យុវជន​ពីរ​ក្រុម​ដេញ​កាប់​គ្នា​បណ្ដាល​ឲ្យ​របួស​ធ្ងន់​ម្នាក់​-នគរបាល​ចាប់​ខ្លួន​៨​នាក់

ថ្ងៃ ច័ន្ទ ទី26 មករា ឆ្នាំ2015 ម៉ោង14:48   ផ្នែក: សន្តិសុខ និង សង្គម    ដោយ: វិទូ​

M26-01-15-g

ភ្នំពេញ ​៖​ ស្ទាវ​ពីរ​ក្រុម​ ដោយ​​មួយ​ក្រុម​កំពុង​ផឹក​ទឹក​ត្នោត​ជូរ​ និង​មួយ​ក្រុម​ទៀត​បាន​ដើរ​ឆ្លងកាត់​ទីនោះ​ ហើយ​​មើល​មុខ ​ក្រុម​អ្នក​អង្គុយ​ផឹកស៊ី​ ស្រាប់​តែ​ក្រុម​អង្គុយ​ផឹកស៊ី​បាន​នាំ​គ្នា​ស្ទុះ​មក​វាយ​ជនរងគ្រោះ​ដែល​មើល​មុខ​នោះ​ តែ​ត្រូវ​ជន​រងគ្រោះ​រត់​មក​ប្រាប់​បងប្រុស​របស់​ខ្លួន​ឲ្យ​ជួយ។ ពួកគេ​បាន​វាយ​តប់​កាប់​គ្នា​ទៅវិញទៅមក​បណ្ដាល​ឲ្យ​ជនរងគ្រោះ​ពីរ​នាក់​បងប្អូន​រង​របួសធ្ងន់​ម្នាក់​ស្រាល​ម្នាក់​ ហើយ​ក្រុម​បង្ក​បាន​ឈាន​ទៅ​ធ្វើ​ឲ្យ​រថយន្ត​អគ្គិសនី​កម្ពុជា​មួយ​គ្រឿង​ដែល​ចត​នៅ​ក្បែរ​នោះ​រង​ការខូចខាត​ផង​ដែរ។ ភ្លាម​នោះ​នគរបាល​បាន​ចុះ​ទៅ​​ចាប់​​ក្រុម​ទាំង​ពីរ​ដល់​ចំណុច​កើតហេតុ​​យក​មក​សាកសួរ​រក​ខុស​ត្រូវ​ឃើញ​ថា ​ជន​ដៃដល់​ពិត​ប្រាកដ​មាន​គ្នា​៤​នាក់​ក្រៅ​ពី​នេះ​ឲ្យ​ត្រឡប់​ទៅវិញ។

ហេតុការណ៍​នេះ​កើត​ឡើង​កាល​ពី​ម៉ោង​៣​និង​២០​នាទី​រសៀល​ថ្ងៃ​ទី​២៥ ខែ​មករា ឆ្នាំ​២០១៥ ស្ថិតនៅ​ តាម​ផ្លូវ​ជាតិ​លេខ​៤ ត្រង់​ចំណុច​ភូមិ​អង្គ​កែវ​ សង្កាត់​ចោមចៅ ​ខណ្ឌ​ពោធិ៍សែនជ័យ។

ជនរងគ្រោះ​២​នាក់​បងប្អូន ​ទី​១-​ឈ្មោះ នាង រី​ម ភេទ​ប្រុស អាយុ​២០​ឆ្នាំ រង​របួស​រយះ​កដៃ និង​ខ្នង​ស្ទើរ​ដល់​ឆ្អឹង។ ចំណែក​ប្អូន​មានឈ្មោះ នាង រ៉ា​ល់ ភេទ​ប្រុស អាយុ​១៨​ឆ្នាំ​របួសស្រាល​។ ទាំង​២​នាក់​បងប្អូន​មានមុខ​របរ ​ជា​កម្មករ​រោងចក្រ ស្នាក់នៅ​ផ្ទះ​ជួល​ភូមិ​កើតហេតុ​ខាងលើ និង​មាន​ស្រុកកំណើត​នៅ​ភូមិ​ទន្លាប់ ឃុំ​សំបួរ ស្រុក​ទ្រាំង ខេត្ត​តាកែវ។

ចំណែក​ជន​សង្ស័យ​មាន​គ្នា​១០​នាក់​ក្នុង​នោះ​ចាប់​បាន​៨​នាក់​និង​ពីរ​នាក់​ទៀត​បាន​គេច​ខ្លួន​បាត់ ដែល​ទាំង​អស់​គ្នា​ស្នាក់​នៅ​ក្នុង​ដីឡូត៍​​ចត​រថយន្ត​ដឹក​ទំ​ទិញ កន្លែង​កើតហេតុ។ ជន​សង្ស័យ​៨​នាក់​នោះ ត្រូវ​យក​ទៅ​សាកសួរ​នៅ​ប៉ុស្តិ៍ ចោមចៅ​ក្នុង​នោះ​មាន​៤​នាក់​ជា​ជន​ដៃដល់។ ចំណែក​៤​នាក់​ទៀត​ពុំ​មាន​ពាក់ព័ន្ធ​ត្រូវ​សមត្ថកិច្ច​ឲ្យ​វិលត្រឡប់​ទៅ​វិញ។

តាម​ប្រភព​នៅ​កន្លែង​កើតហេតុ​បាន​ឲ្យ​ដឹង​ថា​ មុន​ពេល​កើតហេតុ ក្រុម​ជន​បង្ក​មាន​គ្នា​១០​នាក់ នាំគ្នា​ផឹក​ទឹកត្នោតជូរ ​ខាង​ក្រោយ​ភូមិ​កើតហេតុ លុះ​ពេល​ជនរងគ្រោះ​ឈ្មោះ​នាង រ៉ា​ល់ ដើរ​ឆ្លងកាត់​កន្លែង​ផឹកស៊ី​នោះ ត្រូវ​ក្រុម​បង្ក​ស្ទុះ​មក​វាយ​ក្បាល ហើយ​បាន​ប្រតាយប្រតប់​គ្នា។ ពេលនោះ​ជនរងគ្រោះ​ទប់ទល់​មិនបាន ក៏​រត់​ចេញមក​ផ្លូវជាតិ​លេខ​៤ ស្រែក​ប្រាប់​បងប្រុស​ឲ្យ​ជួយ តែ​ត្រូវ​ក្រុម​បង្ក​ដេញ​តាម​ក្រោយ​ទាន់ ហើយ​​ជនរងគ្រោះ​ជា​បង​មាន​កាន់​កាំបិតផ្គាក់ ​ស្រាប់តែ​ក្រុម​ខាង​គ្នា​ច្រើន​ប្រដាប់​ដោយ​គល់​ឈើ​ និង​ដំបង ​វាយបក​វិញ ​មិន​ឲ្យ​២​នាក់​បងប្អូន​តដៃ​រួច បណ្តាល​ឲ្យ​រង​របួស​ដៃ​ធ្ងន់​ម្នាក់។ ចំណែក​ម្នាក់ទៀត​រត់​រួច​គ្រាន់តែ​របួសស្រាល។

ប្រភព​បន្ដ​ថា​ ខណៈ​នោះ​ដែរ​មាន​រថយន្ដ​ក្រុម​អគ្គិសនី​កម្ពុជា​កំពុង​ត​បណ្ដាញ​ភ្លើង​នៅ​ទីនោះ​ពួកគេ​បាន​វាយ​គប់ និង​កាប់​ទៅលើ​រថយន្ដ​នោះ​បណ្ដាល​ឲ្យ​បែក​កញ្ចក់​មើល​ក្រោយ​រថយន្ដ​នោះ​ផងដែរ។

តាម ចម្លើយ​សារភាព​ពី​យុវជន​បង្ក​៤​នាក់​បាន​ឲ្យ​ដឹង​ថា ពួក​ខ្លួន​បាន​នាំគ្នា​ស៊ីផឹក​នៅ​កន្លែង​លក់​ទឹកត្នោតជូរ​មាន​គ្នា​១០​នាក់ ផឹក​អស់​៨​លីត្រ លុះ​ស្រវឹង​ខឹង​ជនរងគ្រោះ​មើល​មុខ​ ​​​​ក៏​ដើរមក​ក្បែរ​រួច​​​​​ក្រុម​​ខ្លួន​ពីរ​នាក់​បាន​ស្ទុះ​ទៅ​វាយ​និង​រត់​ដេញ​តាម​វាយ​គ្នា​ដល់​ផ្លូវជាតិ​លេខ​៤ ទើប​ឃើញ​ជនរងគ្រោះ​មាន​ពីរ​នាក់​បងប្អូន​ បន្ត​វាយ​តប់​គ្នា​នៅ​ទីនោះ​ទៀត។ ពេល​វាយ​គ្នា​រួច​បាន​នាំគ្នា​រត់​ចូល​ពួន​ក្នុង​ដី​ឡូត៍​​ចត​រថយន្ដ​ ​​មួយសន្ទុះ​ក្រោយមកទើប​​ឃើញ​នគរបាល​ទៅ​ចាប់ខ្លួន​ដល់​ទី​នោះ​ ហើយ​នាំមក​សាកសួរ​នៅ​ប៉ុស្ដិ៍​ចោមចៅ។ ចំពោះ​អ្នកពាក់ព័ន្ធ​ត្រូវ​បញ្ជូនទៅ​តុលាការ ​ហើយ​មនុស្ស​៤​នាក់​ដែល​មិន​ពាក់ព័ន្ធ​ត្រូវ​ឲ្យ​ត្រឡប់​ទៅផ្ទះ​វិញ៕

M26-01-15-g1