កំពង់ធំ ៖ កាលពីព្រឹកថ្ងៃទី ២៦ ខែ ធ្នូ ឆ្នាំ ២០១២ អាជ្ញាធរខេត្តកំពង់ធំ បានជួបសំណេះសំណាលជាមួយនឹង វីរៈយុវនិស្សិតស្ម័គ្រចិត្តសម្តេចតេជោ ហ៊ុន សែន ត្រឡប់ទៅភ្នំពេញ ក្នុងឱកាសបេសកកម្មត្រូវបានបញ្ចប់រយៈពេល ៦ ខែ ក្នុងការអនុវត្តន៍ គោលនយោបាយចាស់សកម្មភាពថ្មី លើវិស័យដីធ្លី ដោយមានការចូលរួមពីសំណាក់ លោកឈុន ឈន់ អភិបាលនៃគណៈអភិបាលខេត្តកំពង់ធំ និងលោកគង់ វិមានអភិបាលរងខេត្តកំពង់ធំ រួមទាំងមន្ត្រីសុរិយោដី បានជូនដំណើរយុវជនស្ម័គ្រចិត្តផងដែរ។
លោក ប៉ូ លីវ៉ា តំណាងឲ្យវីរៈយុវនិស្សិតស្ម័គ្រចិត្តទាំង១២ ក្រុមដែលចុះមកបំពេញបេសកកម្មវាស់វែងដីធ្លីជូន ប្រជាពលរដ្ឋ បានថ្លែងអំណរគុណដល់អាជ្ញាធរខេត្តកំពង់ធំ និងអាជ្ញាធរស្រុក ព្រមទាំងមន្ត្រីបច្ចេកទេស ជំនាញ រួមទាំងប្រជាពលរដ្ឋ ដែលបានរួមសហការក្នុងយុទ្ធនាការវាស់វែងដីធ្លី និងសូមអរគុណដល់អាជ្ញាធរ គ្រប់ស្ថាប័ន ដែលបានផ្តល់នូវស្បៀងអាហារ ទាំងកន្លែងស្នាក់អាស្រ័យ ប្រៀបបានដូចជាកូន ជាចៅ និងបានធ្វើឲ្យវីរៈយុវនិស្សិតទាំងអស់ទទួលបាននូវភាពកក់ក្តៅ។ មិនតែប៉ុណ្ណោះក៏សូមអរគុណដល់ លោកឪពុក អ្នក ម្តាយរបស់ក្រុមនិស្សិត ទាំងអស់ដែលបានផ្តល់ឱកាសឲ្យកូនបានចុះមកប្រឡូកក្នុងវិញ្ញាសារជាក់ស្តែង ដែលមានតំលៃខ្លាំងណាស់សំរាប់ការតបស្នងបំរើជាតិមាតុភូមិ បន្តវេនពីរៀមច្បង។
លោក ឌិត ធន ប្រធានមន្ទីរសុរិយោដីខេត្តកំពង់ធំ បានបញ្ជាក់ថា ប្អូនវីរៈយុវនិស្សិតស្ម័គ្រចិត្តសម្តេចតេជោ ហ៊ុន សែន បានខិតខំប្រឹងប្រែងអនុវត្តន៍ការងារវាស់វែងដីធ្លី យ៉ាងយកចិត្តទុកដាក់ រហូតឈានដល់ការចែក ប័ណ្ណកម្មសិទ្ធស្របច្បាប់ជូនប្រជាពលរដ្ឋ ចំនួន ៤ ភូមិ ក្នុងខេត្តកំពង់ធំ លោកបានបន្តថា ក្រុមក្មួយនិស្សិត ទាំងអស់នេះ អ្នកខ្លះបានទៅបំរើការងារក្នុងស្ថាប័នជំនាញសុរិយោដី ខ្លះទៀតគឺមានការងាររួចទៅហើយ ឯខ្លះទៀតកំពុងតែសិក្សាបន្ត។ លោក ក៏បានផ្តាំផ្ញើឲ្យប្អូនថែរក្សាសុខភាព ចៀសផុតពីរោគបៀតបៀន ព្រោះរដូវនេះអាចនឹងមានជំងឺបានយ៉ាងងាយដោយសារអាកាសធាតុប្រែប្រួល៕
ប៊ុន រដ្ឋា
