ព្រៃវែង ៖ អំពើឃាតកម្មដែលមនុស្សម្នាហួសចិត្តមិនគួរណាចៅប្រុសហ៊ានសម្លាប់ជីតារបស់ខ្លួនដែលជានាយកសាលាដោយសារតែខ្ចីម៉ូតូមិនបាននោះបានកើតឡើងកាលពីថ្ងៃទី១៥ ខែធ្នូ ឆ្នាំ២០១២កន្លងទៅ រយៈពេលត្រឹមមួយខែប៉ុណ្ណោះ សមត្ថកិច្ចមានសង្ស័យក៏ស្រាវជ្រាវបន្តទៀតរកឃើញថាមានការពាក់ព័ន្ធទៅនឹងប្រពន្ធដែលខឹងប្ដី ហើយជួលចៅប្រុសឲ្យសម្លាប់ចោលតែម្ដង។
គួររំលឹកថា អំពើឃាតកម្មមួយបានកើតឡើងកាលពីថ្ងៃទី១៥ ខែធ្នូ ឆ្នាំ២០១២ ដោយជនរងគ្រោះឈ្មោះ សេន សារ៉ែម ភេទប្រុស អាយុ៦៧ឆ្នាំ ជានាយកសាលាបឋមសិក្សាចំណងទាក់ ក្នុងឃុំពាមបន្ទាយ ស្រុកកំពង់ត្របែក ត្រូវបានចៅប្រុសបង្កើតរបស់ខ្លួនសម្លាប់ដោយសារតែខឹងនឹងជីតាដែលខ្លួនខ្ចីម៉ូតូមិនបាន។
ដោយសារមិនអស់ចិត្តពីព្រោះថាជនសង្ស័យមានគ្នាតែម្នាក់ឯងមិនអាចធ្វើសកម្មភាពងាយស្រួលបែបនេះទេ ទើបសមត្ថកិច្ចបន្តបើកការស្រាវជ្រាវរកឃើញថាមានការពាក់ព័ន្ធជាមួយនឹងប្រពន្ធជនរងគ្រោះ។
បើតាមលោកវរសេនីយ៍ឯក សេង សុភក្ត្រ ស្នងការរងនៃស្នងការដ្ឋាននគរបាលខេត្តព្រៃវែងបានប្រាប់កម្ពុជាថ្មីឲ្យដឹងថា ក្រោយពេលស្រាវជ្រាវទើបសមត្ថកិច្ចកំណត់មុខសញ្ញាបន្ថែមទៀត ហើយរាយការណ៍ជូនចៅក្រមសាលាដំបូងខេត្តព្រៃវែងដើម្បីចេញដីកានាំខ្លួនឈ្មោះ ហែម ផេង ភេទស្រី អាយ៥៦ឆ្នាំ ត្រូវជាប្រពន្ធរបស់ជនរងគ្រោះ។ នៅថ្ងៃទី១២ ខែកុម្ភៈឆ្នាំ២០១៣ ចៅក្រមស៊ើបសួរសាលាដំបូងខេត្តព្រៃវែងលោក ម៉ុង មន្នីសោភា បានចេញដីកានាំខ្លួនជនសង្ស័យ។
លោកវរសេនីយ៍បន្តថា ជនសង្ស័យបានសារភាពការពិត ហើយមូលហេតុដែលគាត់ហ៊ានសម្លាប់ប្ដីនោះដោយសារតែខឹងប្ដីពេលសុំលុយម្ដងៗគាត់មិនដែលឲ្យនោះទេ។ ជនសង្ស័យបន្តថា នៅពេលខឹងប្ដី(ជនរងគ្រោះជានាយកសាលាបឋមសិក្សា) ខ្លាំងពេក ក៏បានជួលចៅប្រុសបង្កើតឲ្យសម្លាប់ជនរងគ្រោះតែម្ដង។
នៅពេលទទួលបានចម្លើយសារភាពរួចមក សមត្ថកិច្ចប៉ូលិសក៏បានបញ្ជូនជនសង្ស័យទៅកាន់សាលាដំបូងខេត្តព្រៃវែងដើម្បីចាត់ការទៅតាមផ្លូវច្បាប់៕
វិចិត្រ
