ការ​វាយប្រហារ​តាម​អាកាស​ទៅ​លើ​ភូមិ​នីហ្សេរ​ សម្លាប់​មនុស្ស​៣៦​នាក់

ថ្ងៃ ព្រហស្បតិ៍ ទី19 កុម្ភៈ ឆ្នាំ2015 ម៉ោង16:34   ផ្នែក: ព័ត៌មានអន្តរជាតិ​ទូទៅ    ដោយ: កម្ពុជាថ្មី​

M19-02-15-l

ប្រភព​ព័ត៌​មាន​ពី​ទីភ្នាក់ងារ​ AFP នៅ​ក្រុង​ Niamey បាន​ឲ្យ​ដឹង​ថា យ៉ាង​ហោច​អ្នក​ចូល​រួម​​កាន់​មរណទុក្ខ​ចំនួន​៣៦​នាក់​នៅ​ក្នុង​ពិធី​បុណ្យ​សព​មួយ​រងការ​សម្លាប់​ និង​២៧​នាក់​ទៀត​រង​របួស ពេល​ដែល​យន្ដហោះ​មួយ​គ្រឿង​ដែល​មិន​ត្រូវ​បាន​ស្គាល់​អត្តសញ្ញាណ​បាន​ទម្លាក់​គ្រាប់បែក​ទៅលើ​ភូមិ​មួយ​កន្លែង​នៅ​ក្នុង​ប្រទេស​នីហ្សេរ ក្បែរ​ព្រំដែន​ជាមួយ​ប្រទេស​នីហ្សេ​រីយ៉ា​ នេះ​បើតាមការ​ឲ្យដឹង​ពីកងទ័ព​កាលពីថ្ងៃពុធ។

ការ​វាយប្រហារ​កាលពីថ្ងៃ​អង្គារ បាន​កើត​មាន​ឡើង​ខណៈ​ពេលដែល​ប្រទេស​នីហ្សេ​រ​បាន​ចូលរួម​នៅក្នុង​ប្រតិបត្ដិ​ការ​ការពារ​ក្នុង​តំបន់​មួយ​ប្រឆាំងនឹង​ក្រុមអ្នក​ប្រយុទ្ធ Boko Haram ដែល​មានមូលដ្ឋាននៅក្នុង​ប្រទេសនីហ្សេរីយ៉ា ហើយ​ដែល​បាន​បន្ដ​លាតសន្ធឹង​ការបះបោរ​រយៈ​ពេល​៦​ឆ្នាំនោះ​ឆ្ពោះ​ចូលទៅ​ប្រទេស​នីហ្សេរ ប្រទេស​ឆាដ និងប្រទេស​កាមេរូន ទៀត​ផង​នោះ។

របាយការណ៍​មួយ​របស់​កងទ័ព​នីហ្សេរ​ ទទួល​បាន​ដោយ​ទីភ្នាក់​ងារព័ត៌​មាន​ AFP ដែលបាន​ផ្ដល់​ព័ត៌មាន​ពីចំនួន​មនុស្ស​ស្លាប់​និយាយ​ថា ប្រភព​របស់​យន្ដហោះ​នោះនៅតែ​មិនទាន់​អាច​បញ្ជាក់​កំណត់​បាននៅឡើយទេ។

ដោយឡែក​ប្រភព​អង្គការ​មនុស្ស​ធម៌​មួយ​បាននិយាយ​ថា ជន​រងគ្រោះ​ គឺជាអ្នក​ស្រុក​ដែល​បាន​ចូលរួម​ពិធីបុណ្យ​សពមួយ​ដែល​រៀបចំ​ធ្វើឡើង​ជាផ្លូវការ។ ប្រភព​ដដែល​និយាយ​ទៀត​ថា ការ​វាយ​ប្រហារ​ដោយ​ទម្លាក់​គ្រាប់បែក​នោះ​កើត​មាន​នៅក្បែរ​ព្រះវិហារ​សាសនាមូស្លីម​មួយ​ក្នុ​ងក្រុង Abadam

ប្រទេសនីហ្សេរីយ៉ា បានបដិសេធ​រាល់គ្រប់​ការ​ទទួលខុសត្រូវ​ចំពោះ​ការ​វាយប្រហារតាម​អាកាសនេះ បើទោះជា​មានការ​អះអាង​ថា ប្រទេស​នេះ​មាន​ជាប់​ពាក់ព័ន្ធ​យ៉ាងដូច​ម្ដេច​ក្ដី។

ជាមួយ​ពេលនោះ​ផង​ដែរ អ្នក​ភូមិ​៧នាក់​ទៀត​នៅឯ​ភាគ​ខាង​ជើងប្រទេស​កាមេរូន រង​ការ​សម្លាប់​កាលពីថ្ងៃ​អង្គារ ពេលដែល​មាន​ការ​តតាំង​ជាមួយ​ក្រុម​អ្នកប្រយុទ្ធ​ Boko Haram ដែល​ចូល​មក​លួចគោមេ​៧០ក្បាល​ ហើយបាន​ដុត​ផ្ទះសម្បែង​នៅភូមិ Gaboua

រីឯក្រុម​សកម្ម​ជន​ប្រយុទ្ធ​ឥស្លាម៩នាក់​ ក៏​បាន​បាត់បង់​ជិវិត​ផង​ដែរ​នៅក្នុង​ការ​ប៉ះ​ទង្គិចគ្នា​ជាមួយ​អ្នកស្រុក​ប្រដាប់ទៅដោយ​ដំបង​ព្រនង់ កាំបិត​ផ្លែ​វែង ធ្នូ និង​ព្រួញ៕

..