*ឆ្មបហឿពៅប៉ិចត្រូវបានដកបញ្ឈរជើងតាមវិន័យរដ្ឋបាល
ភ្នំពេញ ៖ រឿងរ៉ាវឆ្មបមធ្យមបម្រើការងារនៅមន្ទីរពេទ្យបង្អែកសម្តេចឪពេលដែលស្ត្រីជាអ្នកលក់លៀសហាលមកសម្រាលកូនតែឆ្មបនោះមិនបានទទួលសម្រាល ហើយបណ្ដោយឲ្យស្ត្រីនោះសម្រាលកូននៅតាមផ្លូវរទេះភ្លើងនោះ ត្រូវបានដោះស្រាយរួចហើយដោយគណៈកម្មការក្រុមប្រឹក្សាវិន័យមន្ទីរសុខាភិបាលរាជធានីភ្នំពេញបានសម្រេចឲ្យឆ្មបនោះទៅបម្រើការងារនៅផ្នែករដ្ឋបាលនៃការិយាល័យសុខាភិបាលស្រុកប្រតិបត្តិខាងជើងជាបណ្ដោះអាសន្នបន្ទាប់ពីរកឃើញថាឆ្មបនោះពិតជាមានកំហុសពិតប្រាកដមែន។
បន្ទាប់ពីមានបញ្ហាកើតឡើងភ្លាមលោកវេជ្ជបណ្ឌិតសុខ សុគន្ធប្រធានមន្ទីរសុខាភិបាលរាជធានីភ្នំពេញបានបង្កើតគណៈកម្មការក្រុមប្រឹក្សាវិន័យមួយកាលពីថ្ងៃទី១៣ខែកុម្ភៈឆ្នាំ២០១៣ដែលមានសមាសភាពចំនួន៧រូបដែលមានលោកវេជ្ជបណ្ឌិតម៉ៅ ហេង អនុប្រធានមន្ទីរសុខាភិបាលរាជធានីភ្នំពេញជាប្រធាន។ នៅថ្ងៃដដែលនៅគណៈកម្មការបានចុះស្រាវជ្រាវលើករណីដែលស្ត្រីលក់លៀសហាលសម្រាលកូនដែលត្រូវបានឆ្មបនៅមន្ទីរពេទ្យបង្អែកសម្តេចឪម្នាក់មិនទទួលសម្រាល ដោយបានហៅពេទ្យដែលត្រូវយាមនៅថ្ងៃនោះមកសាកសួរចំនួន៧នាក់រួមទាំងឆ្មបនោះផងដែរ។
យោងតាមកំណត់ហេតុរបស់គណៈកម្មការក្រុមប្រឹក្សាវិន័យចុះថ្ងៃទី១៣កុម្ភៈ បានឲ្យដឹងថាឆ្មប ដែលបង្កឲ្យមានបញ្ហានោះមានឈ្មោះកញ្ញាហឿពៅប៉ិចជាឆ្មបមធ្យមបានសារភាពថាស្ត្រីលក់លៀសហាលឈឺពោះនិងសម្រាលកូនបានមកដល់មន្ទីរពេទ្យបង្អែកសម្តេចឪនៅវេលាម៉ោង១១ព្រឹកថ្ងៃទី១២ខែកុម្ភៈ ដោយសារឃើញស្ត្រីមានអាការៈឈឺពោះនិងមានធ្លាក់ឈាមទៀតនោះគាត់ក៏បានបញ្ជាឲ្យស្ត្រីនោះជិះម៉ូតូឌុបទៅសម្រាលនៅមន្ទីរពេទ្យជប៉ុនឬមន្ទីរពេទ្យក្រុងទៅដោយពុំបានឆ្លងយោបល់គ្រូពេទ្យនិងបានបញ្ជូនតាមរថយន្តសាមុយឲ្យបានត្រឹមត្រូវទេ។ ទង្វើនេះកញ្ញាបានទទួលសារភាពកំហុសនៅចំពោះមុខគណៈកម្មការក្រុមប្រឹក្សាភិបាលវិន័យថា«ខ្ញុំហឿពៅប៉ិចពិតជាខុសមែនដោយសារខ្ញុំមានការភ័យខ្លាចស្លន់ស្លោព្រោះខ្លាចស្ត្រីនោះស្លាប់បាត់បង់ជីវិត»។ កញ្ញាបាននិយាយទៀតថា«ខ្ញុំស្លន់ពេកដោយសារឃើញស្ត្រីនោះមានសភាពស្លេកស្លាំងពេកទើបពុំបានជំរាបគ្រូពេទ្យនោះទីនោះបានដឹងនេះគឺជាកំហុសរបស់ខ្ញុំតែម្នាក់ឯងទេខ្ញុំសូមទទួលកំហុសទាំងអស់»។
លោកវេជ្ជបណ្ឌិតផានភារត្ន័ប្រធានការិយាល័យសុខាភិបាលស្រុកប្រតិបត្តិខាងជើងបានមានប្រសាសន៍ថា«នៅថ្ងៃនោះគាត់ក៏នៅនឹងការិយាល័យដែរ ប៉ុន្តែគាត់មិនបានដឹងតែបើដឹងក៏មិនឲ្យមានរឿងនេះកើតឡើងដែរ»។
ចំណែកលោកវេជ្ជបណ្ឌិតគង់គឹមចាន់ប្រធានវេនយាមប្រចាំការនៅថ្ងៃនោះបានឲ្យដឹងថាគាត់មានការសោកស្ដាយដោយសារគាត់មិនបានដឹងព្រោះគាត់ក៏នៅយាមប្រចាំការនៅក្នុងមន្ទីរពេទ្យនៅដែរ ប៉ុន្តែពេលនោះកំពុងជាប់រវល់ពិនិត្យជំងឺផ្នែកជំងឺទូទៅ។ គ្រូពេទ្យអឿនកេសាសមាជិកវេនយាមនៅថ្ងៃនៅដែរបាននិយាយថាគាត់មិនបានដឹងរឿងនេះទេគាត់បានដឹងតាមរយៈមិត្តភក្ដិទូរស័ព្ទប្រាប់គាត់ថាពេទ្យសម្តេចឪដេញអ្នកជំងឺចេញ។
ក្រៅពីសាកសួរក្រុមគ្រូពេទ្យយាមប្រចាំការ ហើយគណៈកម្មការក្រុមប្រឹក្សាវិន័យក៏បានធ្វើការសាកសួរសាក្សីម្នាក់ឈ្មោះឡូញសារិនអាយុ៥៥ឆ្នាំដែលជាអ្នកកំដរកូនឆ្លងទន្លេនៅក្នុងមន្ទីរពេទ្យដែលបានឃើញហេតុការណ៍នោះដោយគាត់មានប្រសាសន៍ថានៅពេលនោះស្ត្រីនោះមានសភាពធ្ងន់ធ្ងរហើយគាត់ថែមទាំងបានជួយលើកជើងនិងក្តោបសារុងទៀតផង។ មិនតែប៉ុណ្ណោះថែមទាំងបានឮឆ្មបនោះប្រាប់ថាឲ្យអ្នកជំងឺទៅកើតនៅមន្ទីរពេទ្យក្នុងក្រុងមែន។
គួរបញ្ជាក់ថានៅថ្ងៃទី១២ខែកុម្ភៈវេលាម៉ោង១១និង៤០នាទីស្ត្រីឈ្មោះជាចែតអាយុ២៩ឆ្នាំនិងមានប្តីឈ្មោះឌីប្រកបមុខរបរជាអ្នកលក់លៀសហាលពេលដែលប្រពន្ធឈឺពោះឆ្លងទន្លេប្តីបានចេញទៅលក់លៀសហាលបាត់ប្រពន្ធបានជិះម៉ូតូជាមួយកូនស្រីអាយុ១០ឆ្នាំទៅមន្ទីរពេទ្យបង្អែកសម្តេចឪ។ លុះពេលទៅដល់មន្ទីរពេទ្យស្ត្រីរូបនោះមានអាការៈធ្លាក់ឈាមហើយស្រែកថ្ងូរថាឈឺចុកចាប់សូមឲ្យគ្រូពេទ្យជួយប៉ុន្តែខណៈនោះត្រូវគ្រូពេទ្យប្រាប់ថាអត់មានគ្រូពេទ្យប្រចាំនៅទីនោះទេហើយក៏ដេញឪ្យត្រឡប់ទៅផ្ទះវិញ។ ពេលនោះដោយសារស្ត្រីនោះគ្មានថវិកាមិនដឹងជាទៅរកពេទ្យណាឲ្យជួយសង្គ្រោះទៀតនោះក៏សំរេចចិត្តជិះម៉ូតូឌុបត្រឡប់មកផ្ទះវិញស្របពេលមកដល់ផ្លូវរទេះភ្លើងក្បែរផ្លូវចូលផ្ទះគ្រាន់តែចុះពីលើម៉ូតូភ្លាមក៏ដួលនៅលើដីតែម្តង។ ខណៈនោះស្រាប់តែមានយាយម្នាក់ដែលត្រូវជាយាយបង្កើតរបស់ស្ត្រីនោះដែលជាអតីតឆ្មបបូរាណរួមនិងអ្នកជិតខាងក៏បានជួយសម្រាលកូនឲ្យស្ត្រីនោះហើយក្រោយមកក៏ដឹកស្ត្រីនោះមកកាន់មន្ទីរពេទ្យកាល់ម៉ែត។
ដោយមានការអាណិតអាសូរដល់ស្ត្រីនោះមានសប្បុរសជនបានផ្តល់ជំនួយជាសម្ភារៈនិងថវិកាជាច្រើនដើម្បីជួយសម្រាលនូវការលំបាកនិងដោះស្រាយជីវភាព។
បន្ទាប់ពីស្រាវជ្រាវរកឃើញកំហុសរួចគណៈកម្មការក្រុមប្រឹក្សាវិន័យបានសម្រេចដាក់ទណ្ឌកម្មតាមច្បាប់ស្តីពីសហលក្ខន្តិកៈមន្ត្រីរាជការនៃព្រះរាជាណាចក្រកម្ពុជានូវទណ្ឌកម្មថ្នាក់ទី១ត្រង់ចំណុចទី៣ដែលបានចែងថាផ្លាស់ប្តូរដោយបង្ខំតាមវិធានការខាងវិន័យ។ ផ្អែកតាមទណ្ឌកម្មខាងលើនេះមន្ទីរសុខាភិបាលរាធានីភ្នំពេញបានសម្រេចចេញលិខិតបង្គាប់សម្រួលភារកិច្ចកញ្ញាហឿពៅប៉ិចជំនាញឆ្មបមធ្យមមានអាយុ៣៣ឆ្នាំដែលបម្រើការងារនៅមន្ទីរពេទ្យបង្អែកសម្តេចឪឲ្យទៅបម្រើការងារនៅផ្នែករដ្ឋបាលនៃការិយាល័យសុខាភិបាលស្រុកប្រតិបត្តិខាងជើងជាបណ្ដោះអាសន្ន។
លោកវេជ្ជបណ្ឌិតសុខសុគន្ធប្រធានមន្ទីរសុខាភិបាលរាជធានីភ្នំពេញបានមានប្រសាសន៍ថានេះគឺជាការព្រមានដល់មន្ត្រីក៏ដូចជាបុគ្គលិកផ្សេងទៀតកុំឲ្យធ្វើបែបនេះជាបន្តទៀត។ លោកបានសំណូមពរដល់អាជ្ញាធរមានសមត្ថកិច្ចនិងអាជ្ញាធរមូលដ្ឋាននិងប្រជាពលរដ្ឋនៅពេលមានបញ្ហាអ្វីមួយទាក់ទងនឹងករណីស្ត្រីមានផ្ទៃពោះឬឈឺធ្ងន់ធ្ងរសូមទាក់ទងមករថយន្តសង្គ្រោះដែលមានលេខ១១៩,៦៩៩តាមរយៈប្រព័ន្ធ០១២មិនគិតលុយទេ៕
សំអឿន
