ភ្នំពេញ ៖ មន្ត្រីប៉េអឹមម្នាក់ដែលមេរបស់គេដាក់ឲ្យយាមក្រុមហ៊ុនឯកជន រ៉ូតជីវី ជាក្រុមហ៊ុនយកលុយឡានតាមផ្លូវលេខ២០០៤ ហើយដោយសារតែខឹងនឹងស្រីម៉ាស្សាកោសជប់ម្នាក់ដែលទៅសុំដូរលុយនៅកន្លែងបញ្ជរបង់ប្រាក់នោះនិយាយមិនស្ដាប់គ្នាទើបមន្ត្រីប៉េអឹមម្នាក់នោះទប់កំហឹងមិនបានក៏ដកកាំភ្លើងខ្លីពីចង្កេះបាញ់ភ្ជុចដី១គ្រាប់ធ្វើឲ្យមានការភ្ញាក់ផ្អើលដល់ប្រជាពលរដ្ឋនិងបានទូរស័ព្ទប្ដឹងប៉ូលិសឲ្យទៅចាប់វាយខ្នោះទាំងយប់តែម្ដង។
ហេតុការណ៍នេះបានកើតឡើងកាលពីវេលាម៉ោង២៤រំលងអធ្រាត្រឈានចូលថ្ងៃទី១៤ ខែកុម្ភៈ ឆ្នាំ២០១៣នៅចំណុចបញ្ជរបង់ប្រាក់របស់ក្រុមហ៊ុន រ៉ូតជីវី ដែលមានទីតាំងនៅភូមិត្រពាំងល្វាសង្កាត់ កាកាប ខណ្ឌពោធិ៍សែនជ័យ។ មន្ដ្រីប៉េអឹមរូបនោះមានឈ្មោះម៉មវាសនាភេទប្រុសអាយុ៣៤ឆ្នាំស្នាក់នៅកន្លែងបញ្ជរបង់ប្រាក់ ជាប៉េអឹមផ្ទៃប្រទេសដែលកាន់កាំភ្លើងខ្លីម៉ាកប៉េអាម៉ាប់ដោយបានបាញ់១គ្រាប់ភ្ជុចដី ហើយនៅបង់មានតែពីរគ្រាប់ប៉ុណ្ណោះពេលបាញ់១គ្រាប់នៅសល់១គ្រាប់។ នារីរងការគំរាមកំហែងនោះមានឈ្មោះសម្បត្តិអាលីនតាអាយុ២២ឆ្នាំមុខរបរម៉ាស្សាកោសជប់ស្នាក់នៅក្បែរកន្លែងកើតហេតុពុំមានរងរបួសនោះទេ តែភ័យព្រលឹងចុងសក់រត់បាតជើងសព្រាត។
តាមប្រភពព័ត៌មានបានឲ្យដឹងថាមុតពេលកើតហេតុនារីម៉ាស្សាកោសជប់រូបនោះបានកាន់លុយ ក្រដាស១ម៉ឺនរៀលយកទៅដូរបំបែកយកលុយរាយនៅកន្លែងបញ្ជរបង់ប្រាក់នោះ ពេលនោះប៉េអឹមដែលឈរយាមនៅទីនោះបានហាមឃាត់មិនឲ្យចូលទៅកន្លែងរបស់គេតែនារីរូបនោះមិនព្រមស្ដាប់ ហើយស្របពេលនោះអ្នកកាន់លុយនៅក្នុងបញ្ជរក៏យល់ព្រមដូរលុយរាយឲ្យដែរតែមិនទាន់បានដូរផងស្រាប់តែខ្មាន់កាំភ្លើងរូបនោះដកកាំភ្លើងខ្លីពីចង្កេះបាញ់ភ្ជុចដីមួយគ្រាប់តែម្ដង។ គ្រាន់តែឮស្នូរ១គ្រាប់ភ្លាមនារីរូបនោះបានរត់ចេញពីចំណុចកើតហេតុត្រឡប់ទៅកន្លែងរបស់ខ្លួនវិញហើយនិយាយរ៉ាយរ៉ាប់ប្រាប់មេការរបស់ខ្លួនពីសកម្មភាពដែលបានកើតឡើងទើបគេបានទូរស័ព្ទទៅប្ដឹងប៉ូលិសឲ្យជួយអន្តរាគមន៍។
ក្រោយពីទទួលពាក្យបណ្ដឹងតាមទូរស័ព្ទរួចមក សមត្ថកិច្ចក៏បានចុះទៅដល់កន្លែងកើតហេតុភ្លាម ហើយសួរនាំរកមុខអ្នកបាញ់ឃើញ ក៏បាននាំខ្លួនមកកាន់ប៉ុស្ដិ៍ទាំងយប់ដើម្បីធ្វើការសួរនាំ លុះព្រឹកឡើងប៉ូលិសបានបញ្ជូនជនដៃដល់ជាប៉េអឹមទៅឲ្យប៉េអឹមខណ្ឌជាអ្នកដោះស្រាយវិញ។
គេនៅចាំបានថានាពេលកន្លងមកលោកកែបជុតិមាអភិបាលរាជធានីភ្នំពេញធ្លាប់ចេញសេចក្ដីណែនាំ មិនឲ្យកងកម្លាំងប្រដាប់អាវុធជាពិសេសប៉ូលិសប៉េអឹមយាមតាមបណ្ដាហាងផឹកស៊ីឬបាញ់បោះសេរីនោះទេ តែគេនៅតែឃើញមានសមត្ថកិច្ចឆ្លៀតចូលយាមជាដដែល៕
វិទូ
