ភ្នំពេញ ៖ បុរស២នាក់ និងនារី២នាក់ ដែលគេអះអាងថា ជាអ្នកបម្រើក្នុងផ្ទះត្រូវបានសមត្ថកិច្ចប៉ូលិសមន្ទីរប្រឆាំងគ្រឿងញៀនក្រសួងមហាផ្ទៃធ្វើការឃាត់ខ្លួនពាក់ព័ន្ធនឹងការជួញដូរថ្នាំញៀនជាច្រើនគ្រាប់ក្រោយពីមានការស្រាវជ្រាវរហូតកំណត់មុខសញ្ញា។
ប៉ូលិសក្រសួងមហាផ្ទៃសហការជាមួយស្ថាប័នតុលាការ និង ប៉ូលិសមូលដ្ឋានផង បានធ្វើការឃាត់ខ្លួនជនសង្ស័យទាំងអស់៤នាក់ កាលពីព្រឹកថ្ងៃទី២១ ខែ មេសា ឆ្នាំ ២០១២ វេលាម៉ោង១០ និង ៣០នាទី នៅចំណុចផ្ទះជួលជាន់ទី២ លេខ៤៣ ផ្លូវ២១៥ ក្រុម៤ ភូមិ១៣ សង្កាត់ទឹកល្អក់៣ ខណ្ឌទួលគោក។
ជនសង្ស័យទាំង៤នាក់ មាន២នាក់ ត្រូវបានគេឃាត់ខ្លួន១. ឈ្មោះ ហេង សំណាង ភេទប្រុសអាយុជាង៣០ឆ្នាំ មុខរបរ មិនពិតប្រាកដ ស្នាក់នៅក្នុងផ្ទះជួលខាងលើ និងជាអ្នកចែកចាយថ្នាំញៀន។ ទី២. ឈ្មោះ ញឹម សុវណ្ណារិទ្ធ ភេទប្រុស អាយុ ២៩ឆ្នាំ មុខរបរ រត់ម៉ូតូឌុប ស្នាក់នៅក្នុងផ្ទះកើតហេតុខាងលើ។ ចំណែកនារី២នាក់ត្រូវបានគេដឹងថា ជាអ្នកបម្រើក្នុងផ្ទះខាងលើ ក៏ត្រូវបានឃាត់ខ្លួនដែរ។ ក្នុងការឃាត់ខ្លួននោះ សមត្ថកិច្ចប៉ូលិសធ្វើការដកហូតបានវត្ថុតាង មួយចំនួន ក្នុងនោះរួមមាន ថ្នាំញៀន ប្រភេទ យ៉ាម៉ា ចំនួន៣០គ្រាប់ ម្សៅសជិត១ខាំ។
ប្រភពព័ត៌មានឲ្យដឹងថា មុនពេលកើតហេតុ ក្រោយពីមានការស្រាវជ្រាវ ដឹងពីមុខសញ្ញាទាំងនេះហើយ កម្លាំងសមត្ថកិច្ចរបស់មន្ទីរប្រឆាំងគ្រឿងញៀនក្រសួងមហាផ្ទៃ ក៏បានសហការជាមួយស្ថាប័នតុលាការរួមនិង ប៉ូលិសមូលដ្ឋាន ចុះធ្វើការឆែកឆេរ លំនៅដ្ឋានខាងលើតែម្ដង។ ការឆែកឆេរនោះ ប៉ូលិសបានរកឃើញថ្នាំញៀនប្រភេទយ៉ាម៉ា ចំនួន៣០គ្រាប់និងម្សៅប្រមាណជិតមួយខាំ ទើបសម្រេចឃាត់ខ្លួន ជនសង្ស័យទាំង៤នាក់ បញ្ជូនទៅកាន់មន្ទីរប្រឆាំងគ្រឿងញៀនក្រសួងមហាផ្ទៃដើម្បីចាត់ការទៅតាមច្បាប់៕
ស្រីរ័ត្ន
