ភ្នំពេញ ៖ យុវជន២នាក់ត្រូវបានក្រុមក្មេងទំនើងមួយក្រុមប្រមាណជិត១០នាក់បើកម៉ូតូដេញកាប់នឹងកាំបិតសាំម៉ូរ៉ៃបណ្ដាលឲ្យរងរបួសធ្ងន់ធ្ងរដេកពេទ្យដោយគ្រាន់តែសម្លឹងមើលមុខក្រុមក្មេងទំនើងពេលចេញពីដើរលេងកោះពេជ្រវិញ។
ហេតុការណ៍ក្រុមក្មេងទំនើងដេញកាប់ចាក់គ្នានោះបានកើតឡើងកាលពីវេលាម៉ោង១៩និង៤០នាទីយប់ថ្ងៃទី១៦ខែ កញ្ញាឆ្នាំ ២០១២ នៅចំណុចខាងមុខហាងឡាក់គីម៉ាស្សាផ្លូវលេខ២១៤ក្នុងសង្កាត់បឹងរាំងខណ្ឌដូនពេញ។
សមត្ថកិច្ចបានឲ្យដឹងថាក្រុមជនរងគ្រោះ២នាក់ដែលរងរបួសនោះទី១. ឈ្មោះជា ឌីណា ភេទប្រុសអាយុ១៩ឆ្នាំស្នាក់នៅសង្កាត់បឹងទំពន់ខណ្ឌមានជ័យត្រូវរបួសខ្នង១កាំបិតនិងកែងដៃឆ្វេង១កាំបិតចេញឆ្អឹង(ជាអ្នកបើកម៉ូតូ)ទី២.ឈ្មោះគ្រឿន ភារម្យភេទប្រុសអាយុ២២ឆ្នាំស្នាក់នៅសង្កាត់និរោធខណ្ឌមានជ័យត្រូវមួយកាំបិតចំកំភួនជើងខាងស្តាំ(អ្នករួមដំណើរជាមួយ)ពួកគេទាំង២នាក់ជិះម៉ូតូម៉ាកC125ពណ៌ខ្មៅពាក់ស្លាកលេខភ្នំពេញ1BJ -53 38 ។
ចំណែកក្រុមជនល្មើសមានគ្នាប្រមាណជិត១០នាក់ជិះម៉ូតូសេរីទំនើបៗជាច្រើនគ្រឿងដែលប្រដាប់ដោយកាំបិតសាំម៉ូរ៉ៃស្ទើរគ្រប់ដៃ ហើយក្រោយពេលដេញកាប់ក្រុមជនរងគ្រោះបណ្តាលឲ្យរងរបួសធ្ងន់ទាំង២នាក់ហើយគេចខ្លួនបាត់ដោយសុវត្ថិភាព។
ក្រុមជនរងគ្រោះបានបំភ្លឺប្រាប់សមត្ថកិច្ចមូលដ្ឋានឲ្យដឹងថានៅមុនពេលកើតហេតុពួកគេបាននាំគ្នាជិះម៉ូតូទៅលេងនៅកោះពេជ្ររួចហើយក៏នាំគ្នាវិលត្រឡប់មកវិញក៏បានជួបនិងក្រុមជនល្មើសមួយក្រុមប្រមាណជិត១០នាក់ជិះម៉ូតូជាច្រើនគ្រឿងដោយគ្រាន់តែពួកគេបានមើលមុខក្រុមជនទាំងនោះក៏ពួកគេបានដេញកាប់មកលើពួកខ្លួនបណ្តាលឲ្យរងរបួសដូច្នេះតែម្តង។
បើតាមប្រភពព័ត៌មានពីប្រជាពលរដ្ឋជិតខាងដែលឃើញហេតុការណ៍ក្រុមក្មេងទំនើងដេញកាប់បណ្តាលឲ្យរងរបួសធ្ងន់២នាក់បាននិយាយគ្រប់ៗគ្នាថានេះមិនមែនជារឿងគ្រាន់តែមើលមុខគ្នាហើយឈានដល់ការដែញកាប់គ្នាដូច្នេះនោះទេ ដែលបញ្ហានេះប្រហែលជាពួកគេមានគំនុំទំនាស់គ្នាហើយកាលពីពេលកន្លងមកទើបឈានដល់ការតាមសងសឹកគ្នាដូច្នេះតែម្តង។
សមត្ថកិច្ចបានបញ្ជាក់ថាចំពោះរឿងហេតុនេះសមត្ថកិច្ចកំពុងស្រាវជ្រាវតាមចាប់ក្រុមជនដៃដល់ទាំងនោះមកផ្តន្ទាទោសតាមផ្លូវច្បាប់៕
រស្មី
