ភ្នំពេញ ៖ ប្រជាពលរដ្ឋចំនួន4សង្កាត់គឺសង្កាត់ផ្សារកណ្កាលទី1ផ្សារកណ្តាលទី2ផ្សារចាស់ និងសង្កាត់ជ័យជំនះ ក្នុងខណ្ឌដូនពេញ នៅព្រឹកថ្ងៃទី15 ខែកុម្ភៈ ឆ្នាំ2013 នេះ បានចូលរួមស្តាប់ នូវការពន្យល់ របស់មន្រ្តីជំនាញ និងអាជ្ញាធរ ខណ្ឌដូនពេញ ស្តីពីការធ្វើដំណើរ តាមផ្លូវឯកទិស ចំនួន4ខ្សែ នៅក្នុងខណ្ឌដូនពេញ ដើម្បីជួយកាត់បន្ថយការកកស្ទះចរាចរណ៍នាពេលបច្ចុប្បន្ននេះ។
ក្នុងពិធីនោះដែរមានការចូលរួមពន្យល់ពីផ្លូវឯកទិសចំនួន4ខ្សែនេះ ដោយលោក សាំ ពិសិដ្ឋ ប្រធានមន្ទីរ សាធារណៈការ និងដឹកជញ្ជូន រាជធានី ភ្នំពេញ និង លោក ឯក ឃុនដឿន អភិបាលរង ខណ្ឌដូនពេញ រួមនិងមន្រ្តីជំនាញពាក់ព័ន្ធ មួយចំនួនទៀត។
គួរបញ្ជាក់ថាបន្ទាប់ពីសាលារាជធានីភ្នំពេញ បានធ្វើការផ្សព្វផ្សាយ នូវការដាក់ដំណើរការសាកល្បង ផ្លូវឯកទិសចំនួន 4ខ្សែក្នុងមូលដ្ឋានខណ្ឌដូនពេញ ដើម្បីបង្កលក្ខណៈងាយស្រួល ដល់ការធ្វើចរាចររបស់ប្រជាពលរដ្ឋក្នុងរាជធានីភ្នំពេញ ក៏ដូចជា ភ្ញៀវទេសចរណ៍ជាតិ និងអន្តរជាតិឆ្លងកាត់។
លោក សាំ ពិសិដ្ឋ បានអោយដឹងថា ដើម្បីកាត់បន្ថយនូវការកកស្ទះចរាចរនៅក្នុងរាជធានីភ្នំពេញ និងដើម្បីរៀបចំសណ្តាប់ធ្នាប់ នៃការចតយានយន្ត និងផ្លូវថ្មើរជើងឲ្យមានរបៀបរៀបរយល្អ ធានាបាននូវសុវត្ថិភាព ក្នុងការធ្វើដំណើរ របស់បងប្អូនប្រជាពលរដ្ឋ និងភ្ញៀវទេសចរជាតិ និងអន្តរជាតិ សាលារាជធានីភ្នំពេញ បានរៀបចំគម្រោងសាកល្បង ដាក់ឲ្យដំណើរការជាសាធារណៈ នូវផ្លូវឯកទិស ចំណត និងទីធ្លាថ្មើរជើង នៅតាមកំណាត់ផ្លូវ ចំនួន៤ខ្សែក្នុងនោះផ្លូវលេខ 130, 136, 154 និងផ្លូវលេខ 178ចាប់ពីព្រះមហាវិថីនរោត្តម ដល់វិថីព្រះសីសុវត្ថិ ក្នុងភូមិសាស្ត្រខណ្ឌដូនពេញ។
លោក សាំ ពិសិដ្ឋ បានបន្ថែមទៀតថា គម្រោងនេះ គឺដោយមានកិច្ចពិគ្រោះយោបល់រវាងក្រុមអ្នកបច្ចេកទេសអង្គការJICA និងមន្ទីរសាធារណការដឹកជញ្ជូន រាជធានីភ្នំពេញ ជាមួយនឹងបងប្អូនប្រជាពលរដ្ឋ ដែលរស់នៅតាមកំណាត់ផ្លូវពាក់ព័ន្ធនោះ។ ចំណែកឯការដាក់ដំណើរការសាកល្បងផ្លូវឯកទិសនេះ នឹងចាប់ផ្តើមដំណើរការ ពីថ្ងៃទី27 ខែកុម្ភៈ ឆ្នាំ2013ដល់ថ្ងៃទី3ខែមិនា ឆ្នាំ2013 ។
ជាមួយគ្នានោះដែរលោក ឯក ឃុនដឿន អភិបាលរង ខណ្ឌដូនពេញបានណែនាំប្រាប់ប្រជាពលរដ្ឋ កុំឲ្យចាញ់បោក ក្រុមអគតិមួយចំនួនដែល និយាយបំផ្លើស ពីការពិតថា នៅពេលដាក់ឲ្យដំណើរការ ផ្លូវឯកទិសចំនួន4 ខ្សែខាងលើនេះ នឹងអនុញ្ញាតឲ្យតែប្រជាពលរដ្ឋដើរឡើយ ពោលគឺម៉ូតូ និងរថយន្តមិនអាចធ្វើដំណើរបានទេ។
លោកអភិបាលរងខណ្ឌ ដែលតំណាងឲ្យ លោក អភិបាលខណ្ឌ សុខ សម្បត្តិ បានអំពាវនាវ ឲ្យប្រជាពលរដ្ឋ ចូលរួមសហការជាមួយអាជ្ញាធរ និងសមត្ថកិច្ចជំនាញចំពោះការធ្វើដំណើរតាម ផ្លូវឯកទិសទាំង4ខ្សែនេះ ក្នុងគោលបំណង កាត់បន្ថយការកកស្ទះចរាចរ ដែលបាននិងកំពុងកើនឡើង នៅពេលបច្ចុប្បន្ននេះផងដែរ៕
រស្មី
