្វើសកម្មភាពហិង្សាញុះញង់ឱ្យស្ថានការណ៍កាន់តែតានតឹងឡើងៗបែបនេះ?។ ការបង្កើតសហជីព និងស្ថាប័នពាក់ព័ន្ធផ្សេងៗ គឺគោលបំណង ដើម្បីការពារសិទ្ធិកម្មករចៀសផុតពីការកេងប្រវ័ញ្ច ជួយធ្វើការសម្របសម្រួលពេលមានភាពមិនប្រក្រតីណាមួយកើតឡើងរវាងកម្មករ និងថៅកែរោងចក្រ ហើយធ្វើការដោះស្រាយតាមសន្តិវិធីតាមដែលអាចធ្វើទៅបាន ប៉ុន្តែកន្លងមក ចាប់តាំងពីមានសហព័ន្ធសហជីពចលនាកម្មករនេះកើតឡើង មានបញ្ហាជាច្រើនដែលកើតមានឡើង គឺមិនត្រូវបានដោះស្រាយឱ្យបានប្រសើរឡើយ ផ្ទុយទៅវិញបែរជាមានបាតុភាពមិនប្រក្រតីរហូតដល់មានផ្ទុះកូដកម្មឈានដល់ប្រើអំពើហិង្សាជាបន្តបន្ទាប់គ្នា ដោយមានការចូលរួមពីក្រុមក្មេងពាលមិនដឹងមកពីណាទៀតផង។ កាលពីមុនផ្ទុះកូដកម្មក៏មិនដែលឃើញមានពួកនោះធ្វើការងារសោះ ស្រាប់តែភាពចលាចលកើតឡើង គេសង្កេតឃើញក្រុមក្មេងស្ទាវទាំងនោះបង្កើតហិង្សា ធ្វើឱ្យរាំងស្ទះដល់ការបំពេញការងាររបស់កម្មករ-កម្មការិនី និងដំណើរការរីកចម្រើនរបស់រោងចក្រដែលបំពេញកាតព្វកិច្ចការងារយ៉ាងខ្លាំង។ ប្រសិនបើក្នុងរោងចក្រនិមួយៗ តែងតែមានកូដកម្មទាមទារនេះ ទាមទារនោះ ជាបន្តបន្ទាប់ វាក៏អាចបណ្តាលឱ្យស្ថេរភាពរោងចក្រមានការរង្គោះរង្គើផងដែរ ដូចករណីរោងច្រកមួយក្នុងខេត្តស្វាយរៀង ដោយសារតែការធ្វើកូដកម្មទាមទាររបស់កម្មករ ការចរចារវាងថៅកែរោងចក្រ និងសហជីព មិនអាចទទួលយកបានទាំងសងខាង ក៏បង្ខំចិត្តឱ្យរោងចក្រនោះ បិទទ្វារ ក្ស័យធន ព្រោះកម្មកររវល់តែចូលរួមធ្វើកូដកម្ម មិនព្រមចូលធ្វើការ បណ្តាលឱ្យខ្វះទំនិញដែលគេបញ្ជាទិញ យូរៗទៅខាងអ្នកបញ្ជាទិញគេឈប់ទិញ ហើយអ្នកដែលខាតប្រយោជន៍នោះ គឺកម្មករ-កម្មការិនី ខ្លួនឯងតែម្តង។ ដូច្នេះ គួរតែបងប្អូនកម្មករ-កម្មការិនី ត្រិះរិះពិចារណាឡើងវិញអំពីទង្វើរបស់ខ្លួន ដែលចូលរួមធ្វើកូដកម្មទាមទារកន្លងមក ធ្វើយ៉ាងម៉េចឱ្យការទាមទារនោះ កុំឱ្យហួសហេតុពេក ហើយក៏គួរតែជ្រើសយកផ្លូវដោះស្រាយតាមការចរចាដោយសន្តិវិធី។
រហូតមកដល់ព្រឹកថ្ងៃទី១៩ ខែកុម្ភៈ ឆ្នាំ២០១៣នេះ ក្រុមកម្មករ កម្មការិនីមួយចំនួនធំ បានចូលបំពេញការងារនៅរោងចក្រជាធម្មតាវិញហើយ។ ដោយឡែកមានតែក្រុមញុះញង់មួយចំនួនតូចប៉ុណ្ណោះដែលនៅតែចចេសមានចេតនាអាក្រក់ចង់បង្កបាតុភាពឲ្យកើតឡើងសារជាថ្មីទៀត៕
