អ្វី​ទៅ ជាព្រះ​ប្រាជ្ញា បារមិតា?

ថ្ងៃ ព្រហស្បតិ៍ ទី19 កុម្ភៈ ឆ្នាំ2015 ម៉ោង10:02   ផ្នែក: វប្បធម៌/ទេសចរណ៍    ដោយ: កម្ពុជាថ្មី​

M19-02-15-a

ក្នុង​សម័យ បាយ័នគេ​រក​ឃើញ​បដិមា​ភេទស្រី​ដ៏​កំពូល មួយ​អង្គ​ដែល​គេ​អោយ​ឈ្មោះ​ថា ប្រាជ្ញា​បារមិតា​ ក៏​ចាត់​ទុក​ជា​ព្រះ​ពោធិសត្វ មាន​ភាព​ស្មើ​គ្នា​ នឹង​ព្រះ​ពោធិសត្វ​ អវលោកេស្វរៈដែរ។

ព្រះ​ប្រា​ជ្ញា​បារមិតា​ គេ​បានសម្គាល់​ឃើញ​ជា​សក្តិ​របស់​​ទេវតា​ប្រុស​ ពោល​គឺ​ព្រះ​សិវៈ។ ជាពិ​សេស​ព្រះ​ប្រាជ្ញា​បារ​មិតា តំ​ណាង​អោយ​ព្រះ​នាង​ឧមា ជា​សក្តិ​ ឬ​ជា​មហេសី​ព្រះ​ឥ​សូរ​តែ​ម្តង។ ជា​ពិសេស​ព្រះ​នាង ប្រាជ្ញាបារមិតា​ក៏​តំណាង​អោយ​គុណ​ធម៌​ ដ៏​ប្រពៃ​​ឥត​ខ្ចោះ​ទាំង​ឡាយ​ដែល​គេ​អោយ​ឈ្មោះ​ជា ស្រីគ្រប់​លក្ខណ៍ដែល​ទាំង​កាយ​និងទាំង​ចិត្ត ប្រកប​ដោយ​ស្វាមី​ភក្តិ​ គ្មាន​ពីរ។

ចំពោះ​បដិមា​ ៣ អង្គ​ដ៏​ល្បី​ល្បាញ​នៅ​សម័យ​អង្គរ​ជាពិសេស​ សម័យ​ព្រះ​បាទ​ជ័យ​វរ្ម័នទី​៧ នោះ​គេ​ឃើញ​មាន​បដិមា​មនុស្ស​ប្រុស​នៅ​ចំហៀង​ខាង​ស្តាំ​ គឺ​ជាតំណាង​ព្រះ​ពោធិសត្វ​លោកេស្វ​រៈ និង ខាង​ឆ្វេង​ ជា​ព្រះ​បដិមា​តំណាង​ព្រះ​ប្រាជ្ញា​បារ​មិតា​ តំណាង​ភេទ​ស្រី​ ហើយ​បដិមា​​ដែល​នៅ​ចន្លោះ​កណ្តាល​នោះ​តំណាង​អោយ​ព្រះពុទ្ធ​ សម​ណ​គោ​តម​ដែល​ព្រះអង្គ​គង់​លើ​បល្ល័ង្ក នាគ​រាជ បើក​ព​ពារ​គ្រប​បិទ​បាំង​ខាង​លើ​ព្រះ​សិរសា ការពារ​កំដៅ​ថ្ងៃ​និង​ភ្លៀង​ព្យុះ...

គប្បី​បញ្ជាក់​ថា ព្រះ​បាជ្ញាបារមិតា តំណាង​អោយ​ពោធិសត្វ​ ផ្នែក​នារី ព្រោះ​គេ​យល់​ថា​ជា​សក្តិ​(មហេសី)​របស់​ទេវតា ដ៏​ស័ក្តសិទ្ធិ។ នេះ​ជាតំណាង​នូវ​ទឹក​ចិត្ត​បុព្វ​បុរស​ខ្មែរ​ក្នុងការ​គោរព​ យេនឌ័រ ឬ​ក៏​អាច​ហៅ​បាន​ថា​ជាការ​គោរព​សិទ្ធិ​នារី ដែល​គេ​ចាត់​ទុក​នារី មាន​សមភាព​ជា​​ជាមួយ​បុរស។ បាន​សេចក្តី​បន្ត​ទៀត​ថា ក្នុង​ការ​ជួយ​មនុស្ស​ ឬ​ជួយ​សង្គម​ជាតិ​អោយ​មានការ​អភិវឌ្ឍ​នោះ​មិន​មែន មានតែ​បុរស​ភេទ​នោះ​ទេ គឺ​មានទាំង​​​​ស្ត្រី​ភេទ​ឬ ក៏​ជា​ភរិយា​ទៀត​ផង។

ជាក់​ស្តែង​ក្នុង​សង្គម​ខ្មែរ​តែង​មាន​គោរព​អ្នក​តា​ដែល​តំណាង​អោយ​ព្រលឹង​បុព្វ​​ការី​ជន​ឬ​ជាបុព្វ​បុរស​ក្នុងការ​បង្កើត​ស្នា​ដៃ​ក្នុង​សង្គម​។ ប៉ុន្តែ​ក៏​មាន​ការ​និយម​គោរព​អ្នក​តាភេទ​ស្រី​ ដែល​គេ​ហៅថា​" អ្នក​យាយ​" ឬហៅ​ថាៈ "​យាយ​ទេព",​យាយ​ម៉ៅ​, យាយ​ពេញ​, យាយ​កែស(​នៅ​ឃុំ​បឹង​ខ្យាង ស្រុក​កណ្តាល​ស្ទឹង​ ខេត្ត​កណ្តាល)។ល។

បដិមា​ព្រះ​ប្រាជ្ញា​បារមិតា ដ៏​ល្បី​ល្បាញ​ដែល​ជាតំណាង​នូវ​សក្តិ​ព្រះ​ឥសូ​រនោះ​ក៏​គេ​ឃើញ​ចម្លាក់​នៅ​ប្រាសាទ​បន្ទាយ​ស្រី ខេត្ត​សៀម​រាប​ ហើយ​ដែល​គេហៅ​ថា​ ស្រី​គ្រប់​លក្ខណ៍ ជាតំណាង​នាង​ឧ​មាជាម​ហេសី​ របស់​ឥ​សូរ​ព្រោះ​ប្រាសាទ

បន្ទាយ​ស្រី​ដែល​មាន​ប្រាង្គ​កណ្តាល​គេ​នោះ​ ជាការ​ឧ​ទិ្ទ​ស​ថ្វាយ​ព្រះ​ឥ​សូរ។​ រូប​ចម្លាក់​ស្រី​គ្រប់​លក្ខណ៍​តំណាង​អោយ​សិរី​មង្គល​ ឬ​សិរី​សួស្តីជ័យ​មង្គល​ ជូន​ដល់​មនុស្ស​លោក​ ឬ​ហៅថា​ ស្រ្តី​ដែល​មានស្នា​ដៃ​ក្នុង​ការ​ជួយ​​អភិវឧ្ឍ​ជាតិ​អោយ​រីក​ចម្រើន ទុក​ដូច​ឬស្មើ​នឹង​ព្រះ​ពោធិសត្វ​ដែរ។

ជាក់​ស្តែង​តាមរយៈ​ប្រាសាទ​តាព្រហ្ម គឺ​ព្រះ​បាទ​ជ័យ​វរ្ម័នទី​៧ បាន​គោរព​វិញ្ញាក្ខ័ន្ធ​ ព្រះ​មាតា​ស្មើ​នឹង​ព្រះ​ប្រាជ្ញា​បារមិតា​។ ឯ​ចំណែក​ប្រា​សាទ​ព្រះ​ខ័ន​វិញ​ ព្រះអង្គ​ទ្រង់​គោរព​ព្រះ​វិញ្ញាណក្ខ័ន្ធ​ព្រះ​បិតា​ព្រះ​អង្គ​ស្មើ​ និង​ព្រះ​ពោធិ​សត្វ​​ អវលោ​កេ​ស្វរៈ។​

ជា​កិច្ច​បន្ត​ ចំពោះ​ទឹក​ចិត្ត ប្រជា​ពលរដ្ឋ​ខ្មែរ​សម័យ​អង្គរ​​​​ក្រោយ​ពេល​ដែល​ព្រះ​បាទ​ជ័យ​វរ្ម័នទី​៧ សោយ​ទិវង្គត​នោះ​ក៏​គេ​បាន​លើក តម្កើង​ ព្រះ​បាទ​ជ័យ​វរ្ម័នទី​៧ ស្មើ​នឹង​ព្រះ​ពោធិសត្វ​អវលោ​កេ​ស្វរៈ និង​ព្រះ​នាង​ឥន្ទ្រទេវី​ស្មើ​នឹង ព្រះ​ប្រា​ជ្ញាបារមិតា​ជា​ទីគោរព​របស់​ជនា​នុ​ជន​គ្រប់​គ្នា។

បានសេចក្តី​ថា បើ​ប្តី​ជាទេ​វតា​ក៏​ប្រ​ពន្ធ ជា ទេវតាដូច​​​​​គ្នា​ទើប ការ​ងារ​ជួយ​ជាតិ​ និង​ជួយ​សង្គម​មនុស្ស​អាច​ប្រ​ព្រឹត្ត​ទៅ​បាន​។ ដូចនេះ​ក្នុង​លោក​ដែល​មាន​ការ​រីក​ចម្រើន​ទៅ​បាន​ វា​មិន​មាន​តែ​ស្នាដៃ​ខាង​បុរស​នោះ​ទេ គឺ​ត្រូវតែ​មាន​ស្នាដៃ​ខាង​នារី ឬ​ ស្រ្តី​ជាមួយ​ដែរ។

យ៉ាង​នេះ​ហើយ​ទើប​លទ្ធផល​នៃការ​ជួយ​សង្គម​របស់​ព្រះ​ពោធិសត្វ​ អវលោ​កេ​ស្វ​រៈ​ក៏​មិន​អាច​កាត់​​ផ្តាច់​បាន​ពី​ស្នាដៃ​នៃព្រះ​ប្រាជ្ញា​បារមិតានោះ​ឡើយ។​

យ៉ាងនេះ​ហើយ​ទើបប្រជា​ពលរដ្ឋ​ខ្មែរ​​បុរាណ​គោរព​ទាំង​ព្រះ​ពោធិសត្វ​ ផង​និង​ទាំង​ព្រះ​ប្រា​បារមិតា​​ផង​ក្នុង​ពេល​ជាមួយ​គ្នា​តែ​ម្តង៕

ឥន្ទ្រីយ៍ខ្មៅ