គោលនយោបាយ​នៃ​យុទ្ធសាស្ត្រ​កម្មវិធី​អភិវឌ្ឍន៍​អគ្គិសនី​ ភាវូបនីយកម្ម​ជនបទ​

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង10:06   ផ្នែក: ព័ត៌មានជាតិទូទៅ    ដោយ: កញ្ញាវ៉ាត​
Nita-21-A-1-Full

ភ្នំពេញ ៖ គោលនយោបាយ​លើកទឹកចិត្ត​នេះ​របស់​រាជរដ្ឋាភិបាល សំដៅ​ជំរុញ​ការអភិវឌ្ឍន៍​អគ្គិសនី​ភាវូបនីយកម្ម​ជនបទ ដើម្បី​ឆ្លើយតប​ទៅនឹង​សេចក្តីត្រូវការ​ប្រើប្រាស់​អគ្គិសនី​របស់​ប្រជា​ពលរដ្ឋ​និង​សង្គម ដោយ​គោលដៅ​របស់​រាជរដ្ឋាភិបាល​ គឺ​ដល់​ឆ្នាំ​២០២០ ភូមិ​ទាំងអស់​ទូទាំង​ព្រះរាជាណាចក្រ​កម្ពុជា និង​មាន​អគ្គិសនី​ប្រើប្រាស់​ពី​ប្រភព​ផ្សេងៗ​ និង​ដល់​ឆ្នាំ​២០៣០ យ៉ាងហោច​៧០%​នៃ​គ្រួសារ​ទាំងអស់​ទូទាំង​ព្រះរាជាណាចក្រ​កម្ពុជា​នឹងមាន​អគ្គិសនី​ដែលមាន​គុណភាព​ដូច​អគ្គិសនី​ពី​បណ្តាញ​ជាតិ​ប្រើប្រាស់​។​

​ ​យោងទៅតាម​ឯកសារ​របស់​អគ្គិសនី​កម្ពុជា​បាន​ឲ្យ​ដឹងថា បច្ចុប្បន្ន​អគ្គិសនី​កម្ពុជា​តាមរយៈ​នាយកដ្ឋាន​មូលនិធិ​អគ្គិសនី​ភាវូបនីយកម្ម​ជនបទ (​ម​.​អ​.​ជ​) មាន​កម្មវិធី​អភិវឌ្ឍន៍​អគ្គិសនី​ភាវូប​នីយ​កម្ម​ជនបទ​ចំនួន​៣​រួមមាន​ទី​១ កម្មវិធី​ផ្តល់​ចរន្តអគ្គិសនី​ដល់​គ្រួសារ​ក្រីក្រ ទី​២ កម្មវិធី​ប្រព័ន្ធ​ថាមពល​ពន្លឺព្រះអាទិត្យ​តាម​ផ្ទះ​និង ទី​៣ កម្មវិធី​ផ្តល់ជំនួយ​អភិវឌ្ឍន៍​ហេដ្ឋារចនាសម្ព័ន្ធ​ផ្គត់ផ្គង់​អគ្គិសនី​នៅ​តំបន់​ជនបទ​។ ដោយឡែក​នៅក្នុង​កម្មវិធី​ប្រព័ន្ធ​ថាមពល​ពន្លឺព្រះអាទិត្យ​តាម​ផ្ទះ​មាន​គោលបំណង​គឺ​ជួយ​សម្រួល​ឲ្យ​គ្រួសារ​ជនបទ​រស់នៅ​តំបន់​ដាច់ស្រយាល​ ដែល​ខ្សែបណ្តាញ​អគ្គិសនី​មិនទាន់​អាច​ពង្រីក​ទៅដល់​ក្នុង​រយៈពេល​យូរ អាច​ទទួលបាន​អគ្គិសនី​ប្រើប្រាស់​តាមរយៈ​ប្រព័ន្ធ​ថាមពល​ពន្លឺ​ព្រះអាទិត្យ​តាម​ផ្ទះ​។ អគ្គិសនី​កម្ពុជា តាមរយៈ​នាយកដ្ឋាន (​ម​.​អ​.​ជ​) នឹង​ជួយផ្តល់​ប្រាក់ឧបត្ថម្ភ​ធន​ក្នុង​១​ប្រព័ន្ធ​ដល់​គ្រួសារ​ជនបទ ដើម្បី​ជួយ​កាត់បន្ថយ​ការទូទាត់​ថ្លៃ​ទិញ​ប្រព័ន្ធ និង​ថ្លៃ​តម្លើង ហើយ​អ្នកទិញ​ត្រូវ​បង់ថ្លៃ​សល់​ពី​ការឧបត្ថម្ភ​ធន​មក (​ម​.​អ​.​ជ​) វិញ​។ ម​.​អ​.​ជ នឹង​តម្លើង​ប្រព័ន្ធ​ថាមពល​ពន្លឺ​ព្រះអាទិត្យ​ដល់ផ្ទះ​អ្នកទិញ ហើយ​អ្នកទិញ​អាច​ជ្រើសរើស​ជម្រើស​បង់​តម្លៃ​សល់​នៃ​ថ្លៃ​ប្រព័ន្ធ​ក្នុង​ចំណោម​ជម្រើស​ចំនួន​៣​គឺ​៖ ជម្រើស​ទី​១ បង់​គ្រប់​ចំនួន​តែម្តង​នៃ​តម្លៃ​សល់ ឬ​ជម្រើស​ទី​២ បង់​សង​រំលស់​តម្លៃ​សល់​រៀងរាល់​៦​ខែម្តង រហូតដល់​គ្រប់​ចំនួន​សម្រាប់​រយៈពេល ៤​ឆ្នាំ ឬ​ជម្រើស​ទី​៣ បង់​សង​រំលស់​តម្លៃ​សល់​រៀងរាល់ខែ​រហូតដល់​គ្រប់​ចំនួន សម្រាប់​រយៈពេល​៤​ឆ្នាំ​។ ក្រោយពេល​បង់​រំលស់​អស់​ជា​ស្ថាពរ ប្រព័ន្ធ​នេះ​នឹង​ក្លាយជា​កម្មសិទ្ធិ​របស់​អ្នកទិញ​។​

នៅក្នុង​បរិក្ខារ​ប្រព័ន្ធ​ថាមពល​ពន្លឺព្រះអាទិត្យ​តាម​ផ្ទះ ដែល​ត្រូវ​តម្លើង​ឲ្យ​អ្នកទិញ​មាន​ដូចខាង​ក្រោម​៖

•​ ​ផ្ទាំង​កញ្ចក់​ស្រូប​ពន្លឺព្រះអាទិត្យ​ដែលមាន​អានុភាព ៥០​វ៉ា​ត់​ចំនួន​១​ផ្ទាំង​

•​ ​ឧបករណ៍​ត្រួតពិនិត្យ (​តង់ស្យុង ១២​វ៉ុល ចរន្តជាប់​) ចំនួន​១​គ្រឿង​

•​ ​អាគុយ​កម្លាំង ៥៥ អាំ​ពែរ​ម៉ោង (​តង់ស្យុង​១២​វ៉ុល ចរន្តជាប់​) ចំនួន​១​គ្រឿង​

•​ ​អំពូល​បំភ្លឺ​សន្សំ​ថាមពល ១២​វ៉ុល អានុភាព ៧​វ៉ា​ត់ ចរន្តជាប់ ចំនួន​២​គ្រឿង​ និង​ឧបករណ៍​បន្ទាប់បន្សំ សម្រាប់​ការ​តម្លើង​ប្រព័ន្ធ​ថាមពល​ពន្លឺព្រះអាទិត្យ​តាម​ផ្ទះ​នេះ​៕