កំពត ៖ នៅថ្ងៃទី២៩ ខែមេសាឆ្នាំ២០១២នៅវេលាម៉ោង២និង៣០នាទីរសៀលនៅសាលាខេត្តកំពតបានទទួលពលករចំណាកស្រុកខ្មែរ៣នាក់ ដែលបានរួចខ្លួនពីសេចក្ដីស្លាប់ ហើយបានប្រជានេសាទវៀតណាមប្រទះឃើញនៅក្នុងលំហសមុទ្រព្រំប្រទល់ប្រទេសវៀតណាមនិងប្រទេសម៉ាឡេស៊ីយកមកប្រគល់ឲ្យអាជ្ញាធរខេត្ត។
លោកទូច ពលៈ អនុប្រធាននាយកដ្ឋាននគរបាលព្រំដែនទឹកបានមានប្រសាសន៍ឲ្យដឹងថាដោយមានកិច្ចសហប្រតិបត្តិការសាមគ្គីភាព មិត្តភាពជាប្រពៃណីល្អរវាងរាជរដ្ឋាភិបាលកម្ពុជានិងរាជរដ្ឋាភិបាលនៃសាធារណៈរដ្ឋសង្គមនិយមវៀតណាមនិងកិច្ចព្រមព្រៀងរវាងក្រសួងមហាផ្ទៃ អគ្គស្នងការនគរបាលជាតិនិងមានការណែនាំពីលោកខូយ ឃុនហ៊ួរ អភិបាលនៃគណៈអភិបាលខេត្តកំពតយើងធ្វើការទំនាក់ទំនងល្អជាមួយខេត្តគៀងយ៉ាង ទើបកម្លាំងរបស់លោកទទួលបានពលករចំណាកស្រុក៣នាក់ដែលរសាត់អណ្តែតនៅលើផ្ទៃទឹកអស់ជាច្រើនថ្ងៃ។
លោកបានដឹកនាំកំលាំងប៉ូលិសការពារព្រំដែនទឹកមានខេត្តកំពត និងកែប និងគណៈប្រតិភូមួយចំនួនទៅទទួលពលករចំណាកស្រុកខ្មែរបីនាក់ដែលរួចផុតពីសេចក្ដីស្លាប់នោះត្រូវបានប្រជានេសាទវៀតណាមប្រទះឃើញក្នុងលំហសមុទ្រព្រំដែនវៀតណាមនិងប្រទេសម៉ាឡេស៊ីនៅខេត្តកាម៉ៅ ប្រទេសវៀតណាម ដោយទទួលយកមកដល់ប្រទេសកម្ពុជាវិញ។ លោកទូច ពលៈ បានឲ្យដឹងទៀតថាពលករចំណាកស្រុកចំនួន៣នាក់នេះត្រូវបានប្រជានេសាទវៀតណាមប្រទះឃើញពីរនាក់នៅក្នុងលំហសមុទ្រព្រំប្រទល់ប្រទេសវៀតណាមនិងប្រទេសម៉ាឡេស៊ី និងម្នាក់ទៀតប្រទះឃើញនៅលើឆ្នេរ ដែលពួកគេទៅធ្វើជាកម្មករទូកនេសាទនៅប្រទេសថៃ។
ជនចំណាកស្រុកទាំងនេះមានទី១ឈ្មោះយ័ន ចូច ភេទប្រុសអាយុ៣៣ឆ្នាំ ទី២ឈ្មោះលី រឿន ភេទប្រុសអាយុ៤៧ឆ្នាំអ្នកទាំងពីររស់នៅជាមួយគ្នាក្នុងភូមិភ្នំដំរីឃុំដំណាក់កន្ទួតខាងជើង ស្រុកកំពង់ត្រាច ខេត្តកំពតទាំង២នាក់នេះត្រូវជាពូនិងក្មួយ។ចំណែកម្នាក់ទៀតមានឈ្មោះសំ ភឿង ភេទប្រុស អាយុ៣៤ឆ្នាំ មានទីលំនៅភូមិពោលខាវ ឃុំត្បូងក្រពើ ស្រុកព្រះបាទជាន់ជុំ ខេត្តកំពង់ធំ ម្នាក់នេះដើរក្បែរកោះតែម្នាក់ឯងដោយមានសតិមិនសូវល្អដោយសារតែត្រូវថ្នាំរវើរវាយនៅឡើយ។
លោកទូច ពលៈ បានបញ្ជាក់ឲ្យដឹងទៀតថាក្រោយពីសមត្ថកិច្ចបានទទួលព័ត៌មានពីទីបញ្ជាការកងទ័ពការពារព្រំដែនខេត្តកាម៉ាវប្រទេសវៀតណាមក៏បានដឹកនាំកម្លាំងសួរនាំជនរងគ្រោះទើបដឹងថាពួកគេទៅធ្វើកម្មករសំណង់នៅក្រុងថេប ប្រទេសថៃ អស់រយៈពេលជាង៣ខែ។ ក្រោយមកមានគេបបួលទៅធ្វើកម្មករទូកនេសាទថៃ ដោយប្រាប់ថា បានលុយកាសច្រើនជាងធ្វើកម្មករសំណង់។
កម្មករចំនួនពីរនាក់ក៏ទៅធ្វើការលើទូកនេសាទថៃចំនួន៥ថ្ងៃដោយសារពុលរលកខ្លាំងពេកមិនអាចធ្វើការបានទើបថៅកែទូកក៏មានបំណងសម្លាប់ចោល។ ប៉ុន្តែចៃដន្យដោយពួកគេចេះភាសាថៃខ្លះៗ ក៏សំរេចចិត្តលោតចុះទឹកមិនឲ្យថៅកែដឹងដោយតោងប៊ីដុងម្នាក់មួយលបលោតចូលទឹកកណ្តាលសមុទ្រល្វឹងល្វើយ។ប៉ុន្តែសំណាងល្អក្រោយមកអស់រយៈពេលពីរម៉ោងជាងគេក៏បានឃើញទូកនេសាទពីរគ្រឿងធ្វើដំណើរជិតនោះ ក៏បានដោះអាវគ្រវីទើបមានអ្នកជួយសង្គ្រោះបានទាន់ពេល។
គួរបញ្ជាក់ផងដែរថាកម្មករដែលបានរួចពីសេចក្ដីស្លាប់នេះមានការយកចិត្តទុកដាក់ពីសំណាក់លោកខូយ ឃុនហ៊ួរ អភិបាលខេត្តកំពតផ្ដល់ជម្រកនិងថវិកាម្នាក់២០ម៉ឺនរៀលសំរាប់ធ្វើដំណើរទៅផ្ទះវិញ។ ឯម្នាក់ទៀតត្រូវបានលោកទូច ពលៈ ឲ្យស្នាក់នៅវរការពារព្រំដែន២៤សិនដោយព្យាបាលឲ្យបានជាទើបស្វែងរកក្រុមគ្រួសារជាក្រោយ៕
ស៊ុនលី
