ភ្នំពេញ ៖ បុរសម្នាក់បានរងរបួសធ្ងន់ធ្ងរហើយក៏ត្រូវបានគេជួយសង្គ្រោះដឹកបញ្ជូនទៅកាន់មន្ទីរពេទ្យភ្លាមៗ ក្រោយពេលដែលបុរសម្នាក់នេះជិះម៉ូតូយ៉ាងលឿនទៅបុករថយន្តបណ្តាលអោយដាច់ក.ម៉ូតូនោះ។
ហេតុការណ៍គ្រោះថ្នាក់នេះកើតឡើង នៅមុខវិទ្យាស្ថានសុខភាពសាធារណៈ តាមផ្លូវលេខ២៨៩ ក្រុម៧៥ ភូមិ១៦ សង្កាត់បឹងកក់ទី២ ខណ្ឌទួលគោក កាលពីវេលាម៉ោង១០ និង១៥ នាទីយប់ថ្ងៃទី២៥ ធ្នូ ឆ្នាំ២០១២។
គ្រោះថ្នាក់នេះកើតឡើងដោយរថយន្តឡិចស៊ីស RX300 ពណ៌ស ពាក់ស្លាកលេខភ្នំពេញ២S-៩៦២៤ បើកបរដោយជនជាតិចិនម្នាក់ បានប៉ះគ្នាជាមួយម៉ូតូ១គ្រឿងម៉ាកសង់ផលិតនៅប្រទេសចិនពាក់ស្លាកលេខ ១S៩៧៥៧ ជិះដោយបុរសម្នាក់រងរបួសធ្ងន់។
ប្រភពព័ត៌មានបានឲ្យដឹងថានៅមុនពេលកើតហេតុគេបានឃើញរថយន្តឡិចស៊ីស RX300 ពណ៌ស ពាក់ស្លាកលេខ ភ្នំពេញ២S៩៦២៤បើកបរដោយជនជាតិចិនបានបើកបរតាមផ្លូវលេខ២៨៩ ក្នុងទិសដៅពីត្បូងទៅជើង ចំណែកម៉ូតូសង់ចិន ពណ៌ខ្មៅ ពាក់ស្លាកលេខ ១S៩៧៥៧ជិះដោយបុរសម្នាក់ពីជើងទៅត្បូង ខណៈមកដល់ចំណុចកើតហេតុ ម៉ូតូជិះវ៉ារថយន្តមួយគ្រឿងឈានចូលទៅបុករថយន្តឡិចស៊ីស RX300 ចំពីមុខ ធ្វើឲ្យម៉ូតូដាច់កផ្នែកខាងមុខជាប់នឹងកាងរថយន្ត ហើយតួម៉ូតូដួលនៅនឹងថ្នល់ រីឯអ្នកជិះម៉ូតូរងរបួសធ្ងន់ ។
ក្រោយពេលកើតហេតុ ជនរងគ្រោះ បានបញ្ជូនទៅព្យាបាល នៅគ្លីនិកជិតកន្លែងកើតហេតុ ចំណែករថយន្ត និងម៉ូតូ ដែលដាច់.កមួយកំណាត់នោះ យកទៅរក្សាទុក នៅខណ្ឌទួលគោក ។
ក្នុងហេតុការណ៍គ្រោះថ្នាក់ចរាចរណ៍នោះដែរ មានរថយន្តស៊េរីទំនើបមួយគ្រឿង ចតនៅជិត កន្លែងកើតហេតុនោះ ស្រាប់តែមានជនឆ្លៀតឱកាសទៅចោមរោមមើលបានលួចខ្វេះយកកញ្ចក់មើលចំហៀង និងតែមម៉ាករថយន្តបិទនៅខាងលើស្លាកលេខរថយន្ត យកទៅបាត់ ធ្វើឲ្យម្ចាស់រថយន្តកាន
តែហួសចិត្តថែមទៀត៕
ស្រីរ័ត្ន
