ភ្នំពេញ ៖ អំពើហិង្សាមួយបង្កឡើងដោយក្រុមក្មេងទំនើងប្រចាំតំបន់បណ្ដាលឲ្យបុរសម្នាក់រងរបួសបែកក្បាល និងកូនស្រីអាយុ២ឆ្នាំរបស់គាត់ម្នាក់ទៀតក៏រងរបួសដែរ ដែលទំនាស់នេះបានកើតឡើងកាលពីវេលាម៉ោង១៨និង១០នាទីថ្ងៃទី២៥ ខែធ្នូ ឆ្នាំ២០១២ នៅក្នុងភូមិអូរបែកក្អម ក្រុមទី៦ សង្កាត់ទឹកថ្លា ខណ្ឌសែនសុខ។
បុរសឈ្មោះ សួន អាំ អាយុ២៤ឆ្នាំ មានទីលំនៅផ្ទះជួលក្នុងភូមិកើតហេតុ បានប្ដឹងសមត្ថកិច្ចថា គាត់ជាជនរងគ្រោះក្នុងហេតុការណ៍នេះរួមទាំងកូនស្រីគាត់ម្នាក់ទៀតឈ្មោះ វីន ទើបតែមានអាយុ២ឆ្នាំ ក៏រងរបួសដែរ។
ពាក់ព័ន្ធទៅនឹងទំនាស់ខាងលើ ជនរងគ្រោះបាននិយាយប្រាប់ប៉ូលិសមូលដ្ឋានថា កាលពី៣ថ្ងៃមុននេះគាត់បានចូលរួមផឹកស៊ីជាមួយឈ្មោះ ដំ និងឈ្មោះ គោ រួមទាំងបក្ខពួករបស់គេម្នាក់ទៀតនៅក្នុងភោជនីយដ្ឋានមួយមិនចាំឈ្មោះ ហើយនៅពេលបញ្ចប់ការផឹកស៊ីនោះខ្លួនបានជួយចេញលុយថ្លៃផឹកស៊ីចំនួន២ម៉ឺនរៀល រួចក៏ត្រឡប់មកផ្ទះវិញដោយពុំមានរឿងអ្វីនោះទេ។
ប្រភពព័ត៌មានពីបុរសរូបនោះបានបន្តថា លុះនៅពេលម៉ោង៦ល្ងាចថ្ងៃកើតហេតុ នេះក៏ស្រាប់តែលេចមុខឈ្មោះ ដំ និង ឈ្មោះ គោ អាយុប្រហែល២០ឆ្នាំ មកផ្ទះរបស់គាត់សួរនាំគ្នាថា កាលពីថ្ងៃផឹកស៊ីថ្ងៃមុននោះ ម៉េចក៏ឯងចេញលុយតិចម្ល៉េះ។ ពេលនោះគាត់(ជនរងគ្រោះ) ក៏បានតបថា ខ្ញុំជួយចេញ២ម៉ឺនដែរតើ ... ពេលនោះឈ្មោះ ដំ និង ឈ្មោះ គោ បាននាំគ្នាព្រួតវាយដំមកលើជនរងគ្រោះហើយនៅពេលនោះជនរងគ្រោះពុំហ៊ានតបតវិញទេព្រោះខ្លាចពួកគេវាយកូនតូច ប៉ុន្តែពួកវាពុំអនុគ្រោះឡើយគឺវាយទាំងកូនស្រីតូចរបស់គាត់ម្នាក់អាយុ២ឆ្នាំឲ្យរងរបួសដែរ។
ក្រោយកើតហេតុជនល្មើសទាំង២នាក់បាននាំគ្នារត់គេចចេញពីផ្ទះបាត់ ដែលមានទីលំនៅក្នុងភូមិជាមួយគ្នា។
ជនរងគ្រោះបានមកប្ដឹងសមត្ថកិច្ចប៉ូលិសខណ្ឌសែនសុខឲ្យជួយអន្តរាគមន៍ និងរកយុត្តិធម៌ឲ្យពោលគឺតាមចាប់ខ្លួនជនដៃដល់មកផ្ដន្ទាទោសតាមច្បាប់៕
សឿន
