គ្រួសារ​ជនរងគ្រោះ​ចោទ​ប្រកាន់ថា មន្ទីរពេទ្យ​ខេត្តស្វាយរៀង​មិន​យកចិត្តទុកដាក់​អ្នក​ជម្ងឺ​ បណ្តាល​ឲ្យ​ស្លាប់​

ថ្ងៃ ព្រហស្បតិ៍ ទី19 កុម្ភៈ ឆ្នាំ2015 ម៉ោង17:16   ផ្នែក: សន្តិសុខ និង សង្គម    ដោយ: គឹមសេង​

Nita-19-A-30-Full

 

ស្វាយរៀង ៖ បុរស​ម្នាក់​បាន​ស្លាប់​បាត់​បង់ជីវិត​ ពេលដែល​គ្រូពេទ្យ​កំពុងធ្វើការ​វះកាត់​នៅក្នុង​សាល​វះកាត់​ នៃ​មន្ទីរ​ខេត្តស្វាយរៀង​ ហើយ​ក្រុមគ្រួសារ​ជនរងគ្រោះ​ ចោទប្រកាន់ថា ​ក្រុមគ្រូពេទ្យ​មន្ទីរ​ពេទ្យ​មិន​យកចិត្តទុកដាក់​សង្គ្រោះ​អ្នក​ជម្ងឺ​ ដោយនិយាយ​ប្រាប់​គ្រួសារ​អ្នក​ជម្ងឺ​ថា​ ក្រុម​វេជ្ជ​បណ្ឌិត​មិន​នៅ​ ទៅ​តែ​ចិន​អស់ហើយ​ទុក​អ្នក​ជម្ងឺ​រហូត​ហួសពេល​ជួយសង្គ្រោះ​លែងកើត​ ហើយ​បាន​ស្លាប់​បាត់​បង់ជីវិត​ចោល​ប្រពន្ធ​កូន​ កាលពីរ​ថ្ងៃទី​១៨​កុម្ភៈ​២៩១៥​ វេលា​ម៉ោង​៦​និង​៣០​នាទី​យប់​នៅក្នុង​សាល​វះ​កាត់​នៃ​មន្ទីរពេទ្យ​ខេត្ត ​ស្ថិតនៅ​ភូមិ​ស្រះ​វង់​ សង្កាត់​ស្វាយរៀង​ ក្រុង​ស្វាយរៀង​។

បើតាម​ស្ត្រី​ជា​ប្រពន្ធ​ជនរងគ្រោះ ឈ្មោះ​ព្រាប​ ស៊ី​ណេ​ត​ អាយុ​២៧​ឆ្នាំ​បាន​រៀបរាប់​ទាំ​ទឹកភ្នែក​ថា​ នាង​មានការ​សោកស្តាយ​ជាខ្លាំង​ ប្តី​របស់​នាង​ស្លាប់បាត់​បង់ជីវិត​ ដោយសារតែ​ការមិនយកចិត្ត​ទុកដាក់​របស់​គ្រូពេទ្យ​ ទុក​ប្តី​របស់​នាង​ចោល​ មិន​ព្រម​សង្គ្រោះ​រហូត​ហួសពេល​ ទើប​ធ្វើការ​វះកាត់​ហើយ​បាន​ស្លាប់​ពេល​គ្រូពេទ្យ​កំពុង​វះកាត់​។ ស្ត្រី​រងគ្រោះ​បាន​បន្តទៀតថា​ ប្តី​របស់​នាង​ឈ្មោះ​ឥន​សែន អាយុ​២៥​ឆ្នាំ​ជា​កម្មករសំណង់​មាន​ទីលំនៅ​ភូមិ​ដូន​លែ​ប​ ឃុំ​គោគ​ព្រីង​ ស្រុក​ស្វាយជ្រំ​មានកូន​២​នាក់​ស្រី​១​នាក់​និង​មាន​ផ្ទៃពោះ​៥​ខែ​ក្នុង​ពោះ​ទៀត ដែលជា​បន្ទុក​យ៉ាង​ធ្ងន់​សម្រាប់​នាង​ ដែល​ប្តី​ស្លាប់​ចោល​ក្លាយជា​ស្ត្រី​មេម៉ាយ​។ ស្ត្រី​រងគ្រោះ​បន្តទៀតថា​ កាលពីរ​ថ្ងៃទី​១៧​កុម្ភៈ​២០១៥​វេលា​ម៉ោង​៦០០​ល្ងាច​ប្តី​នាង​បាន​ចេញពីរ​ធ្វើការ​សំណង់​ជិះ​ម៉ូតូ​ម៉ាក​ហុងដា​សេ​១២៥​សេរី​២០១២​ត្រឡប់មកផ្ទះ​វិញ​តាមផ្លូវ​ជាតិ​លេខ​១​ពី​កើតមក​លិច​លុះ​មកដល់​ចំណុច​ភូមិ​ទទា​សង្កាត់​ចេក​ក្រុង​ស្វាយរៀង​ក៏​បុក​ជាមួយ​ម៉ូតូ​សណ្តោង​រ៉ឺម៉ក​ដឹក​ទឹកកក​ ដែល​បើក​ពី​លិច​មក​កើត​បញ្ច្រាស​ទិស​គ្នា​ក៏​បុក​ពេញទំហឹង​បណ្តាល​ឲ្យ​ជនរងគ្រោះ​រងរបួស​ពក​ក្បាល​ និង​ជាំ​ពោះ​ធ្ងន់ធ្ងរ​សន្លប់​ឈឹង​នៅ​និង​កន្លែង​ក៏ត្រូវ​នគ​បាល​ក្រុង​ស្វាយរៀង​ហៅ​រថយន្ត​ឯកជន​ដឹក​ទៅកាន់​មន្ទីរពេទ្យ​ខេត្ត​ ដើម្បី​សង្គ្រោះ​ក៏ប៉ុន្តែ​គ្រូពេទ្យ​គ្រាន់​តែ​យក​សេរ៉ូម​មួយ​កំប្លោក​មក​បន្តោង​ឲ្យ​រួច​ទៅ​បាត់​។ រហូតដល់​ម៉ោង​៨ៈ០០​ព្រឹក​ថ្ងៃទី​១៨​កុម្ភៈ​ឪពុក​ជនរងគ្រោះ​ឈ្មោះ​ អ៊ុំ​ សាយ​ទៅ​សួររក​ពេទ្យ​ពិនិត្យ​របួស​គ្រូពេទ្យ​ម្នាក់​បាន​ប្រាប់ថា​ លោក​វេជ្ជ​បណ្ឌិត​មិន​នៅទេ​ជាប់​ទៅ​សេនចិន​អស់ហើយ​។

ស្រ្តី​ជា​ប្រពន្ធ​បន្តទៀតថា​ លុះដល់​ម៉ោង​១០០០​ព្រឹក​ជនរងគ្រោះ​មាន​អាការៈ​កាន់តែ​ធ្ងន់ធ្ងរ ​ក៏​ទៅតាម​គ្រូពេទ្យ​ពិនិត្យ​និង​ថត​អេកូ​ តែ​គ្រូពេទ្យ​ហាក់បី​ដូចជា​ប្រ​ងើយ​កន្តើយ​មិន​យកចិត្តទុកដាក់​រហូត​ដល់​ម៉ោង​២ៈ០០​រសៀល​ទើប​មាន​គ្រូពេទ្យ​មក​យក​ជនរងគ្រោះ​ទៅ​ថត​អេកូ​ឃើញថា​ បែក​ពោះវៀន​ធ្លាយ​ក្រពះ​ធ្ងន់ធ្ងរ​ ទើប​រាយការណ៍​ទៅ​មន្ទីរពេទ្យ​រហូត​ដល់​ម៉ោង​៤ៈ០០​ល្ងាច​ ទើប​យក​ជនរងគ្រោះ​ទៅ​វះកាត់​ហួសពេល​ ទៅហើយ​និង​បាន​ស្លាប់​នៅ​វេលា​ម៉ោង​៦​និង​៣០​នាទី​យប់​ខណៈ​គ្រូពេទ្យ​កំពុង​វះកាត់​ក្នុង​បន្ទប់វះកាត់​។ ហើយ​ត្រូវ​លោក​អន​សុ​ភី​អនុប្រធាន​មន្ទីរពេទ្យ​ឲ្យ​រថយន្ត​ដឹក​សព​ចេញ​ភ្លាមៗ​ទាំងយប់​។ ហើយ​ទាក់ទិន​ករណីនេះ​ដែរ​មន្ត្រី​សុខាភិបាល​ម្នាក់​បាន​ឲ្យ​ដឹង​ទៀតថា​ ជាង​មួយឆ្នាំ​មកហើយ​ពេល​មាន​អ្នក​ជម្ងឺ​ឬ​ជនរងគ្រោះ​ថ្នាក់​ចរាចរណ៍​តែងតែ​យក​រថយន្ត​ឯកជន​ទៅ​ដឹក​បើ​ពេលយប់​ចាប់ពី​ម៉ោង​៩ៈ០០​យប់​ទៅ​គឺ​យក​ប្រក់​ថ្លៃ​កប់​ពពក​ស្វាយរៀង​ភ្នំពេញ​តម្លៃ​៣០០​ដុល្លា​បង់​ឲ្យ​មន្ទីរពេទ្យ​១០០​ដុល្លា​ រីឯ​រថយន្ត​មន្ទីរពេទ្យ​មាន​ដល់​ទៅ​៥​គ្រឿង​ហើយ​២​គ្រឿង​ទើបតែ​ទទួល​អំណោយ​មនុស្សធម៌​ពី​ប្រទេស​ចិន​គឺ​ដឹក​តែ​ពេល​ថ្ងៃ​ពេលយប់​គ្មាន​អ្នកបើកបរ​ប្រចាំការ​។ ហើយ​នៅ​ថ្ងៃកើតហេតុ​រថយន្ត​ឯកជន​ដឹក​ចម្ងាយ​២​ពាន់​ម៉ែត្រ​យក​តម្លៃ​១២​ម៉ឺន​រៀល។

សព​ជនរងគ្រោះ​បូជា​នៅ​ថ្ងៃទី​១៩​កុម្ភៈ​វេលា​ម៉ោង​២ៈ០០​រសៀល​ហើយ​បាន​ប្រាប់ថា ពេលធ្វើ​បុណ្យសព​រួច​ និង​ដាក់​ពាក្យបណ្តឹង​ទៅ​សាលាដំបូង​ខេត្ត​ឲ្យ​រក​យុត្តិធម៌​ឲ្យ​ជន​រងគ្រោះ​។ ទាក់ទិន​ករណី​ចោទប្រកាន់​ខាងលើនេះ​មិនអាច​សុំ​ការបំភ្លឺ​ពី​លោក​ប្រធាន​មន្ទីរពេទ្យ​ខេត្ត​បាន​ទេ​នៅ​ថ្ងៃទី​១៩​ន​នេះ​។​ប្រជាពលរដ្ឋ​បានធ្វើ​រិះគន់​យ៉ាង​ធ្ងន់ៗ​មន្ទីរពេទ្យ​ខេត្តស្វាយរៀង​រយៈមក​តែងតែ​ធ្វេសប្រហែស​ជា​រៀងរហូត​ មិន​យកចិត្តទុកដាក់​ដល់​អ្ន​ក​ជម្ងឺ​នោះទេ ជាក់ស្ដែង​ដូច​ករណី​ខាង​លើ​ដោយ​បណ្ដោយ​ឲ្យ​អ្នក​ជម្ងឺ​រហូត​ធ្ងន់ធ្ងរ​ ទើបបាន​យក​ធ្វើការ​វះកាត់​ព្រមទាំង​មិនបាន​បញ្ចូល​ឈាម​ឲ្យ​បាន​ទាន់​ពេលវេលា​ ដើម្បី​ជួយសង្គ្រោះ​នោះទេ​៕

Nita-19-A-28-FullNita-19-A-29-Full