ប៊ុលហ្គារី​មានបំណង​ពង្រីក​កិច្ច​សហប្រតិបត្តិការ​លើ​វិស័យ​សេដ្ឋកិច្ច​ ពាណិជ្ជកម្ម​ជាមួយ​កម្ពុជា

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង12:06   ផ្នែក: ព័ត៌មានជាតិទូទៅ    ដោយ: កោះកែវ​

M21-02-15-h

ភ្នំពេញ ​៖​ ប្រទេស​ប៊ុលហ្គារី មានបំណង​ពង្រឹង​ពង្រីក​កិច្ច​សហប្រតិបត្តិការ​ទ្វេភាគី​លើ​វិស័យ​មួយ​ចំនួន​ដូចជា ផ្នែក​សេដ្ឋកិច្ច ពាណិជ្ជកម្ម និង​វិនិយោគ​ជាមួយ​កម្ពុជា ហើយ​បំណង​នេះ​បាន​ធ្វើឡើង​នៅក្នុង​ជំនួប​រវាង​លោក អ៊ុច បូរ​រិ​ទ្ធ រដ្ឋលេខាធិការ​ក្រសួងការបរទេស និង​សហប្រតិបត្តិការ​អន្តរជាតិ​កម្ពុជា ជាមួយ​លោក Evgueni Stefanov Stoytchev ឯកអគ្គរដ្ឋទូត​ប៊ុលហ្គារី​ប្រចាំ​នៅ​កម្ពុ​ជាថ្មី កាលពី​រសៀល​ថ្ងៃទី​២០ ខែកុម្ភៈ ឆ្នាំ​២០១៥។

លោក អ៊ុច បូរ​រិ​ទ្ធ បាន​ប្រាប់​អ្នកសារព័ត៌មាន​បន្ទាប់​ពី​ជំនួប​ថា នៅក្នុង​ជំនួប​នោះ លោក​បាន​ជម្រាប​ជូន​ដល់​លោក Ev gueni Stefanov Stoytchev ឯកអគ្គរដ្ឋទូត​ប៊ុលហ្គារី អំពី​ការ​រីកចម្រើន​ផ្នែក​សេដ្ឋកិច្ច និង​នយោបាយ​របស់​កម្ពុជា ហើយ​ក្នុងនាម​រាជរដ្ឋាភិបាល​កម្ពុជា លោក​បាន​ថ្លែង​អំណរគុណ​ដល់​ប្រទេស​ប៊ុលហ្គារី ដែល​បាន​ផ្តល់​ជំនួយ​ដល់​កម្ពុជា កាលពី​ទស្សវត្សរ៍​ឆ្នាំ​១៩៨០​។ លោក​បន្តថា នៅក្នុង​ជំនួប​នោះដែរ លោក​រដ្ឋលេខាធិការ​សំណូមពរ​ដល់​ប្រទេស​ប៊ុលហ្គារី ផ្តល់​អាហារូបករណ៍​ដល់​និស្សិត​កម្ពុជា​ឲ្យ​បាន​ច្រើន ដើម្បី​បណ្តុះបណ្តាល​ធនធានមនុស្ស​នៅ​កម្ពុជា។

នៅក្នុង​ជំនួប​នោះដែរ លោក​ឯកអគ្គរដ្ឋទូត​ប៊ុលហ្គារី បាន​ថ្លែងថា លោក​បានទទួល​ការណែនាំ​ពី​រដ្ឋាភិបាល និង​ក្រសួងការបរទេស​ប្រទេស​ប៊ុលហ្គារី​មក​ប្រាប់​រដ្ឋាភិបាល​កម្ពុជា​ថា ប្រទេស​ប៊ុលហ្គារី​មាន​សុ​ឆន្ទៈ​ជំរុញ​កិច្ចសហប្រតិបត្តិការ​ទ្វេ​​ភាគី​ជាមួយ​ប្រទេស​កម្ពុជា ដែលជា​មិត្ត​និង​មាន​ទំនាក់​ទំនង​ជាមួយគ្នា​យូរ​មកហើយ បន្ទាប់ពី​កម្ពុជា​រំដោះ​ចេញពី​របប​ខ្មែរក្រហម​កាលពី​ឆ្នាំ​១៩៧៩​។ លោក​ឯកអគ្គរដ្ឋទូត​ប៊ុលហ្គារី​បន្តថា បេសកកម្ម​របស់​លោក​នៅ​កម្ពុជា​មានបំណង​ពង្រឹង​កិច្ចសហការ​ទ្វេភាគី​ផ្នែក​វិស័យ​ពាណិជ្ជកម្ម និង​សេដ្ឋកិច្ច​ជាមួយ​កម្ពុជា និង​ពិភាក្សា ដើម្បី​រិះរក​មធ្យោបាយ​ឲ្យ​មាន​អ្នក​វិនិយោគទុន​ប៊ុលហ្គារី​មក​កម្ពុជា ​ដោយ​ត្រូវ​ពិភាក្សា​ជាមួយ​សភា​ពាណិជ្ជកម្ម ក្រសួង​សេដ្ឋកិច្ច ក្រសួងពាណិជ្ជកម្ម ពីព្រោះ​ប្រទេស​ប៊ុលហ្គារី ទើបបាន​ចូល​ជា​សមាជិក​នៃ​សហភាព​អឺរ៉ុប​។​

លោក Ev gueni Stefanov Stoytchev ឲ្យ​ដឹង​ដែរ​ថា ប្រទេស​កម្ពុជា និង​ប៊ុលហ្គារី​មាន​កិច្ចព្រមព្រៀង​ជាមួយ​កម្ពុជា​តាំងពី​ឆ្នាំ​២០១០ ខាង​បច្ចេកវិទ្យា​,​វិទ្យាសាស្ត្រ និង​សេដ្ឋកិច្ច​ពាណិជ្ជកម្ម​តែ​នៅ​មិន​ទាន់បាន​ចុះហត្ថលេខា​ជាមួយគ្នា​នៅឡើយ​ទេ ដូច្នេះ​សុំ​ស្នើ​ឲ្យ​មានការ​ចុះហត្ថលេខា​លើ​កិច្ចព្រមព្រៀង​ទាំងនោះ​ឲ្យ​បាន​ឆាប់ នៅ​ពេលដែល​រដ្ឋមន្ត្រីការបរទេស​ប៊ុលហ្គារី នឹង​មក​បំពេញ​ទស្សនកិច្ច​នៅ​តំបន់​អាស៊ាន ហើយ​បន្ត​មក​កម្ពុជា នា​ខែមេសា ឆ្នាំ​២០១៥ ខាងមុខ​។

តាម​លោក អ៊ុច បូរ​រិ​ទ្ធ បញ្ជាក់ថា ប្រទេស​ប៊ុលហ្គារី ក៏បាន​ពិភាក្សា​អំពី​កិច្ចសហការ​រវាង​គណៈកម្មការ​ទន្លេ​មេគង្គ​កម្ពុជា ជាមួយ​ទន្លេ​ដឹណូ ដែល​ហូរ​កាត់​ប្រទេស​ប៊ុលហ្គារី​ផងដែរ​។ ចំពោះ​ការផ្តល់​អាហារូបករណ៍​សម្រាប់​និស្សិត​កម្ពុជា គឺ​រដ្ឋាភិបាល​ប៊ុលហ្គារី និង​ដាក់បញ្ចូល​កម្ពុជា​ទៅក្នុង​បញ្ជី ដែល​ត្រូវ​ផ្តល់​អាហារូបករណ៍​លើកដំបូង​នៅ​ឆ្នាំក្រោយ៕