ផល សោ​ភ័​ណ្ឌ និង សែន រ៉ា​ដេ​ត ​ជួប​ថៃ​នៅ​ថ្ងៃអាទិត្យ​នេះ​

ថ្ងៃ ព្រហស្បតិ៍ ទី19 កុម្ភៈ ឆ្នាំ2015 ម៉ោង11:06   ផ្នែក: ព័ត៌​មានកីឡា    ដោយ: វិសិទ្ធ​

Pisey-02-19-2015-full-L1

ភ្នំពេញ ៖ ​អ្នក​ប្រដាល់​ជើង​ខ្លាំង​របស់​កម្ពុជា​២​រូប គឺ​ ផល សោ​ភ័​ណ្ឌ ក្លិប​តា​ឡី​ដំរី​មាន​រិ​ទ្ធ​និង​សែន រ៉ា​ដេ​ត ក្លិប​អប្សរា​គុន​ខ្មែរ ត្រូវ​ជួប​ប្រកួត​ជាមួយ​អ្នក​ប្រដាល់​ថៃ ក្នុង​កម្មវិធី​ប្រដាល់​ស្រាបៀ​កម្ពុជា នា​ល្ងាច​ថ្ងៃអាទិត្យ​ ទី​២២ ខែកុម្ភៈ​នេះ នៅ​លើ​សង្វៀន​SEA-TV។​

ផល សោ​ភ័​ណ្ឌ គេ​នឹង​ត្រូវ​ជួប​អ្នក​ប្រដាល់​ថៃ​ឈ្មោះ​ Thy Det ក្នុង​ទម្ងន់​៦៣,៥០០​គីឡូក្រាម​។ អ្នក​ប្រដាល់​ថៃ​រូប​នេះ ធ្លាប់​មក​ប្រកួត​ជាមួយ​អ្នក​ប្រដាល់​ខ្មែរ​ម្តង​ហើយ កាលពី​ថ្ងៃទី​១០ ខែ​មករា ឆ្នាំ​២០១៥ នៅ​សង្វៀន​ប៉ោយប៉ែត​ ខេត្តបន្ទាយមានជ័យ ក្នុង​កម្មវិធី​ប្រដាល់​ទេសចរណ៍​របស់​SEA-TV។​

កាលណោះ Thy Det បាន​វាយ​ចាញ់​ ផាន់ គ្រាន់ ក្លិប​គជសារ​កីឡា​ដោយ​ពិន្ទុ​។ អ្នក​ប្រដាល់​ថៃ​រូប​នេះ គេ​ជា​ម្ចាស់​ខ្សែក្រវាត់​នៅ​បាងកក ហេតុនេះ​មិនធម្មតា​នោះ​ឡើយ​។ ក្នុង​ការ​ប្រកួត​ជាមួយ ​ផាន់ គ្រាន់​នោះ គេ​រឹងមាំ​ណាស់ និង​មាន​ស្នៀត​ប្រដាល់​ល្អ​ថែមទៀត​ធ្វើឲ្យ ​ផាន់ គ្រាន់​យកឈ្នះ​ដោយ​លំបាក​។​

នេះ​ជា​លើក​ទី​៨ របស់​ សោ​ភ័​ណ្ឌ​ ហើយ ដែល​ជួប​ប្រកួត​ជាមួយ​ថៃ​នេះ​។ កាលពី​ដើម​ខែ​កុម្ភៈ​កន្លង​មក​នេះ សោ​ភ័​ណ្ឌ បាន​បំបាក់​អ្នក​ប្រដាល់​ថៃ​ឈ្មោះ ​Tor Khit មិនអោយ តដៃ​កើត​ក្នុង​ទឹក​ទី​២ ប៉ុណ្ណោះ​។ សម្រាប់​លើក​នេះ ពុំ​ដឹង​ថា ​សោ​ភ័​ណ្ឌ​ អាច​បំបាក់ Thy Det បាន​ទៀត ​ឬ​អត់​នោះ​ទេ​? អ្នក​ប្រដាល់​ថៃ Thy Det មាន​ប្រវត្តិ​ប្រកួត​ចំនួន​៤៩​ដង ឈ្នះ​៣៥​ដង ចាញ់​១២​ដង ​និង​ស្មើ​២​ដង​។ ប៉ុន្តែ​យ៉ាង​ណា ប៉ះ​ជាមួយ​ សោ​ភ័​ណ្ឌ​ ដែល​មាន​កណ្ដាប់ដៃ​ខ្លាំង រហ័ស និង លឿន​នោះ Thy Det អាច​នឹង​វេទនា​ទ្វេដង​បើ​ប្រៀបធៀប​ទៅ​នឹង​ការប្រកួត​ជាមួយ ​ផាន់ គ្រាន់​នោះ​។

ផល សោ​ភ័​ណ្ឌ គេ​មាន​ប្រវត្តិ​ប្រកួត​ចំនួន​៧៨​ដង ឈ្នះ​៥៤​ដង និង​ចាញ់​២១​ដង មិនដែល​ស្មើ ហើយ​ធ្លាប់​ផ្ដួល​គូប្រកួត​ឲ្យ​សន្លប់​លើ​រេញ​ចំនួន​២១​លើក​។ ចាំ​មើល រវាង​ ផល សោ​ភ័​ណ្ឌ និង អ្នក​ប្រដាល់​ថៃ Thy Det តើន​រណា​ជា​អ្នកឈ្នះ​នោះ​? ​

​ ​អ្នក​ប្រដាល់​ថៃ​ដែល​មក​ជួប ​សែន រ៉ា​ដេ​ត​នោះ មានឈ្មោះ ​Phit Phong Thang ប្រកួត​គ្នា​ក្នុង​ទម្ងន់ ៥១​គីឡូក្រាម​។ ​អ្នក​ប្រដាល់​ថៃ​ម្នាក់​នេះ មិនដែល​មក​ប្រកួត​នៅ​កម្ពុជា​ម្តង​ណា​នៅឡើយ​ទេ​កន្លងមក​។ គេ​មាន​ប្រវត្តិ​ប្រកួត​២៧​ដង ឈ្នះ​២១​ដង ចាញ់​៦​ដង​ប៉ុណ្ណោះ ខណៈ​ដែល ​សែន រ៉ា​ដេ​ត ទើប​ប្រកួត​បាន​១៨​ដង ឈ្នះ​១១​ដង និង​ចាញ់​៧​ដងនោះ​។​

តាម​លោក ញាណ សុធី អ្នកចាត់ចែង​កម្មវិធី​ប្រដាល់​នៅ​សង្វៀន​SEA-TV ឲ្យ​ដឹង​ថា Phit Phong Thang​នេះ​នៅ​ស្រុក​ថៃ គេ​ជា​ជើង​ខ្លាំង​គ្មាន​អ្នកណា​ឈ្នះ​គេ​ទេ ក្នុង​ប្រភេទ​ទម្ងន់​៥១​គីឡូក្រាម​នេះ ហើយ​មក​ក៏​ដើម្បី​សងសឹក​ឲ្យ​មិត្ត​រួម​ជាតិ​របស់​គេ គឺ​Pnag Porn​ដែល​បាន​វាយ​ចាញ់ ​រ៉ា​ដេ​ត ​ក្នុង​ទឹក​ទី​៤​នោះ​។​

Phit Phong Thang កាលដែល​គេ​មក​ជួប ​សែន រ៉ា​ដេ​ត​នេះ គឺ​ដោយសារ​ចង់​សាក​កណ្ដាប់ដៃ ជា​មួយ​ រ៉ា​ដេ​ត​តែប៉ុណ្ណោះ​។ ទោះជា​យ៉ាងណា អ្នក​ប្រដាល់​ថៃ​រូប​នេះ មិន​ប្រាកដ​ថា​ អាច​សងសឹក​ឲ្យ​មិត្ត​របស់​គេ​បាន​សម្រេច​នោះ​ទេ ព្រោះថា​ សែន​រ៉ា​ដេ​ត ​ដែល​ជា​ប្អូនបង្កើត​របស់ ​សែន រ៉ា​ឌី​ ជើង​ខ្លាំង​របស់​កម្ពុជា​នេះ មាន​ថ្វីដៃ​មិន​ចាញ់​បងប្រុស​របស់​គេ​នោះ​ឡើយ ហើយ​ថែមទាំង​ធ្លាប់​បំបាក់​ថៃ​ប៉ុន្មាន​នាក់​មក​ហើយ​។​ ដូច្នេះ​ចាំ​មើល ​Phit Phong Thang​ អ្នក​ប្រដាល់​ថៃ​ដែល​មក​លើក​នេះ អាច​យកឈ្នះ​សែន រ៉ា​ដេ​ត អ្នក​ប្រដាល់​កម្ពុជា​យើង​ឬ​អត់​? ​

ចំពោះ​ការប្រកួត​រវាង​ខ្មែរ និង​ខ្មែរ​វិញ សុខ ធី អ្នក​ប្រដាល់​ក្លិប​គី​រី​ដងរែក ខេត្ត​បន្ទាយមានជ័យ​នឹង​ជួប​ប្រកួត​ជាមួយ​ហ៊ឹម សេរី ក្លិប​តា​ព្រហ្ម​មានជ័យ​។ ឯ ឃិត ទូច ក្លិប​មជ្ឈមណ្ឌល កីឡា​ខ​.​ភ​.​ម ត្រូវ​ជួប​ប្រកួត​ជាមួយ​ថៃ សាក់​សារៈ ក្លិប​ឃ្លាំងមឿង​កីឡា​៕

Pisey-02-19-2015-full-L