ភ្នំពេញ ៖ បុរសម្នាក់មានភាពស្រវឹងស្រាជោកជាំបានជិះម៉ូតូបោះពួយជ្រុលចង្កូតឡើងលើខឿនចិញ្ចើមផ្លូវ ទៅបុកគល់អំពិលហូបផ្លែ បណ្តាលឲ្យដួលបោកក្បាល រងរបួសធ្ងន់ សន្លប់ឈឹងហើយត្រូវបានគេបញ្ជូនទៅពេទ្យដើម្បីជួយសង្គ្រោះផងដែរ។
ហេតុការណ៍ម៉ូតូបុកដើមអំពិលខ្លួនឯងនោះបានកើតឡើងនៅវេលាម៉ោង២៣ និង១៥ នាទីយប់ថ្ងៃទី២៥ ធ្នូ នៅតាមវិថីព្រះស៊ីសុវត្ថិ ក្នុងសង្កាត់ស្រះចក ខណ្ឌដូនពេញ។
បុរសដែលបើកម៉ូតូបុកដើមអំពិលព្រោះស្រវឹងស្រានោះមិនត្រូវបានគេស្គាល់អត្តសញ្ញាណឡើយ ដោយមានអាយុជាង៣០ឆ្នាំ ហើយម៉ូតូផ្លើស ពណ៌ក្រហម ។
សាក្សីដែលឃើញហេតុការណ៍នោះបានអោយដឹងថា នៅវេលាកើតហេតុគេឃើញបុរសរងគ្រោះទំនងជាអ្នករត់ម៉ូតូឌុបបានធ្វើដំណើរតាមវិថីព្រះស៊ីសុវត្ថិ ក្នុងទិសដៅពីជើងទៅត្បូង ខណៈមកដល់ចំណុចកើតហេតុបានរេចង្កូតឡើងទៅលើខឿនចិញ្ចើមផ្លូវទៅបុកគល់អំពិលហូបផ្លែ បណ្តាលឲ្យដួលបោកក្បាលរងរបួសធ្ងន់សន្លប់ឈឹងតែម្តង ។
ក្រោយពេលកើតហេតុ ជនរងគ្រោះដឹកតាមរថយន្តសង្គ្រោះយកទៅព្យាបាល នៅមន្ទីរពេទ្យកាល់ម៉ែត ចំណែកម៉ូតូ ត្រូវសមត្ថកិច្ចយកទៅរក្សាទុកឲ្យ នៅប៉ុស្តិ៍ស្រះចក ។
ដោយឡែកមានហេតុការណ៍គ្រោះថ្នាក់មួយករណីទៀតបានកើតឡើងកាលពីវេលាម៉ោង២០និង៣០នាទីយប់ថ្ងៃទី២៥ខែធ្នូឆ្នាំ២០១២នៅចំណុចខាងមុខវាលព្រះមេរុផ្លូវសុធារសក្នុងសង្កាត់ជ័យជំនះ ខណ្ឌដូនពេញ ដែលបង្កដោយម៉ូតូម៉ាកIconពណ៌ក្រហមគ្មានស្លាកលេខបើកបរដោយឈ្មោះលីម គឹមខៀងភេទប្រុសអាយុ១៨ឆ្នាំស្នាក់នៅផ្ទះលេខ០៣៧eផ្លូវលំសង្កាត់ទួលសង្កែខណ្ឌឫស្សីកែវព្រោះតែស្រវឹងបានបើកមូ៉តូបុកអ្នកដើរឆ្លងផ្លូវឈ្មោះសំ ប៊ុណ្ណាភេទប្រុសអាយុ២០ឆ្នាំមុខរបរនគរបាលក្រសួងមហាផ្ទៃស្នាក់នៅសង្កាត់ស្ទឹងមានជ័យខណ្ឌមានជ័យបណ្តាលអោយរបួសធ្ងន់ហើយត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត។ចំណែកមូ៉តូបង្កហេតុត្រូវប៉ូលិសខណ្ឌដូនពេញយករក្សាទុករង់ចាំដោះស្រាយតាមនិតិវិធី៕
រស្មី
