សៀមរាប ៖ ក្រុមអ្នកនេសាទចំនួន៦៧ នាក់ដែលកម្លាំងកងរាជអាវុធហត្ថចាប់ខ្លួនកាលពីថ្ងៃទី ១៦ ខែកុម្ភៈ កន្លងទៅ ត្រូវបានតុលាការសម្រេចឃុំខ្លួនដាក់ពន្ធនាគារបណ្ដោះអាសន្នចំនួន៥៧ នាក់ ដោយ៤នាក់ត្រូវបានតំណាងអយ្យកាមិនធ្វើការចោទប្រកាន់ និង៦នាក់ផ្សេងទៀតមិនបានបញ្ជូន ខ្លួនមកតុលាការទេ។
លោកចៅក្រមសាលាដំបូងកាន់សំណុំរឿងអ៊ិត សុធា បានមានប្រសាសន៍ប្រាប់អ្នកកាសែត កាលពីព្រឹកថ្ងៃទី១៨នេះថាការឃុំខ្លួនជនជាប់ចោទទាំង៥៧នាក់ខាងលើធ្វើឡើងកាលពីល្ងាចថ្ងៃអាទិត្យ បន្ទាប់ពីតំណាងអយ្យកា បើកការចោទប្រកាន់ទៅលើពួកអ្នកទាំងនោះរួច។
លោកបានបន្តដោយចាត់ទុកថា នេះជាករណីឃុំខ្លួនជនជាប់ចោទមានចំនួនច្រើនមិនធ្លាប់មានពីមុនមកពាក់ព័ន្ធនឹងបទល្មើសនេសាទខុសច្បាប់ នៅក្នុងអំឡុងពេលចុងក្រោយនេះ។
គួរបញ្ជាក់ថា កាលពីយប់ថ្ងៃទី១៥-១៦ ខែកុម្ភៈ កម្លាំងកងរាជអាវុធហត្ថខេត្តសៀមរាបបាន បើកយុទ្ធនាការបង្ក្ករាបទៅលើសកម្មភាពនេសាទល្មើសច្បាប់ក្នុងតំបន់ដែនទឹកឡូត៍បម្រុងលេខ៥ ក្នុងភូមិសាស្ត្រ ស្រុកសូត្រនិគម នឹងឡូត៍លេខ ៤ ក្នុងភូមិសាស្ត្រតំបន់សង្កាត់ចុងឃ្នៀស ក្រុងសៀមរាប ដោយបានចាប់ក្រុមអ្នកនេសាទស្រី-ប្រុសចំនួន ៦៧ នាក់ ក្នុងនោះមានជនជាតិ វៀតណាមចំនួន ៨ នាក់ផងដែរ។
ទាក់ទិនទៅនឹងការចាប់ខ្លួនក្រុមអ្នកនេសាទខាងលើលោកអ៊ុយ សំភារ ព្រះរាជអាជ្ញារងអម សាលាដំបូងខេត្តសៀមរាបកាន់សំណុំរឿងនេសាទនោះបានមានប្រសាសន៍ថា ខាងកងរាជអាវុធហត្ថគេបានបញ្ជូនខ្លួនជនសង្ស័យមកតុលាការតែ៦១នាក់ប៉ុណ្ណោះ នៅក្នុងចំណោមនោះលោកបានសម្រេចបើកការចោទប្រកាន់ត្រឹមតែ ៥៧ នាក់ ចំណែក៤នាក់ទៀតជាស្ត្រីមានផ្ទៃពោះ នឹងអនីតិជន ត្រូវបានឲ្យរួចផុតពីបទចោទនិងដោះលែងឲ្យមានសេរីភាពវិញ។
លោកបានបន្ថែមថាជនទាំង៥៧ នាក់នោះ មានខ្លះត្រូវបានចោទប្រកាន់ពីបទនេសាទដោយ ប្រើប្រាស់ឧបករណ៍ទំនើប និងខ្លះទៀតចោទប្រកាន់ពីបទទទួលទិញផលត្រីខុសច្បាប់។
ថ្វីបើយ៉ាងនេះក្តីគេមិនអាចស្វែងរកបញ្ជីឈ្មោះក្រុមអ្នកនេសាទដែលត្រូវចាប់បញ្ជូនខ្លួនទាំងអស់នោះបានទេ គ្រាន់តែដឹងថាពួកគេត្រូវបានចាប់ខ្លួនកាលពីព្រឹកថ្ងៃទ១៦ កុម្ភៈ នៅក្នុងប្រតិបត្តិការ បង្ក្រាបរបស់កម្លាំងកងរាជអាវុធហត្ថខេត្តសៀមរាប ខណៈកំពុងធ្វើសកម្មភាពនេសាទ ដោយប្រើ ឧបករណ៍ទំនើបខុសច្បាប់នៅក្នុង នៅក្នុងដែនឡូត៍ហាមឃាត់នៃបឹងទន្លេសាប ដែលត្រូវបានប្រកាស ដកហូតពីកណ្តាប់ដៃឈ្មួញ ដោយសម្តេចនាយករដ្ឋមន្ត្រី ហ៊ុន សែន កាលពីពេលកន្លងទៅ។
យោងតាមរបាយការណ៍ស្តីពីការបង្ក្រាបបទល្មើសនេសាទនៅតំបន់បឹងទន្លេសាបថ្ងៃទី១៥-១៦ ខែ កុម្ភៈរបស់ទីបញ្ជាការកងរាជអាវុធហត្ថខេត្តសៀមរាបបានបង្ហាញថា លទ្ធផលនៃការ បង្ក្រាបនៅក្នុងដែនទឹកហាមឃាត់ខាងលើកម្លាំងរាជអាវុធហត្ថបានឃាត់ខ្លួនមនុស្សចំនួន ៦៧ នាក់ ស្រី ១៧ នាក់ ក្នុងនោះ ជនជាតិយួនចំនួន ៨ នាក់ ទូកឈើម៉ាស៊ីន ចំនួន ១៦ គ្រឿង ទូតឈើអ ត់ម៉ាស៊ីន ចំនួន ០១ គ្រឿង រួមទាំងសាច់មង ចំនួន ១០០ ម៉ែត្រ សាច់អ៊ួន ចំនួន ៤០០ ម៉ែត្រ ដងស៊ីប ចំនួន ១០ ដង ត្រីចំរុះ ចំនួន ៤.៥ តោន។
មន្ត្រីកងរាជអាវុធហត្ថបានអះអាងថា នេះមិនមែនជាយុទ្ធនាការដំបូងទេក្នុងការចូលរួមទប់ស្កាត់បទល្មើសនេសាទតាមបទបញ្ជារបស់ប្រមុខរាជរដ្ឋាភិបាលកម្ពុជា ដោយគ្រាន់តែលើកមុនៗមាន ទ្រង់ទ្រាយតូចជាងពេលនេះបន្តិច៕
កុសល
