ភ្នំពេញ ៖ សេចក្តីព្រាងច្បាប់ស្តីពីការធ្វើវិសោធនកម្មមាត្រា៩ និងមាត្រា១០ នៃច្បាប់ស្តីពី លក្ខន្តិកៈមន្ត្រីរាជការស៊ីវិលត្រូវបានរដ្ឋសភាពិនិត្យ និងផ្តល់សម្លេងគាំទ្រអនុម័ត ៨៥លើ៩៤សម្លេង និងសេចក្តីព្រាងច្បាប់ ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឲ្យក្រុមហ៊ុនហាយដ្រូ ផៅវ័រ ឡូវើរ សេសាន្ត២ ត្រូវបានរដ្ឋសភាអនុម័ត ៨២លើ៩០សម្លេងនៃអង្គសភាដែលបានចូលរួម បើទោះមានការស្នើសុំការពន្យារពេលការអនុម័តច្បាប់នេះពីគណបក្សប្រឆាំងសម រង្សី លោក ស៊ុន ឆៃ និងលោក យឹម សុវណ្ណ ក៏ដោយ។
រដ្ឋសភាបានអនុម័តនេះ បន្ទាប់ពីការពិភាក្សាអស់ពេញមួយព្រឹកថ្ងៃទី១៥ ខែកុម្ភៈនេះ នៅក្នុងសម័យប្រជុំរបស់រដ្ឋសភា ក្រោមអធិបតីភាពដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា។
ដោយឡែកច្បាប់ ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឲ្យក្រុមហ៊ុនហាយដ្រូ ផៅវ័រ ឡូវើរ សេសាន្ត២ នៅក្នុងកិច្ចដំណើរការពិភាក្សា លោកបណ្ឌិតរដ្ឋ ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារនិងសវនកម្ម នៃរដ្ឋសភា បានឲ្យដឹងថា សេចក្តីព្រាងច្បាប់នេះ មាន ៣មាត្រា ដែលត្រូវបានធ្វើការប្រជុំពិភាក្សាជាមួយគណៈកម្មការជំនាញរបស់រដ្ឋសភា និងតំណាងរដ្ឋាភិបាលចំនួនច្រើនលើករួចមកហើយ មុននឹងសម្រេចដាក់ចូលក្នុងរបៀបវារៈនៃ សម័យប្រជុំ ពេញ អង្គរដ្ឋសភាលើកទី៩ នីតិកាលទី៤ នៅព្រឹកថ្ងៃទី១៥ ខែកុម្ភៈនេះ។ លោក ជាម យៀប បានបញ្ជាក់ថា ការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជាឲ្យទៅក្រុមហ៊ុន ហាយដ្រូផៅវ័រឡវើរសេសាន្ត២ គឺនឹងផ្តល់អត្ថប្រយោជន៍ក្នុងការទទួលបានប្រភពថាមពលដ៏ធំដែលកម្ពុជាមិនធ្លាប់មាន រួមចំណែកធានាឯករាជភាព និងសន្តិសុខថាមពលកាត់បន្ថយការផលិត អគ្គិសនី ដោយប្រើប្រេងឥន្ធនៈដែលមានតម្លៃខ្ពស់និងទទួលបានថាមពលអគ្គិសនីមានតម្លៃថេរ រយៈពេលវែង។ មួយចំណែកទៀត វាបានរួមចំណែកជំរុញការអភិវឌ្ឍន៍សេដ្ឋកិច្ចជាតិ និងការប្រកួតប្រជែងអន្តរជាតិដោយបង្កើតឱកាសការងាររាប់ពាន់ដល់ពលករខ្មែរបម្រើការងារផ្ទាល់ក្នុងគម្រោង និងបង្កើនប្រាក់ចំណូលដល់ប្រជាសហគមន៍ក្នុងតំបន់ដាច់ស្រយាលនិងរួម ចំណែក កាត់បន្ថយភាពក្រីក្ររបស់ប្រជាពលរដ្ឋ។ ពោលគឺធ្វើការអភិវឌ្ឍវិស័យថាមពលអគ្គិសនី ឲ្យមានការរីកចម្រើនដើម្បីសេចក្តីត្រូវការរបស់ប្រជាពលរដ្ឋ និងប្រទេសជាតិ។
ក្នុងសេចក្តីថ្លែងហេតុរបស់រាជរដ្ឋាភិបាលកម្ពុជា ផ្ញើមកកាន់អង្គសភាដែលត្រូវបានចុះហត្ថលេខាដោយសម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឲ្យដឹងថាតាមលទ្ធផលសិក្សាផែនការមេនៅឆ្នាំ២០០៤ ក្នុងការអភិវឌ្ឍវារីអគ្គិសនីក្នុងអាងទន្លេ សេសានភាគខាងក្រោមក្នុងប្រទេសកម្ពុជាបង្ហាញថា គម្រោងវារីអគ្គិសនីសេសានក្រោមទី២ ជា គម្រោងដែលមានប្រសិទ្ធភាពសេដ្ឋកិច្ចខ្ពស់ និងជាអាទិភាពទី១ ក្នុងចំណោមគម្រោង វារីអគ្គិសនី ចំនួន៥ ដែលក្នុងនោះគម្រោងចំនួន៤ទៀតរួមមាន៖ គម្រោងវារីអគ្គិសនីសេសានក្រោមទី១, គម្រោងវារីអគ្គិសនីសេសានក្រោមទី៣, គម្រោងវារីអគ្គិសនីសេសាន្តព្រែកល្អាងទី១, និងគម្រោង វារីអគ្គិសនីសេសាន្តព្រែកល្អាងទី២។
នៅឆ្នាំ២០០៧ រាជរដ្ឋាភិបាលកម្ពុជា បានអនុញ្ញាតជាគោលការណ៍ឲ្យក្រុមហ៊ុន វៀតណាមឈ្មោះ EVN International Joint Stock Company ធ្វើការសិក្សាសមិទ្ធិលទ្ធភាព នៃ គម្រោង វារីអគ្គិសនីសេសានក្រោមទី២ ដើម្បីពិនិត្យលទ្ធភាពវិនិយោគរួមគ្នា រវាងភាគីកម្ពុជា និង វៀតណាម។
ក្នុងសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី២ ខែវិច្ឆិកា ឆ្នាំ២០១២ បានអនុម័តជា ឯកច្ឆន្ទ លើគម្រោងសាងសង់ស្ថានីយវារីអគ្គិសនីសេសានក្រោមទី២ អានុភាពដំឡើង ៤០០ មេហ្កវ៉ាត់ នៅខេត្តស្ទឹងត្រែង ដែលត្រូវអនុវត្តដោយក្រុមហ៊ុន ហាយដ្រូផៅវ័រឡូវើរសេសាន្ត ក្រោម២ (Hydro Power Lower Sesan 2 Co., Ltd.)។ ក្រុមហ៊ុននេះ ត្រូវបានបង្កើតឡើងដោយក្រុមហ៊ុន រ៉ូយ៉ាល់ គ្រុបរបស់លោកឧកញ៉ា គិត ម៉េង ដែលជាក្រុមហ៊ុនក្នុងស្រុកមានភាគហ៊ុន៩០ភាគរយ ដោយសហការជាមួយក្រុមហ៊ុន EVN International Joint Stock Company ដែលជា ក្រុមហ៊ុន រដ្ឋ មកពីប្រទេសវៀតណាមមានភាគ ហ៊ុន១០ភាគរយ។
អនុលោមតាមលក្ខខណ្ឌ នៃកិច្ចព្រមព្រៀងអនុវត្តគម្រោង តម្រូវឲ្យរាជរដ្ឋាភិបាលផ្តល់ការ ធានាពីរប្រភេទគឺ៖ ទី១ ការធានាលើការទូទាត់ថ្លៃទិញថាមពលអគ្គិសនី ក្នុងករណីអគ្គិសនី កម្ពុជា មិនធ្វើការ ទូទាត់ និងទី២ ១ ការធានាលើការទូទាត់ថ្លៃទិញមធ្យោបាយគម្រោង ក្នុងករណីដែលក្រុម ហ៊ុនមិនអាចអនុវត្តបាន ដែលបណ្តាលមកពីព្រឹត្តិការណ៍ ប្រធានស័ក្តិផ្នែក នយោបាយ។ ការធានានេះ ត្រូវបានចុះហត្ថលេខា កាលពីថ្ងៃទី១២ ខែធ្នូ ឆ្នាំ២០១២ដោយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងក្រសួងឧស្សាហកម្ម រ៉ែ និងថាមពលនៃរាជរដ្ឋាភិបាលកម្ពុជា។
លក្ខខណ្ឌ នៃកិច្ចព្រមព្រៀងអនុវត្តគម្រោងគឺត្រូវ៖ ទី១ សាងសង់ស្ថានីយវារីអគ្គិសនីអានុភាពដំឡើង៤០០មេហ្កាវ៉ាត់។ ទី២ សាងសង់ខ្សែបញ្ជូនអគ្គិសនីប្រវែង៣៦គីឡូម៉ែត្រ អានុភាព ២៣០គីឡូវ៉ុល។ ទី៣ ដោះស្រាយផលប៉ះពាល់ជូនប្រជាជនរងផលប៉ះពាល់ដោយគម្រោង ក្នុង នោះរួមមាន៖ ការដោះស្រាយប៉ះប៉ូវគោលនយោបាយការសាងសង់លំនៅដ្ឋានថ្មី ការសាងសង់ ហេដ្ឋារចនាសម្ព័ន្ធចាំបាច់នានារួមមាន៖ ផ្លូវថ្នល់ សាលារៀន វត្តអារាម មណ្ឌលសុខភាព ប្រព័ន្ធ ផ្គត់ផ្គង់ទឹកស្អាត សាលាឃុំ ប៉ុស្តិ៍នគរបាល ប្រព័ន្ធធារាសាស្ត្រ ជាដើម។ ទី៤ សាងសង់ថ្នល់ក្រាល កៅស៊ូប្រវែង២៤គីឡូម៉ែត្រ ពីការដ្ឋានទៅកាន់ទីរួមខេត្តស្ទឹងត្រែង។ ទី៥ កាប់សម្អាតព្រៃឈើក្នុង អាងស្តុកទឹក។ ទី៦ បោសសំអាតមីន និងគ្រាប់មិនទាន់ផ្ទុះ។ ទី៧ ឧបត្ថម្ភអគ្គិ សនី កម្ពុជា ៥០ម៉ឺន ដុល្លារអាមេរិកក្នុងមួយឆ្នាំ(សរុបរយៈពេល៤០ឆ្នាំ ស្មើនឹង២០លានដុល្លារ) សម្រាប់ការងារបណ្តុះបណ្តាល និងអភិវឌ្ឍន៍ធនធានមនុស្ស។ និងទី៨ ផ្លាស់ប្តូរគ្រឿងម៉ាស៊ីន ឧបករណ៍ បរិក្ខារចាំបាច់ មួយចំនួន ដោយជំនួសមកវិញនូវគ្រឿងម៉ាស៊ីន ឧបករណ៍បរិក្ខារថ្មីៗក្នុងតម្លៃសរុប ១៤០លាន ដុល្លារ នៅក្នុងឆ្នាំប្រតិបត្តិការទី៣០ ដើម្បីធានាសុវត្ថិភាព និងប្រសិទ្ធភាពសេដ្ឋកិច្ច។
ក្នុងលិខិតរបស់រាជរដ្ឋាភិបាល បានឲ្យដឹងទៀតថា ថ្លៃនៃការអនុវត្តគម្រោងនេះ មានតម្លៃ សរុប៧៨១.៥២លានដុល្លារអាមេរិកក្រោមរូបភាពសាងសង់-អាជីវកម្ម-ផ្ទេរ(Build-Operate-Trans fer BOT ) ហើយមានរយៈពេលសម្បទាន៤៥ឆ្នាំ ក្នុងនោះសាងសង់៥ឆ្នាំ និងធ្វើអាជីវកម្ម៤០ឆ្នាំ។ ដោយឡែក ថវិកាដែលគ្រោងសម្រាប់ដោះស្រាយផលប៉ះពាល់នានាវិញ គឺមានតម្លៃ ៣៨.៧១ លានដុល្លារអាមេរិក ដោយក្នុងនោះដោះស្រាយការសាងសង់លំនៅឋានថ្មីក្នុងទឹកប្រាក់ ១៩.៣៤ លានដុល្លារ, អ្នកស្ម័គ្រចិត្តរើចេញដោយមិនយកផ្ទះថ្មីចំនួន១.៤៩ដុល្លារ, ក្នុងចំណោមប្រជាពលរដ្ឋដែលសិក្សាថាមានការរងផលប៉ះពាល់៧៩៧គ្រួសារ។ ថវិកាក៏បានគិតលើថ្លៃឈូសឆាយដី ស្រែចម្ការជូនប្រជាពលរដ្ឋរងផលប៉ះពាល់ទំហំ៥ហិកតាក្នុងមួយគ្រួសារ ឬសរុប៣,៩៨៥ហិកតា ក្នុងតម្លៃ ៣.៧០លានដុល្លារ។
ក្រុមអ្នកតំណាងរាស្ត្រគណបក្សកាន់អំណាច គឺគណបក្សប្រជាជនកម្ពុជា បានបង្ហាញនូវ ការគាំទ្រទាំងស្រុងតាមការសុំរបស់រាជរដ្ឋាភិបាលកម្ពុជា។
យ៉ាងណាក៏ដោយក្រុមអ្នកតំណាងរាស្ត្រគណបក្សប្រឆាំង មិនបានបង្ហាញនូវការគាំទ្រនោះទេ ដោយក្រុមខ្លួនស្នើសុំពន្យារពេលដើម្បីសិក្សាឲ្យបានគត់មត់សិន។
លោក យឹម សុវណ្ណ អ្នកតំណាងរាស្ត្រគណបក្សសម រង្ស៊ី មណ្ឌលភ្នំពេញ ក្នុងអាណត្តិទី៤ នៃរដ្ឋសភា បានមានប្រសាសន៍ថា ការស្នើសុំពន្យារពេលនេះ គឺដើម្បីទុកពេលឲ្យអ្នកតំណាងរាស្ត្រ អ្នកជំនាញនិងអង្គការសង្គមស៊ីវិលសិក្សាឲ្យបានល្អិតល្អន់លើគម្រោងសាងសង់វារីអគ្គិសនី សេសាន្តក្រោម២នៅខេត្តស្ទឹងត្រែង។ មួយវិញទៀត ការស្នើសុំនេះដោយសារតែមានសំណើរបស់ប្រជាពលរដ្ឋរងគ្រោះនៅខេត្តស្ទឹងត្រែង បានដាក់លិខិតមកកាន់រដ្ឋសភាហើយឯកសារលើគម្រោងនោះក៏មិនទាន់មានគ្រប់គ្រាន់។ «ដំណើរការគម្រោងសាងសង់វារីអគ្គិសនី សេសាន្តក្រោម២ គឺធ្វើឡើងដោយគ្មានតម្លាភាព»។
ក្នុងសន្និសីទសារព័ត៌មានបន្ទាប់រដ្ឋសភាអនុម័តនូវខ្លឹមសារទាំងស្រុងនៃសេចក្តីព្រាងច្បាប់ លោក សុន ឆ័យ អ្នកតំណាងរាស្ត្រគណបក្សសម រង្ស៊ីដែរនោះ បានលើកឡើងថា ការមិនបានឯកភាពតាមសំណើរសុំពន្យារពេលនេះ វាហាក់ដូចជាបង្កប់នូវអាថ៌កំបាំងអ្វីមួយ ដែលបង្ហាញពីការគ្មានតម្លាភាព។ «ក្តីបារម្ភរបស់យើងនោះគឺការរុះរើលំនៅដ្ឋានរបស់ប្រជាពលរដ្ឋជិត ១,០០០ គ្រួសារនិងបាត់បង់ដីស្រែចំការ ជាពិសេសបងប្អូនជនជាតិដើមភាគតិចត្រូវបាត់បង់ព្រៃអារក្ស និងផ្នូរបុព្វបុរស ជាដើម។ រីឯសំណងសម្រាប់ប្រជាពលរដ្ឋ ដែលរងផលប៉ះពាល់ទាំងនោះ ក៏មិនទាន់ច្បាស់លាស់នៅឡើយ»។
បើតាមលោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល ដែលឡើងមកការពារសេចក្តីព្រាងច្បាប់នេះ បានឲ្យដឹងថា មុនសម្រេចដាក់ឲ្យអនុវត្តគម្រោងនេះ គឺមានការសិក្សាយ៉ាងល្អិតល្អន់បំផុតដោយមានការចូលរួមពីភាគីពាក់ព័ន្ធមានទាំងការចូលរួមពីសហគមន៍ប្រជាពលរដ្ឋនិងមានការចូលរួមទាំងអង្គការសង្គមស៊ីវិលផងដែរ។ «គម្រោងសាងសង់ទំនប់វារីអគ្គិសនីសេសាន្ត២ត្រូវបានវាយតម្លៃពីផលប៉ះពាល់ចំនួន២ដង និងមានការពិភាក្សាច្រើនលើកគ្រប់ជ្រុងជ្រោយ ដោយមិនមែនចេះតែធ្វើៗហើយក៏មិនមែនដើម្បីធ្វើបាបប្រជាជននោះទេ។ គម្រោងសាងសង់ទំនប់វារីអគ្គិសនីមួយនេះ ប្រាកដជាបម្រើចំនូវសេចក្តីត្រូវការរបស់ប្រជាជន»។
លោក ជាម យៀប បានឲ្យដឹងថានៅព្រឹកថ្ងៃទី១៥ ខែកុម្ភៈ លោកបានទទួលផ្ទាល់ដៃនូវញ្ញតិ្តស្នាមមេដៃរបស់តំណាងប្រជាសហគមន៍ចំនួន១២រូបនៅស្រុកសេសាន្ត ខេត្តស្ទឹងត្រែង ដែលបានបង្ហាញការព្រួយបារម្ភលើគម្រោងសាងសង់ទំនប់វារីអគ្គិសនី សេសាន្ត២ ក៏ប៉ុន្តែរាជរដ្ឋាភិបាល និងក្រុមហ៊ុន បានសិក្សាពីផលប៉ះពាល់និងផ្តល់សំណង់ត្រឹមត្រូវហើយ។
សូមបញ្ជាក់ថា កន្លងមក ប្រភពវារីអគ្គិសនីនៅកម្ពុជា មានមកពីគីរីរម្យ១ ទទួលថាមពលបាន១២មេហ្កាវ៉ាត់, អគ្គិសនីគីរីរម្យ៣ ទទួលថាមពលបាន១៨មេហ្កាវ៉ាត់ និងវារីអគ្គិសនីកំចាយមានអនុភាព១៩៣.២មេហ្កាវ៉ាត់។ ឆ្នាំ២០១៣ខាងមុខនេះ រាជរដ្ឋាភិបាលកម្ពុជា ក៏នឹងដាក់ឲ្យដំណើរការប្រភពវារីអគ្គិសនីស្ទឹងឫស្សីជ្រំក្រោម ទំហំ៣៣៨មេហ្កាវ៉ាត់ ជាមួយនឹងការដាក់ឲ្យដំណើរការម៉ាស៊ីនទី១ នៃរោងចក្រអគ្គិសនី ដើរដោយធ្យូងថ្មទី២ ដែលមានទំហំ១៣៥មេហ្គាវ៉ាត់ នៅក្នុងព្រះសីហនុ។ នៅឆ្នាំ២០១៥ ក៏នឹងដាក់ឲ្យដំណើរការប្រភពវារីអគ្គិសនីស្ទឹងតាតៃ ដែលមានទំហំ២៤៦មេហ្កាវ៉ាត រួម ជាមួយនឹងម៉ាស៊ីនទី២ នៃរោងចក្រអគ្គិសនីដើរដោយធ្យូងថ្មទី២ទំហំ១៣៥មេហ្គាវ៉ាត់បន្ថែមទៀត។
លោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌ បានលើកឡើងថាដើម្បីឲ្យមានលិខិតបទដ្ឋានគតិយុត្តិគ្រប់គ្រាន់សម្រាប់ការគ្រប់គ្រងមន្ត្រីរាជការស៊ីវិល នៃព្រះរាជាណាចក្រកម្ពុជា រាជរដ្ឋាភិបាលតែងតែខិតខំរៀបចំតាក់តែង ប្រមូលផ្តុំ ចងក្រងជាប្រចាំនូវរាល់ច្បាប់ និងលិខិតបទដ្ឋានគតិយុត្តិនានា ដែលពាក់ព័ន្ធនឹងការគ្រប់គ្រងមន្ត្រីរាជការស៊ីវិល ចាប់តាំងពីច្បាប់ និងលិខិតបទដ្ឋានគតិយុត្តិពាក់ព័ន្ធនឹងការគ្រប់គ្រងមន្ត្រីរាជការ ឬមន្ត្រីរដ្ឋការពីសម័យមុន មកដល់បច្ចុប្បន្ន។ កន្លងមករាជរដ្ឋាភិបាលសង្កេតឃើញមានលិខិតបទដ្ឋានគតិយុត្តក្រោមច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជាមួយចំនួនត្រូវបានដាក់ចេញឲ្យអនុវត្តជាបន្តបន្ទាប់ ចំពោះលិខិតបទដ្ឋានគតិយុត្ត ដែលពាក់ព័ន្ធនឹងការអនុវត្តមាត្រាទាំងពីរដែលត្រូវបានស្នើសុំវិសោធនកម្មនេះ ក៏មានលិខិតបទដ្ឋានគតិយុត្តិខ្លះបានបានដាក់ចេញឲ្យប្រើប្រាស់រួចហើយដែរ ដោយយោងតាមការចាំបាច់ក្នុងគ្រប់គ្រងមន្ត្រីរាជការស៊ីវិល។
ពេជ ប៊ុនធិន រដ្ឋលេខាធិការ នៃរដ្ឋលេខាធិការដ្ឋានមុខងារសាធារណៈ មានប្រសាសន៍ថា ការស្នើសុំវិសោធនកម្មមាត្រាទាំងពីរនេះ គឺក្នុងគោលបំណង៖ ទី១ ធ្វើឲ្យច្បាប់ពាក់ព័ន្ធនឹងគ្រប់គ្រងមន្ត្រីរាជការស៊ីវិល មានភាពរលូនជាមួយច្បាប់ពាក់ព័ន្ធនឹងការគ្រប់គ្រងមន្ត្រីនីតិប្បញ្ញត្តិ។ ទី២ រក្សាលក្ខណៈត្រឹមត្រូវនៃលិខិតបទដ្ឋានគតិយុត្តិមួយចំនួនពាក់ព័ន្ធនឹងគ្រប់គ្រងមន្ត្រីរាជការស៊ីវិលដែលមានស្រាប់ហើយដែលមានចែងឡើងក្នុងគោលដៅអនុវត្ត ខ្លឹមសារនៃមាត្រាដែលត្រូវបានស្នើសុំធ្វើវិសោធនកម្មនេះ។ ទី៣ បើកផ្លូវដល់ការកសាង និងកែសម្រួលលិខិតបទដ្ឋានគតិយុត្តិមួយចំនួនទៀត ដែលពាក់ព័ន្ធនឹងខ្លឹមសារនៃមាត្រាដែលត្រូវស្នើសុំធ្វើវិសោធនកម្មនេះផងដែរ។ ដូច្នេះខ្លឹមសារសំខាន់ នៃការស្នើសុំធ្វើវិសោធនកម្មមាត្រាទាំងពីរនេះ គឺដើម្បីឲ្យរាជរដ្ឋាភិបាលងាយស្រួលក្នុងការចេញលិខិតបទដ្ឋានគតិយុត្តិពាក់ព័ន្ធនឹងគ្រប់គ្រងមន្ត្រីរាជការស៊ីវិល មានលក្ខណៈចាំបាច់ និងអាចបត់បែនបាន។
ទោះជាយ៉ាងណាក៏ដោយ នៅចុងបញ្ចប់នៃការពិភាក្សាសេចក្តីព្រាងច្បាប់ស្តីពីការធ្វើវិសោធនកម្មមាត្រា៩ និងមាត្រា១០ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៅព្រឹកថ្ងៃដដែលនេះ គឺអង្គសភាបានសម្រេចអនុម័តនូវខ្លឹមសារទាំងមូល នៃសេចក្តីព្រាងច្បាប់នេះ ដោយការគាំទ្រ៨៥លើ៩៤សម្លេង៕
សុងយោ
