ភ្នំពេញ ៖ សម្ដេចតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានថ្លែងនៅព្រឹកថ្ងៃទី១៤ ខែកុម្ភៈ ឆ្នាំ២០១៣ ក្នុងពិធីសម្ពោធអគារថ្មីនៃពុទ្ធិកសកលវិទ្យាល័យ ព្រះសីហមុនី រាជា ក្នុងរាជធានីភ្នំពេញថា អព្ភូតហេតុចម្លែកពិតជាបានកើតឡើងក្នុងថ្ងៃថ្វាយព្រះភ្លើងចុងក្រោយ ព្រះបរមសព ព្រះបរមរតនកោដ្ឋ ព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ បូរណភាពទឹកដី និងឯកភាពជាតិខ្មែរ។
សម្ដេចតេជោថ្លែងថា បារមីរបស់ព្រះបរមសពនៅពេលថ្វាយព្រះភ្លើង គឺទាល់តែធ្វើឡើងចំនួន៥លើក ទើបអាចជោគជ័យ ហើយលើកទី៥ គឺសម្តេចតេជោផ្ទាល់ជាអ្នកថ្វាយព្រះភ្លើង ព្រះបរមសព។ សម្ដេចតេជោថ្លែងបន្តថា នៅពេលថ្វាយព្រះភ្លើងអីក៏យូរម្ល៉េះ គឺមិនមែនមកពីបច្ចេកទេស ឬមូលហេតុអ្វីនោះទេ ដោយសារបារមី និង ឫទ្ធានុភាពរបស់ព្រះបរមសពតែម្ដង។
សម្តេចនាយករដ្ឋមន្រ្តី បានថ្លែងទៀតថា ការថ្វាយព្រះភ្លើងត្រូវបានធ្វើឡើង ដោយលើកទី១ព្រះមហាក្សត្រ បានចម្លងទៀន បន្ទាប់ពីក្រុមបាគូផ្លុំស័ង្ខ និងព្រះសង្ឃបង្សុកូល ប៉ុន្តែទៀនដែលឆេះ២ថ្នាំងដៃហើយនោះបានរលត់ទៅវិញ។ លើកទី២ ព្រះមហាក្សត្រ និងសម្តេចម៉ែ បានចម្លងទៀនសាជាថ្មីទៀត ដែលទៀននោះឆេះ៣ថ្នាំងដៃហើយ តែរលត់ទៅវិញទៀត។ លុះលើកទី៣ បើទោះបីជាចាក់អាល់កុលពីលើដល់ក្រោមឲ្យឆេះឡើង ប៉ុន្តែទៀននោះនៅតែរលត់ដដែល រហូតដល់លើកទី៤ បើទោះសម្តេចសង្ឃរាជ និងព្រះមហាក្សត្រ រួមទាំងសម្តេចម៉ែ រៀបចំថ្វាយព្រះភ្លើង ក៏ទៀនរលត់ទៀត។
សម្តេចតេជោបានបន្តថា លុះលើកទី៥ សម្តេចផ្ទាល់តែម្នាក់ឯង បានសូមព្រះរាជទានទោស និងធ្វើការបួងសួង ទើបអាចថ្វាយព្រះភ្លើងរំលាយព្រះបរមសពបានរហូតនៅសល់ព្រះអដ្ឋិ។ ដូច្នេះសម្តេចតេជោ ជាអ្នកថ្វាយព្រះភ្លើងចុងក្រោយ៕
ស្នាយពល-សុភក្តិ
