ភ្នំពេញ ៖ កម្ពុជាបានស្នើសុំទិញថាមពលអគ្គីសនីចំនួន១២០មេហ្គាវ៉ាត់បន្ថែមទៀតពីប្រទេសថៃសម្រាប់បង្គ្រប់តម្រូវការប្រើប្រាស់របស់ប្រជាពលរដ្ឋកម្ពុជាតាមបណ្ដាខេត្ត ដែលនៅជាប់ព្រំដែននារដូវប្រាំងខាងមុខនេះ។
នៅក្នុងជំនួបសវនាការជាមួយលោក Arak Chonlanon រដ្ឋមន្ត្រីថាមពលថៃនៅសណ្ឋាគារកាំបូឌីយ៉ាណា ក្នុងឱកាសដែលលោកអញ្ជើញមកចូលរួមកិច្ចប្រជុំថ្នាក់រដ្ឋមន្ត្រីថាមពលអាស៊ានលើកទី៣០នៅកម្ពុជា លោកស៊ុយ សែម រដ្ឋមន្ត្រីក្រសួង ឧស្សាហកម្មកម្ពុជា បានបញ្ជាក់ថា ទាក់ទងនឹងគម្រោងស្នើសុំទិញថាមពលអគ្គិសនីពីប្រទេសថៃនេះ លោក Arak Chonlanon រដ្ឋមន្ត្រីថាមពលថៃ បានឯកភាពលើគម្រោងស្នើសុំតភ្ជាប់បណ្តាញថាមពលអគ្គិសនីចំនួន ១២០មេហ្គាវ៉ាត់ពីកម្ពុជាហើយ ដើម្បីបំពេញបន្ថែមពីលើថាមពលអគ្គិសនីដែលកម្ពុជាទិញពីថៃចំនួន ៨០មេហ្គាវ៉ាត់នាពេលកន្លងមក។ លោករដ្ឋមន្ត្រីបានបន្ថែមថា រដ្ឋមន្ត្រីថាមពលថៃក៏បានឯកភាព និងគាំទ្រផងដែរដល់ការវិនិយោគរោងចក្រថាមពលអគ្គិសនីដើរដោយធ្យូងថ្មនៅឯខេត្តកោះកុងជាប់ព្រំដែនថៃ។
ពាក់ព័ន្ធនឹងការវិនិយោគលើបណ្ដាញអគ្គិសនីដើរដោយធ្យូងថ្មនៅខេត្តកោះកុងនេះ លោក រដ្ឋមន្ត្រីក្រសួងឧស្សាហកម្ម ស៊ុយ សែម បានលើកឡើងថា រាជរដ្ឋាភិបាលកម្ពុជាបានពឹងផ្អែកលើដៃគូវិនិយោគឯកជន ដើម្បីពង្រីកបណ្តាញភ្លើងនៅក្នុងប្រទេស ហើយក្រសួងឧស្សាហកម្ម រ៉ែ និងថាមពលកំពុងសិក្សាលើគម្រោងរោងចក្រដើរដោយថាមពលធ្យូងថ្មនៅខេត្តកោះកុង ដែលមានកំលាំង ១៨០០ មេហ្គាវ៉ាត់ក្នុងតម្លៃប្រមាណ ៣០០០លានដុល្លារអាមេរិក។
គួរបញ្ជាក់ដែរថា នៅក្នុងជំនួបសវនាការជាមួយអនុប្រធានរដ្ឋបាលថាមពលចិន លោក Wu Yin នាសណ្ឋាគារកាំបូឌីយ៉ាណា ព្រឹកថ្ងៃទី១៣ ខែកញ្ញា ឆ្នាំ២០១២នោះដែរ លោក ស៊ុយ សែម រដ្ឋមន្ត្រីក្រសួងឧស្សាហកម្មរ៉ែ និងថាមពល ក៏បានមានប្រសាសន៍អះអាងប្រាប់ក្រុមអ្នកសារព័ត៌មានដែរថា ក្នុងគម្រោងស្នើឲ្យប្រទេសចិនជួយផ្តល់ប្រាក់ឥណទានចំនួន ៥០ លានដុល្លារអាមេរិកក្នុងមួយឆ្នាំទៅលើគម្រោងផែនការមេរបស់ខ្លួនក្នុងឆ្នាំ២០២០ ដើម្បីបញ្ជូនខ្សែអគ្គិសនីឲ្យបានទៅដល់គ្រប់ភូមិរបស់ប្រជាពលរដ្ឋនៅទូទាំងប្រទេសនៅកម្ពុជា ភាគីចិនបានគាំទ្រដោយចិនយល់ថាគម្រោងនេះវាពិតជាមានសារៈសំខាន់ក្នុងការជួយដល់ប្រជាពលរដ្ឋកម្ពុជា។
នៅក្នុងជំនួបដោយឡែកជាមួយនឹងរដ្ឋមន្ត្រីថាមពលជប៉ុន កាលពីយប់ថ្ងៃទី១២ ខែកញ្ញា ឆ្នាំ២០១២ នៅសណ្ឋាគារកាំបូឌីយ៉ាណាមកនោះដែរ លោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល បានមានប្រសាសន៍អះអាងប្រាប់ក្រុមអ្នកសារព័ត៌មានដែរថា បើទោះជាមិនទាន់មានតួលេខបញ្ជាក់អ្វីនៅឡើយ ភាគីជប៉ុនបានគាំទ្រដល់ការស្នើសុំទុនរបស់កម្ពុជា សម្រាប់កិច្ចអភិវឌ្ឍន៍វិស័យអគ្គិសនីភាវូបនីយកម្មជនបទ ហើយកន្លងមករដ្ឋាភិបាលជប៉ុនក៏បានផ្តល់ទុនឲ្យកម្ពុជាចំនួន ៣២លានដុល្លារអាមេរិករួចមកហើយដែរ ដែលសព្វថ្ងៃទុនទាំងនេះភាគីកម្ពុជាកំពុងប្រើប្រាស់សម្រាប់គម្រោងអគ្គិសនីជនបទនៅកម្ពុជា។
តាមប្រសាសន៍អះអាងរបស់លោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពលក៏បានបញ្ជាក់ជូនដល់ក្រុមអ្នកសារព័ត៌មានដែរថា នៅឆ្នាំ២០៣០ប្រជាជនកម្ពុជាប្រមាណ ៧០ភាគរយនឹងមានភ្លើងអគ្គិសនីប្រើប្រាស់ ៕
សុងយោ
