ភ្នំពេញ ៖ ក្រោយពីឃើញក្រុមជំនាញរបស់មន្ទីរសាធារណការរាជធានីភ្នំពេញចាប់ផ្ដើមរៀបចំដាក់របាំងថ្មលើទ្រូងផ្លូវ២៧១ជាច្រើនកន្លែងពិសេសម្ដុំអូរបែកក្អមកាលពីព្រឹកថ្ងៃទី១៥ ខែកុម្ភៈ ឆ្នាំ២០១៣រួចមក ប្រជាពលរដ្ឋអ្នកដំណើរបានសម្ដែងនូវការគាំទ្រចំពោះចំណាត់ដ៏ល្អនេះ។
ការដាក់របាំងថ្មចែកទ្រូងផ្លូវត្រង់ចំណុចខាងលើនោះពិតជាកាត់បន្ថយបាននូវការកកស្ទះចរាចរមួយចំនួនធំពីព្រោះថាផ្លូវ២៧១ច្រើនតែស្ទះរាល់ថ្ងៃមែនចាប់ពីស្តុបបំបែកផ្លូវ២០០៤រហូតដល់វិទ្យាល័យជា ស៊ឹម សាមគ្គីឯណោះ។
តាមប្រភពព័ត៌មានពីប្រជាពលរដ្ឋរស់នៅផ្លូវ២៧១បានឲ្យដឹងថា ពួកគាត់មានការអរគុណចំពោះមន្ទីរសាធារណការរាជធានីដែល បាននិងកំពុងរៀបចំដាក់របាំងថ្មពុះផ្លូវ២៧១ជាច្រើនកន្លែងនោះពិសេសតាំងពីចំណុចភ្លើងស្តុបកែងផ្លូវ២០០៤រហូតដល់វិទ្យាល័យជា ស៊ឹមសាមគ្គីនោះតែម្ដង ដែលម្ដុំនោះកកស្ទះចរាចររាល់ថ្ងៃតាំងពីព្រឹករហូតដល់ម៉ោង៧ទៅ៨យប់ឯណោះទម្រាំបានធូរស្រាលវិញ។
នេះជាការខាតបង់ផលប្រយោជន៍និងពេលវេលារបស់អ្នកដំណើរមិនតិចនោះទេ ដោយសារត្រង់ចំណុចខាងលើមានផ្លូវឆ្លងកាត់ទទឹងច្រើន ទើបបង្កឲ្យកកស្ទះចរាចររាល់ថ្ងៃ។ ប៉ុន្តែចាប់ពីមន្ទីរសាធារណការដាក់របាំងថ្មពីពេលនេះរហូតរួចរាល់ហើយនោះគេមានសង្ឃឹមថាបញ្ហាកកស្ទះចរាចរអាចនឹងធូរស្រាលវិញ។
ទន្ទឹមនឹងការគាំទ្រនេះដែរប្រជាពលរដ្ឋសំណូមពរឲ្យខាងមន្ទីរសាធារណការរាជធានីភ្នំពេញបំពាក់ស្លាកសញ្ញានិងភ្លើងសុវត្ថិភាពពេលយប់ផងដើម្បីឲ្យអ្នកដំណើរបានមើលឃើញរបាំងថ្មទ្រូងផ្លូវនោះផង។ ការលើកឡើងបែបនេះដោយសារតែកន្លងមកគេឃើញអ្នកដំណើរមួយចំនួនបានបើកម៉ូតូឡានបុករបាំងថ្មទ្រូងផ្លូវបណ្ដាលឲ្យរងរបួសឬគ្រោះថ្នាក់ដល់បាត់បង់ជីវិត ខូចខាតទ្រព្យសម្បត្តិទៀតផង។ បញ្ហានេះមិនមែនសុទ្ធតែមកពីអ្នកបើកបរពិសារជាតិស្រវឹងទាំងអស់នោះទេវាក៏ផ្ដើមមកពីរបាំងថ្មទ្រូងផ្លូវមួយចំនួននោះងងឹតពេកខ្វះនូវបច្ចេកទេសនៃការស្ថាបនានិងការជួសជុលថែទាំពីសំណាក់ក្រុមជំនាញផងដែរ។ ហេតុនេះហើយមន្ទីរសាធារណការរាជធានីភ្នំពេញត្រូវពិនិត្យមើលឡើងវិញពីកង្វះខាតបច្ចេកទេសដែលផ្ដើមឲ្យកើតមាននូវករណីគ្រោះថ្នាក់ចរាចរប៉ះពាល់អាយុជីវិតមនុស្សនិងសណ្ដាប់ធ្នាប់សង្គម។ ជាក់ស្ដែង ដូចជាកំណាត់ផ្លូវវេងស្រេងនៅជាយរាជធានីតែងតែបង្កគ្រោះថ្នាក់ចរាចររាល់យប់ដោយសារតែបុករបាំងថ្មដែលងងឹតឈឹងនោះតែម្ដង៕
វិមាន
