ភ្នំពេញ ៖ កូនភ្លោះ៣នាក់ស្រីទាំងអស់របស់សម្ដេចអគ្គមហាសេនាបតីតេជោ ហ៊ុន សែន និងលោកជំទាវបានប្រសូតចេញពីផ្ទៃត្រកូលគ្រួសារកសិករមកពីខេត្តរតនគិរីនៅមន្ទីរពេទ្យកាល់ម៉ែតកាលពីវេលាម៉ោង១៥និង១៥នាទីរសៀលថ្ងៃទី១៧ ខែកុម្ភៈ ឆ្នាំ២០១៣ក្រោមការយកចិត្តទុកដាក់ថែទាំពីគ្រូពេទ្យទាំងម្តាយ និងកូនមានសុខភាពល្អប្រសើរផងដែរ។
បើតាមការឲ្យដឹងពីស្ត្រីឈ្មោះវ៉ាត សួន អាយុ២៦ឆ្នាំ ជាកសិករ រស់នៅភូមិជ័យឧត្តម ឃុំជ័យឧត្តម ស្រុកលំផាត់ ខេត្តរតនគិរី ដែលជាម្តាយកូនភ្លោះចំនួន៣នាក់នោះបានឲ្យដឹងថា កូនភ្លោះស្រីបីនាក់នេះជាកូនលើកទី៣ហើយ ដែលលើកទី១ក្នុងអំឡុងឆ្នាំ២០០បានកូនស្រីម្នាក់តែជាអកុសលកូនស្រីលើកទី១នោះបានស្លាប់ទៅវិញ។ លុះសម្រាលលើកទី២បានកូនម្នាក់ទៀតនាងមានអាយុជាង២ឆ្នាំមកទល់បច្ចុប្បន្ននេះ ហើយនៅពេលសម្រាលលើកទី៣នេះស្រាប់តែកើតកូនភ្លោះរហូតដល់ទៅ៣នាក់ស្រីទាំងអស់តែម្តង។
ស្ត្រីជាម្តាយឈ្មោះវ៉ាត សួន បានបន្តទៀតថាមុនពេលចាប់កំណើតកូនភ្លោះរបស់គាត់ចំនួន៣នាក់នេះគាត់មិនបានយល់សប្តិឃើញអ្វីប្លែកឡើយ ហើយម្យ៉ាងវិញទៀតក្នុងពេលពពោះនោះគាត់ក៏ឧស្សាហ៍ទៅពេទ្យបង្អែកខេត្តរតនគិរីដើម្បីតាមដានតាមបញ្ជាគ្រូពេទ្យដែរ តែគ្រូពេទ្យមិនបានប្រាប់គាត់ថាកូនក្នុងផ្ទៃរបស់គាត់មានដល់ចំនួន៣នាក់ឡើយ លុះជិតដល់ពេលឆ្លងទន្លេគ្រូពេទ្យពិនិត្យប្រាប់ថាកូនក្នុងផ្ទៃរបស់គាត់មានចំនួនរហូតដល់ទៅ៣នាក់ឯណោះ ទើបគាត់សម្រេចមកឆ្លងទន្លេនៅមន្ទីរពេទ្យកាល់ម៉ែតបានកូនស្រីជាទីស្រឡាញ់៣នាក់នេះតែម្តង ហើយគ្រួសារគាត់បានសម្រេចដាក់ឈ្មោះអោយដោយកូនទី១-ឈ្មោះភួង ប៊ុនមី មានទម្ងន់២គីឡូក្រាមកន្លះខាំ, កូនទី២-ឈ្មោះភួង ផាត់សី មានទម្ងន់២គីឡូក្រាម៣ខាំ និងកូនទី៣-ឈ្មោះភួង ម៉ារ៉ាស៊ី មានទម្ងន់២គីឡូក្រាម៣ខាំ។
គួរបញ្ជាក់ថាក្រុមគ្រូពេទ្យនៃមន្ទីរពេទ្យកាល់ម៉ែតបាននឹងកំពុងយកចិត្តទុកដាក់ក្នុងការមើលថែឲ្យកូនភ្លោះនាក់មានសុខភាពល្អឯម្តាយក៏មានសុខភាពល្អដែរកំពុងសំរាកនៅមន្ទីរពេទ្យនៅឡើយ៕
រស្មី
