ភ្នំពេញ ៖ ភ្ញៀវភាគច្រើនជាជនបរទេសបាននាំគ្នាស្រវេស្រវារត់ចេញពីសណ្ឋាគារយីហោញ៉ូយ៉កទាំងព្រលឹងចុងសក់ដោយសារតែមានហេតុការណ៍អគ្គីភ័យមួយបានឆាបឆេះសន្ធោសន្ធៅនៅជាន់ទី៨ពេលកំពុងដេកលង់លក់នាពេលពាក់កណ្ដាលអធ្រាត្រ។
ហេតុការណ៍អគ្គីភ័យនោះបានកើតឡើងកាលពីវេលាម៉ោង១២ រំលងអធ្រាត្រឈានចូលថ្ងៃទី១៩ ខែកុម្ភៈ ឆ្នាំ២០១៣ នៅជាន់ទី៨នៃ សណ្ឋាគារយីហោយីហោ(ញ៉ូយក)ត្រង់កន្លែងភោជនីយដ្ឋាននិងស្ទីមដែលមានទីតាំងលេខ ២៥៦ក្នុងភូមិទី៩ ក្រុមទី៣៩ ផ្លូវព្រះមុនីវង្សកែងផ្លូវលេខ១០៩ សង្កាត់បឹងរាំងខណ្ឌដូនពេញដែលម្ចាស់សណ្ឋាគារឈ្មោះព្រំ លន ភេទស្រីអាយុ៦១ឆ្នាំ។
ប្រភពព័ត៌មានពីប្រជាពលរដ្ឋក្បែរខាងកន្លែងកើតហេតុបានឲ្យដឹងថានៅវេលាកើតហេតុគេបានឃើញភ្លើងនិងផ្សែងបានឆេះហុយសន្ធោសន្ធៅចេញពីអាគារសណ្ឋាគារញ៉យកនៅជាន់ទី៨បង្កជាភាពភ្ញាក់ផ្អើលនាំគ្នាយកបំពង់ពន្លត់អគ្គីភ័យ និងតទុយោទឹកបាញ់ពន្លត់ដែរតែមិនអាចគ្រប់គ្រងបានសមត្ថកិច្ចមូលដ្ឋាន ក៏ដូចជាសមត្ថកិច្ចខណ្ឌដូនពេញក្រោមការបញ្ជានិងដឹកនាំផ្ទាល់ពីលោកអភិបាលខណ្ឌនិងអធិការខណ្ឌរួមជាមួយមេបញ្ជាការខណ្ឌបានចុះមកដល់កន្លែងកើតហេតុបញ្ជាឲ្យមន្ត្រីក្រោមឱវាទជួយអន្តរាគមន៍ឡើងគោះទ្វារតាមបន្ទប់ដាស់ភ្ញៀវដែលភាគច្រើនជាជនបរទេសកំពុងតែដេកលង់លក់ក្នុងដំណេកឲ្យភៀសចេញពីកន្លែងកើតហេតុដើម្បី ការពារសុវត្ថិភាពខ្លួនក្រែងមានគ្រោះថ្នាក់ព្រោះភ្លើងកំពុងឆាបឆេះខ្លាំង។
បើតាមការឲ្យដឹងពីលោកពិន គង់ ជាមេប៉ុស្តិ៍នគរបាលបឹងរាំងបានឲ្យដឹងថាហេតុការណ៍អគ្គីភ័យនៅជាន់ទី៨នៃសណ្ឋាគារញ៉ូយ៉កនោះមិនមានអ្នកនរណារងគ្រោះថ្នាក់នោះឡើយ ហើយមូលហេតុដែលបណ្តាលឲ្យឆេះនោះលោកមិនអាចបញ្ជាក់បានឡើយរង់ចាំមន្ត្រីជំនាញពិនិត្យសិន។
លោកនេត វន្ថា បានឲ្យដឹងថាពាក់ព័ន្ធក្នុងហេតុការណ៍អគ្គីភ័យឆេះនៅសណ្ឋាគារញ៉ូយ៉កនៅជាន់ទី៨នោះផ្តើមចេញពីបញ្ហាទុស្សេចរន្តអគ្គិសនីត្រង់ម៉ាស៊ីន សូ ណា(ស្ទីម)បណ្ដាលឲ្យខូចខាតម៉ាស៊ីន សូណា២គ្រឿងឆេះបន្ទប់ស្ទីមមួយបន្ទប់រួមទាំងរបស់របរផ្សេងទៀតគិតជាទឹកប្រាក់អស់ជាងមួយម៉ឺនដុល្លារ ហើយបានរលត់ជាស្ថាពរវិញនៅវេលាម៉ោង១និង៥នាទីបន្ទាប់ពីឆេះនៅវេលាម៉ោង១២រំលងអធ្រាត្រឈានចូលថ្ងៃទី១៩ខែកុម្ភៈឆ្នាំ២០១៣ ដោយប្រើប្រាស់រថយន្តពន្លត់អគ្គីភ័យរាជធានីចំនួន៥គ្រឿងបាញ់អស់ទឹកទាំង៥គ្រឿងតែម្តង តែមិនមានអ្នកណារងគ្រោះថ្នាក់ឡើយ៕
រស្មី
