កំពត ៖ ឈើប្រណិតខុសច្បាប់ប្រមាណជាង១០ម៉ែត្រគូបត្រូវបានកំលាំងសមត្ថកិច្ចចំរុះដឹកនាំដោយលោកខៃ សម្ផស្ស ព្រះរាជអាជ្ញារងអមសាលាដំបូងខេត្តកំពត ឆែកឆេររកឃើញលាក់ទុកក្នុងភូមិគ្រឹះដ៏ស្ដុកស្ដម្ភគ្មានលិខិតអនុញ្ញាត។
ហេតុការណ៍ចុះបង្ក្រាបឈើខុសច្បាប់នេះបានប្រព្រឹត្តឡើងកាលពីវេលាម៉ោង២និង៣០នាទីរសៀលនៅ ថ្ងៃទី១៨ ខែកុម្ភៈ ឆ្នាំ ២០១៣ នៅក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត។ បើតាមប្រភពព័ត៌មានពីសមត្ថកិច្ចនៅកន្លែងបង្ក្រាបបទល្មើសបានឱ្យដឹងថាឈ្មួញដែលរកស៊ីឈើខុសច្បាប់យកមកលាក់ទុកក្នុងភូមិគ្រឹះរបស់ខ្លួនមានឈ្មោះទេព កុសល់ ហៅ(អាសល់)ភេទប្រុស អាយុ៤០ឆ្នាំ ប្រពន្ធឈ្មោះ គង់ ម៉ី អាយុ ៣០ ឆ្នាំ មុខរបរដឹកបង្គារពីខេត្តកោះកុងទៅវៀតណាម។
លោក ប៊ូ សុវុធ នាយរងខណ្ឌរដ្ឋបាលព្រៃកំពតបានប្រាប់ឲ្យកម្ពុជាថ្មីដឹងថា ឈើដែលសមត្ថកិច្ចឆែករកឃើញនេះ គឺជាឈើប្រណីតលេខ១ប្រភេទគគីរ និងធ្នង់បានយកមកលាក់ទុកដោយខុសច្បាប់គ្មានលិខិតអនុញ្ញាត។ ក្រោយពីឆែកឆេររួចវត្ថុតាងឈើល្មើសច្បាប់ទាំងនេះត្រូវបានរឹបអូសយកមករក្សាទុកនៅខណ្ឌរដ្ឋបាលព្រៃឈើកំពត ដើម្បីចាត់ការកសាងសំណុំរឿង បញ្ជូនទៅសាលាដំបូងខេត្តកំពត។
យោងតាមប្រភពមួយផ្សេងទៀតបានខ្សឹបប្រាប់ឲ្យដឹងថា ឈ្មោះទេព កុសល់ នេះមិនត្រឹមតែរកស៊ីដឹកបង្គាប៉ុណ្ណោះទេ តែលួចបង្កប់ដឹកឈើទៅវៀតណាម ទើបគេរកស៊ីមានរហ័សក្នុងរយៈពេលដ៏ខ្លីអាចធ្វើភូមិគ្រឹះដ៏រឹងមាំ៕
ស៊ុនលី
