កម្មករ​រោងចក្រ​ "ខ្វាន់​ទុម​ប្ល៊ូ​ស៊ី​ង"​ បន្ត​ធ្វើ​កូដកម្ម​ទាំងយប់​ទាំង​ថ្ងៃ​ ដើម្បី​ទាមទារ​លក្ខខណ្ឌ​ការងារ​ចំនួន​៥​ចំណុច​

ថ្ងៃ ព្រហស្បតិ៍ ទី19 កុម្ភៈ ឆ្នាំ2015 ម៉ោង10:35   ផ្នែក: សន្តិសុខ និង សង្គម    ដោយ: វិទូ​

Pisey-02-19-2015-full-I1

ភ្នំពេញ ៖ ក្រុម​កម្មករ​រោងចក្រ​កាត់ដេរ​ ខ្វាន់​ទុម​ប្ល៊ូ​ស៊ី​ង​ ដែល​មាន​ទីតាំងនៅ​ភូមិ​ជ្រៃ​កោង ​សង្កាត់​ចោមចៅ ​ខណ្ឌ​ពោធិ៍​សែន​ជ័យ ​ប្រមាណ​ជា​១.៥០០​នាក់​ បាន​នាំ​គ្នា​ធ្វើ​កូដកម្ម​ទាមទារ​លក្ខខណ្ឌ​ការ​ងារ​ទាំងយប់​ទាំង​ថ្ងៃ​ តែ​មិន​ទាន់​មាន​សញ្ញាណ​ណាមួយ​បញ្ជាក់​ថា​មានការ​ដោះស្រាយ​នៅឡើយ​ទេ​ហើយ​កម្មករ​នៅតែ​បន្ត​ធ្វើ​កូដកម្ម​បន្ដ​ទៀត​។​

ប្រភព​ព័ត៌មាន​បាន​ឲ្យ​ដឹង​ថា​ កាលពី​ព្រឹក​ថ្ងៃទី​១៨ ​ខែ​កុម្ភៈ ​ឆ្នាំ​២០១៥​ ក្រុម​កម្មករ​រោងចក្រ​ខ្វាន់​ទុម​ប្ល៊ូ​ស៊ី​ង​ខេ​ម​បូ​ឌា​អិ​ល​ធី​ឌី​ បាន​នាំ​គ្នា​ធ្វើ​កូដកម្ម​ដើម្បី​ទាមទារ​លក្ខខណ្ឌ​ចំនួន​៥​ចំណុច ​ដែល​កាល​នោះ​មាន​កម្មករ​សរុប​ចូលរួម​ចំនួន​៣.៥០០​នាក់ ​ទាំង​វេន​យប់​ និង​វេន​ថ្ងៃ​ តែ​ការ​ទាមទារ​នោះ​មិន​ទាន់​មាន​ការ​ដោះស្រាយ​នៅឡើយ​ទេ ជាហេតុ​នាំ​ឲ្យ​ដល់​វេលា​យប់​ត្រូវ​បាន​ក្រុម​កម្មករ​ដែល​​ធ្វើការ​វេន​យប់​នោះ​ នាំគ្នា​បន្ដ​ធ្វើ​កូដកម្ម​ទាំងយប់​បន្ថែម​ទៀត​ និង​បន្ត​រហូតមកដល់​វេលា​ព្រឹក​ថ្ងៃទី​១៩ ​ខែ​កុម្ភៈ​នេះ​ជា​បន្ដ​ទៀត​។​

ទោះបីជា​កម្មករ​ធ្វើ​កូដកម្ម​យ៉ាងសកម្ម​បែបនេះ​ក៏ដោយ ​ក៏​រហូតមកដល់​ព្រឹក​ថ្ងៃទី​១៩ ខែ​កុម្ភៈ​នេះ​ នៅ​មិន​ទាន់​មាន​ការ​ចចារ​ដោះ​ស្រាយ​គ្នា​នៅឡើយ​ទេ​។ ​ក្រុម​កម្មករ​បាន​នាំ​គ្នា​ទាមទារ​ចំនួន​៥​ចំណុច​ ក្នុង​នោះ​មាន​ដូចជា ទាមទារ​ប្រាក់​២៨​ដុល្លារ លើ​ចំនួន​ប្រាក់ខែ​ដែល​មាន​ស្រាប់ ពេល​ប្ដូរ​ការងារ​កម្មករ​ត្រូវ​គិត​អ្វីៗ​ដូចដែល​កម្មករ​នៅ​កន្លែង​ចាស់​នា​ពេល​មុន នៅពេល​កម្មករ​សុំច្បាប់​ឈឺ​ក្រុមហ៊ុន​មិន​ត្រូវ​កាត់​លុយ​ទេ ក្រុមហ៊ុន​ត្រូវ​តែ​មាន​ផលិតផល​ឲ្យ​កម្មករ​វេន​យប់​ធ្វើ​គ្រប់គ្រាន់ ​និង​ចុង​ក្រោយ​ក្រុមហ៊ុន​ត្រូវ​ឲ្យ​មាន​ម្ហូប​សម្រាប់​កម្មករ​ចំនួន​ពីរ​មុខ​ផង​។​ ជា​មួយ​គ្នា​នេះ​ ក្រុម​កម្មករ​ក៏​បាន​លើក​ឡើង​ផង​ដែរ​ សូមកុំ​ឲ្យ​ក្រុមហ៊ុន​បញ្ឈប់​កម្មករ​ពី​ការងារ​ដោយ​គ្មាន​មូលហេតុ​ដូច​នា​ពេល​កន្លងមក​។​

តាម​ប្រភព​ព័ត៌មាន​បញ្ជាក់​ថា​ នៅ​ព្រឹក​ថ្ងៃទី​១៩​ ខែ​កុម្ភៈ​នេះ ​មាន​កម្មករ​ដែល​ចូលរួម​ធ្វើ​កូដកម្ម​ចំនួន​១.៥០០​នាក់​ប៉ុណ្ណោះ​ ក្នុង​នោះ​មាន​អ្នកខ្លះ​មិន​ចូលរួម ​និង​មាន​មួយចំនួន​តូច​ទៀត​ចូល​ធ្វើការ​ដែរ មាន​សហជីព​ចំនួន​ពីរ​ដែល​នៅចាំ​ជួយ​កម្មករ​តាមផ្លូវ​ច្បាប់​៕

Pisey-02-19-2015-full-I