ភ្នំពេញ ៖ កាបូបលុយខ្សែដៃនិងទូរស័ព្ទស៊េរីទំនើបមួយគ្រឿងត្រូវបានក្រុមល្មើស២នាក់ធ្វើសកម្មភាពភ្ជង់ប្លន់ពីមេការខារ៉ាអូខេម្នាក់យកទៅបាត់ដោយសុវត្ថិភាព ក្នុងខណៈពេលដែលស្ត្រីជាមេការខារ៉ាអូខេរូបនោះត្រឡប់មកពីបើកលុយវិញ។
អំពើប្លន់ខាងលើនេះបានកើតឡើងកាលពីរាត្រីឆ្លងចូលថ្ងៃទី១៤ ខែកុម្ភៈ ឆ្នាំ២០១៣ វេលាម៉ោង១២និង៣០នាទីនៅចំណុចមុខផ្ទះលេខ៤៨ ផ្លូវ១៤៦ ក្រុម៣០ ភូមិ១១ សង្កាត់ ផ្សារដេប៉ូ២ ខណ្ឌទួលគោក។ តែក្នុងអំពើប្លន់នេះនារីរងគ្រោះមិនមានគ្រោះថ្នាក់ឡើយ ពោលគឺគ្រាន់តែបាត់បង់ទ្រព្យសម្បត្តិប៉ុណ្ណោះ។
ក្រុមល្មើសត្រូវបានគេអះអាងថា មានគ្នា២នាក់ប្រដាប់ដោយកាំភ្លើងខ្លីមិនស្គាល់ម៉ាក១ដើមជិះម៉ូតូមិនចាំម៉ាកមួយគ្រឿង បានធ្វើសកម្មភាពភ្ជង់ប្លន់យកកាបូបលុយរបស់ស្ត្រីរងគ្រោះ១ ដែលក្នុងកាបូបនោះមានប្រាក់ចំនួន៤០ម៉ឺនរៀល ទូរស័ព្ទសាំសុង១គ្រឿង ខ្សែដៃពាក់សម្រាប់លើសឈាម១ខ្សែ និងអត្តសញ្ញាណប័ណ្ណ១សន្លឹក។
ស្ត្រីរងគ្រោះត្រូវបានគេស្គាល់ឈ្មោះ ឆែន មុំ អាយុ៣៥ឆ្នាំ មុខរបរមេការខារ៉ាអូខេ ស្នាក់នៅផ្ទះជួលកើតហេតុខាងលើ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុស្ត្រីរងគ្រោះត្រូវបានគេទូរស័ព្ទឲ្យទៅយកលុយ តែដោយស្ត្រីរងគ្រោះមិនមានម៉ូតូជិះនោះ ក៏ត្រូវបានមិត្តភក្ដិជិះម៉ូតូមកឌុប។ លុះពេលបានលុយជិះម៉ូតូត្រឡប់មកដល់មុខផ្ទះ ក៏ត្រូវក្រុមល្មើសដែលមានគ្នា២នាក់ធ្វើសកម្មភាពដោយជិះម៉ូតូ១គ្រឿងមកក្បែរ ហើយកាំភ្លើងប្លន់យកកាបូបលុយនោះបានសម្រេចតែម្ដង ហើយក្រុមល្មើសក៏បានគេចខ្លួនបាត់ស្រមោលអស់ដែរ។
ក្រោយពេលកើតហេតុស្ត្រីរងគ្រោះបានត្រឹមតែមកប្ដឹងប៉ូលិសដើម្បីឲ្យប៉ូលិសស្រាវជ្រាវតាមចាប់ក្រុមល្មើសមកដាក់ទោសទៅតាមច្បាប់៕
ស្រីរ័ត្ន
