ភ្នំពេញ ៖ កម្មកររោងចក្រយីហោខ្លាឃ្មុំម្នាក់បានស្លាប់ភ្លាមៗនៅនឹងកន្លែងកើតហេតុ និង២នាក់ទៀតរងរបួសធ្ងន់សន្លប់ឈឹងដែលសង្ឃឹមរស់តិចបំផុត ដោយសារគ្រោះថ្នាក់ចរាចរមួយដែលបង្កឡើងដោយរថយន្តធុនធំម៉ាកមីតស៊ុយប៊ីស៊ីសែនធ័របើកបញ្ច្រាសទិសគ្នាបុកជាមួយម៉ូតូជនរងគ្រោះចំកណ្ដាលផ្លូវបណ្ដាលឲ្យកម្មកររោងចក្រទឹកកកស្លាប់ និងរងរបួសរដូករណែលពេញផ្លូវតែម្ដង ចំណែកតៃកុងរថយន្តបង្កបានដាក់មេប្រូចបាត់ស្រមោលបន្ទាប់ពីបុកគេរួច។
ហេតុការណ៍នេះបានកើតឡើងកាលពីវេលាម៉ោង៤ទៀបភ្លឺ ថ្ងៃទី១៦ ខែកុម្ភៈឆ្នាំ២០១៣ នៅតាមបណ្ដោយផ្លូវជាតិលេខ៥ ចំណុចព្រំប្រទល់ សង្កាត់ទួលសង្កែ និង សង្កាត់ឫស្សីកែវ ខណ្ឌឫស្សីកែវ។
សមត្ថកិច្ចបានឲ្យដឹងថា រថយន្តបង្កម៉ាក មីតស៊ុយប៊ីស៊ីសែនធ័រពណ៌ស ពាក់ស្លាកលេខព្រៃវែង 3A-0113 បើកបរដោយបុរសម្នាក់មិនស្គាល់អត្តសញ្ញាណ ក្រោយពីបង្កហេតុបានរត់បាតជើងសព្រាតបាត់ស្រមោល។ ចំណែកម៉ូតូរបស់ជនរងគ្រោះម៉ាកស៊ីធីប្លឹកពណ៌ក្រហមគ្មានស្លាកលេខ គ្មានភ្លើងមុខបំភ្លឺផ្លូវ គ្មានអ្វីៗទាំងអស់បានខូចខាតស្ទើរទាំងស្រុង។
សមត្ថកិច្ចបន្តថា ជនរងគ្រោះទី១. ឈ្មោះ ឡេវ ភេទប្រុសអាយុជាង២០ឆ្នាំ បានស្លាប់នៅនឹងកន្លែងកើតហេតុ ទី២. ឈ្មោះ ទូចភេទប្រុស អាយុជាង២០ឆ្នាំ ដូចគ្នា និងទី៣. ឈ្មោះ រ៉ូ ភេទប្រុស អាយុជាង២០ឆ្នាំ ទាំង៣នាក់ជាកម្មករនៅរោងចក្រទឹកកកយីហោខ្លាឃ្មុំស្នាក់នៅក្នុងរោងចក្រខាងលើ ភូមិមិត្តភាព សង្កាត់-ខណ្ឌឫស្សីកែវ។
បើតាមសាក្សីនៅក្បែរកន្លែងកើតហេតុបានឲ្យដឹងថា មុនពេលកើតហេតុជនរងគ្រោះទាំង៣នាក់ជិះម៉ូតូគ្មានភ្លើងពីជើងទៅត្បូង ចំណែករថយន្តបើកពីត្បូងទៅជើងបញ្ច្រាសទិសគ្នា ខណៈពេលមកដល់ចំណុចកើតហេតុ រថយន្តក៏បានរេចង្កូតចូលចំណែកផ្លូវម៉ូតូដោយសារម៉ូតូគ្មានភ្លើងបំភ្លឺផ្លូវ ទើបបណ្ដាលឲ្យបុកគ្នាពេញទំហឹង បង្កឲ្យមានមនុស្សស្លាប់ និងរបួសរដូករណែលតែម្ដង។
ប្រភពបន្តទៀតថា ភ្លាមៗអ្នកឃើញហេតុការណ៍បានហៅរថយន្តសង្គ្រោះរបស់មន្ទីរពេទ្យរដ្ឋ ប៉ុន្តែហៅរយៈពេលជាង១ម៉ោងមិនឃើញមានរថយន្តមកសោះ ទើបប៉ូលិសចរាចរក្រុងយកឡានខ្លួនឯងដឹកទៅមន្ទីរពេទ្យកាល់ម៉ែតដោយខ្លួនឯង។ គេឃើញអ្នករងរបួសធ្ងន់ទាំង២នាក់បានហូរឈាមឡើងខ្សោះអស់ពីខ្លួន ហើយមានសង្ឃឹមរស់តិចបំផុត៕
ឌីរៀ
