ឡុង សុវណ្ណ​ឌឿ​ន ជួប សូ​យ យក្ស​តឿ ឯ ងួន គា ​សងសឹក ​ជុន​ សាវុធ​

ថ្ងៃ សុក្រ ទី20 កុម្ភៈ ឆ្នាំ2015 ម៉ោង09:09   ផ្នែក: ព័ត៌​មានកីឡា    ដោយ: វិសិទ្ធ​

Pisey-02-2015-20-full-C

ភ្នំពេញ ៖ អ្នក​ប្រដាល់​ជើង​ខ្លាំង ឡុង សុវណ្ណ​ឌឿ​ន ត្រូវ​គេ​ផ្គូផ្គង​ឲ្យ​ជួប​ប្រកួត​ជាមួយ ​សូ​យ យក្ស​តឿ អ្នក​ប្រដាល់​ក្លិប​ពោធិ​ជ័យ​កីឡា លើ​សង្វៀន​រោង​សៀក​ទល់មុខ​រដ្ឋសភា នា​រសៀល​ថ្ងៃអាទិត្យ​ ទី​២២ ខែកុម្ភៈ ឆ្នាំ​២០១៥​នេះ​។​

ជា​លើក​ទី​១​សម្រាប់​ឆ្នាំ​២០១៥​នេះ ដែល ​ឡុង សុវណ្ណ​ឌឿ​ន ឡើង​ប្រកួត​នោះ​។ ​កាល​ពី​ឆ្នាំ​២០១៤​កន្លងមក សុវណ្ណ​ឌឿ​ន ប្រកួត​បាន​៣​ដង​ប៉ុណ្ណោះ ដោយ​ការប្រកួត​លើក​ចុង​ក្រោយ​(ថ្ងៃទី​២១​ខែ​កញ្ញា​ ឆ្នាំ​២០១៤) គេ​បាន​ផ្ដួល​អ្នក​ប្រដាល់​ថៃ​ឲ្យ​សន្លប់​ក្នុង​ទឹក​ទី​៣​។​

ដូច្នេះ មិន​ដឹង​ថា​ សូ​យ យក្ស​តឿ អាច​ទប់​ជាមួយ ​ឡុង សុវណ្ណ​ឌឿ​ន បាន​ឬ​អត់​នោះ​ទេ​? ព្រោះ ​យក្ស​តឿ ប្រកួត​ត្រឹមតែ​ជាមួយ សរ រាជសីហ៍ អ្នក​ប្រដាល់​ជើង​ថ្មី​ក្លិប​មោងឫស្សី​មរតក​គុន​ខ្មែរ​ខេត្តបាត់ដំបង កាលពី​ថ្ងៃទី​២៥​ ខែ​មករា​កន្លងមក គេ​ទៅ​មិន​រួច​ផង​ដោយ​ត្រូវ​ សរ រាជសីហ៍ ​វាយ​ឲ្យ​សន្លប់​ក្នុង​ទឹក​ទី​៣​នោះ​។​

សូ​យ យក្ស​តឿ គេ​វាយ​ខ្លាំង​ដែរ តែ​អន់​ខាង​ការពារ​។ មួយទៀត គេ​វាយ​ច្រើន​សម្រុក​ខ្លាំង​ពី​ដើម​ទឹក​ដល់​ចុង​ទឹក​ ក៏​អស់​ស៊ុ​ហ្វ ធ្វើ​ឲ្យ​ចាញ់​គូប្រកួត​។ ចាំ​មើល​លើក​នេះ​ជួប​ជាមួយ​ ឡុង សុវណ្ណ​ឌឿ​ន យក្ស​ តឿ​ អាច​តស៊ូ​បាន​ឬ​អត់​? ​

ងួន គា អ្នក​ប្រដាល់​ក្លិប​តា​ឡី​ដំរី​មាន​រិ​ទ្ធ នឹង​ឡើង​សងសឹក ​ជុន សាវុធ អ្នក​ប្រដាល់​ក្លិប​ពោធិ​ជ័យ​កីឡា​។ គា បាន​វាយ​ចាញ់ ​សាវុធ​ ដោយ​ពិន្ទុ​តែម្តង​ប៉ុណ្ណោះ តាំងពី​ជួបគ្នា​នា​ថ្ងៃ​២៤ ខែ​វិច្ឆិកា ឆ្នាំ​២០១៣​កន្លងមក​។ ចាប់ពី​នោះ​មក គេ​ពុំដែល​ជួប​ជាមួយ ​សាវុធ ​ទៀត​ឡើយ។​

តែ​យ៉ាងណា ងួន គា ឥឡូវនេះ​មិន​ដូច​មុន​នោះ​ទេ​។ គេ​វាយ​ខ្លាំង និង​ល្អ​ជាង​មុន គួបផ្សំ​នឹង​គេ​មានចិត្ត​ប្រដាល់​ធំ​ថែមទៀត​នោះ មិន​ងាយ​នរណា​ផ្ដួល​គេ​បាន​ឡើយ​។ គេ​ប្រកួត​ចុងក្រោយ​នេះ វាយ​ឈ្នះ​ យ៉ា​ម ឡយ អ្នក​ប្រដាល់​ក្លិប​រស្មី​កុមារ​កំព្រា​ដោយ​ពិន្ទុ​។​

ជុន សាវុធ គេ​ជា​អ្នក​ប្រដាល់​ជើងចាស់​ម្នាក់​ដែល​មាន​បទពិសោធន៍​ជោគជាំ​លើ​សង្វៀន​។ គេ​មាន​កណ្ដាប់ដៃ​មិនជា​ធ្ងន់​ប៉ុន្មាន​ទេ តែ​ជើង​ទាត់​ និង​ជង្គង់​របស់​គេ​មាន​ផ្លែ​ល្អ​។ ​គេ​ប្រកួត​ចុងក្រោយ​នេះ វាយ​ឈ្នះ​ ម៉ៅ រិទ្ធី អ្នក​ប្រដាល់​ជើងចាស់​ក្លិប​ពន្លឺ​សាមគ្គី​ខេត្តបាត់ដំបង​ក្នុង​ទឹក​ទី​៤​។​

ទោះជា​យ៉ាងណា សម្រាប់​ការ​ជួប​គ្នា​រវាង​ ជុន សាវុធ និង ងួន គា លើក​នេះ មិន​មាន​អ្នកណា​ហ៊ាន​ទាយ​មុន​ថា អ្នកណា​ឈ្នះ​អ្នកណា​ចាញ់​នោះ​ឡើយ ព្រោះថា​ ងួន គា​បច្ចុប្បន្ន​ខ្លាំង​ជាង​មុន​។ ងួន គា ប្រកួត​ស៊ូ​ណាស់ ទោះ​ចាញ់​ប្រៀប​គូប្រកួត​ក្តី ក៏​គេ​នៅតែ​សម្រុកចូល​វាយ​គូប្រកួត​ដែរ​។ ចាំ​មើល ងួន គា អាច​សងសឹក​ ជុន សាវុធ បានសម្រេច​ឬ​អត់​? ​

អ៊ុង ស៊ីណា អ្នក​ប្រដាល់​ក្លិប​សុភា​នូ​មានជ័យ​នឹង​ជួប​ប្រកួត​ជាមួយ យ៉ា​ម ឡយ អ្នក ប្រដាល់​ក្លិប​រស្មី​កុមារ​កំព្រា​។ ពីរ​នាក់​នេះ​ពុំ​ធ្លាប់​ដែល​ជួបគ្នា​ទេ​កន្លងមក​។ នេះ​ជា​ការ​ប្រកួត​មួយ​ដ៏​តឹងតែង​បំផុត ដោយសារ​ ស៊ីណា ជា​អ្នក​ប្រដាល់​ចាស់វស្សា ឯ​ យ៉ា​ម ឡយ ជា​អ្នក​ប្រដាល់​ស្រករ​ក្រោយ តែ​យ៉ា​ម ឡយ​មានប្រៀប​ខាង​កម្ពស់ និង​មាន​ស្នៀត​ប្រដាល់​មិន​ចាញ់​ ស៊ីណា ​ប៉ុន្មាន​ទេ​។ ប៉ុន្តែ​មិនទាន់​ប្រាកដ​ថា​ឈ្នះ​ អ៊ុង ស៊ីណា នោះ​ឡើយ​។​

ទោះបីជា​គេ​ទាប​បន្តិច​ក្តី ស៊ីណា​ មាន​របៀប​វាយ​ល្អ​ជាង​ យ៉ា​ម ឡយ និង​មាន​កលល្បិច​ច្រើន​ជាង​។ ហេតុនេះ សម្រាប់​ការ​ជួប​គ្នា​រវាង​ អ៊ុង ស៊ីណា និង យ៉ា​ម ឡយ​នេះ ពុំ​មាន​នរណា​ហ៊ាន​ទស្សន៍ទាយ​ថា​នរណា​ជា​អ្នកឈ្នះ​នោះ​ឡើយ​។​

​ ​យ៉ា​ម ឡយ ប្រកួត​ចុងក្រោយ វាយ​ចាញ់​ ងួន គា​ដោយ​ពិន្ទុ ឯ អ៊ុង ស៊ីណា ប្រកួត​ចុងក្រោយ វាយ​ឈ្នះ ​សេង កំសត់ អ្នក​ប្រដាល់​ក្លិប​ខេមរិន្ទ្រ​មាន​រិ​ទ្ធ​ដោយ​ពិន្ទុ​។​

​ ​ប្រាក់ ស៊ី​ណាត អ្នក​ប្រដាល់​ក្លិប​តា​ឯក​មា​រិ​ទ្ធ ត្រូវ​ប្រកួត​ជាមួយ​ ឈុន បញ្ញា អ្នក​ប្រដាល់​ក្លិប​រ៉ា​ហាប់​ស្វាយប៉ាក​។ ពួកគេ​ទាំងពីរ​នេះ ពុំដែល​ប៉ះ​គ្នា​ទេ​ពី​មុន​មក តែ​អ្នក​ទាំងពីរ​មាន ស្នៀត​ប្រដាល់​ប្រហាក់​ប្រហែល​គ្នា​។​

ស៊ី​ណាត ប្រកួត​ជិត​២០​ដង តែ​ឈ្នះ​បាន​ពីរ​ដង​ប៉ុណ្ណោះ ហើយ​ ឈុន បញ្ញា ក៏​ប្រកួត​ចាញ់​ច្រើន​ជាង​ឈ្នះ​ដែរ​។ ដូច្នេះ សម្រាប់​ការ​ជួប​គ្នា​នេះ មិន​ដឹង​ថា​នរណា​ជា​អ្នកឈ្នះ​នោះ​ទេ​៕​

Pisey-02-2015-20-full-C1Pisey-02-2015-20-full-C5