ភ្នំពេញ ៖ លោក Jean Francois Cautain ឯកអគ្គរដ្ឋទូតសហភាពអឺរ៉ុបមានប្រសាសន៍ក្នុងជំនួបជាមួយ សម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាពក្នុងរាជធានីភ្នំពេញ កាលពីថ្ងៃទី១៨ ខែកុម្ភៈ ឆ្នាំ ២០១៣ ថា ប្រទេសទាំង ២៧ ក្នុងសហភាពអឺរ៉ុបមានការគាំទ្រកម្ពុជានៅក្នុងការបោះឆ្នោត សាកលលើកទី ៥ នៅក្នុងខែកក្កដា ខាងមុខនេះ ហើយក៏សូមចូលរួមអបអរសាទរចំពោះកំណែទម្រង់ ប្រព័ន្ធយុត្តិធម៌នៅកម្ពុជាផងដែរ។
លោក អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីថ្លែងថា នៅក្នុងជំនួបនោះ លោក Jean Francois Cautain បានថ្លែងថា សហភាពអឺរ៉ុបគាំទ្រ និងជម្រុញការសហការជាមួយរាជរដ្ឋាភិបាលកម្ពុជា ដើម្បីឲ្យការបោះឆ្នោតសាកលប្រព្រឹត្តទៅដោយត្រឹមត្រូវ យុត្តិធម៌ ហើយសហភាពអឺរ៉ុប សូមអបអរសាទរចំពោះកំណែទម្រង់ប្រព័ន្ធតុលាការរបស់កម្ពុជា ដែលរាជរដ្ឋាភិបាលបានអនុម័តក្រមរដ្ឋប្បវេណី ក្រមព្រហ្មទណ្ឌ ក៏ដូចជាច្បាប់ប្រឆាំងអំពើពុករលួយនោះ។ លោក Jean Francois Cautain ក៏បានស្នើឲ្យរាជរដ្ឋាភិបាលកម្ពុជា ធ្វើយ៉ាងណាជម្រុញឲ្យបាននូវច្បាប់ចៅក្រម ច្បាប់មេធាវី និងច្បាប់ ឧត្តមក្រុមប្រឹក្សាចៅក្រមផងដែរ។
លោកជំនួយការបានប្រាប់ក្រុមអ្នកយកព័ត៌មានថា លោក Jean Francois Cautain បានអបអរ សាទរចំពោះរាជរដ្ឋាភិបាលកម្ពុជា ដែលក្នុងរយៈពេល ៣ ឆ្នាំកន្លងមកនេះ បានកាត់បន្ថយភាពក្រីក្រ រហូតដល់ ៥% ដោយបានធ្វើឲ្យភាពក្រីក្រនៅកម្ពុជានៅសល់តែ ២០% ប៉ុណ្ណោះនៅពេលបច្ចុប្បន្ន ហើយលោកក៏បានអបអរសាទរចំពោះសេចក្តីថ្លែងការណ៍របស់អាស៊ាន ពាក់ព័ន្ធជាមួយបញ្ហាសិទ្ធិ មនុស្សផងដែរ។
ដោយបានថ្លែងអំណរគុណចំពោះយោបល់របស់លោក Jean Francois Cautain នោះសម្តេច តេជោនាយករដ្ឋមន្ត្រីមានប្រសាសន៍ថា ការបោះឆ្នោតជាទៀងទាត់របស់កម្ពុជា គឺជាការចាំបាច់ណាស់ ដើម្បីជម្រុញកម្ពុជាឆ្ពោះទៅកាន់ការអភិវឌ្ឍ និងប្រកបដោយលទ្ធិប្រជាធិបតេយ្យ។សម្តេចនាយករដ្ឋមន្ត្រីក៏បានសំដែងនូវការរីករាយផងដែរ នូវការអបអររបស់សហភាពអឺរ៉ុបចំពោះកម្ពុជាដែលបានអនុម័តច្បាប់ទាំង ៣ ប៉ុន្តែទោះជាយ៉ាងនេះក្តីក៏សម្តេចតេជោនាយករដ្ឋមន្ត្រីបានសំដែងនូវភាពមិនសប្បាយចិត្តការយឺតយ៉ាវពាក់ព័ន្ធទៅនឹងច្បាប់ចៅក្រម ច្បាប់មេធាវី និងច្បាប់ឧត្តមក្រុមប្រឹក្សាចៅក្រម ដែលមិនទាន់បានអនុម័ត ដោយមានប្រសាសន៍ថា ច្បាប់ទាំងនោះគប្បីជំរុញអនុម័តឲ្យបានកាន់តែលឿនឡើងៗទើបជាការប្រសើរ។
លោកជំនួយការឲ្យដឹងបន្តថា សម្តេចនាយករដ្ឋមន្ត្រីបានថ្លែងអំណរគុណចំពោះការលើកទឹក ចិត្ត និងការវាយតម្លៃខ្ពស់របស់សហភាពអឺរ៉ុប ចំពោះការប្រឹងប្រែងរបស់រាជរដ្ឋាភិបាលកម្ពុជាក្នុងការកាត់បន្ថយភាពក្រីក្រនោះ។ សម្តេចនាយករដ្ឋមន្ត្រីក៏បានថ្លែងអំណរគុណចំពោះសហភាពអឺរ៉ុបផងដែរ ដែលក្នុងរយៈពេលប្រមាណ ១០ ឆ្នាំកន្លងមកនេះបានផ្តល់ហិរញ្ញប្បទានដល់កម្ពុជាជួយលើវិស័យអប់រំ។
លោក អ៊ាង សុផល្លែត ថ្លែងថា ចំពោះការលើកឡើងរបស់លោក Jean Francois Cautain អំពី បញ្ហាដីធ្លីនោះ សម្តេចតេជោបានជំរាបជូនលោកទូតសហភាពអឺរ៉ុបយ៉ាងលម្អិតអំពីកំណែទម្រង់ដីធ្លី របស់រាជរដ្ឋាភិបាល ដែលមានយុវជនស្ម័គ្រចិត្ត រួមជាមួយស្ថាប័នមានសមត្ថកិច្ច ដើម្បីវាស់វែងដីធ្លីចែកជូនប្រជាជនកម្ពុជា៕
ស្នាយពល
