ព្រះវិហារ ៖ នៅវេលាម៉ោងប្រមាណ១០និង៣២នាទីយប់ថ្ងៃទី១៥ ខែកុម្ភៈ ឆ្នាំ២០១៣មានកើតហេតុការណ៍អគ្គីភ័យឆាបឆេះផ្ទះប្រជាពលរដ្ឋ១ខ្នងធ្វើអំពីឈើប្រក់ស័ង្កសីក្នុងដីទ្បូតិ៍១កន្លែងស្ថិតនៅភូមិគោកបេង សង្កាត់កំពង់ប្រណាក ក្រុងព្រះវិហារធ្វើឲ្យមានការភ្ញាក់ផ្អើលដល់ប្រជាពលរដ្ឋក្នុងមូលដ្ឋានដែលកំពុងតែដេកលង់លក់ក្នុងពេលរាត្រី។
ហេតុការណ៍អគ្គីភ័យឆាបឆេះផ្ទះប្រជាពលរដ្ឋនេះក៏មានកម្លាំងសមត្ថកិច្ចនគរបាលនិងកងរាជអាវុធហត្ថបាននាំគ្នាចុះជួយអន្តរាគមន៍ក្នុងនោះឃើញមានវត្តមានលោកស៊ីគិរីស្នងការនគរបាលខេត្តព្រះវិហារចុះបញ្ជាផ្ទាល់ឲ្យរថយន្តពន្លត់អគ្គីភ័យចំនួន២គ្រឿងមកអន្តរាគមន៍បាញ់ទឹកពន្លត់ភ្លើងដែលកំពុងឆេះសន្ធោសន្ធៅនោះ។
ដោយទីតាំងផ្ទះកើតហេតុនៅជ្រៅពីផ្លូវកៅស៊ូហើយមានផ្លូវចូលទៅផ្ទះលំបាកក្នុងការបើករថយន្ដពន្លត់អគ្គីភ័យចូលទៀតនោះធ្វើឲ្យអណ្ដាតភ្លើងបានលេបត្របាក់ផ្ទះទាំងមូលទៅជាគំនរផេះ ចំណែករថយន្តពន្លត់អគ្គីភ័យខ្នះខ្នែងជួយបាញ់ទឹកពន្លត់ពីខាងក្រៅរបងមុខផ្ទះជាលទ្ធផលអណ្ដាតភ្លើងបានរលត់អស់ទៅវិញនៅវេលាម៉ោង១២និង៣៨នាទីឈានចូលថ្ងៃទី១៦ ខែកុម្ភៈ ឆ្នាំ២០១៣។
ស្ដ្រីមេម៉ាយកូន២ជាម្ចាស់ផ្ទះរងគ្រោះឈ្មោះពៅសុខនអាយុ៣២ឆ្នាំបានឲ្យអ្នកសារព័ត៌មានដឹងនៅយប់កើតហេតុថាមូលហេតុដែលនាំឲ្យមានភ្លើងឆាបឆេះផ្ទះរបស់គាត់គឺផ្ដើមឆេះពីទិសខាងជើងជាប់ទ្រុងមាន់របស់គាត់ ពេលនោះគាត់ព្រមទាំងកូន២នាក់ភ័យស្លន់ស្លោរត់គេចចេញពីក្នុងផ្ទះស្រែកហៅឲ្យអ្នកជិតខាងជួយតែសំណាងមិនល្អផ្ទះប្រជាពលរដ្ឋក្បែរខាងមិនមានទឹកនៅក្នុងពាងឬអាងដងជញ្ជូនយកមកជួយពន្លត់ភ្លើងកំពុងឆាបឆេះបានទាន់ពេលវេលានោះទេ។
ស្ដ្រីរូបនេះបន្ដទៀតថាគាត់មិនបានធ្វេសប្រហែសឲ្យមានងងើកភ្លើងចង្ក្រាននោះទេ ជារៀងរាល់ថ្ងៃគាត់ដាំបាយនឹងភ្លើងអគ្គិសនីចំណែកខ្សែភ្លើងអគ្គិសនីក៏មិនមានទុស្សេអ្វីដែរគឺគាត់បានដាក់ការសង្ស័យមានមនុស្សឈ្នានីសលួចដុតតែម្ដង។ គាត់និយាយថាទ្រព្យសម្បត្តិក្នុងផ្ទះដែលបាត់បង់មានចំនួន៩០០ដុល្លារអាមេរិកលុយខ្មែរចំនួន១លាន៥សែនរៀលនិងគ្រឿងអលង្ការប្លាទីនទម្ងន់៤ជី ហើយសម្ភារៈយកបានទាន់ពេលវេលារួមមានគ្រែដេកចំនួន២ទូរទស្សន៍១គ្រឿងនិងភួយមុងកន្ទេលខ្នើយព្រមទាំងឯកសារមួយចំនួន។
ចំណែកផ្ទះទំហំ៩ម៉ែត្រគុណ៤ម៉ែត្រនិងផ្ទះបាយ៤ម៉ែត្រគុណ៣ម៉ែត្រព្រមទាំងសម្ភារៈមួយចំនួនក្នុងផ្ទះត្រូវភ្លើងឆាបឆេះខ្ទេចខ្ទីគ្មានសល់។
លោកគង់គាអធិការនគរបាលក្រុងព្រះវិហារបានឲ្យដឹងនៅព្រឹកថ្ងៃទី១៦ ខែកុម្ភៈ ឆ្នាំ២០១៣ថាហេតុការណ៍ភ្លើងឆេះផ្ទះខាងលើមិនទាន់ដឹងពីមូលហេតុពិតប្រាកដនៅឡើយទេគឺសមត្ថកិច្ចកំពុងធ្វើការស៊ើបសួរស្ត្រីម្ចាស់ផ្ទះចំពោះការអះអាងថាមានមនុស្សឈ្នានីសលួចដុតបំផ្លាញនោះមន្ត្រីជំនាញនឹងបើកការស៊ើបអង្កេតវែករកមុខជនល្មើស៕
មង្គល
