ភ្នំពេញ៖ អាជ្ញាធរកម្ពុជា និងមន្ត្រីធនាគារអភិវឌ្ឍន៍អាស៊ី(ADB) កាលពីព្រឹកថ្ងៃទី២២ខែកុម្ភៈ ឆ្នាំ២០១២ បានចុះទៅពិនិត្យស្ថានភាពផ្លូវ មួយចំនួនដើម្បីស្តារឡើងវិញ ក្រោយពីហេដ្ឋារចនាសម្ព័ន្ធទាំងនោះ ត្រូវរងការបំផ្លិចបំផ្លាញដោយគ្រោះទឹកជំនន់កាលពីឆ្នាំ២០១១ កន្លងទៅ។
ប្រតិភូដែលដឹកនាំដោយឯកឧត្តមទេសរដ្ឋមន្ត្រីញឹម វណ្ណដា អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ, លោកStephen P.Grof អនុប្រធាន ADB ប្រចាំកម្ពុជា និងអន្តរក្រសួង ដែលមានក្រសួងសេដ្ឋកិច្ច ហិរញ្ញវត្ថុ ក្រសួងអភិវឌ្ឍន៍ជនបទ និងក្រសួងសាធារណការ បានចុះទៅពិនិត្យស្ថានភាពផ្លូវប្រវែង៣៣គីឡូម៉ែត្រពីឃុំមានជ័យ ស្រុកខ្សាច់កណ្តាល ខេត្តកណ្តាល ដល់ព្រំប្រទល់ស្រុកកោះសុទិន្ទ ខេត្តកំពង់ចាម, ពិនិត្យមើលផ្លូវជាតិលេខ១១ពីអ្នកលឿង ដល់ថ្នល់ទទឹង , ផ្លូវក្រវ៉ាត់ក្រុង ក្នុងខេត្តព្រៃវែង និងប្រឡាយប្រវែង១០គីឡូម៉ែត្រ។
ឯកឧត្តមទេសរដ្ឋមន្រ្តីញឹម វណ្ណដាបានមានប្រសាសន៍ថា ការចុះទៅពិនិត្យនេះ គឺដើម្បីមើលអោយឃើញជាក់ស្តែងពីទំហំនៃការខូចខាតហេដ្ឋារចនា សម្ព័ន្ធផ្លូវថ្នល់ទាំងនោះ ដើម្បីស្តារឡើងវិញអោយបានឆាប់រហ័ស ធានាបានគុណភាពស្របតាមលក្ខណៈបច្ចេកទេស ក្រោយពេលរដូវវស្សាឈានចូលមកដល់នាពេលឆាប់ៗខាងមុខនេះ។
គួរបញ្ជាក់ថា កាលពីថ្ងៃទី២១ខែកុម្ភៈ ឆ្នាំ២០១២ ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀងហិរញ្ញប្បទានមួយ សម្រាប់គម្រោងកែលំអផ្លូវខេត្តមួយចំនួន ដែលរងគ្រោះដោយទឹកជំនន់ជាមួយ ADB មានទឹកប្រាក់ចំនួន៦៩លានដុល្លារសហរដ្ឋអាមេរិក ក្នុងនោះមានហិរញ្ញប្បទានរបស់ADB ចំនួន៥២លានដុល្លារ ហិរញ្ញប្បទានពីកម្មវិធីយុទ្ធសាស្រ្តសម្រាប់ភាពធននិងអាកាសធាតុ ចំនួន១៩លានដុល្លារ និងហិរញ្ញប្បទានឥតសំណងគ្រប់គ្រងដោយADB ចំនួន៧លានដុល្លារ ព្រមទាំងថវិកាបដិភាគរបស់រាជរដ្ឋាភិបាលចំនួន១០,៥លានដុល្លារ សរុបទាំងអស់មានចំនួន៧៩,៥លានដុល្លា៕
