ឯម លី​ថូ អាច​យកឈ្នះ​រឿ​ម វ​ណ្ណះ បាន​ឬ​អត់ ?

ថ្ងៃ សៅរ៍ ទី21 កុម្ភៈ ឆ្នាំ2015 ម៉ោង10:03   ផ្នែក: ព័ត៌​មានកីឡា    ដោយ: វិសិទ្ធ​

T-02-21-15-c-full

*សរ សី ជួប ម៉ូ រដ្ឋា

ឯម លី​ថូ អ្នក​ប្រដាល់​ក្លឹប​ឫទ្ធី​ពោធិ​សែន​ជ័យ ដែល​ជើង​ខ្លាំង​ជើងចាស់ ត្រូវ​គេ​ផ្គូផ្គង​ឲ្យ​ជួប​ប្រកួត​ជាមួយ​រឿ​ម វ​ណ្ណះ អ្នក​ប្រដាល់​សមាគម​កីឡាប្រដាល់​ក្រសួងការពារជាតិ ដើម្បី​សាក​កណ្តាប់ដៃ​គ្នា។ ពីរ​នាក់​នេះ នឹង​ជួបគ្នា​លើស​ង្វៀន​បាយ័ន​បឹង​ស្នោ នា​ល្ងាច​ថ្ងៃអាទិត្យ​ទី​២២ កុ​ម្ភៈ ២០១៥​នេះ។ នេះ​ជា​ការ​ប៉ះគ្នា​លើកដំបូង​ហើយ សំរាប់​អ្នក​ប្រដាល់​ជើង​ខ្លាំង​ទាំងពីរ​នេះ ដែល​ការ​ជួបគ្នា​លើក​នេះ​ប្រៀប​បាន​ដូចជា​ការ​ជួប​រវាង​អ្នក​ប្រដាល់​រៀមច្បង​ជាមួយ​សិស្ស​ប្អូន​យ៉ាង​ដូច្នេះ​ដែរ។ ព្រោះ​ឯម​លី​ថូ គេ​ជា​ស្គាល់​រេញ​មុន​រឿ​ម វ​ណ្ណះ ហើយក៏​ជា​អ្នក​ប្រដាល់​ដែល​មាន​ឈ្មោះ​បោះ​សម្លេង​ផងដែរ។

រឿ​ម វ​ណ្ណះ គេ​ក៏​ជា​ជើង​ខ្លាំង​និង​មានឈ្មោះ​ល្បី​ដែរ ។ កាលពី​ពីរ​ឆ្នាំមុន វ​ណ្ណះ គេ​ល្បី​ខ្លាំងណាស់ ដោយ​ផ្តួល​អ្នក​ប្រដាល់​រួម​ជាតិ​ដែល​ខ្លាំងៗ​ជាច្រើន​នាក់ ប៉ុន្តែ​ក្រោយ​មួយឆ្នាំ​បន្ទាប់​នោះ គេ​ក៏​ចាប់ផ្តើម​ស្រុត​ធ្លាក់ចុះ​រហូតមកដល់​ស​ព្វ​ថ្ងៃ។ ទោះជា​មានការ​ធ្លាក់ចុះ​យ៉ាងនេះ​ក្តី ឯម លី​ថូ ក៏​ពិបាកធ្វើ​គេ​ដែរ ព្រោះ​វ​ណ្ណះ​នៅតែ​វាយ​ខ្លាំង​និង​មាន​លក្ខ​ណះ​កាច​ដដែល​នោះ។

រឿ​ម វ​ណ្ណះ មួយ​រយៈ​ចុង​ក្រោយនេះ វាយ​ចាញ់​គេ​រហូត​និង​ឃើញ​ឈ្នះ​អ៊ុំ ចំរើន អ្នក​ប្រដាល់​ក្លឹប​តា​ឡី​ដំរី​មាន​រិ​ទ្ធ​ក្នុង​ទឹក​ទី​៣​ម្តង ហើយ​ពេល​មក​ជួប​គ្នា​លើក​ចុងក្រោយ​(១៥​កុ​ម្ភៈ​២០១៥) គេ​អត់​មាន​លទ្ធផល​ដោយសារ​គណៈកម្មការ​បច្ចេកទេស​មិន​ប្រកាស​លទ្ធផល ដោយ​ចោទ​គេ​ថា​ប្រកួត​មិន​អស់ពី​សមត្ថភាព​នោះ។

វ​ណ្ណះ គេ​វាយ​ខ្លាំង​និង​ប្រើ​ស្នៀត​កាចៗ​សន្ធាប់​ទៅលើ​គូប្រកួត ត្រង់​ឈ្នះ​ឬ​ចាញ់​គេ មិនដឹង​ទេ គឺ​ដឹង​តែ​ពី​វាយ​គ្នា​ម​បណ្តា​ក់ដៃ​ឡើយ។

ឯម លី​ថូ បើ​ជួប​អ្នក​ប្រដាល់​ចាស់ៗ​ស្រករ​គ្នា គឺ​គេ​មិន​ពិបាក​ទេ តែបើ​ប៉ះ​ជាមួយ​ជើង​ខ្លាំង​វ័យក្មេង​ស្រករ​ក្រោយ គឺ​គេ​រាង​ពិបាក​ស៊ី​បន្តិច ពីព្រោះ​គេ​មាន​កម្លាំង​ស៊ុ​ហ្វ​មិន​ដូច​ពី មុន​ពេល​ដែល​គេ​នៅ​វាយ​ក្នុង​ទម្ងន់​ស្រាល​នោះ។ ហើយ​ពេលនេះ គេ​ប្រកួត​ជាមួយ​រឿ​ម វ​ណ្ណះ ក្នុង​ទម្ងន់​៦០​គីឡូក្រាម ក្នុងពេលដែល​រូបគេ​មាន​ទម្ងន់​លើស​៦០​គីឡូក្រាម ដែល​ត្រូវ​សម្រក​ឲ្យមក​ត្រឹម​៦០​នោះ គឺជា​ការពិបាក​នឹង​សង្ឃឹម​ឈ្នះ​ណាស់។

លោក ធី ណា​រិ​ទ្ធ ដែល​ជា​គ្រូបង្ហាត់​នៅ​ក្លឹប​ឫទ្ធី​ពោធិ​សែន​ជ័យ បាន​ឲ្យ​ដឹង​ថា លី​ថូ​ប្រកួត​ដឹង​តែ​ពី​បាន​៥​ទឹក​ហើយ ទោះ​ហាត់​មិន​ដល់​ក៏​នៅតែ​៥​ទឹក​ដែរ ក្រែង​តែ​មាន​បញ្ហា​បែក ឬ ប្រការ​ផ្សេងៗ ទើប​មិន​គ្រប់ទឹក។

ទោះជា​យ៉ាងណា លី​ថូ តែ​ដាក់ចិត្ត​ឡើង​ប្រកួត​ហើយ​នោះ គឺ​គេ​មិន​ខ្លាចញញើត​ឡើយ ទោះបី​ជាធំ​ឬ​តូច គឺ​មិន​រួញរា​ដែរ។ ដូច្នេះ​ការ​ជួប​ជាមួយ​រឿ​ម វ​ណ្ណះ​លើក​នេះ គេ​មិនទាន់​ហ៊ាន​ថា​លី​ថូ​ចាញ់​នោះ​ទេ។ ប៉ុន្តែ​កំណត់ត្រា​ប្រកួត​របស់​លី​ថូ ប៉ុន្មាន​ប្រកួត​ចុងក្រោយ​នេះ គឺ​ល្អ​ដោយ​ឈ្នះ​ច្រើនជាង​ចាញ់ ហើយ​ការប្រកួត​ចុងក្រោយ​នេះ គេ​វាយ​ឈ្នះ​វៀត ប៊ុន​ឌឿ​ន អ្នក​ប្រដាល់​សមាគម​កីឡា​ក្រសួងការពារជាតិ ដោយ​ពិន្ទុ។

ទោះជា​យ៉ាងណា ការ​ប៉ះ​គ្នា​រវាង​រឿ​ម វ​ណ្ណះ​ជាមួយ​ឯម លី​ថូ​នេះ ត្រូវបាន​គេ​រំពឹងទុក​ថា លី​ថូ​នឹង​ឈ្នះ​ការប្រកួត​នេះ ពីព្រោះ​លី​ថូ​មិន​ងាយ​ឲ្យ​វ​ណ្ណះ​ចេញ​កែង​ជង្គង់​បាន​ស្រួលៗ​នោះ​ឡើយ។

សរ សី អ្នក​ប្រដាល់​សមាគម​កីឡាប្រដាល់​ក្រសួងការពារជាតិ នឹង​ជួប​ប្រកួត​ជាមួយ​ម៉ូ រដ្ឋា អ្នក​ប្រដាល់​ក្លឹប​ព្រៃទទឹង​ខេត្តបាត់ដំបង។ ពួកគេ​ទាំងពីរ​នេះ ក៏​មិនដែល​ប៉ះ​គ្នា​ទេ​ពី​មុន​មក។

អ្នក​ប្រដា​ល់សរ សី តាម​ពិតជា​អ្នក​ប្រដាល់​ស្រករ​ក្រោយ​ម៉ូ រដ្ឋា​ទេ គ្រាន់តែ​រដ្ឋា​គេ​ពុំ​មាន​ឈ្មោះ​ល្បី​នោះ។ អ្នក​ប្រដា​ល់សរ សី មាន​កម្លាំង​ស៊ុ​ហ្វ​ខ្លាំង​ជាង​រដ្ឋា តែ​ទិច​និ​ច​ប្រកួត​ចាញ់​រដ្ឋា។

ម៉ូ រដ្ឋា គេ​មាន​កណ្តាប់ដៃ​ល្អ តែ​អន់​ជើង​ក្រោម ប៉ុន្តែ​យ៉ាងណា​រដ្ឋា គេ​មាន​ទិច​និ​ច​និង​ល្បិចកល​ប្រកួត​ខ្ពស់ជាង​សរ សី ដែល​វាយ​ត្រង់ៗ​នោះ។

ការប្រកួត​រវាង​សរ សី និង ម៉ូ រដ្ឋា នេះ ទោះជា​អ្នកណា​ឈ្នះ ក៏​ឈ្នះ​ដោយ​វេទនា​ដែរ។ សី ប្រកួត​ចុងក្រោយ​នេះ វាយ​ឈ្នះ​មី​ស្លី​ន អា​លី អ្នក​ប្រដាល់​ក្លឹប​អាស៊ី​កីឡា​ដោយ​ពិន្ទុ ឯ​ការប្រកួត​ចុងក្រោយ​របស់​ម៉ូ រដ្ឋា វិញ គឺ​វាយ​ចាញ់​ចៅ ផល​ឌឿ អ្នក​ប្រដាល់​ក្លឹប​សំរោង​កោង​ខេត្តបាត់ដំបង​ដោយ​ពិន្ទុ។

គិ​ន សំបូរ អ្នក​ប្រដាល់​ក្លឹប​ភារ​ម្យ​គុន​ខ្មែរ នឹង​ប្រកួត​ជាមួយ​សល់ អា​វិ​ន អ្នក​ប្រដាល់​ក្លឹប​កុសល​កីឡា។ គិ​ន សំបូរ បាត់​មុខ​ជាង​៣​ឆ្នាំ​មក​ហើយ គេ​ប្រកួត​ទើប​១៨​ដង​ប៉ុណ្ណោះ ប៉ុន្តែ​អ្នកណា​ចាប់​ប្រកួត​ប៉ះ​គេ​នោះ គឺ​ស៊យ​ធំ​ហើយ ព្រោះ​សំបូរ​ខ្ពស់ ដៃជើង​វែង ពិបាក​វ៉ៃ​ជា មួយ​ណាស់។

ក្រោយ​បាត់​មុខ​៣​ឆ្នាំ គេ​វិល​មក​សង្វៀន​វិញ​កាលពី​ថ្ងៃទី​០៦ កុ​ម្ភៈ ២០១៥ ហើយ​បាន ផ្តួល​ផល សីហា អ្នក​ប្រដាល់​ក្លឹប​សុភា​នូ​មានជ័យ នៅក្នុង​ទឹក​ទី​២។ ដូច្នេះ​គេ​នៅតែ​វាយ​ល្អ​ដដែល​ទេ។

លោក នួន ភី​រម្យ ដែល​ជា​គ្រូបង្ហាត់​របស់​សំបូរ បាន​ឲ្យ​ដឹង​ថា សំបូរ​ហាត់​តែម្នាក់ឯង​ទេ ព្រោះ​គ្មាន​អ្នកណា​សមជា​មួយ​នោះ​ទេ ដោយសារ​គេ​ខ្ពស់​ពេក។ តែ​យ៉ាងណា សំបូរ​ហាត់​បានល្អ​ត្រៀប​សម្រាប់​ការជួប​ជាមួយ​សល់ អា​វិ​ន​នេះ។

សល់ អា​វិ​ន គេ​មាន​កំនត់ត្រា​ប្រកួត​ច្រើនជាង​គិ​ន សំបូរ ប៉ុន្តែ​មិន​រំពឹង​ថា ឈ្នះ​សំបូរ​នោះ​ទេ សម្រាប់​ការ​ជួប​ប្រកួត​គ្នា​លើកដំបូង​នេះ។ អា​វិ​ន ប្រកួត​ចុងក្រោយ​នេះ វាយ​ឈ្នះ​ង៉ែ​ត្រ បូ​រិ​ន ក្លឹប​ពន្លឺ​វិបុល​រិទ្ធី​ក្នុង​ទឹក​ទី​៣។

កីឡាការិនី បូរី ស្រី​ភ័​ណ្ឌ ក្លឹប​បុរី​គុន​ខ្មែរ នឹង​ឡើង​ប្រកួត​ជាមួយ​កីឡាការិនី វី ស្រី​ឆាយ ក្លឹប​នាគ​មានជ័យ ។ ស្រី​ភ័​ណ្ឌ វាយ​ចាញ់​វី ស្រី​ខួច ដែលជា​បងស្រី​របស់​ស្រី​ឆាយ​ពីរ​ដង ទៅ​ហើយ ទើប​ឥឡូវ​ផ្គូ​អោយ​ជួប​ស្រី​ឆាយ​ជា​ប្អូន​ម្តង។ ចាំ​មើល​ស្រី​ភ័​ណ្ឌ អាច​យកឈ្នះ​ស្រី​ឆាយ​បាន​ឬ​អត់​នោះ ? ៕​