ភ្នំពេញ ៖ លោកស្រី ទូច សារ៉ុម អភិបាលរងរាជធានីភ្នំពេញក្នុងពិធីសំណេះសំណាល ទិវា៨មីនា ខួបលើកទី១០១ ក្រោមប្រធានបទ«អ្នកម្ដាយដ៏ឆ្នើមរបស់ខ្ញុំ»កាលពីថ្ងៃទី២ ខែ មីនា ឆ្នាំ២០១២នៅមន្ទីរសាធារណការនិងដឹកជញ្ជូនរាជធានីភ្នំពេញ បានមានប្រសាសន៍លើកឡើងថា អ្នកម្ដាយមានតួនាទីសំខាន់ណាស់ក្នុងការចូលរួមអនុវត្តន៍គោលនយោបាយភូមិសង្កាត់មានសុវត្ថិភាព។
លោកស្រីទូចសារ៉ុម បន្តថាស្ត្រីបានចូលរួមលុបបំបាត់មិនឲ្យមាន ក្មេងទំនើង គ្រឿងញៀន អំពើហិង្សាក្នុងគ្រួសារ ការជួញដូរកុមារ។ ក្មេងទំនើងមិនមែនមានតែបុរសនោះទេ ក្មេងទំនើងជាស្ត្រីក៏មានដែរ ដែលត្រូវឲ្យស្ត្រីជាម្ដាយជាអ្នកទប់ស្កាត់។
លោកស្រី ទូច សារ៉ុម បន្ថែមថា ការងារដែលយើងទទួលបានជោគជ័យនោះគឺមាន៤ចំណុចសំខាន់ក្នុងនោះរួមមាន យើងមានថ្នាក់ដឹកនាំរបស់យើងល្អ មានមិត្តរួមការងារយើងល្អ មានក្រុមការងាររបស់យើងល្អ ហើយចុងក្រោយគឺកត្តាខ្លួនយើងជាពិសេស។ យើងធ្វើជាមនុស្សត្រូវតែមានមហិច្ឆតាទើបការងាររបស់យើងទទួលបានជោគជ័យ តែមហិច្ឆតានោះធ្វើឡើងត្រឹមត្រូវ និង មានគុណធម៌។ យើងជាស្ត្រីត្រូវបន្តការងារល្អរបស់យើងបន្តទៀត ពិសេសលើការអប់រំ ទូន្មានកូនចៅឲ្យក្លាយជាក្មេងល្អ មនុស្សល្អ ជាទំពាំងស្នងឫស្សី៕
ស្រីរ័ត្ន
