រដ្ឋមន្ត្រី​សុខាភិបាល​ដឹកនាំ​ក្រុម​គ្រូពេទ្យ​ចុះ​ព្យាបាល​ភ្នែក​ដល់​ប្រជាពលរដ្ឋ​នៅ​សង្កាត់​ភ្នំពេញ​ថ្មី​ដោយ​ឥតគិតថ្លៃ

ថ្ងៃ ច័ន្ទ ទី26 មករា ឆ្នាំ2015 ម៉ោង15:26   ផ្នែក: ព័ត៌មានជាតិទូទៅ    ដោយ: សំអឿន​

M26-01-15-i

ភ្នំពេញ ​៖​ លោក​វេជ្ជបណ្ឌិត​ម៉ម ​ប៊ុនហេង​រដ្ឋមន្ត្រី​ក្រសួងសុខាភិបាល ​និង​ជា​ប្រធាន​ក្រុមការងារ​ថ្នាក់​ជាតិ​ចុះ​ជួយ​ខណ្ឌ​សែន​សុខ​កាលពី​ព្រឹក​ថ្ងៃ​ទី​២៦​ ខែ​មករា​ ឆ្នាំ​២០១៥​បាន​ដឹកនាំ​ក្រុម​គ្រូពេទ្យ​ស្ម័គ្រចិត្ត​ថ្នាក់​ជាតិ​ចុះ​ពិនិត្យ​ព្យាបាល​ភ្នែក​ដោយ​ឥតគិតថ្លៃ​ជូន​ដល់​បងប្អូន​ប្រជាពលរដ្ឋ​រស់នៅ​ក្នុង​សង្កាត់​ភ្នំពេញ​ថ្មី​ខណ្ឌ​សែន​សុខ​រាជធានី​ភ្នំពេញ។

លោក​សាស្ត្រាចារ្យ​សោ​ផុន​វឌ្ឍនៈ​សកលវិទ្យាធិការ​សកល​វិទ្យាល័យ​វិទ្យាសាស្ត្រ​សុខាភិបាល​បាន​មានប្រសាសន៍​ថា ​ដោយ​មាន​ការចូលរួម​ឧបត្ថម្ភ​ថវិកា​ពី​អង្គការ​មូលនិធិ​ហ្រេ​ត​ហូ​ឡូ​សកលវិទ្យាល័យ​វិទ្យាសាស្ត្រ​សុខាភិបាល ​មន្ទីរពេទ្យ​មិត្តភាព​ខ្មែរ សូ​វៀត​មន្ទីរពេទ្យ​ព្រះអង្គ​ឌួង​និង​អាជ្ញាធរ​មូលដ្ឋាន​បាន​ដឹកនាំ​ក្រុម​គ្រូពេទ្យ​ចុះ​មក​ពិនិត្យ​ និង​ព្យាបាល​ភ្នែក​ដល់​ប្រជាពលរដ្ឋ​នៅ​សង្កាត់​ភ្នំពេញ​ថ្មី​រយៈពេល​មួយថ្ងៃ​ដោយ​ឥតគិតថ្លៃ​ដើម្បី​ផ្តល់​ឱ​កាស​ដល់​សាស្ត្រាចារ្យ​និស្សិត​សកលវិទ្យាល័យ​ក៏ដូចជា​គ្រូពេទ្យ​បាន​ចូលរួម​ការងារ​ក្នុង​សហគមន៍​ដើម្បី​ស្វែងយល់​ពី​តម្រូវការ​សុខភាព​របស់​សហគមន៍​ព្រមទាំង​ចូលរួម​ចំណែក​ក្នុង​ការថែទាំ​ព្យាបាល​សុខភាព​ជូន​ប្រជាជន​ស្របតាម​គោលនយោបាយ​របស់​ក្រសួងសុខាភិបាល​ក៏ដូចជា​គោលនយោបាយ​របស់​រាជ​រដ្ឋាភិបាល​កម្ពុជា។

លោក​វេជ្ជបណ្ឌិត​ម៉ម​ប៊ុនហេង​មានប្រសាសន៍ថា ​ការ​ចុះពិនិត្យ​ព្យាបាល​ជំងឺ​ទូទៅ​ក៏ដូចជា​ជំងឺ​ភ្នែក​នេះ​មិនមែន​លើក​ទី​១​ទេ​ដែល​ក្រុម​គ្រូពេទ្យ​យើង​បាន​ចុះ​ព្យាបាល​ជំងឺ​ជូន​ប្រជាពលរដ្ឋ​ដោយ​ឥតគិតថ្លៃ​ពោល​គឺ​បាន​ចុះ​ជា​ហូរហែ​មិន​ថា​នៅ​រាជធានី​ភ្នំពេញ​ឬ​ខេត្ត​ទេ​ដើម្បី​ឲ្យ​គ្រូពេទ្យ​ និង​សហគមន៍​ប្រជាពលរដ្ឋ​បាន​ដឹង​សុខទុក្ខ​គ្នា​តើ​ពួកគាត់​មាន​ជួប​បញ្ហា​ជំងឺ​អ្វីខ្លះ​។​ជាងនេះទៅទៀត​វា​ជាការ​ចូលរួម​លើក​កម្ពស់​សុខភាព​ប្រជាពលរដ្ឋ​តាម​មូលដ្ឋាន ​និង​កាត់បន្ថយ​ពេលវេលា​និង​ចំណាយ​ថវិកា​ក្នុង​ការ​ទៅ​រក​សេវា​ព្យាបាល​នៅ​តាម​មន្ទីរពេទ្យ​នានា​ផង​ពិសេស​លោកតា​លោកយាយ​ដែល​មាន​វ័យ​ចំណាស់​​​​​ពិបាក​ក្នុងការ​ធ្វើដំណើរ។

លោក​រដ្ឋមន្ត្រី​បាន​បន្ត​ថា​«​ដោយ​មើល​ឃើញ​ពី​ការ​លំបាក​របស់​បងប្អូន​ប្រជាពលរដ្ឋ​នេះហើយ​បានជា​យើង​បាន​នាំនូវ​គ្រូពេទ្យ​មកពី​ថ្នាក់ជាតិ​មូលដ្ឋាន​និង​និស្សិត​ពេទ្យ​ចុះ​មក​ពិនិត្យមើល​បងប្អូន​ដោយ​មាន​ការ​ត្រួតពិនិត្យ​ពី​គ្រូពេទ្យ​ជំនាញ​ពី​មន្ទីរពេទ្យ​មិត្តភាព​ខ្មែរ ​សូវៀត​តើ​មាន​ជួប​ការ​លំបាក​អ្វីខ្លះ​មាន​បញ្ហា​ភ្នែក​អ្វីខ្លះ​ដើម្បី​ឈាន​ទៅ​សម្រេច​គោលដៅ​របស់​រាជរដ្ឋាភិបាល​ក្នុង​ការ​លុប​បំបាត់​ជំងឺភ្នែកឡើង​បាយ​នេះ​នៅ​ឆ្នាំ​២០២០​ខាងមុខ​»

លោក​រដ្ឋមន្ត្រី​បាន​បន្ត​ថា ​«​ការពិនិត្យ​និង​ព្យាបាល​នេះ​មិន​គិត​ថវិកា​ទេ​ហើយ​បើ​រក​ឃើញថា​ត្រូវការ​វះកាត់​ទៀត​នោះ​នឹង​​បញ្ជូន​ទៅ​មន្ទីរពេទ្យ​មិត្តភាព​ខ្មែរ​សូ​វៀត​ឬ​មន្ទីរពេទ្យ​ព្រះអង្គ​ឌួង​ហើយ​ការវះកាត់​ក៏​មិន​គិត​ថ្លៃ​ដែរ។ ក្រៅពី​ពិនិត្យ​ព្យាបាល​ហើយក៏​មានការ​ផ្តល់​ជូន​វែនតា​ដោយ​ឥតគិតថ្លៃ​ទៀតផង​»​។​

លោក​វេជ្ជបណ្ឌិត​ម៉ម​ប៊ុនហេង​បាន​អំពាវនាវ​សូម​ឲ្យ​បងប្អូន​ប្រជាពលរដ្ឋ​ទៅប្រើ​ប្រាស់​សេវា​រដ្ឋ​ឲ្យ​បាន​គ្រប់ៗ​គ្នា។

លោក​រដ្ឋមន្ត្រី​ក៏បាន​ថ្លែងអំណរគុណ​ដល់​លោក​សា​ផុន​វឌ្ឍនៈ​សកលវិទ្យាធិការ​សកលវិទ្យាល័យ​វិទ្យាសាស្ត្រ​សុខាភិបាល​និង​ក្រុមគ្រូពេទ្យ​ស្ម័គ្រចិត្ត​ទាំងអស់​ក៏ដូចជា​អាជ្ញាធរ​មូលដ្ឋាន​និង​អង្គការ​ហ្វ្រេ​ត​មូលនិធិ​ហូ​ឡូ​ដែល​បាន​ចុះមក​ពិនិត្យ​ព្យាបាល​ភ្នែក​ដល់​ប្រជាពលរដ្ឋ​នាពេលនេះ៕