ភ្នំពេញ ៖ រថយន្តពីរគ្រឿងបានរងនូវការខូចខាតយ៉ាងដំណំរៀងៗខ្លួនបន្ទាប់ពីជួបឧប្បត្តិហេតុគ្រោះថ្នាក់ចរាចរបុកគ្នាពេញទំហឹងកាលពីវេលាម៉ោង៨និង៣០នាទីយប់ថ្ងៃទី១៣ខែកុម្ភៈឆ្នាំ២០១៣នៅលើកំណាត់ផ្លូវជាតិលេខ៤ត្រង់ចំណុចភូមិផ្សារកំបូល សង្កាត់កំបូល ខណ្ឌពោធិ៍សែនជ័យរាជធានីភ្នំពេញ។
រថយន្តទាំងនោះត្រូវបានគេដឹងថាមួយគ្រឿងម៉ាកឡិចស៊ីសRX300 មួយគ្រឿងនោះពណ៌ខ្មៅពាក់ស្លាកលេខភ្នំពេញ2M-6976បើកបរដោយយុវជនម្នាក់មិនស្គាល់ឈ្មោះ ដែលសមត្ថកិច្ចនិយាយថារូបគេនិងអ្នកជិះជាមួយពីរទៅបីនាក់ទៀតស្រវឹងស្រាហើយមិនមាននរណាម្នាក់រងរបួសនោះឡើយ ប៉ុន្តែរថយន្តនោះបានដាច់កង់មុខខាងឆ្វេងអស់១គ្រាប់។ ចំណែកឯរថយន្តមួយគ្រឿងទៀតម៉ាកហ៊ីយ៉ាន់ដាយពណ៌ខៀវអត់ស្លាកលេខបើកបរដោយបុរសម្នាក់និងជារថយន្តដឹកត្រីបានរងនូវការខូចខាតយ៉ាងដំណំដែរដោយបែកកង់មុខខាងឆ្វេងនិងកំពិតមុខដែរ។
សមត្ថកិច្ចប៉ូលិសប៉ុស្តិ៍កំបូលនិងប៉ូលិសចរាចរខណ្ឌពោធិ៍សែនជ័យបាន ឲ្យដឹងថានៅមុនពេលកើតហេតុរថយន្តឡិចស៊ីសកូនកាត់បានបើកបរក្នុងទិសដៅពីកើតទៅលិចក្នុងល្បឿនលឿនចំណែកឯរថយន្តហ៊ីយ៉ាន់ដាយដឹកត្រីបើកបរធ្វើដំណើរក្នុងទិសដៅពីលិចទៅកើតក្នុងល្បឿនលឿនដែរ។ លុះពេលទៅដល់ត្រង់ចំណុចកើតហេតុរថយន្តដឹកត្រីនោះបានបត់ឆ្លងផ្លូវទៅខាងឆ្វេងដៃក៏ត្រូវរថយន្តឡិចស៊ីសបុកពេញទំហឹងតែម្ដង។ ពេលនោះរថយន្តឡិចស៊ីសបានដាច់កង់មុខខាងឆ្វេងនិងកំពិតរួញមួយចំហៀងខ្លួន ឯរថយន្តដឹកត្រីក៏រងការខូចខាតដូចគ្នាដែរ។ ប្រភពដដែលបានបន្តថាបន្ទាប់មករថយន្តឡិចស៊ីសមិនបានឈប់ស្ងៀមនោះទេបានបើករត់ទៅមុខយ៉ាងលឿនទាំងអត់កង់មុខម្ខាងអូសលើថ្នល់បែកផ្កាភ្លើងព្រាតរហូតចម្ងាយជិត៥០០ម៉ែត្រទើបទៅមុខលែងរួច ត្រូវប៉ូលិសឃាត់ខ្លួន ហើយអ្នកបើកបរនិងអ្នករួមដំណើរសុទ្ធតែស្រវឹងនិយាយគ្នាមិនកើត។
គ្រោះថ្នាក់ចរាចរនេះបានកើតឡើងដោយសារតែការបើកបរខ្វះការប្រុងប្រយ័ត្នមិនមានការយោគយល់អធ្យាស្រ័យឲ្យគ្នា គឺរថយន្តហ៊ីយ៉ាន់ដាយដឹកត្រីបើកបរឆ្លងផ្លូវមិនមើលមុខមើលក្រោយ ឯរថយន្តឡិចស៊ីសអ្នកបើកបរស្រវឹង។
ប្រភពព័ត៌មានមួយផ្សេងទៀតបានឲ្យដឹងថារថយន្តដឹកត្រីបើកអត់ឆ្លងផ្លូវនោះទេគឺបើកទៅមុខតាមផ្លូវត្រង់ធម្មតាប៉ុន្តែដោយសាររថយន្តឡិចស៊ីសបើកលឿនពេកហើយក៏រេចង្កូតជ្រុលទៅបុករថយន្តដឹកត្រីនោះតែម្ដង៕
វិទូ
