ព្រះរាជអាជ្ញា​រង មាស ច័ន្ទ​ពិសិដ្ឋ ដោះលែង​ជនល្មើស​៦​នាក់ ពីរ​សំណុំរឿង​ក្នុង​ពេល​តែមួយ​

ថ្ងៃ ច័ន្ទ ទី26 មករា ឆ្នាំ2015 ម៉ោង15:12   ផ្នែក: សន្តិសុខ និង សង្គម    ដោយ: កម្ពុជាថ្មី​

Nita-26-A-34-Full

 

ភ្នំពេញ ៖ ព្រះរាជអាជ្ញារង​អម​សាលាដំបូង​រាជធានី​ភ្នំពេញ លោក មាស ច័ន្ទ​ពិសិដ្ឋ កាលពី​ចុង សប្តាហ៍​កន្លងទៅនេះ បានធ្វើ​ការ​ដោះលែង​ជនសង្ស័យ​ចំនួន​៦​នាក់ ដែល​ជាប់ចោទ​ពីរ​សំណុំ​រឿង។ សំណុំរឿង​ទី​១ ករណី​ចាប់ពង្រត់​ និង​បង្ខាំង​មនុស្ស​ខុសច្បាប់​និង សំណុំរឿង​ទី​២ ករណី​បើក​កន្លែង កត់​កន្ទុយលេខ​ខុសច្បាប់ នៅ​ខណ្ឌ​ពោធិ៍​សែន​ជ័យ។ ក្រៅពី​ករណី នេះ លោក មាស ច័ន្ទ​ពិសិដ្ឋ ធ្លាប់បាន​ធ្វើការ​ដោះលែង ជនបង្ក​ជាច្រើន​នាក់​ទៀត​ពាក់ព័ន្ធ​នឹង​ករណី​គ្រោះថ្នាក់​ចរាចរ និង បទល្មើស ផ្សេងៗទៀត​ផង។

ប្រភពព័ត៌មាន​ច្បាស់​ការណ៍​ពី​មន្ត្រី​សាលាដំបូង​រាជធានី​ភ្នំពេញ បាន​ទម្លាយ​ឲ្យ​ដឹង​នៅ​ថ្ងៃទី ២៦ ខែមករា នេះ​ថា លោក​ព្រះរាជអាជ្ញារង មាស ច័ន្ទ​ពិសិដ្ឋ បានធ្វើ​ការ​ដោះលែង​ជនសង្ស័យ​ឈ្មោះ រ៉ែ​ម ឧសភា ហៅ​នុត អាយុ​៣០​ឆ្នាំ ជាប់ចោទ​ពីបទ ចាប់ពង្រត់​និង​បង្ខាំង​មនុស្ស​ខុសច្បាប់ ទៅលើ​នារី​វ័យ ក្មេង​ម្នាក់​ឈ្មោះ នៅ សុខ​ឡែ​ន អាយុ​២៣​ឆ្នាំ។ ដោយឡែក​ករណី​បើក​កន្លែង​កត់​កន្ទុយលេខ​ខុស ច្បាប់ ជនសង្ស័យ​៥​នាក់ ក៏ត្រូវ​បាន​លោក​ព្រះរាជអាជ្ញារង មាស ច័ន្ទ​ពិសិដ្ឋ ធ្វើការ​ដោះលែង​ផង ដែរ។ សមត្ថកិច្ច​បាន​ឲ្យ​ដឹងថា ជនសង្ស័យ​ទាំងនេះ​មានឈ្មោះ សុខ រ័ត្ន​មុនី ភេទ​ស្រី អាយុ​៣៦​ឆ្នាំ ឈ្មោះ និ​ត ច័ន្ទ​តារា ភេទ​ប្រុស អាយុ​២០​ឆ្នាំ ឈ្មោះ គឹម កល្យាណ ហៅ​លីន ភេទ​ស្រី អាយុ​២៧​ឆ្នាំ ឈ្មោះ យឹម វ៉ុ​ន ភេទ​ប្រុស អាយុ​២៥​ឆ្នាំ និង ឈ្មោះ ពៅ សំណាង ភេទ​ស្រី អាយុ​២៩​ឆ្នាំ។

ចំពោះ​មូលហេតុ​នៃ​ការដោះលែង​នេះ ពុំមាន​ប្រភពព័ត៌មាន​ណាមួយ​បញ្ជាក់​ឲ្យ​ដឹង​នោះ ទេ។

ក្រៅពី​ករណី​ទាំងពីរ​នេះ លោក​ព្រះរាជអាជ្ញារង មាស ច័ន្ទ​ពិសិដ្ឋ ធ្លាប់ធ្វើ​ការដោះលែង ជនបង្ក​ជា​ច្រើន​នាក់​ទៀត​ពាក់ព័ន្ធ​នឹង​ករណី​គ្រោះថ្នាក់​ចរាចរ និង បទល្មើស ផ្សេងៗផងដែរ​។

ទី​១ លោក មាស ច័ន្ទ​ពិសិដ្ឋ កាលពីថ្ងៃទី​២៥ ខែវិច្ឆិកា ឆ្នាំ​២០១៤ បាន​ដោះលែង ជនបង្ក​ម្នាក់​ឲ្យ​មាន​សេរីភាព​ឡើងវិញ បន្ទាប់ពី បាន​បើក រថយន្តបុក​បណ្តាល ឲ្យ​បុរស​ម្នាក់​ស្លាប់ ភ្លាមៗ​នៅ​កន្លែង​កើតហេតុ ក្នុង​ខណ្ឌ​សែន​សុខ។ ទី​២ ជនបង្ក​គ្រោះថ្នាក់​ចរាចរណ៍​ដ៏​រន្ធត់​មួយ ដែល​បណ្តាល​ឲ្យ​យុវ​ជន​៣​នាក់​ស្លាប់​ភ្លាមៗ នៅ​កន្លែងកើតហេតុ​យ៉ាង​អាណោចអាធ័មទីបំផុត កាលពី​យប់​ថ្ងៃទី​២០ ខែកក្កដា ឆ្នាំ​២០១៤ នៅ​ចំណុច​មុខ​អាកាសយានដ្ឋាន​អន្តរជាតិ​ភ្នំពេញ តាម​បណ្តោយ​ផ្លូវ​សហព័ន្ធ​រុស្ស៊ី ក្នុង​សង្កាត់​កា​កាប ខណ្ឌ​ពោធិ៍​សែន​ជ័យ ត្រូវបាន លោក មាស ច័ន្ទ​ពិសិដ្ឋ សម្រេច​ដោះលែង​ភ្លាមៗ បន្ទាប់ពី​ត្រូវ​សមត្ថកិច្ច ឃាត់ខ្លួន​បាន​មួយ​យប់ ហើយ​បញ្ជូន​ទៅដល់​តុលាការ។

ការសម្រេច​ដោះលែង​ជនបង្ក​យ៉ាង​ឆាប់រហ័ស​បែបនេះ ធ្វើ​ឲ្យ​មជ្ឈដ្ឋាន​មួយចំនួនធំ ធ្វើការ​រិះ​គន់ យ៉ាងខ្លាំង ចំពោះ​ចំណាត់ការ​យ៉ាង​តក់ក្រហល់​របស់​ព្រះ​រាជ​អាជ្ញារង មាស ច័ន្ទ​ពិសិដ្ឋ ទោះបី​ក្រុម​គ្រួសារ​ជនរងគ្រោះ​ទទួលបាន​សំណង និង​របាយការណ៍​របស់​សមត្ថកិច្ច បញ្ជាក់ថា ខាង​ម៉ូតូ​ជន​រងគ្រោះ ជា​អ្នក​ខុស​ក៏ដោយ។ អ្នក​រិះគន់​បានលើកឡើង​ថា ប្រសិនបើ​គ្មាន​លាភសក្ការៈ ទេនោះ ក៏​ជនបង្ក​មិន​ត្រូវបាន​ដោះលែង​យ៉ាង​ឆាប់រហ័ស​បែបនេះ​ដែរ។ ទី​៣ បុរស​ម្នាក់​ដែល​បើករថយន្ត​ទំនើប​ក្នុង​ស្ថានភាព​ស្រវឹង​ជោកជាំ បុក​បណ្តាលឱ្យ​ស្ត្រី​២​នាក់ និង​បុរស​ម្នាក់​រងរបួស​ធ្ងន់ធ្ងរ ត្រូវបាន​លោក មាស ច័ន្ទ​ពិសិដ្ឋ សម្រេច​កាលពី​រសៀល​ថ្ងៃទី​១០ ខែតុលា ឆ្នាំ​២០១៤ ដោះលែង​ឱ្យមាន​សេរីភាព ឡើង​វិញ​ ក្រោម​ហេតុផល​ថា ភាគី​ទាំងសងខាង​បាន​សម្របសម្រួល​គ្នា​ដោយ​សំណង​រួចរាល់​អស់​ហើយ។ ជនបង្ក​រូបនេះ​ឈ្មោះ ម៉ែន វិ​ល័យ បើករថយន្ត​ម៉ាក FORD RANGER ពណ៌​បៃតង ចាស់ ពាក់​ស្លាក​លេខ រាជការ ៣៤៣៨ បុក​បណ្តាលឱ្យ​មនុស្ស​៣​នាក់​រងរបួស​ធ្ងន់ធ្ងរ នៅ​ចំណុច​មុខ ភោជនីយដ្ឋាន​វ៉ាស៊ីនតោន លើផ្លូវ​ជាតិ​លេខ​៦ សង្កាត់ ជ្រោយចង្វា ខណ្ឌជ្រោយចង្វា រាជធានី​ភ្នំពេញ កាលពី​យប់​ថ្ងៃទី​០៧ ខែតុលា ឆ្នាំ​២០១៤។ ទី​៤ បុរស​ម្នាក់​ដែល​បាន​បើករថយន្ត​ដឹក​ទឹក​សុទ្ឋ​ម៉ាក កា​សូ​ណា បុក​បណ្តាលឱ្យ​ក្មេងប្រុស​អាយុ​២​ឆ្នាំ​ម្នាក់​ស្លាប់​ភ្លាមៗ​នៅ​កន្លែងកើតហេតុ ត្រូវបាន​លោក មាស ច័ន្ទ​ពិសិដ្ឋ ដោះលែង​ឱ្យ មាន​សេរីភាព​វិញ​ហើយ កាលពី​រសៀល​ថ្ងៃទី​០៣ ខែតុលា ឆ្នាំ​២០១៤។

ពាក់ព័ន្ធ​ករណីនេះ ប្រភពព័ត៌មាន​មួយ​លួច​បង្ហើប​ឱ្យដឹងថា ជនបង្ក​ឈ្មោះ កប កឹ​ប អាយុ​២៤​ឆ្នាំ ត្រូវបាន​ព្រះរាជអាជ្ញារង មាស ច័ន្ទ​ពិសិដ្ឋ ដោះលែង​ឱ្យមាន​សេរីភាព តែ​ជននេះ ក៏ត្រូវ​បាន​តុលា​ការ​ចោទប្រកាន់​ពី​បទ​បើកបរ​បង្ក​ឱ្យ​អ្នកដទៃ​ស្លាប់​ដោយ​អ​ចេតនា រួច​បញ្ជូន សំណុំរឿង ទៅ​ចៅក្រម​ស៊ើបសួរ​ចាត់ការ​បន្ត​តាម​នីតិវិធី តាម​រូបភាព​ជន​ត្រូវ​ចោទ​នៅក្រៅ​ឃុំ។

ចំពោះ​មូលហេតុ​នៃ​ការដោះលែង​នេះ ត្រូវបាន​ប្រភពព័ត៌មាន បង្ហើប​ប្រាប់ថា គឺ​បន្ទាប់ពី​ក្រុម គ្រួសារ​ជនរងគ្រោះ សុខចិត្ត​ទទួលយក​សំណង​ចំនួន​៣៥០០​ដុល្លារ​សហរដ្ឋអាមេរិក ពី​ជនបង្ក ជា​ថ្នូរ​នឹង​ការដក​ពាក្យបណ្តឹង។ទី​៥ ជនសង្ស័យ​ជា​មនុស្ស​ប្រុស​ចំនួន​៤​នាក់ ត្រូវបាន​សមត្ថកិច្ច​ការិយា​ល័យ​ព្រហ្មទណ្ឌ កម្រិត​ស្រាល​នៃ​ស្នងការដ្ឋាន​នគរបាល​រាជធានី​ភ្នំពេញ កាលពី​ព្រឹក​ថ្ងៃទី​១០ ខែ​កញ្ញា ឆ្នាំ​២០១៤ បញ្ជូន​មកកាន់​អយ្យការ​អម​សាលាដំបូង​រាជធានី​ភ្នំពេញ ដោយ​ភ្ជាប់​សេចក្តី​សន្និដ្ឋាន​ពីបទ បើក​កន្លែង លេងល្បែង​ស៊ីសង​ខុសច្បាប់។ ប៉ុន្តែ នៅ​រសៀល​ថ្ងៃ​ដដែល លោក មាស ច័ន្ទ​ពិសិដ្ឋ បាន​ដោះលែង ជនសង្ស័យ​ទាំង​៤​នាក់​នេះ​ឲ្យ​មាន​សេរីភាព​ឡើងវិញ។ ទាក់ទិន​នឹង​ការ​ដោះលែង​នេះ គ្មាន​មន្ត្រី តុលាការណា​​ម្នាក់​បង្ហើប​ឲ្យ​ដឹង​ជា​ផ្លូវការ​នោះទេ គ្រាន់តែ​ប្រាប់​យ៉ាង ខ្លី​ថា ជន​សង្ស័យ​ត្រូវបាន​អប់រំ ណែនាំ រួច​ដោះលែង​តែម្តង។ ទី​៦ មនុស្ស​ប្រុស​ស្រី​ចំនួន​៧​នាក់ ដែល​ជាប់​ពាក់​ព័ន្ធ​នឹង​ករណី​ទទួល​កត់​ឆ្នោត​ និង​កត់​ការ​ភ្នាល់​បាល់​​ខុសច្បាប់​ ត្រូវបាន​សមត្ថកិច្ច​ព្រហ្មទណ្ឌ​កម្រិត​ស្រាល​រាជធានី​ភ្នំពេញ ដោះលែង​ឱ្យ មាន សេរីភាព​ឡើងវិញ​ហើយ កាលពី​ថ្ងៃទី​១២ ខែតុលា ឆ្នាំ​២០១៤ ដោយមាន​ការឯកភាព​ពី​លោក មាស ច័ន្ទ​ពិសិដ្ឋ ព្រះរាជអាជ្ញារង​អម​សាលាដំបូង​រាជ​ធានី​ភ្នំពេញ។ មនុស្ស​ប្រុស​ស្រី​ទាំង​៧​នាក់​នេះ ពុំ​ត្រូវបាន​ស្គាល់​អត្តសញ្ញាណនោះទេ។ ទាំងនេះ គឺ​សុទ្ឋ​តែ​ជា​ករណី​ដែល​អ្នកយកព័ត៌មាន​បាន​តាមដាន និង នៅមាន​ករណី​មួយចំនួន ទៀត ដែល​មិន​អាច​ស្វែងរក​ប្រភពព័ត៌មាន​បាន នៃ​ការដោះលែង​ជនបង្ក​នៃ​បទល្មើស របស់លោក​ព្រះ​រាជ​អាជ្ញារង​ មាស ច័ន្ទ​ពិសិដ្ឋ ដែល​អ្នក​ច្បាប់​ខ្លះ​លើក​ឡើង​ថា ជា​ឆន្ទានុសិទ្ធិ​របស់​តុលាការ​តែ​ប៉ុណ្ណោះ​៕

 

 

Nita-26-A-33-FullNita-26-A-35-FullNita-26-A-36-FullNita-26-A-37-Full