ភ្នំពេញ ៖ កងយោធពលខេមរភូមិន្ទគ្រោងនឹងបង្កើតទីលានបាញ់គ្រាប់ពិតមួយនៅខេត្តកំពង់ស្ពឺ ក្នុងគោលដៅដើម្បីពង្រឹងសមត្ថភាពប្រយុទ្ធរបស់ប្រភេទទ័ពជំនាញ ។ នេះបើយោងតាម ការបញ្ជាក់របស់លោកឧត្តមសេនីយ៍ឯក ឥត សារ៉ាត់ អគ្គមេបញ្ជាការរង ដែលបានរាយការណ៍ជូនក្នុងកិច្ចប្រជុំមួយកាលពីរសៀលថ្ងៃទី១៣ ខែកុម្ភៈ នៅអគ្គបញ្ជាការ ក្រោមអធិបតីភាពឯកឧត្តមនាយឧត្តមសេនីយ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ។
លោកឧត្តមសេនីយ៍ឯក ឥត សារ៉ាត់ បានរាយការណ៍ថា ទីតាំងដែលត្រូវកំណត់ ជ្រើសរើសនោះគឺស្ថិតនៅក្នុងភូមិសាស្ត្រ ភ្នំបាំង ភ្នំនាងប្លែក ភ្នំជ្រួកក្រាញ់ ភ្នំមមល់ ភ្នំសម្រែង ភ្នំដំបង ភ្នំថ្មពួក ភ្នំភ្នាយរូង ភ្នំអណ្តូង ភ្នំចង្អោរ ភ្នំជ្រោះភ្នំ និងភ្នំសូភី ស្ថិតក្នុងព្រំប្រទល់របស់ ស្រុកចំនួន៤ គឺស្រុកសំរោងទង ស្រុកភ្នំស្រួច ស្រុកបរសេដ្ឋ និងស្រុកគងពិសី ខេត្តកំពង់ស្ពឺ ដែលជាទីតាំងភូមិសាស្ត្រមានលក្ខណៈអំណោយផល ងាយស្រួលក្នុងការចល័តកម្លាំង។
លោកបានបន្តថា តាមការគ្រោងទុក ការកសាងទីលានបាញ់គ្រាប់ពិតនេះ គឺផ្តល់អាទិភាពចំនួន៧ រួមមាន ទីលានបាញ់អាវុធថ្មើរជើង -ទីលានបាញ់កាំភ្លើងគាំទ្រប្រភេទត្បាល់ និង ដេកាហ្សិត- ទីលានបាញ់កាំភ្លើងធំគ្រប់ប្រភទ- ទីលានបាញ់កាំភ្លើងការពារអាកាស- ទីលានបាញ់រថក្រោះ រថពាសដែក - ទីលានបាញ់ឧទ្ធម្ភាគចក្រ យន្តហោះ និងទីលានបាញ់គ្រាប់ពិត ចាប់ពីថ្នាក់ក្រុម រហូតដល់វរសេនាតូច។
មានប្រសាសន៍នាឱកាសនោះ ឯកឧត្តមនាយឧត្តមសេនីយ៍ ប៉ុល សារឿន បានផ្តាំផ្ញើដល់ ក្រុមការងារគណៈកម្មការគ្រប់ជំនាញ ត្រូវសហការគ្នាឲ្យបានល្អ ដើម្បីរៀបចំប្លង់មេ សម្រាប់ កសាងទីលានបាញ់គ្រាប់ពិត និង ដាក់ឆ្លងអគ្គបញ្ជាការ និង ក្រសួងការពារជាតិ។ ក្នុងនោះ ត្រូវសិក្សាលំអិត អំពីការរៀបចំរចនាសម្ព័ន្ធអង្គភាព ព្រមទាំងការស្វែងរកប្រភពចំណូលពីបណ្តាប្រទេសជាមិត្ត និងសប្បុរសជននានា ដើម្បីស្ថាបនាទីលានបាញ់គ្រាប់ពិតទទួលបានជោគជ័យតាមការគ្រោងទុក ។
គួររំលឹកផងដែរថា តាមប្រសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ដែលថ្លែងក្នុងពិធីបិទវគ្គជំនាន់ទី១ នៅវិទ្យាស្ថាន កងទ័ពជើងគោក កាលពីថ្ងៃទី ២៤ ខែមករា ឆ្នាំ២០១៣ បានមានប្រសាសន៍ថា ការហ្វឹកហ្វឺនតាមបណ្តាកងឯកភាព ត្រូវធ្វើឲ្យបានជាប់ជាប្រចាំ ដើម្បីរំលឹក និង សាកល្បងមុនការ ប្រយុទ្ធ ឬបំពេញបេសកកម្មអ្វីមួយ និងជាសកម្មភាពអនុវត្តជាក់ស្តែងនៅលើភូមិសាស្ត្រដែល អង្គភាពទទួលខុសត្រូវ។
ក្នុងន័យនេះ កងយោធពលខេមរភូមិន្ទ ធ្លាប់បានធើ្វការបាញ់សាកល្បងទទួលបានជោគជ័យ ជាច្រើនលើករួចមកហើយ រួមមាន កាំភ្លើងការពារអាកាស ត្បាល់ ដេកា កាំភ្លើងលើរថក្រោះ កាំភ្លើងធុន១៣០មីលីម៉ែត្រ និងកាំភ្លើងប្រភេទប្រតិកម្មBM21 ជាដើម៕
