កំពង់ស្ពឺ ៖ សកម្មភាពរថយន្តដឹកថ្មធំៗ ចេញពីការដ្ឋានរណ្តៅថ្ម របស់ក្រុមហ៊ុន ណឹម ម៉េង កំពុងធ្វើឲ្យប្រជាពលរដ្ឋ មានលំនៅដ្ឋាន អមសងខាងផ្លូវ មានការខឹងសម្បារ យ៉ាងខ្លាំងព្រោះតែ ដីហុយទ្រលោម បង្កឲ្យមានការរំខាន និង ប៉ះពាល់ដល់សុខភាពរស់នៅប្រចាំថ្ងៃ។
ប្រជាពលរដ្ឋរស់នៅក្នុងភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺបាននិយាយប្រាប់ឲ្យដឹងថា សព្វថ្ងៃពួកគាត់បានរងផលប៉ះពាល់បញ្ហាផ្លូវដង្ហើមស្ទើរគ្រប់គ្នាដោយសារតែដីហុយទ្រលោមពីសំណាក់ ក្រុមរថយន្តយីឌុប ដឹកជញ្ជូនថ្មភ្នំបើកលឿនៗជា រៀងរាល់យប់ថ្ងៃ ដោយមិនបានស្រោចទឹកគ្រប់គ្រាន់នោះឡើយ ។ អ្នកភូមិបានបន្តទៀតថាសកម្មភាពរថយន្តដឹកថ្មនេះ ចាប់ផ្តើមរយៈពេលប្រមាណ ជិតមួយឆ្នាំកន្លងមកហើយហើយពួកគាត់ជួបបញ្ហាសុខភាពជាញឹកញាប់ ជាពិសេសក្មេងតូចតែម្តង ។
អ្នកភូមិបានបន្តទៀតថា ជារៀងរាល់ថ្ងៃឃើញមានរថយន្ត ដឹកទឹកស្រោចផ្លូវ ដែរប៉ុន្តែវាមិនទៀងទាត់នោះទេ គឺក្នុងមមួយថ្ងៃស្រោចត្រឹម តែ២ដងប៉ុណ្ណោះ ហើយការស្រោចទឹកមិនសូវជោកជាំនោះទេ ។ ពួកគាត់បន្តថា រថយន្តដឹកថ្មទាំងនោះបើកលឿនៗទៀតផង ព្រោះតៃកុងភាគច្រើនស៊ីឈ្នួលជើងពីថៅកែរថយន្ត ។
សូមបបញ្ជាក់ថារថយន្តដឹកថ្មដែលរងការរិៈគន់ពីសំណាក់ប្រជាពលរដ្ឋ នោះពួកគេដឹកចេញ ពីការដ្ឋានថ្មរបស់ក្រុមហ៊ុន ណឹម ម៉េង ម្តុំភ្នំម្រះព្រៅ ក្នុងភូមិព្រៃស្យា ឃុំសែនដី ស្រុកសំរោងទង ។ ដោយសារភាពហុយទ្រាំលេងបានបែបនេះ ប្រជាពលរដ្ឋគ្រោងរៀបចំបិតផ្លូវ តវាសុំឲ្យថៅកែក្រុមហ៊ុនថ្ម ជួយស្រោចទឹកឱ្យបានគ្រប់គ្រាន់និងកុំបើកលឿនពេកនៅក្នុងភូមិ ដើម្បីកាត់បន្ថយការហុយ និង ម្យ៉ាងទៀតការពារគ្រោះថ្នាក់ចំពោះក្មេងៗដែលរត់លេងតាមផ្លូវ ។
មន្ត្រីសុខាភិបាលម្នាក់បាននិយាយថា ធូលីដីដែលហុយដោយសាររថយន្តបើក វាអាចបង្កឲ្យប៉ះពាល់ បញ្ហាផ្លុវដង្ហើមរបស់មនុស្ស ជាពិសេសកុមារតូចៗតែម្តង។ប្រភពបន្ត ថាប្រសិនបើមានករណីធូលីដីហុយ រាល់ថ្ងៃដូចប្រជាពលរដ្ឋក្នុង ឃុំសែនដីអះអាងមែនវាពិតជាធ្វើឲ្យប៉ះពាល់សុខមាលភាពប្រាកដណាស់ ហើយអាជ្ញាធរគួរតែទប់ស្កាត់បញ្ហានេះផង ។
កម្ពុជាថ្មីបានព្យាយាមទូរស័ព្ទដើម្បីទំនាក់ទំនងសុំការបំភ្លឺពី តំណាងក្រុមហ៊ុនថ្ម ណឹម ម៉េង ជុំវិញបញ្ហានេះមិនបានឡើយ ព្រោះប្រព័ន្ធទូរស័ព្ទមិនអាចទាក់ទងបាន ៕ រដ្ឋឋានៈ
