សៀមរាប ៖ ប្រជាពលរដ្ឋក្នុងឃុំចារឈូក ស្រុកអង្គរជុំ ខេត្តសៀមរាបចំនួន ៦៥៦នាក់ និង សិស្សានុសិស្ស វិទ្យាល័យ ហ៊ុន សែន អង្គរជុំ ចំនួន១០០នាក់ បានអញ្ជើញចូលរួមក្នុងវេទិកាសាធារណៈភូមិឃុំមានសុវត្ថិភាព និង ទទួលអត្តសញ្ញាណប័ណ្ណសញ្ជាតិខ្មែរគំរូថ្មី ក្រោមអធិបតីភាពលោក ម៉ៅ វុឌ្ឍី អភិបាលរង នៃ គណៈអភិបាលខេត្ត និង ជាប្រធានក្រុមការងារចុះជួយស្រុក ព្រមទាំងមានការចូលរួមពី សំណាក់អស់លោក លោកស្រីជាអាជ្ញាធរស្រុក ឃុំ អធិការនគរបាលស្រុក នគរបាលប៉ុស្តិ៍រដ្ឋបាល កងរាជអាវុធហត្ថស្រុក និង អង្គការដៃគូចូលរួម កាលពីព្រឹកថ្ងៃទី២៥ ខែ ធ្នូ ឆ្នាំ២០១២ នៅ ឃុំ ចារឈូក ស្រុកអង្គរជុំ ខេត្តសៀមរាប។
ក្នុងកិច្ចស្វាគមន៍របស់លោក រត្ន ជុំ អភិបាលនៃគណៈអភិបាលស្រុកអង្គរជុំ ក៏បានបញ្ជាក់ផងដែរ អំពីស្ថាន ភាពភូមិសាស្ត្រ សន្តិសុខ សេដ្ឋកិច្ច និង ការងារបង្កបង្កើនផល ជីវភាពរស់នៅរបស់ ប្រជាជនក្នុងស្រុក និង បានឲ្យ ដឹងផងដែរថា អំពីស្ថិតិប្រជាជនក្នុងស្រុក ចាប់ពីអាយុ១៨ ឡើងមាន ចំនួន៣៧.៤៣៨នាក់ ស្រី១៩.០០១នាក់។ ចំពោះការចុះធ្វើអត្តសញ្ញាណប័ណ្ណជូនប្រជាជនគ្រប់ អាយុ ក្នុងផែនការរបស់ខេត្ត មាន ១១.២៥៦នាក់ ហើយការជំរឿន ជាក់ស្តែងតាមឃុំ មានចំនួន សរុប ១២.២៤៩នាក់ នឹងធ្វើប័ណ្ណជូនបាន ៧.៩៤១នាក់។ លោកក៏បានបន្តទៀតថា កន្លងមកនៅ ស្រុកអង្គរជុំនេះ បានធ្វើការចែកអត្តសញ្ញាណប័ណ្ណគំរូថ្មី មានចំនួន២លើកមកហើយ ដែលមានចំនួន សរុប ៤១០ប័ណ្ណ ហើយនេះក៏ជាលើកទី៣ផងដែរ ដែលប្រជាជនចំនួន ៦៥៦នាក់បានមកទទួល អត្តសញ្ញាប័ណ្ណ គំរូថ្មីនេះ នៅក្នុងឃុំចារឈូក។
ក្នុងនោះដែរលោក លុក ផុស អភិបាលរងនៃគណៈអភិបាលស្រុកអង្គរជុំ ក៏បានឡើងធ្វើការ ផ្សព្វផ្សាយ ពី លក្ខណៈសម្បត្តិ៩យ៉ាង របស់គោលនយោបាយភូមិឃុំ មានសុវត្ថិភាព ព្រមទាំងបានធ្វើការបកស្រាយពីខ្លឹមសារ អត្ថន័យលក្ខណៈសម្បត្តិទាំង០៩យ៉ាង ជូនដល់អង្គវេទិកា ឲ្យកាន់តែបានយល់ច្បាស់ ពីកាតព្វកិច្ចរបស់ប្រជាពលរដ្ឋ ដែលត្រូវចូលរួមក្នុងសង្គម និង មូលដ្ឋានខ្លួន និង បាន លើកពីច្បាប់ទោសទណ្ឌ ដែលបានកំណត់ ចំពោះក្រុមជនដែល បានប្រព្រឹត្តបទល្មើសផ្សេងៗ ដែលមានចែងនៅក្នុងលក្ខណៈសម្បត្តិទាំង៩យ៉ាងរបស់គោល នយោបាយ ភូមិឃុំ មានសុវត្ថិភាពផងដែរ។
បានមានមតិសំណេះសំណាលជាមួយសិស្សានុសិស្ស និង ប្រជាពលរដ្ឋឃុំចារឈូក ក្នុងនាមលោកបណ្ឌិត ស៊ូ ភិរិន្ទ អភិបាលនៃគណៈអភិបាលខេត្ត លោក ម៉ៅ វុឌ្ឍី នៅក្នុងវេទិកាសាធារណៈភូមិឃុំមានសុវត្ថិភាព និង ប្រគល់អត្តសញ្ញាណប័ណ្ណខ្មែរគំរូថ្មីជូនបងប្អូនប្រជាពលរដ្ឋនាពេលនេះ គឺបានបញ្ជាក់ថា ដើម្បីធានាបាននូវសុវត្ថិភាព សន្តិសុខសណ្តាប់ធ្នាប់បានល្អនៅក្នុងមូលដ្ឋានខ្លួន គឺចាំបាច់ទាមទាញពីការចូលរួមរបស់បងប្អូន ជាមួយកម្លាំងសមត្ថកិច្ច ក្នុងមូលដ្ឋាន លើការអនុវត្តគោលនយោបាយភូមិឃុំមានសុវត្ថិភាព របស់រាជរដ្ឋាភិបាលកម្ពុជា ក្រោម កិច្ចដឹកនាំ ប្រកបដោយគតិបណ្ឌិតដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា។ លោក ម៉ៅ វុឌ្ឍី ក៏បានគូសបញ្ជាក់ថា អត្តសញ្ញាណប័ណ្ណ គឺមានអត្ថប្រយោជន៍ និង សារសំខាន់បំផុតសម្រាប់បងប្អូន ដើម្បី យកទៅបំរើការតាមការចាំបាច់ផ្សេងៗ ក្នុងការធ្វើលិខិតឆ្លងដែន ធ្វើការងារតាមក្រុមហ៊ុននានា ព្រមទាំងយកទៅប្រើ ប្រាស់នៅពេលបោះឆ្នោតជ្រើសរើសតំណាងរាស្ត្រខាងមុខ។ ម្យ៉ាងទៀតប្រជាពលរដ្ឋម្នាក់ៗ ដែលគ្រប់អាយុត្រូវធ្វើអត្តសញ្ញាណប័ណ្ណសញ្ជាតិខ្មែរគំរូថ្មីឲ្យបានគ្រប់ៗគ្នា ពីព្រោះថា អត្តសញ្ញាប័ណ្ណនេះ ជាលិខិត ស្នាមផ្លូវការរបស់បុគ្គល និមួយៗ ត្រូវតែមានដោយអត់ខានពុំបាន បន្ទាប់ពីសៀវភៅគ្រួសារ និង ប័ណ្ណស្នាក់នៅ។ លោក ម៉ៅ វុឌ្ឍី ក៏បានផ្តាំផ្ញើដល់ប្រជាពលរដ្ឋទាំង ៦៥៦នាក់ និង សិស្សានុសិស្សទាំងអស់ ដែលបានទទួលនូវ អត្តសញ្ញាប័ណ្ណសញ្ជាតិខ្មែរគំរូថ្មី នេះទៅ ត្រូវយកចិត្តទុកដាក់ ថែរក្សាឲ្យបានគង់វង្ស កុំឲ្យមានការបាត់បង់ ហើយបើមានការបាត់បង់ ដោយប្រកាណា មួយ ឬ ក៏មានឧបទ្ទវហេតុណាមួយ ត្រូវប្រញាប់មករាយការណ៍ជូន សមត្ថកិច្ចនគរបាលរដ្ឋបាលឃុំ និង មេភូមិរបស់ខ្លួន ដើម្បីធានាសុវត្ថិភាព នៅពេលមានហេតុការណ៍អាក្រក់អ្វីមួយកើតឡើង ពីពួកខិលខូចដែលបាន ដាក់បន្ទុកទៅបងប្អូន ជាម្ចាស់អត្តសញ្ញាណប័ណ្ណដែលបានបាត់បង់នោះ ព្រមទាំងសូមឲ្យបងប្អូនប្រជាពលរដ្ឋទាំងអស់ ត្រូវចូលរួមក្នុងការអនុវត្ត គោរពឲ្យបាននូវលក្ខណៈសម្បត្តិ ៩យ៉ាង របស់គោលនយោបាយភូមិឃុំ មានសុវត្ថិភាព ដើម្បីធានាបានសន្តិសុខ សុវត្ថិភាព និង ការរស់នៅរបស់ប្រជាជនក្នុងមូលដ្ឋានខ្លួន ប្រកបដោយសុខដុមរមនាទៅ ថ្ងៃអនាគត។
បន្ទាប់មកគណៈអធិបតី ក៏បានធ្វើការប្រគល់នូវអត្តសញ្ញាណប័ណ្ណសញ្ជាតិខ្មែរគំរូថ្មីជូនបងប្អូនប្រជាពលរដ្ឋនៅក្នុង ឃុំចារឈូក ស្រុកអង្គរជុំ ខេត្តសៀមរាប ទាំង ៦៥៦នាក់ ជានិមិត្តរូបផងដែរ៕
គឿនវេត
