ព្រះរាជអាជ្ញា​បញ្ចប់​ការសួរចម្លើយ​លោក​ឧ​ត្ត​ម​សេនីយ៍​ពេជ្រ ព្រហ្ម​មុន្នី​

ថ្ងៃ សុក្រ ទី20 កុម្ភៈ ឆ្នាំ2015 ម៉ោង20:55   ផ្នែក: ព័ត៌មានជាតិទូទៅ    ដោយ: មករា​

M21-02-15-c

ភ្នំពេញ​៖ រហូតមកដល់​ម៉ោង​១៨ និង​៣០ នាទី​ព្រលប់​ថ្ងៃទី​២០ ខែកុម្ភៈ ឆ្នាំ​២០១៥ ព្រះ រាជអាជ្ញា​អម​តុលាការក្រុង​ភ្នំពេញ បាន​បង្គាប់ ឲ្យ​សមត្ថកិច្ច​អាវុធហត្ថ​នាំខ្លួន​ឧ​ត្ត​ម​សេនីយ៍ ពេជ្រ ព្រហ្ម​មុន្នី ទៅកាន់​ទីបញ្ជាការ​អាវុធ​ហត្ថ លើ​ផ្ទៃ​ប្រទេស​ជា​បណ្តោះអាសន្ន​ដើម្បី​នាំខ្លួន មកកាន់​តុលាការ​បន្ត​ការសាកសួរ​នៅ​ព្រឹក​ថ្ងៃ ទី​២១ ខែកុម្ភៈ ឆ្នាំ​២០១៥​។​

ប្រភពព័ត៌មាន​ច្បាស់​ការណ៍​ពី​តុលាការ ក្រុងភ្នំពេញ​បាន​ឲ្យ​ដឹងថា លោក​លី សុ​ផា​ណ្ណា ព្រះរាជអាជ្ញារង​អម​តុលាការ​បានបញ្ចប់​ការ សួរ​យក​ចម្លើយ​លោក​ពេជ្រ ព្រហ្ម​មុន្នី នៅ​ព្រលប់​ថ្ងៃទី​២០​កុម្ភៈ​នេះ ប៉ុន្តែ​មិនទាន់​សម្រេច ចោទប្រកាន់​នូវ​បទល្មើស​ណាមួយ​ឲ្យ​ពិត ប្រាកដ​នៅ​ឡើ​ុ​យ​។​

ប្រភពព័ត៌មាន​ដដែល​បាន​ឲ្យ​ដឹងថា បើ យោងតាម​ចម្លើយសារភាព​របស់លោក ឧ​ត្ត​ម សេនីយ៍​ពេជ្រ ព្រហ្ម​មុន្នី​ពេញ​មួយ​ថ្ងៃទី​២០​កុម្ភៈ គេ​អាច​សន្ម​ត់​បាន​ថា ព្រះរាជអាជ្ញា​អម​តុលាការ នឹងធ្វើ​ការចោទប្រកាន់​លោក​ពេជ្រ ព្រហ្ម​មុន្នី ពីបទ​ជ្រៀតជ្រែក​ដោយ​ខុសច្បាប់ នៅក្នុង​ការ បំពេញ​មុខងារសាធារណៈ​តាម​មាត្រា​៦០៩ នៃ​ក្រមព្រហ្មទណ្ឌ​និង​បទ​ប្រើប្រាស់​ដោយ​គ្មាន សិទ្ធិ​នូវ​យានយន្ត​ដែលមាន​សញ្ញា​សំគាល់ ប្រើប្រាស់​ដោយ​នគរបាល និង​យោធា​តាម មាត្រា​៦១៥​នៃ​ក្រមព្រហ្មទណ្ឌ​។​

មាត្រា​៦០៩​នៃ​ក្រមព្រហ្មទណ្ឌ​បាន​ចែងថា

បទ​ជ្រៀតជ្រែក​ដោយ​ខុសច្បាប់​នៅក្នុង​ការបំពេញ​មុខងា​រ​សាធារណៈ​ត្រូវ​ផ្តន្ទាទោស ដាក់ពន្ធនាគារ​ពី​១​ឆ្នាំទៅ​៣​ឆ្នាំ​និង​ពិន័យ​ជា ប្រាក់​ពី​២​លាន​រៀល​ទៅ​៦​លាន​រៀល អំពើ ជ្រៀតជ្រែក​ដោយ​ខុសច្បាប់​ក្នុងការ​អនុវត្ត មុខងារ​សារ​ណៈ​ណាមួយ ដោយ​បំពេញ​កិច្ចការ មួយ​ក្នុងចំណោម​កិច្ចការ​ទាំងឡាយ​ដែល សម្រាប់តែ​អ្នកមាន​សិទ្ធិ​ក្នុង​មុខងារ​នេះ​។

អង្គហេតុ​ដែល​អាច​ឲ្យ​មានការ​ចោទប្រកាន់ លោក​ពេជ្រ ព្រហ្ម​មុ​នី្ន ដែលជា​សេនា​ដៃស្តាំ និង​ជា​គ្រូសិល្ប៍​របស់លោក​អាំង មាលតី អតីត ប្រធាន​តុលាការ​ក្រុងភ្នំពេញ ដែល​ទើប ដកតំណែង​កាលពី​ថ្ងៃទី​១៨ ខែកុម្ភៈ គឺ​យោង ទៅលើ​ករណី​ដែល​លោក​ពេជ្រ ព្រហ្ម​មុន្នី​បាន ប្រើ​ឥទ្ធិពល​ដែល​លោក​អាំង មាល​ដី​ប្រគល់ សិទ្ធិ​ឲ្យ​ចូលទៅ​ជ្រៀតជ្រែក​ត្រួតត្រា​ការងារ របស់​ចៅក្រម ក្រឡាបញ្ជី​ស្ទើរតែ​គ្រប់​បន្ទប់ នៅក្នុង​ស្ថាប័ន​តុលាការក្រុង​ភ្នំពេញ​។​

រីឯ​មាត្រា​៦១៥ បទ​ប្រើប្រាស់​ដោយ​គ្មាន សិទ្ធិ​នូវ​យានយន្ត​ដែលមាន​សញ្ញា​សម្គាល់​ប្រើ ប្រាស់​ដោយ​នគរបាល​ឬ​យោធា ត្រូវ​ផ្តន្ទា ទោស​ដាក់ពន្ធនាគារ​ពី​១​ខែ​ទៅ​១​ឆ្នាំ និង​ពិន័យ ជា​ប្រាក់​ពី​១​សែន​រៀល ទៅ​១​លាន​រៀល​។​

សម្អាង​ហេតុដែល​អាច​ឲ្យ​មានការ​ចោទ ប្រកាន់​នូវ​បទល្មើស​ខាងលើ​គឺ​សំដៅ​ទៅលើ​ករណី​ដែល​លោក​ពេជ្រ ព្រហ្ម​មុន្នី ប្រើប្រាស់ ដោយ​ខុសច្បាប់​នូវ​រថយន្ត​ម៉ាក​ហាំ​ម័​រ​ពណ៌ ខ្មៅ​មួយគ្រឿង​ពាក់​ស្លាក​លេខ​ខេមរៈភូមិន្ទ ០២ ២-២២៦៦ ដែលជា​រថយន្ត​វត្ថុតាង​រឹបអូស​ពី ឧក្រិដ្ឋជន​គ្រឿងញៀន​ហើយ​ត្រូវបាន​លោក អាំង មាលតី ប្រគល់​ឲ្យ​ទៅ​លោក​ពេជ្រ ព្រហ្ម​មុ​នី្ន ប្រើ​ដោយ​អំណាច​បុគ្គល​។​

សូមបញ្ជាក់ថា លោក​ពេជ្រ ព្រហ្ម​មុន្នី​ត្រូវ បាន​ចាប់ខ្លួន​កាលពី​ព្រលប់​ថ្ងៃទី​១៩ ខែកុម្ភៈ នៅ​វត្ត​ប្រាសាទ នាង​ខ្មៅ មាន​ទីតាំង​ក្នុង​ទឹកដី ខេត្តតាកែវ ហើយ​ត្រូវបាន​បញ្ជូន​មកកាន់​តុលាការ​នៅ​យប់​ថ្ងៃ​ដដែល​។ បន្ទាប់មក​ព្រះ រាជអាជ្ញា​បានប្រគល់​ឲ្យ​សមត្ថកិច្ច​អាវុធហត្ថ យកទៅ​គ្រប់គ្រង​បណ្តោះអាសន្ន និង​ត្រូវបាន នាំមក​កាន់​តុលាការ​វិញ​នៅ​ព្រឹក​ថ្ងៃទី​២០ ខែ កុម្ភៈ​ដើម្បី​ធ្វើការ​សាកសួរ​នូវ​បញ្ហា​និង​ភាពមិន ប្រក្រតី​មួយចំនួន​នៅក្នុង​អំឡុងពេល​លោក​ពេជ្រ ព្រហ្ម​មុន្នី ត្រូវបាន​លោក​អាំង មាលតី ធ្វើ លិខិតស្នើ​សុំ​ពី​អគ្គបញ្ជាការ​កងទ័ពជើងគោក យកមកប្រើ​ប្រាស់​នៅក្នុង​តុលាការ​។​

គួររំលឹកថា​លោក​ពេជ្រ ព្រហ្ម​មុន្នី បាន​លេច មុខ​លេច​មាត់​ល្បីឈ្មោះ នៅក្នុង​សំណុំរឿង​ដោះ លែង​ឪពុក​-​ម្តាយ​ឧកញ៉ា​ថោង សារា​៉​ត់ ឲ្យ នៅក្រៅ​ឃុំ​បណ្តោះអាសន្ន​តាម​ការរៀប​ចំ​របស់ លោក​អាំង មាលតី​ជា​ប្រធាន​តុលាការ និង អ្នក​អនុវត្តន៍​ការងារ​ជាក់ស្តែង​គឺ លោក​ចៅក្រម លី សុខ​ឡេង និង​លោក​ក្រឡាបញ្ជី សុខ​ទី​។​

ក្រោយពេល​លោក​ថោង ចំរើន និង​លោក ស្រី​កែវ សារី ត្រូវបាន​ដោះលែង​នៅ​ព្រឹក​ថ្ងៃទី ១៧ ខែកុម្ភៈ ឆ្នាំ​២០១៥ គេ​ឃើញ​លោក​ពេជ្រ ព្រហ្ម​មុ​នី្ន បាន​ទៅ​ចូលរួម​ហូបបាយ​ទឹកជា​មួយ នឹង​ក្រុមគ្រួសារ​លោកស្រី​កែវ សារី ថែមទាំង មាន​ថតរូប​បង្ហោះ​ក្នុង​បណ្តាញ​សង្គម​ហេ្វ​ស​ប៊ុ​ក ផងដែរ​។​

ការដោះលែង​ឪពុក ម្តាយ ថោង សារ៉ាត់​ដែល មាន​ជាប់​ពាក់ព័ន្ធ​កាំភ្លើង​វែង​ខ្លី​ចំនួន​១០​ដើម ឲ្យ​នៅក្រៅ​ឃុំ​នោះ​បានធ្វើ​ឲ្យ​មាន ប្រតិកម្ម​ពី សំណាក់​លោក​ឧបនាយករដ្ឋមន្ត្រី​ស ខេង និង សម្តេចនាយក​រដ្ឋមន្ត្រី​ហ៊ុន សែន​ជា​ដើមចម ដែល​ឧ​ត្ត​ម​ក្រុមប្រឹក្សា​នៃ​អង្គចៅក្រម​បាន​បើក កិច្ចប្រជុំ​ជាបន្ទាន់​មួយ​សម្រេច​ដកតំណែង​លោក អាំង មាលតី​ពី​ប្រធាន​តុលាការ​ក្រុងភ្នំពេញ​ព្រមទាំង​ប្រគល់​ឲ្យ​ក្រុមប្រឹក្សា វិន័យ​នៃ​ឧ​ត្ត​ម​ក្រុមប្រឹក្សា​នៃ​អង្គចៅក្រម​ធ្វើ អធិការកិច្ច​ទាំង​លោក​អាំង មាលតី ទាំង​លោក ចៅក្រម​លី សុខ​ឡេង​។

លុះដល់​រសៀល​ថ្ងៃទី​១៨ ខែកុម្ភៈ រដ្ឋមន្ត្រី ក្រសួងយុត្តិធម៌​បាន​ដឹកនាំ ការប្រកាស​តែង តាំង​លោក​ចៅក្រម​តាំង ស៊ុន​ឡាយ ជា​ប្រធាន តុលាការក្រុង​ភ្នំពេញ​។​

ស្របពេល​នឹង​ព្រឹត្តិការណ៍​ដែលមាន​ការផ្លាស់ប្តូ​រយ៉ា​ង​រហ័ស​នូវ​ថ្នាក់ដឹកនាំ​តុលាការ លោក​ពេជ្រ ព្រហ្ម​មុន្នី​ជា​ដៃស្តាំ​ជា​ជំនួយការ ជា​គ្រូសិល្ប៍​ផ្ទាល់​របស់លោក​អាំង មាលតី បាន រត់គេចខ្លួន​ពី​ក្រុងភ្នំពេញ​ទៅ​លាក់ខ្លួន នៅក្នុង​ប្រាសាទនាងខ្មៅ ប៉ុន្តែ ត្រូវបាន​ចាប់ខ្លួន​មក វិញ​នៅ​ថ្ងៃទី​១៨ ខែកុម្ភៈ។

ឥឡូវនេះ​នៅក្នុង​សំណុំរឿង​ដោះលែង​ឪពុក ម្តាយ​ឧកញ៉ា​ថោង សារ៉ាត់​ឲ្យ​នៅ​ក្រៅ ​ឃុំ​គេ​ឃើញ​សមត្ថកិច្ច​និង​តុលាការ​មាន​វិធានការ​ជាក់ស្តែង​តែ​ទៅលើ​បុគ្គល​ឧ​ត្ត​ម​សេនីយ៍​ពេជ្រ ព្រហ្ម​មុន្នី​តែ​ម្នាក់​គត់ នៅក្នុង​បទល្មើស ដែល​សង្ស័យថា​បាន​ជ្រៀតជ្រែក​ដោយ​ខុសច្បាប់​ទៅក្នុង​ការបំពេញ​មុខងា​រ​សាធារណៈ​របស់​ចៅក្រម និង​មន្ត្រី​តុលាការ និង​បទល្មើស ប្រើ​ស្លាក​លេខ​យានយន្ត​ហាមឃាត់​ប៉ុណ្ណោះ​។​

ចំពោះ​ករណី​ដោះលែង​ឪពុកម្តាយ​ថោង សារ៉ាត់ ដែល​មជ្ឈដ្ឋាន​ទូទៅ​សង្ស័យថា​មាន ជាប់​ពាក់ព័ន្ធ​នឹង​បទល្មើស​ពុករលួយ សុ​ី​សំណូក សូកប៉ាន់​ហាក់ដូចជា​មិនទាន់​មានការ សុ​ើ​ប​អង្កេត​នៅឡើយ​។ ពីព្រោះ​ករណីនេះ វា​ហាក់ដូចជា​គេ​ឃុបឃិត​គ្នា​ធ្វើឡើង​ដោយ​ពុំ កោតញញើត​ទាំង​ច្បាប់ ទាំង​ការរិះគន់​របស់​មហាជន និង​ថ្នាក់ដឹកនាំ​រាជរដ្ឋាភិបាល​។ ពីព្រោះ​គេ​កត់សម្គាល់​ឃើញថា នៅក្នុង​រយៈ ពេល​ដ៏​ខ្លី​ក្រោយពេល​បាន​ឆែក​លំនៅដ្ឋាន​របស់ ឧកញ៉ា​ថោង សារ៉ាត់​ចំនួន​៣​ដង​រួចមក សមត្ថកិច្ច​បាន​រឹបអូស​អាវុធ​វែង​ខ្លី​ចំនួន​១០​ដើម ជា​វត្ថុតាង​ដាក់បន្ទុក​ទៅលើ​ជនជាប់ចោទ​បើ​ទោះ បី​ជា​បទល្មើស​រក្សាទុក​អាវុធ​ជា​បទល្មើស មជ្ឈិម​ក៏ដោយ ក៏​នីតិវិធីតុលាការ​មិនអាច​មាន ការប្រែប្រួល​ផ្លាស់ប្តូរ​យ៉ាង​ឆាប់រហ័ស​ពីស​ទៅ ជា​ខ្មៅ​ភ្លាមៗ​គួរ​ឲ្យ​សង្ស័យ ដូចជា​ករណី​បើក​ផ្ទះ ឲ្យ​ក្រុមគ្រួសារ​ឧកញ៉ា​ថោង សារ៉ាត់​ទាំងអស់ ហើយ​នៅ​ថ្ងៃទី​០៦ ខែកុម្ភៈ​ចៅក្រម​តុលាការ បានចេញ​ដីកា​សម្រេច​ដោះលែង​ឲ្យ​ជន​ជាប់ ចោទ​នៅក្រៅ​ឃុំ​ទៀត ប៉ុន្តែ​ត្រូវបាន​សមត្ថកិច្ច ចាប់ខ្លួនបាន​វិញ​នៅពេលដែល​ជនជាប់ចោទ មាន​ចេតនា​រត់គេច​ទៅដល់​ខេត្តព្រៃវែង​។​

សរុបសេចក្តី​មក​ការរៀបចំ​ដោះលែង​ឪពុក ម្តាយ​ថោង សារ៉ាត់​ឲ្យ​នៅក្រៅ​ឃុំ ពី​សំណាក់ ប្រធាន​តុលាការ​ក្រុងភ្នំពេញ​គឺ​មជ្ឈដ្ឋាន​ទូទៅ យល់ថា​មាន​ជាប់​ពាក់ព័ន្ធ​នឹង​អំពើ​ស៊ី​សំណូក យ៉ាង​ក្រាស់ក្រែល​ទើប​ហ៊ាន​ប្រ​ព្រឹ​ត​អំពើ ដោយ​ខុសច្បាប់​បែបនេះ​៕